7

Fesoasoani i Tamaiti e Faataitai le Faitau, Tusitusi, ma le Matematika

Fesili e Talanoa i ai

1. Vaavaai i ata nei. O a mea ua e vaaia?

2. O le a sou manatu i lagona o tamaiti e uiga i le aoaoina?

3. E faapefea ona e fesoasoani i lau fanau e aoao i aso uma?

Aoao

E tele mea e aoaoina e tamaiti i le aoga. E mafai ona latou faataitai i le fale e fesoasoani ia i latou ia manatua mea sa latou aoaoina. O nisi nei o auala e fesoasoani ai i lau fanau e faataitai le faitau, tusitusi, ma le matematika i aso uma:

Faitau

O le faitau o se auala taua tele lea e aoao ai tamaiti. E mafai e matua ona fesoasoani ia latou fanau ia malamalama pe faapefea e le faitau ona fesoasoani ia i latou i le aoga ma i o latou olaga. E mafai e tamaiti ona aoao ia sili atu le faitau e ala i le faitau leotele ia i latou lava pe leotele i isi i aso uma. E mafai ona e fai atu i lau fanau e faitau atu ia te oe a o e faia ni meaai po o se galuega i lou fale. E mafai foi ona e fai atu ia i latou e faitau upu po o fuaiupu i tusitusiga paia. E mafai e tamaiti matutua atu ona faitau i o latou uso ma tuafafine laiti.

Tusitusi

O le tusitusi e mafai ona fesoasoani i tamaiti e mafaufau ma aoao ai. A o latou tusitusi, e mafai e tamaiti ona faasoa mai o latou manatu ma faaaoga upu fou. E mafai ona e fai atu i lau fanau e tusitusi ni nai mea i aso uma. O nisi tamaiti e fiafia e tusi ni tala. O isi e fiafia e tusitusi e uiga i mea e tutupu ia i latou. Fai atu i lau fanau e faitau mea latou te tusia ia te oe.

Matematika

E taua tele le aoaoina o tomai o le matematika. O nei tomai e faaaoga i le fausiaina, kuka, ma isi vaega o le olaga i aso uma. E toatele tamaiti e manatu e faigata le matematika Ae e le tatau ona faapena. E mafai ona e fesoasoani i lau fanau e aoao le matematika i aso uma. Fai atu i lau fanau e faitau se tupe pe totogi ni mea i le maketi. Fai atu ia i latou e faitau mea i le fale po o le taimi e te kukaina ai meaai. O le a fesoasoani lenei mea ia i latou e mafaufau ai i fuainumera ma le auala latou te faaaogaina ai matematika i aso uma.

Mafaufau ma Tatalo

Mafaufau i mea na e aoaoina. Tusi i lalo soo se manatu o ia te oe po o manatu e sau mai le Agaga. O faapefea ona e fesoasoani i lau fanau e faataitai le faitau, tusitusi, ma le matematika i aso uma?

Gaoioiga

Vaai i lisi o loo i lalo. Tusi se maka faasa‘o (✓) i le pusa i autafa o mea e te manao e fai faatasi ma lau fanau.

Faitau i le Aiga

Ma lau fanau:

• Faitau leotele se tusi.

• Faitau igoa o mea.

• Feauauai i le faitauina o tusitusiga paia.

• Faitau faailoga i luga o auala.

• Ta‘u igoa o mataitusi latou te vaai i ai.

Tusitusi i le Aiga

Fai atu i lau fanau e:

• Tusi ni ata ma ta‘u atu ia te oe e uiga i ai.

• Tusi ni tusi.

• Tusi ni tala.

• Tusi igoa o tagata o le aiga.

• Tusitusi i se api talaaga.

Matematika i le Aiga

Ma lau fanau:

• Faitau mea i le maketi.

• Fua aitema o meaai a o faia ni kuka.

• Faaopoopo ma toese fuainumera.

• Faataitai faatasi se faafitauli o le matematika.

• Faitau le taimi i luga o se uati.

Talanoa ma Lou Aiga

Talanoa ma lou aiga e uiga i mea ua e aoaoina. Talanoaina fesili nei. Fai i tagata o lou aiga e faasoa mai o latou manatu ma faalogo i le tasi ma le isi.

• O a ni mea o loo e aoaoina i le aoga?

• E mafai faapefea ona tatou fesoasoani i le tasi ma le isi e faitau ma tusitusi i aso uma?

• E mafai faapefea ona tatou fesoasoani i le tasi ma le isi e faia matematika i aso uma?