Kaetieti ibukin te Tai n Anene ao Karaoan Anga reirei n te Bootaki n Toa irouia Ataei

Nakoia Beretitentii n te Moanrinan ao Taan Kairiri n te Anene,

Kuuna n te Moanrinan bon bwaai ni mwakuri aika iai korakoraia ni buokiia ataei n reiakin taekan ana babaire Tamara are i Karawa ao aan koaua ibukin ana euangkerio Iesu Kristo. Ngkai ataei a anenea taekan reirein te euangkerio, te Tamnei ae Raoiroi e na kaoti koauaia. Taekana ma te katangitang a na tiku n aia iango ataei inanon maiuia ae bwanin.

Ukoukora ana ibuobuoki te Tamnei ngkai kam katauraoi n reireia te euangkerio rinanon te katangitang. Kaota am koaua iaon ake kam anenei taekaia. Buokiia ataei n taraia bwa e kanga te katangitang n irekereke ma baike a reiakin ao n rinanona ni mweengaia ao n te reirei n te Moanrinan. Ataei ma aia utu a na kakabwaiaki man ami konabwai ae bane nanomi iai.

Ti tangiri ngkami ao ni karababa ara kakaitau ibukin te mwakuri n ibuobuoki are kam anga ni kamanoia ara ataei aika a kakaawaki.

Beretitentii ni Kabuta n te Moanrinan

Babaire ibukin Karaoakin te Bootaki n Toa

Iaan ana kairiiri te bitiobi, aia anga reirei ataei ni bootakin te toa irouia ataei e taneiai ni kakaraoaki n te kaua ni kuata n te ririki. Ngkai beretitentii n te Moanrinan ao te tia kairiiri n te katangitang, a bairea aia tai ni boowi ni moan te ririki ma te kauntira n te bitiobiriki are e tararua te Moanrinan ni moana maroroakinan taian babaire ibukin aia kanoa. Ngkana kam a tia n rinanoi taian babaire, karekea ana kariaia ibukiia.

E riai kanoan aia kanoa ni kariaia ataei bwa a na kanakoa aia kanoa are ngaiia ma aia utu a tia n reiakinna man ana Boki Moomon ni mweengaia ao n te Moanrinan, n raonaki ma anene n te Moanrinan are a tia n aneneneia inanon te ririki. Tataromwaaka n iangoia raoi bwa tera reirein te euangkerio ao anene ake a na boutokai baike a tia n reiakinii. Rinanon nako te ririki, kawakin mwiin aia marooro ataei ao aia taneiai aika a onoti ibukin kabonganaana n tain kanakoan aia anga reirei. Kaoiia ataei bwa a na tibwauai booki aika tabu, karaki, ao aia koaua n tain aia kabwarabwara. Ngkai ko bairea te kabwarabwara, iangoi kawai ake a na kona ni buokiia kaain te taromauri ni kabotoi aia iango iaon te Tia Kamaiu ao Ana reirei.

Iunite ake a karako mwaitiia aia ataei a na bae n iangoi kawai aika a na kona iai kaain te utu ni iriia aia ataei n tain aia kabwarabwara. Kaain te bitiobiriki a kona ni kaina te boowi ni kauarerekea aia marooro.

Ngkana ko a katauraoa karaoakin am kanoa n te anga reirei, ururingi taian babaire aikai:

• Karaoan te kataneiai e ria n aki anaa te tai man taian kiraati n te Moanrinan ke utu.

• Tamnei, kunnikai ni kaotioti, ao bwaai ni katangitang aki katauaki ni kamanenaaki n te bootaki n toa.

Taraa Aeniboki 2: Babairean aron te Ekaretia, 11.5.4.

