Mga Seminary ug mga Institute
Leksyon 1: Si Jesus Mao ang Buhi nga Kristo

1

Si Jesus Mao ang Buhi nga Kristo

Pasiuna

Ang modernong mga saksi namahayag: “Kami mopamatuod, ingon nga sa husto nga paagi Iyang gi-orden nga mga Apostoles—nga si Jesus mao ang Buhi nga Kristo,” (“Ang Buhi nga Kristo: Ang Pagpamatuod sa mga Apostoles,” Ensign o Liahona, Abr. 2000, 3). Tungod kay daw wala na magpakabana ang kalibutan sa tinuod nga kinaiyahan ni Jesukristo ug sa Iyang relasyon sa Dios nga Amahan, importante ang pagkaadunay matinud-anong mga saksi sa Hinigugmang Anak sa Dios. Kini nga leksyon makatabang sa mga estudyante sa pag-ila niini nga panginahanglan ug sa pagkat-on unsaon nga mas makapamatuod bahin ni Jesukristo ngadto sa pamilya, mga higala, ug mga silingan.

Pagbasa sa Background

Mga Sugyot alang sa Pagtudlo

Ang Buhi nga Kristo

Isulat sa pisara ang mosunod nga pangutana:

Kinsa si Jesukristo, ug nganong mituo ka Kaniya?

Sultihi ang mga estudyante nga daghang tawo ang mitubag niini nga pangutana pinaagi sa paghatag og usa ka pagpamatuod. Usa niana nga pagpamatuod gipahayag sa himno “Ako Nasayud nga Akong Manunubos Buhi” (Mga Himno ug mga Awit sa mga Bata, nu. 38). Hatagi ang klase og lyrics niini nga himno, ug bahina sa upat ka grupo ang mga estudyante. I-assign og lain-laing bersikulo sa himno ang matag grupo, ug ipabasa nila ang mga pulong. Human sa igong panahon, ipangutana ang mga mosunod:

  • Unsa nga mga pulong ang gigamit niini nga himno nga nagpahayag kon si kinsa si Jesukristo ug unsay Iyang gibuhat para kanato? (Ang mga tubag maglakip sa “buhi ang akong Pangulo,” “Akong Langitnong Higala,” “Akong Propeta ug hari,” “akong Manluluwas.” Iya kitang gipanalanginan sa Iyang gugma, nangamuyo alang kanato, migiya kanato, mihupay, ug sa inadlaw mipaginhawa kanato.)

  • Unsang mga pulong ang gigamit niini nga himno sa paghulagway sa unsang paagi moepekto kanato ang pagpamatuod kang Kristo? (Ang mga tubag maglakip sa “kahupayan” ug “kalipay.”)

Sultihi ang klase nga ang Unang Kapangulohan ug ang Korum sa Napulog Duha ka mga Apostoles mipahayag sa hiniusa nilang pagpamatuod mahitungod ni Jesukristo diha sa “Ang Buhi nga Kristo: Ang Pagpamatuod sa mga Apostoles” (tan-awa sa Liahona, Abr. 2000, 2–3). Hatagi ang matag estudyante og kopya niini nga pagpamatuod, ug ipasabut nga mokuha og daghang topic sa leksyon kini nga kurso gikan sa mga doktrina ug mga baruganan nga gipresentar niining dinasig nga dokumento. Dapita ang usa ka estudyante sa pagbasa og kusog sa unang paragraph:

“Samtang kita magsaulog sa pagkatawo ni Jesukristo duha ka libo ka tuig na ang milabay, kita mohalad sa atong pagpamatuod sa pagkatinuod sa Iyang dili katupngan nga kinabuhi ug sa walay katapusan nga gahum sa Iyang labing dako nga sakripisyo sa pag-ula. Walay lain nga adunay labaw ka mahinungdanon nga impluwensya diha sa tanan kinsa nakapuyo ug magpuyo pa dinhi sa yuta” (“Ang Buhi nga Kristo: Ang Pagpamatuod sa mga Apostoles,” Ensign o Liahona, Abr. 2000, 2).

