8

Fesoasoani i Tamaiti i Meaaoga i le Fale

Fesili e Talanoa i ai

1. Vaavaai i ata nei. O a mea ua e vaaia?

2. E faapefea ona e fesoasoani i lau fanau i a latou meaaoga i le fale?

3. O ai e mafai ona fesoasoani pe afai e faigata tele meaaoga a lau fanau mo oe e fesoasoani i ai?

Aoao

O nisi taimi o mea e aoao e lau fanau i le aoga e faigata tele mo oe ona malamalama ma fesoasoani i ai. E le afaina pe afai e te le iloa mea uma. O loo tele pea mea e mafai ona e faia e fesoasoani ai i lau fanau i le aoga.

Meaaoga

Aoao lau fanau e galulue i a latou meaaoga i aso uma. Afai e i ai ni meaaoga a lau fanau e manaomia ona latou faamae‘aina i le fale, fesoasoani ia i latou e galulue ai. E mafai ona e fesoasoani i lau fanau e fai se fuafuaga e faauma a latou meaaoga i le taimi e tatau ai. E mafai ona fesoasoani pe afai e maua e tamaiti se taimi filemu ma se nofoaga e suesue ai i le fale. E mafai ona e fesoasoani i lau fanau e fesili atu i se faiaoga, uo, po o se isi tagata matua mo se fesoasoani pe afai e faigata tele a latou meaaoga.

O Suega

Fesili i lau fanau pe ua latou malamalama i mea ua latou aoaoina. Fesili atu ia i latou po o a mea e manaomia ona latou iloa mo suega. Afai latou te manaomia se fesoasoani, e mafai ona e talanoa i o latou faiaoga pe fai atu ia i latou e fesili atu i o latou faiaoga mo se fesoasoani.

E mafai ona e fesoasoani i lau fanau e suesue mo suega e ala i le tuu atu ia i latou e tali fesili o suega ua tuanai. E mafai foi ona outou tatalo faatasi mo se fesoasoani. Taumafai e avatu i lau fanau meaai ma vai ae latou te le‘i faia ni suega ina ia mafai ona latou mafaufau lelei ma ia le fia aai. Ta‘u atu i lau fanau e te talitonu ia i latou ma e te alofa ia i latou e tusa lava pe le lelei a latou suega.

Mafaufau ma Tatalo

Mafaufau i mea na e aoaoina. Tusi i lalo soo se manatu o ia te oe po o manatu e sau mai le Agaga Paia. E mafai faapefea ona e fesoasoani i lau fanau e fai a latou meaaoga ma suesue mo suega?

Gaoioiga

Vaai i lisi o loo i lalo. Tusi se maka faasa‘o (✓) i le pusa i autafa o mea e te manao e fai faatasi ma lau fanau.

Meaaoga i le Fale

• Fesili i lau fanau po o a mea ua latou aoaoina.

• Fesoasoani i meaaoga a lau fanau.

• Taumafai e sue se taimi ma se nofoaga mo lau fanau e suesue ai.

• Fesili i lau fanau pe o afea e tatau ona tuuina atu ai a latou meaaoga i o latou faiaoga.

• Afai latou te manaomia se fesoasoani, tuu atu i lau fanau e fesili i se uo po o se faiaoga mo se fesoasoani.

• Tatalo ina ia iloa pe faapefea ona fesoasoani i lau fanau.

Sauniuniga mo le Suega

• Fesili i lau fanau pe ua latou malamalama i mea ua latou aoaoina.

• Fesili i lau fanau po o a mea e manaomia ona latou iloa mo a latou suega.

• Fai atu i lau fanau e suesue i fesili o suega ua tuanai.

• Tuu atu i lau fanau ni meaai ma vai ae latou te le‘i faia se suega.

• Ta‘u atu i lau fanau e te alofa ia i latou e tusa lava pe le lelei a latou suega.

Talanoa ma Lou Aiga

Talanoa ma lou aiga e uiga i mea ua e aoaoina. Talanoaina fesili nei. Fai i tagata o lou aiga e faasoa mai o latou manatu ma faalogo i le tasi ma le isi.

• E mafai faapefea ona tatou fesoasoani i tagata o le aiga i a latou meaaoga?

• O le a se mea e mafai ona tatou faia e fesoasoani ai i tagata o le aiga e suesue mo a latou suega?

• O fea e mafai ona suesue ai tagata o le aiga i le fale?