Kaetieti ibukin Tain te Anene

5 te miniti (beretitentii n te Moanrinan): Kaukuki n tataro, te boki ae tabu ke taekan te onimaki, ao teuana te taetae

20 te miniti (te tia kairiiri n te katangitang): tain te Anene

Te beretitentii n te Moanrinan ao te tia kairiiri n te katangitang a na rinei anene ni katoa namwakaina ni kamatoai reirei ake a reiakin ataei inanon aia kiraati ao ni mweengaia. Rinanin anene ake a kamatoai reirei aikai a karinaki inanon te kairi aei. Anene aikai a baireaki inanon te kabwarabwara inanon Nakomai, Iriirai—Ibukin te Moanrinan.

Ngkai kam reireiniia ataei te anene, kaoiia bwa a na tibwauai baike a tia n reiakin n taian karaki ao taian reirei aika a kakawaki ake a reiakinaki n te anene. Kam na bae n tangiria ni manga rinanoa Nakomai, Iriirai—Ibukin te Moanrinan te kabwarabwara are ataei a kamatebwai inanon aia kiraati. Aio e na buokiko n atai karaki ao reirei ake a reiakin bwa ko aonga n iangoia bwa kam na kanga ni boutoka aia kamatebwai ma te katangitang.

N tain te Anene, ko kona naba n rinanoi anene ake a tia n reiakin mai imwaina ao anene ake a tatangiria n anenei. Ngkai ko rinanona, kaoiia ataei bwa a na tibwauai aia iango ao aia namakin iaon te koaua ake a kunei inanon te anene.

Aia Boki n Anene Ataei bon te moan buoka ibukin te katangitang n te Moanrinan. Anene n taromauri man boki n anene ao anene man te Rao ao Riaona a tau naba. N taai tabetai ataei a na kona n anenei kunan te aba ke boong ni motirawa ake a tau ibukin te Tabati ao ibukin aia ririki ataei. Kabonganaan tabeua katangitang inanon te Moanrinan a riai ni kariaiakaki mairoun te Bitiobi (taraa Aeniboki 2: Babairean Aron Kairan te Ekaretia, 11.2.4).

Taraan te Moanrinan

Ni katoa wiiki, Moanrinan e na iai:

Tain te Anene25 te miniti

Mwaing man te tabo teuana nakon te tabo teuana5 te miniti

Taian Kiraati20 te miniti

Taan kairiiri ibukin Moanrinan aika a bubura a kona ni bwenauai nakon uoua kurubu ao ni karekea teuana te kurubu bwa tain te kiraati n te Moanrinan ao te kurubu are teuana te kurubu ibukin tain te anene. Ngkanne kurubu aika uoua a na kaibibiti n aia tabo. N aron waaki aikai, taan kairiiri n te Moanrinan a na kainnanoia ni bitii taai aika oti ieta ni kaitarai aia kaangaanga.

Katangitang ibukin Tain te Anene

Tianuare

• “Ngai Natin te Atua,” Aia Boki n Anene Ataei, 2–3

• “I Know My Father Lives,” Aia Boki n Anene Ataei,5

• “When He Comes Again,” Aia Boki n Anene Ataei, 82–83

Beberuare

• “Follow the Prophet,” Aia Boki n Anene Ataei, 110–11 (te kibu3)

• “He Sent His Son,” Aia Boki n Anene Ataei, 34–35

• “Choose the Right,” Anene n Taromauri, nambwa. 239

Maati

• “Love One Another,” Aia Boki n Anene Ataei, 136–37

• “Help Me, Dear Father,” Aia Boki n Anene Ataei99

• “‘Give,’ Said the Little Stream,” Children’s Songbook,236

Eberi

• “Te Tia Kamaiura Iteraera,” Anene n taromauri, nambwa.6

• “Did Jesus Really Live Again?” Aia Boki n Anene Ataei.64

• Keep the Commandments,” Aia Boki n Anene Ataei, 146–47

Meei

• “N na Nakonako ma Iesu” (music.ChurchofJesusChrist.org)