  • Unsa nga impluwensya ang gusto nimong maangkon sa imong pagtuon bahin ni Jesukristo ug sa Iyang walay katapusang ebanghelyo niini nga semester? (Samtang motubag ang mga estudyante, pwede nimong ma-emphasize nga ang usa ka sinserong pagtuon sa kinabuhi ni Jesukristo makatabang nga kita makapasalamat sa dakong impluwensya nga anaa Kaniya ug atong maangkon sa atong kinabuhi.)

  • Sa unsang mga paagi ang Manluluwas miimpluwensya sa tanan nga nakapuyo o mopuyo pa sa kalibutan? (Samtang motubag ang mga estudyante, siguroa nga ma-emphasize ang universal nga Pag-ula sa Manluluwas.)

Sultihi ang mga estudyante nga kini nga kurso mag-focus sa mahangturong pagpangalagad sa Manluluwas sa tibuok Niyang premortal, mortal, ug postmortal nga kinabuhi. Samtang tun-an sa mga estudyante ang daghan nga balaang tahas sa Manluluwas, ang ilang gugma ug pagpamatuod Kaniya molig-on.

Juan 20:30–31; 1 Nephi 6:4; 2 Nephi 25:23, 26

Gisulat ang mga kasulatan aron ang mga tawo motuo kang Jesukristo

Pangutan-a ang mga estudyante kon pila ka libro ang ilang gituohan nga nasulat mahitungod kang Jesukristo. Ipasabut nga ang tanang tukma nga pagtuon sa kinabuhi ni Jesukristo kinahanglang magsentro sa mga kasulatan. Pagdapit og tulo ka estudyante nga magpuli-puli sa pagbasa og kusog sa mosunod nga mga tudling sa kasulatan: Juan 20:30–31; 1 Nephi 6:4; ug 2 Nephi 25:23, 26. Hangyoa ang klase sa pagsunod, nga mangita sa mga rason nganong usa ka bililhong kapanguhaan ang mga kasulatan kon magtuon sa mahangturong pangalagad sa Manluluwas.

  • Unsay gitudlo nga baruganan niini nga tudling mahitungod sa katuyoan sa mga kasulatan? (Bisan og ang mga estudyante mogamit og lahi nga mga pulong, kinahanglan nga maila nila ang mosunod nga baruganan: Kon magtuon kita sa mga tudling sa kasulatan mahitungod sa Manluluwas, ang atong pagpamatuod Kaniya malig-on ug mas maduol kita Kaniya.)

I-display ang mosunod nga pamahayag ni Elder D. Todd Christofferson sa Korum sa Napulog Duha ka mga Apostoles, ug pagdapit og usa ka estudyante sa pagbasa niini og kusog:

Elder D. Todd Christofferson

“Ang sentrong katuyoan sa tanang kasulatan mao ang pagbusog sa atong mga kalag uban sa hugot nga pagtuo diha sa Dios nga Amahan ug sa Iyang Anak, si Jesukristo. …

“… Ang hugot nga pagtuo moabut pinaagi sa pagsaksi sa Balaang Espiritu sa atong mga kalag, Espiritu ngadto sa espiritu, samtang kita maminaw o magbasa sa pulong sa Dios. Ug ang hugot nga pagtuo mohingkod samtang magpadayon kita sa pagbusog sa pulong” (“Ang Panalangin sa Kasulatan,” Ensign o Liahona, Mayo 2010, 34, 35).

  • Sa unsang mga paagi makatabang kanato ang mga kasulatan sa paglig-on sa atong pagtuo o sa pagpaduol kang Jesukristo?

  • Sa unsang paagi ang imong pagtuo ug pagpamatuod kang Jesukristo nalig-on pinaagi sa pagtuon sa mga kasulatan?

Hatagi ang mga estudyante og kopya sa mga kapanguhaan nga nalista diha sa seksyon nga Mga Basahunon sa Estudyante niini nga kurso. (Pweding usa ka paper copy, o mahimo ra nimong pasabton ang mga estudyante kon asa sila makakita og digital nga kopya.) Hagita ang mga estudyante nga himoon ang mga basahunon sa mga estudyante nga usa ka bahin sa ilang inadlaw nga pagtuon sa kasulatan atol niini nga semester. Ipaniguro sa mga estudyante nga samtang lihukon nila kini nga hagit, matudloan sila sa Espiritu Santo ug mas maduol sila sa Manluluwas.

