9

Patisipe Nan Edikasyon Pitit Ou yo

Kesyon pou Diskite

1. Gade foto sa yo. Kisa ou wè?

2. Kòman w ka patisipe nan edikasyon pitit ou yo?

3. Kòman pitit ou yo ka mande enstriktè yo pou ede yo si yo pa konprann?

Aprann

Ou ka pale avèk pitit ou yo, travay avèk yo, jwe avèk yo, li avèk yo, epi koute yo. Sa ap ede yo santi ke w renmen yo. Ou ka mande yo kisa y ap aprann nan lekòl la tou. Mande yo kisa ki fasil pou yo. Mande yo kisa ki difisil. Mande yo kijan yo santi yo konsènan enstriktè yo. Si w panse sa ta ka ede pitit ou yo, mande enstriktè yo si w ka pale avèk yo.

Enstriktè souvan renmen lè paran yo pale avèk yo pou mande yo kijan yo ka ede pitit yo travay byen nan lekòl.

Anvan w rankontre avèk enstriktè pitit ou yo, ekri kesyon w vle poze yo. Men kèk bagay ou ka fè:

1. Remèsye enstriktè yo poutèt yo anseye pitit ou yo.

2. Mande enstriktè yo kòman pitit ou yo ap travay nan klas yo.

3. Mande enstriktè yo kijan w ka ede pitit ou yo travay pi byen nan lekòl.

4. Mande enstriktè yo si gen dat enpòtan ou ta dwe konnen.

Si w pa ka rankontre enstriktè yo, ou ka konekte avèk yo nan yonn oubyen plis pase fason sa yo:

• Voye yon mesaj tèks.

• Voye yon email.

• Fè yon konvèsasyon nan telefòn.

• Ekri yon lèt.

Gen anpil moun ki ede pitit ou yo aprann chak jou. Panse a lòt moun ou ka pale sou sa pitit ou yo ap aprann.

Panse epi Priye

Panse sou sa w aprann yo. Ekri nenpòt panse ou genyen oubyen ide ki soti nan Sentespri a. Kijan lè w pale avèk lòt moun sou sa pitit ou yo ap aprann sa ka ede pitit ou yo nan lekòl?

Aktivite

Ekri twa bagay ou ta renmen mande oubyen pale avèk enstriktè pitit ou yo oubyen avèk lòt moun pou ede pitit ou yo aprann.

Pale avèk Fanmi Ou

Pale avèk fanmi w sou sa w aprann. Diskite kesyon ki anba yo. Mande manm nan fanmi w pou yo pataje ide yo epi pou youn koute lòt.

• Kimoun nan lavi nou ki ede nou aprann?

• Kijan lòt moun ka ede chak manm fanmi an nan lekòl?