Faatonuga mo le Taimi o Pesepesega ma le Polokalama a Tamaiti i le Sauniga Faamanatuga

Susuga i Au Peresitene o Peraimeri ma Taitai Musika,

O pese a le Peraimeri o se meafaigaluega mamana lea e fesoasoani ai i tamaiti ia aoao e uiga i le fuafuaga o le fiafia a le Tama Faalelagi ma upumoni faaleaoaoga faavae o le talalelei a Iesu Keriso. Ao pepese tamaiti e uiga i mataupu faavae o le talalelei, o le a molimau atu le Agaga Paia e uiga i lo latou moni. O upu ma fati o le a tumau i mafaufau ma loto o tamaiti i o latou olaga atoa.

Saili le fesoasoani a le Agaga ao e sauni e aoao atu le talalelei e ala atu i musika. Faasoa atu lau molimau e uiga i upumoni o loo e pese e uiga i ai. Fesoasoani atu i tamaiti ia iloa pe faapefea ona fesootai le musika i mea o loo latou aoaoina ma lagonaina i le fale ma i vasega a le Peraimeri. O le a faamanuiaina tamaiti ma o latou aiga ia outou taumafaiga tuuto.

Matou te alolofa ia te outou ma tuuina atu lo matou agaga faafetai mo le auaunaga tuuto o loo outou faia e faamalosia ma puipuia ai a tatou fanau faapelepele.

O Le Au Peresitene Aoao o le Peraimeri

Taiala mo le Polokalama o le Sauniga Faamanatuga

I lalo o le taitaiga a le epikopo, o le polokalama o le sauniga faamanatuga a tamaiti e masani lava ona faia i le kuata lona fa o le tausaga. I le avea ai ma au peresitene ma taitai musika o le Peraimeri, ia fuafua e fono i le amataga o le tausaga ma le fesoasoani a le au epikopo o loo vaaia le Peraimeri e amata talanoaina ai fuafuaga mo le polokalama. A maea ona e faia fuafuaga, ia tapa lana faamaoniga mo i latou.

E tatau ona faataga e le polokalama ia tamaiti e tuuina atu mea sa latou aoaoina ma o latou aiga mai le Tusi a Mamona i le fale ma i le Peraimeri, e aofia ai pese o le Peraimeri sa latou usuina i le faagasologa o le tausaga. Ia mafaufau ma le agaga tatalo po o fea o mataupu faavae o le talalelei ma pese e lagolagoina ai mea sa latou aoaoina. A o faagasolo le tausaga, ia teu ni faamatalaga o tautalaga ma aafiaga patino o tamaiti e ono mafai ona faaaoga i le polokalama. Ia valaaulia tamaiti e faasoa mai ni mau, tala, ma a latou molimau i le polokalama. A o e fuafuaina le polokalama, mafaufau i ni auala e mafai ona fesoasoani i le faapotopotoga ia taulai atu ai i le Faaola ma Ana aoaoga.

O Iunite e toalaiti le aofai o tamaiti atonu e mafai ona mafaufau i ni auala e mafai ai ona auai tagata o le aiga faatasi ma a latou fanau. O se tasi o le au epikopo e mafai ona faaiuina le sauniga i se saunoaga puupuu.

A o e saunia le polokalama, ia manatua taiala nei:

• O faataitaiga e le tatau ona alu ai se taimi le talafeagai mai vasega o le Peraimeri po o aiga.

• O mea faitino, teuga, ma aoaoga e faia i ala o faasalalauga e le talafeagai mo le sauniga faamanatuga.

Tagai Tusitaulima 2: Taitaiina o le Ekalesia 11.5.4.

Faatonuga mo le Taimi o Pesepesega

5 minute (au peresitene o le Peraimeri): Tatalo amata, mau po o se mataupu faavae o le faatuatua, ma se lauga e tasi.