• Search, Ponder, and Pray,” Aia Boki n Anene Ataei,109

• I Love to See the Temple,” Aia Boki n Anene Ataei,95

Tuun

• “I Will Be Valiant,” Aia Boki n Anene Ataei,162

• “A Child’s Prayer,” Aia Boki n Anene Ataei, 12–13

• “N na Katotonga Iesu,” Aia Boki n Anene Ataei, 78–79

Turai

• “The Holy Ghost,” Aia Boki n Anene Ataei,105

• “I Know My Father Lives,” Aia Boki n Anene Ataei,5

• “I Love to See the Temple,” Aia Boki n Anene Ataei,95

Aokati

• “My Redeemer Lives,” Hymns, no.135

• I Feel My Savior’s Love,” Aia Boki n Anene Ataei, 74–75

• “Teach Me to Walk in the Light,” Aia Boki n Anene Ataei,177

Tebetembwa

• “Kindness Begins with Me,” Aia Boki n Anene Ataei,145

• “Keep the Commandments,” Aia Boki n Anene Ataei, 146–47

• “N na Nakonako ma Iesu” (music.ChurchofJesusChrist.org)

Okitobwa

• “I Feel My Savior’s Love,” Aia Boki n Anene Ataei, 74–75

• “I Hope They Call Me on a Mission,” Aia Boki n Anene Ataei,169

• “Families Can Be Together Forever,” Aia Boki n Anene Ataei,188

Nobembwa

• “Follow the Prophet,” Aia Boki n Anene Ataei, 110–11 (te kibu7)

• “Ti Karabwako te Atua, ibukin am Burabeti,” Anene n taromauri, nambwa.19

• “I Want to Live the Gospel,” Aia Boki n Anene Ataei,148

Ritembwa

• “When He Comes Again,” Aia Boki n Anene Ataei, 82–83

• “Seek the Lord Early,” Aia Boki n Anene Ataei,108

• “Away in a Manger,” Aia Boki n Anene Ataei, 42–43

Kabonganakin te Katangitang n Reiakina te Reirei

Tain te anene e baireaki ibukin buokaia ataei ibukin reiakinan koauan te euangkerio. Iango aika imwina a kona ni kaungai nanomi ngkai kam iangoi kawai n anga reirei iaon reirein te euangkerio ake a kuneaki n anene n taromauri ao ni kunan te Moanrinan.

Wareki koroboki aika a tabu ake a irekereke ma ngaia. Ibukin angiin taian anene inanon Aia Boki n Anene Ataei ao te boki n anene n taromauri, kiibu ake a irekereke ma koroboki aika tabu a koreaki. Buokiia ataei ni wareki tabeua taeka man kiibu aikai, ao maroroakinna bwa a kanga booki aika tabu n irekereke ma te anene. Ko kona naba ni karinani tabeua kiibu man koroboki aika tabu iaon te burakibooti ao kaoiia ataei bwa a na katoatoai bwaai ni kakoaua nakon te anene ke kibun te anene.

Kanoai taian Bwangabwanga. Korea kibun te anene iaon te burakibooti ma tabeua oin taeka ake a bua. Ngkanne tuangiia ataei bwa a na anenea te anene, kakauongo ibukin taian taeka ake a na kanoa te bwangabwanga. Ngkai a kanoa te bwangabwanga, maroroakin reirein te euangkerio ake kam reiakin man taeka akana a bua.

Taeka mairouia Taan Kairiiri n te Ekaretia. Kaoiia ataei bwa a na ongora n ana taeka te mataniwi n te Ekaretia are titebo ma are e taekinaki n reirein te euangkerio n aron anenen te Moanrinan. Tuangiia bwa a na kateibaia ngkana iai te bwai ae a ongo are e buokiia ni kamatataia n taekan te koaua are a aneneia. Tuangiia bwa a na tibwaua te bwai are a ongo.

Kakoaua. Kaota ami koaua ae uarereke nakoia ataei iaon koauan te euangkerio ake a kuneaki n anenen te Moanrinan. Buokiia ataei bwa a na ataia bwa te anene bon teuana te kawai ae a kona ni kaota iai aia koaua ao n namakina te Tamnei.

