9

Ia Avea o se Vaega o Aoaoga a Lau Fanau

Fesili e Talanoa i ai

1. Vaavaai i ata nei. O a mea ua e vaaia?

2. E mafai faapefea ona avea oe ma se vaega o aoaoga a lau fanau?

3. E mafai faapefea e lau fanau ona fesili atu i o latou faiaoga mo se fesoasoani pe afai latou te le malamalama?

Aoao

E mafai ona e talanoa i lau fanau, galulue faatasi ma i latou, taaalo ma i latou, faitau faatasi ma i latou, ma faalogo ia i latou. O le a fesoasoani lenei mea i lau fanau e lagona ai le alofagia. E mafai foi ona e fesili atu ia i latou po o a mea o latou aoaoina i le aoga. Fesili atu ia i latou po o le a le mea e faigofie mo i latou. Fesili atu ia i latou po o le a le mea e faigata. Fesili atu ia i latou po o a ni o latou lagona e uiga i o latou faiaoga. Afai e te manatu e mafai ona fesoasoani i lau fanau, fesili i o latou faiaoga pe mafai ona e talanoa ma i latou.

E masani ona fiafia i ai faiaoga pe a talanoa atu matua ia i latou ma fesili atu ia i latou pe mafai faapefea ona latou fesoasoani ia latou fanau ia manuia le aoga.

Ae e te le‘i feiloai ma faiaoga a lau fanau, tusi i lalo fesili e te manao e fai atu ia i latou. O nisi nei o mea e mafai ona e faia.

1. Faafetai i faiaoga mo le aoaoina o lau fanau.

2. Fesili atu i faiaoga pe o a mai lau fanau i a latou vasega.

3. Fesili atu i faiaoga pe mafai faapefea ona e fesoasoani i lau fanau ia sili atu ona lelei i le aoga.

4. Fesili atu i faiaoga pe o i ai ni aso taua e tatau ona e iloa.

Afai e le mafai ona outou feiloai ma faiaoga, atonu e mafai ona e fesootai ma i latou i se tasi pe sili atu foi o auala nei:

• Auina atu se feau tusitusia.

• Auina atu se imeli.

• Fai se talanoaga i le telefoni.

• Tusi se tusi.

E toatele tagata e fesoasoani i lau fanau e aoao i aso uma. Mafaufau i isi tagata e mafai ona e talanoa i ai e uiga i le aoaoina o lau fanau.

Mafaufau ma Tatalo

Mafaufau i mea na e aoaoina. Tusi i lalo soo se manatu o ia te oe po o manatu e sau mai le Agaga Paia. E mafai faapefea e le talanoa ma isi tagata e uiga i le aoaoina o lau fanau ona fesoasoani i lau fanau i le aoga?

Gaoioiga

Tusi i lalo ni mea se tolu e te manao e fesili atu ai pe talanoa i ai i faiaoga o lau fanau po o isi tagata o e fesoasoani i lau fanau e aoao.

Talanoa ma Lou Aiga

Talanoa ma lou aiga e uiga i mea ua e aoaoina. Talanoaina fesili nei. Fai atu i tagata o le aiga e faasoa mai o latou manatu ma faalogo i le tasi ma le isi.

• O ai tagata i o tatou olaga e fesoasoani ia i tatou e aoao?

• E mafai faapefea e isi ona fesoasoani i tagata taitoatasi o le aiga i le aoga?