20 minute (taitai musika): Taimi o pesepesega

O le au peresitene ma le taitai musika o le Peraimeri e filifilia pese mo masina taitasi e toe faamalosia ai mataupu faavae o loo aoaoina e tamaiti i totonu o a latou vasega ma i le aiga. O se lisi o pese e toe faamalosia ai nei mataupu faavae o loo faaaofiaina atu i lenei taiala. O nei pese o loo fautuaina atu foi i otootoga o i le Sau, Mulimuli Mai ia te A’u—Mo le Peraimeri.

A’o e aoao atu pese i tamaiti, valaaulia i latou e faasoa mai mea ua uma ona latou aoaoina e uiga i tala ma mataupu faavae faaleaoaoga na aoao atu e pese. Atonu e te manao e toe suesue i otootoga o le Sau, Mulimuli Mai ia te A’u—Mo le Peraimeri lea o loo aoaoina e tamaiti i totonu o a latou vasega. O le a fesoasoani lenei mea ia te oe e te malamalama ai i tala ma mataupu faavae o loo latou aoaoina ina ia mafai ai ona e mafaufau i auala e lagolagoina ai a latou aoaoga ma le musika.

I le taimi o pesepesega, e mafai foi ona e toe faamanatu ai pese na aoaoina muamua e tamaiti ma pese latou te fiafia e pepese ai. A’o tou faamanatuina, valaaulia ia tamaiti e faasoa mai o latou manatu ma lagona e uiga i upumoni o loo maua i pese.

O le Tusipese a Tamaiti o le punaoa autu lea mo musika i le Peraimeri. O viiga mai le tusipese ma pese mai le Friend ma le Liahona e talafeagai foi. O nisi taimi e mafai e tamaiti ona usuina pese faaleatunuu po o pese o aso malolo ia e fetaui mo le Aso Sa ma mo le matutua o tamaiti. O le faaaogaaga o nisi lava musika i le Peraimeri e tatau ona faamaonia e le au epikopo (tagai Tusitaulima 2: Taitaiina o le Ekalesia 11.2.4).

Aotelega o le Peraimeri

O vaiaso taitasi, e aofia i le Peraimeri:

Taimi o pesepesega25 minute

Suiga5 minute

Vasega20 minute

E mafai e taitai i Peraimeri toatele ona vaevae tamaiti i ni vaega se lua ma tuu le tasi vaega i vasega Peraimeri ao le isi i le taimi o pesepesega. Ona fesuiai lea o vaega e lua. I ia tulaga, atonu e manaomia e taitai o le Peraimeri le fetuunai o taimi o loo faaali atu i luga e fetaui ma o latou tulaga.

Musika mo le Taimi o Pesepesega

Ianuari

• O Au o se Atalii o le AtuaTusipese a Tamaiti, 2–3

• “Ua Ou Iloa o Soifua Lo’u Tama,” Tusipese a Tamaiti,8.

• “Pe A Ia Toe Afio Mai,” Tusipese a Tamaiti, 46–47

Fepuari

• “Mulimuli i le Perofeta,” Tusipese a Tamaiti, 58 (fuaiupu3)

• “Na Ia Auina Mai Lona Alo,” Tusipese a Tamaiti, 20–21

• “Filifili Tau o Mea Tonu,” Viiga, nu.149

Mati

• “Ia Fealofani,” Tusipese a Tamaiti, 74

• “Fesoasoani Mai Ia Te A‘u Tama Pele,” Tusipese a Tamaiti,52

• “‘Foai’ O Si Auvai Lea,” Tusipese a Tamaiti,116

Aperila

• “Faaola o Isaraelu,” Viiga, nu. 5

• “Pe Na Toe Soifua Moni Mai Ea Iesu?” Tusipese a Tamaiti,45

• “Tausi Poloaiga,” Tusipese a Tamaiti, 68–69

Me

• “Ou te Savali ma Iesu” (music.ChurchofJesusChrist.org)

• “Saili, Mafaufau Loloto, ma Tatalo,” Tusipese a Tamaiti,66

• “Ou Te Fia Vaai i le Malumalu,” Tusipese a Tamaiti,99

Iuni

• “O Le a Ou Lototoa,” Tusipese a Tamaiti,85

• O Le Tatalo a le TamaitiitiTusipese a Tamaiti,6–7

• “O Loo Ou Taumafai e Avea e Pei o Iesu,” Tusipese a Tamaiti,40–41

Iulai

• “O Le Agaga Paia,” Tusipese a Tamaiti,56

• “Ua Ou Iloa o Soifua Lo’u Tama,” Tusipese a Tamaiti,8.

