Faafeiloai atu

O le a fesoasoani lenei taiala a matua ia te oe e aoao ai pe faapefea ona fesoasoani i lau fanau e aoao i le aoga ma i le aiga.

E aoao tamaiti mai matua ma faiaoga. Latou te aoao foi e ala i galuega, taaalo, ma fesili latou te tuuina atu. E taua tele aiga ma e fesoasoani i tamaiti e aoao. Pe a lagolagoina e aiga tamaiti i le aoaoina, e lagona e tamaiti le fiafia ma le lelei e uiga ia i latou lava. Latou te mananao foi e aoao atili.

Talanoa ma lou aiga e uiga i mea ua e aoaoina a o e faitauina lenei taiala. Tatalo mo se fesoasoani mai le Tama Faalelagi. E tusa lava pe le tele sou aoaoina, e mafai lava ona e fesoasoani i lau fanau e aoao. O le a fesoasoani le Alii ia te oe ma lau fanau e aoao faatasi a o outou galulue, taaalo, talanoa le tasi i le isi, ma faitau.

Auala e Faaaoga ai le Taiala Lenei

E mafai e matua ona suesue faatasi lenei taiala, ma a latou fanau, po o isi matua. E mafai e taitai o le Ekalesia ona valaaulia matua e feiloai ma talanoaina autu i lenei taiala. E mafai foi e uso ma tuafafine o auaunaga ona talanoa e uiga i autu i lenei taiala faatasi ma aiga o loo latou auauna atu i ai.

Auala e Suesue ai Autu Taitasi

Mulimuli i laasaga nei a o e suesue i autu taitasi i lenei taiala:

1. Valaaulia isi tou te suesue faatasi le autu, pe suesue na o oe le autu.

2. Mafaufau ma talanoa e uiga i fesili.

3. Faitau ma fai le gaoioiga.

4. Mafaufau ma tatalo e uiga i mea ua e aoaoina.

5. Talanoa ma lou aiga e uiga i mea ua e aoaoina.