Riiki bwa te tia kakoaua. Kaoiia ataei bwa a na kaibibiti n tei ao n tibwauai baike a reiakin man te anene are a aneneia ke aron aia namakin ibukin koaua ake a reiakinaki man te anene. Titirakiniia aron aia namakin ngkai anenea te kuna, ao buokiia bwa a na kinaa ana kairoro te Tamnei ae Raoiroi.

Kabonganai tamnei. Tuangiia ataei bwa a na buoki ngkami ni kakaea ke ni karaoi tamnei ake a iri ma taeka aika kakawaki ke kibun te anene. Kaoiia bwa a na tibwauaia bwa tera rekereken taian tamnei ma te anene ao tera ae reiakinaki man te anene. Te katoto, ngkana ko reireiniia te anene“The Iron Rod” (Anene n Taromauri, nambwa. 274), ko kona ni katei tamnei rinanon te ruu ni kaota kakaawakin taeka man te anene (n aron te kai te biti, ana taeka te Atua, kairi, kariiri, ao karawa). Tuangiia ataei bwa a na ikoti taian tamnei ao n tabeki ieta n teia ae barongaaki ngkai kam bane n anene.

Tibwa te bwai ae iai rabwatana ae tei ibukin te reirei. Ko kona ni kabongana te bwai ae e kona n nooraki ae kaungaa maroroakinan te anene. Te katoto, te anene “Faith” (Aia Boki n Anene Ataei, 96–97) e taekina te ati ae uarereke. Ko kona ni kaota te ati nakon te ataei ao ni maroroakina aron kaotan te onimaki ngkana ti unika te ati; aio e kona ni kaira maroroakinan kawai ake ti kaota iai onimakinan Iesu Kristo, n aron are e kabwarabwaraaki n te anene.

Kaoa te Tibwatibwa ni bwaai ake ko a tia n rinanona. Buokiia ataei n tomai reirei ake a reiakinaki n te anene ma baike a rinanona ma reirei akanne. N aron te katoto, imwain te anene “I Love to See the Temple” (Aia Boki n Anene Ataei, 95), ko kona n tuangiia ataei bwa a na katei baia ngkana a tia n noora te tembora. Kaoiia bwa a na iangoia ngkai a anene bwa tera aia namakin ngkai a noora te tembora.

Anga titiraki. A mwaiti titiraki aika ko kona n anga ngkai ko anenei kuuna. Te katoto, ko kona n titirakiniia ataei tera ae a reikainna man kibun nako te kuna. Ko kona naba n tuangiia bwa a na iangoi titiraki ake e kaeka te kuna. Aio are e kona ni kaira te marooro ibukin koaua ake a reiakinaki n te anene.

Kakauongo nakon kaeka. Tuangiia ataei bwa a na ongora n reken taian titiraki n aron “antai?” “tera?” “iara?” “nningai?” ke “bukin tera?” Te katoto, n te kuna“Ninikorian Nibwaai” (Aia Boki n Anene Ataei, 120–21), a kona n ongora ibukin antai are e tuangaki bwa e na karekea te bwaatua ao n te tabo raa, nningai, ao ni kanga, ao bukin tera e ongotaeka iroun te Uea. Ko kona naba n tuangiia ataei bwa a na kakauongo nakon taeka ke ni warekia i tabon baia iraua te tai are a anenea iai te taeka teuana.

Buokakiia Ataei n Reiakin ao n Uringii Anenen te Moanrinan

Ataei a reiakin anene man ongoraeakin ao n anenei ni kaokiokii. Anenei n tainako taekan kuuna aika boou nakoia ataei—tai tii wareki ke ni kamatenanoi. Aio e buokiia ataei n reita tangin aneneana ma taekana. Imwiin reiakinan kuuna, manga rinanona ni kawai aika a kaunga rinanon te ririki. Inano bon tabeua iango ni buokaia ataei n reiakin ao ni manga rinanon kuuna.