• “Ou Te Fia Vaai i le Malumalu,” Tusipese a Tamaiti,99

Aokuso

• “O Lo’o Soifua Lo’u Faaola,” Viiga, nu. 72

• “Le Alofa o Lou Faaola,” Tusipese a Tamaiti, 42–43

• “Aoao Mai Ia Ou Savali i le Malamalama,” Tusipese a Tamaiti,70

Setema

• “O Le Agalelei e Amata ia te A’u,” Tusipese a Tamaiti,83

• Tausi PoloaigaTusipese a Tamaiti,68–69

• “Ou te Savali ma Iesu” (music.ChurchofJesusChrist.org)

Oketopa

• “Le Alofa o Lou Faaola, Tusipese a Tamaiti, 42–43

• “Faamoemoe Latou Te Valaau Au i Le Misiona,” Tusipese a Tamaiti,91.

• “E Mafai Ona Faavavau Aiga,” Tusipese a Tamaiti,98

Novema

• “Mulimuli i le Perofeta,” Tusipese a Tamaiti, 58 (fuaiupu7)

• “Ia Viia Oe le Atua, mo le Perofeta,” Viiga, nu.10

• “Ou Te Fiaola i le Talalelei,” Tusipese a Tamaiti,72

Tesema

• Pe A Ia Toe Afio MaiTusipese a Tamaiti,46–47

• “Saili Vave le Alii,” Tusipese a Tamaiti,67

• “I Se Fale o Manu,” Tusipese a Tamaiti, 26

Faaaogaina o Musika e Aoao Atu ai Aoaoga Faavae

O le taimi o pesepesega ua faamoemoe e fesoasoani ai i tamaiti e aoao ai upumoni o le talalelei. E mafai ona musuia oe e manatu nei ao e fuafuaina ni auala e aoao atu ai mataupu faavae o le talalelei o loo maua i viiga ma pese o le Peraimeri.

Faitau mau e fesootai i ai. Mo le tele o pese i le Tusipese a Tamaiti ma le tusipese, o loo lisiina atu ni mau faasino e fesootai i ai. Fesoasoani i tamaiti e faitau nisi o nei fuaitau, ma talanoa e uiga i le auala e fesootai ai mau i le pese. E mafai foi ona e lisiina nisi o mau faasino i luga o le laupapa ma valaaulia tamaiti e faatusatusa ia mau faasino taitasi i se pese po o se fuaiupu mai se pese.

Faatumu le Avanoa Tusi se fuaiupu o le pese i luga o le laupapa ma o loo i ai ni upu autu o loo misi. Ona fai lea i tamaiti e usu le pese, faalogologo mo upu ia e faatumu ai ia avanoa. Ao latou faatumuina ia avanoa taitasi, talanoa po o a ni mataupu faavae o le talalelei na e aoaoina mai upu na misi.

Upusii mai taitai o le Ekalesia. Valaaulia tamaiti e faalogologo i se upusii mai se taitai o le Ekalesia lea e aoao mai ai se mataupu faavae e tasi e pei o le pese o le Peraimeri. Fai atu ia i latou e sii o latou lima pe a latou faalogo i se mea e fesoasoani ia i latou ia malamalama ai i le upumoni o loo latou pepese ai. Fai i ai e faasoa mai mea na latou faalogologo i ai.

Molimau atu Molimau puupuu atu i tamaiti e uiga i upumoni o le talalelei o loo maua i pese o le Peraimeri. Fesoasoani atu i tamaiti ina ia malamalama o le usuina o pese o se tasi lea o auala e mafai ai ona latou tuuina atu se molimau ma lagonaina ai le Agaga.

Tu Atu o se molimau Valaaulia tamaiti e auauai ona tutu ma faasoa atu ni mea sa latou aoaoina mai le pese o loo latou usuina po o o latou lagona e uiga i upumoni na aoao mai i le pese. Fai atu ia i latou po o le a so latou lagona ao latou usuina le pese, ma fesoasoani atu ia i latou ia iloa le uunaiga a le Agaga Paia.

Faaaoga ata. Fai atu i tamaiti e fesoasoani ia te oe e sue pe fai ni ata e o faatasi ma upu taua po o fuaitau o i le pese. Valaaulia i latou e faasoa mai pe faapefea ona fesootai le ata i le pese ma le mea o loo aoao mai e le pese. Mo se faataitaiga, afai o loo e aoao atu le pese “The Iron Rod” (Hymns, no. 274), e mafai ona e tuuina ni ata i totonu o le potu e faaalia ai upu taua mai le pese (e pei o le ‘ai uamea, afioga a le Atua, taiala, faaosoosoga, ma le lagi). Fai atu i tamaiti e ao mai ata ma uu i luga i le faasologa sao ao tou usuina faatasi le pese.

Faasoa se lesona faitino E mafai ona e faaaogaina se mea faitino e uunaia ai le talanoaga e uiga i se pese. Mo se faataitaiga, o le pese “Faatuatua” (Tusipese a Tamaiti, 50–51) e ta’ua ai se tama’i fatu. E mafai ona e faaali atu i tamaiti se fatu ma talanoa e uiga i le auala tatou te faaalia ai le faatuatua pe a tatou totoina se fatu; e mafai ona taitai atu ai i se talanoaga e uiga i ni auala tatou te faaalia ai le faatuatua ia Iesu Keriso, e pei ona faamatalaina i le pese.

Valaaulia le faasoa o aafiaga faaletagata lava ia. Fesoasoani atu i tamaiti e fesootai mataupu faavae na aoaoina i le pese ma aafiaga sa latou mauaina i na mataupu faavae. Mo se faaitaiga, ao lei usuina le pese “Ou Te Fia Vaai i le Malumalu” (Tusipese a Tamaiti,99), e mafai ona e fesili i tamaiti e sii i luga o latou lima pe afai na latou vaai i se malumalu. Valaaulia i latou e mafaufau ao latou pepese pe faapefea ni o latou lagona pe a latou vaai i se malumalu.

Fai fesili. E tele naua fesili e mafai ona e tuuina atu ao e peseina ni pese. Mo se faataitaiga, e mafai ona e fesili i tamaiti po o le a se mea sa latou aoaoina mai fuaiupu taitasi o i le pese. E mafai foi ona e fai atu ia i latou e mafaufau i ni fesili o loo taliina e le pese. E mafai ona taitaiina e lenei mea se talanoaga e uiga i upumoni na aoao mai i lenei pese.

Faalogo mo tali. Fai atu i tamaiti e faalogologo mo ni tali i fesili e pei o le “o ai?” “o le a?” “o fea?” “o ana fea?” po o le “pe aisea?” Mo se faataitaiga, i le pese “Lototele o Nifae” (Tusipese a Tamaiti,64--65), e mafai ona latou faalogo pe o ai na talosagaina e aumai papatusi ma o fea, o anafea, faapefea, ma pe aisea na ia usitai ai i le Alii. E mafai foi ona e fai atu i tamaiti e faalogologo mo upu autu pe faitau i o latou tamatamailima le aofai o taimi latou te usuina ai se upu faapitoa.

Fesoasoani i Tamaiti e Aoao ma Manatua Pese o le Peraimeri

E aoao e tamaiti se pese e ala i le faalogo ma le pepese faafia ai. Ia usu i taimi uma i tamaiti upu o se pese fou—ae aua le na o le faitau atu pe na o le taulotoina foi. E fesoasoani lenei faiga i tamaiti e faafesootai ai le fati i upu. A uma ona aoaoina se pese, toe faamanatu atu i ni auala eseese ma malie i le faagasologa o le tausaga. O nisi nei o manatu e fesoasoani i tamaiti e aoao ma toe faamanatu ai ia pese.