Karaoi boutita. Katei taian boutita ma taekan te kibu ke tamnei are a tei ibukin tenaan taeka. Ngkai a anene ataei, rabun tabeua taeka ke tamnei ni karokoa are a kona n anene ni kabwanina kibuna n akea te boutita. Kam kona naba ni kaoiia ataei bwa a na buoki ngkami ni karaoi taian boutita.

Kamataataan toon te anene. Ni buokiia ataei n reiakina een te anene, kaaki baimi ni kaetii imoa, ao ngkana kam anenea taekana, karieta riki baimi ni kaota keeraken toon te anene, ao karuaaka baimi ni kaota keerikakin toon te anene.

Ekoo. Kaoiia ataei bwa a na riki bwa te ekoo ni kaokioka are kam aneneia. Anenea te kibu ae uarereke nakoia ataei ke teuana te rain, ao tuangiia bwa a na manga aneneia nakoim.

Kabonganai anga aika a kakaokoro. N anenean taian kuna ni kawai aika a kakaokoro, n aron te wirikiriki, te aam, ubouboan tangin te anene, ke anene ngkai ko tekateka ke n teirake. Kam kona naba ni karaoi bwaoki man te beeba, ao iaon iteran nako te bwaoki, korea te kawai ae kaokoro n anene. Kaoiia ataei bwa a na niniira te bwaoki ni iangoia bwa a na kanga ataei n anenea te anene.

Anene inanon te kurubu. Anganiia kaain te kiraati ke te aomata teuana te kibu bwa e na aneneia ngke e tabe n tei, ao ngkanne kaibibiti kiibu ni karokoa are e reke aia tai kaain te kiraati n tatabeua ke te aomata n anenei kiibu n tatabeua.

Kabongana katean te bai. Kaoiia ataei bwa a na iangoa aron kamwakuran baai aika a bebete bwa e na buokiia n uringa taekan ao rongorongon te anene. N aron te katoto, ngkana ko anenea kauouan kibun “My Heavenly Father Loves Me” (Aia Boki n Anene Ataei, 228–29), kam kona ni kaoiia ataei bwa a na kotei ni mataia, ni mwakuri kanga ai aron te bwebwe, ao ni kamwangkoi baia iaan taningaia. Tuangiia bwa a na kaaki baia iaon bwabwaia ngkai a anenea “Yes, I know Heavenly Father loves me.”

A anene ataeinaine, a anene ataeinimwaane. Korea tamnein te ataeinimwaane ao tamnein te ataeinaine, ao kuruunna ke kanimwa te tamnei iaon taian kai ni kakaokoroi. Inanon rinanoakin te anene, tabeka ieta teuana te tamnei ni kaotia bwa antai ae e na anenea mwakoron te anene anne.

Kakibaan te bwaene. Kamenai bwaene aika a nambwanaki ke tabeua kaonteina imoan te ruu—ni kamwaiti taian kaonteina ngkai a mwaiti kibun te anene. Kaoa temanna te ataei bwa e na kakibaa te bwaene ni biin ke te mwakoro ni beeba ae nimwanunu nakon ke irarikin kaonteina ake a nambwanaki. Tuangiia ataei bwa a na anenea te kibu ma nambwan te kaonteina.

Katoatoai tamnei ma kibuntaeka. Korea rainin te anene iaon te mwakoro ni beeba ae kaokoro, ao kakaea te tamnei are e tei ibukin te rain n tatabeua. Kaaki tamnei n iteran te ruu ao beeba n iterana are teuana. Anenea te anene, ao tuangiia ataei bwa a katoatoai tamnei ma taian taeka.

Ataia: Bwaai ni kakoaua nakon te uoote ao bitiobiriki a kaineti naba nakon mwaanga ao beretitentii n te mwaanga.