Faia ni pepa lautele o i ai ni savali. Faaali atu ni pepa lautele o i ai ni upu mai fuaiupu taitasi po o ata lea e sui tulaga i upu. Ao pepese tamaiti, kava ni upu po o ni ata sei iloga ua mafai ona latou usuina le fuaiupu atoa e aunoa ma le pepa o loo i ai upu. E mafai foi ona e valaaulia tamaiti e fesoasoani e fai ni pepa lautele o loo i ai upu.

Faataitai i leo maualuga ma le maualalo. Ina ia fesoasoani i tamaiti e aoao i le fati o le pese, taofi lou lima i se tulaga faalava, ma ao e usuina upu, sii i luga lou lima e faailoa atu ai ia leo maualuga ma tuutuu i lalo e faailoa atu ai ia leo maualalo.

Siuleo. Valaaulia tamaiti e avea ma ou siuleo i le toe usuina o upu na e usuina. Usu i tamaiti se fuaiupu po o se laina puupuu, ona fai atu lea i ai latou e toe usuina mai ia te oe.

Faaaoga fesuiaiga. Usu ia pese i ni auala eseese, e pei o le musumusu, hamu, patipati i le pao, fesuiai le pao, pe pepese ao saofafai pe tutu. E mafai foi ona e faia se tamai pusa faatafafa mai se pepa ma, i itu taitasi o le tamai pusa faatafafa, tusi ai se auala ese e pese ai. Valaaulia se tamaitiiti e faataavale le tamai pusa faatafafa e filifili ai pe faapefea ona usuina e tamaiti le pese.

Pese i vaega. Tuu atu ia tofu le vasega po o tagata taitoatasi ma se fuaiupu e tasi e usuina ao tutu, ona fai atu lea e fesuiai a latou fuaiupu seia tofu uma vasega po o tagata taitoatasi ma le avanoa e usuina ai fuaiupu taitasi.

Faaaoga taga o lima. Valaaulia tamaiti e mafaufau i ni taga faigofie o lima ma fesoasoani atu ia i latou ina ia manatua upu ma savali o se pese. Mo se faataitaiga, a e usuina le fuaiupu lona lua o le pese “E Alofa Lo’u Tama Faalelagi Ia Te A’u” (Tusipese a Tamaiti, 16–17), e mafai ona e valaaulia ia tamaiti e faasino i o latou mata, e pei o ni pepe felelei, ma faaofuofu o latou lima i tua o o latou taliga. Fai atu ia i latou e tuu o latou lima i luga o o latou fatu ao latou usuina le pese “Yes, I know Heavenly Father loves me.”

Pepese teineiti, pepese tamaiti. Tusi se ata o se tama ma se ata o se teine, ma faakelu pe faapipii ata i luga o ni laau eseese. Ao faamanatuina se pese, uu i luga se tasi o ata e faailoa atu ai po o ai e tatau ona usuina lena vaega o le pese.

Togi i totonu o se ato. Tuu ni ato ua faanumeraina po o nisi koneteina i luma o le potu—o le tele o koneteina e pei o le tele o fuaiupu o se pese faapitoa. Valaaulia se tasi o tamaiti e togi se tagapi po o se fasi pepa ua faanuminumiina i totonu pe latalata i se koneteina ua faanumeraina. Fai atu i tamaiti e usu le fuaiupu e tutusa le fuainumera ma le koneteina.

Faatusatusa se ata i se fuaitau Tusi ia laina taitasi o se pese i luga o se isi fasipepa, ma sue se ata e suitulaga i laina taitasi. Tuu ata i se itu e tasi o le potu ma pepa i le isi itu. Usu le pese, ma fai atu i tamaiti e faatusatusa ia ata i upu.

Manatua: O faamatalaga e faatatau i uarota ma au epikopo e faatatau foi i paranesi ma au peresitene o paranesi.