Pagkahimong mga saksi kang Jesukristo

Ipasabut sa mga estudyante nga dili igo ang pagtuon lang mahitungod sa Manluluwas diha sa mga kasulatan. Kinahanglan nga makabaton sab kita og personal nga espritwal nga saksi o pagpamatuod pinaagi sa gahum sa Espiritu Santo nga si Jesus mao ang Kristo, ang Usa nga Dinihugan, atong Manluluwas ug Manunubos. Ipaambit sa klase ang mosunod nga pamahayag ni Presidente Dieter F. Uchtdorf sa Unang Kapangulohan:

President Dieter F. Uchtdorf

“Dili kita makasalig sa mga pagpamatuod sa ubang tawo. Kinahanglan kitang masayud sa atong kaugalingon. Miingon si Presidente Gordon B. Hinckley, ‘Ang matag Santos sa Ulahing mga Adlaw adunay responsibilidad nga masayud sa iyang kaugalingon uban sa usa ka kasigurohan nga walay bisan unsang pagduha-duha nga si Jesus mao ang nabanhaw, buhi nga Anak sa buhi nga Dios’ (“Fear Not to Do Good,’ Ensign, Mayo 1983, 80).

“Ang tinubdan niining sigurado nga kahibalo ug lig-ong kombiksyon mao ang balaang pagpadayag, ‘ kay ang pagpamatuod ni Jesus mao man ang espiritu sa propesiya’ (Pinadayag 19:10).

“Atong madawat kini nga pagpamatuod kon ang Espiritu Santo mamulong ngadto sa espiritu nga anaa kanato. …

“Ang kinauyukan niini nga pagpamatuod kanunay gayud nga mao ang hugot nga pagtuo ug ang kahibalo kabahin ni Jesukristo ug sa Iyang balaanong misyon” (“Ang Gahum sa Personal nga Pagpamatuod,” Liahona, Nob. 2006, 38).

  • Ngano kaha nga angay man nga si Jesukristo maoy sentro sa atong pagpamatuod?

  • Unsay gibati nimo nga maoy ipabuhat ni Jesukristo kanimo sa imong pagpamatuod Kaniya?

I-display ang mosunod nga pamahayag ni Elder D. Todd Christofferson sa Korum sa Napulog Duha ka mga Apostoles, ug pagdapit og usa ka estudyante sa pagbasa niini og kusog:

Elder D. Todd Christofferson

“Ang mga tawo kinahanglang makakita diha kanato og butang nga kabahin ni Jesukristo. Ang paagi sa atong linihokan, sinultihan, panagway, ug bisan ang paghunahuna mopakita Kaniya sa Iyang mga paagi. … Bisan tuod nga wala kita didto uban Kaniya sa Iyang pangalagad, samtang magsiksik kita sa mga kasulatan, atong makita si Jesus ug ang unsay Iyang gisulti ug gibuhat. Ug samtang kita mosunod niana nga sumbanan, kita naghatag og pagsaksi mahitungod Kaniya” (“Mahimong usa ka Saksi ni Kristo,” Liahona, Mar. 2008, 60).

I-follow up pinaagi sa pagpangutana sa mga estudyante:

  • Sa unsang paagi ninyo nakita ang uban nga misaksi kang Jesukristo pinaagi sa ilang mga buhat?

  • Kon maghunahuna kamo mahitungod sa kalibutan nga inyong gipuy-an, unsa man ang atong mahimo aron ang atong pagsaksi ug pagpamatuod sa Manluluwas makaimpluwensya sa uban?

Ipamatuod nga samtang mag-angkon kita og pagpamatuod kang Jesukristo pinaagi sa gahum sa Espiritu Santo, may responsibilidad kita sa pagpaambit niini.

Hagita ang mga estudyante nga magpakabuhi sila matag adlaw nga andam sa pagpamatuod kang Jesukristo pinaagi sa ilang mga pulong ug mga buhat. Awhaga sila nga mosulod sa klase nga nabasa ang gi-assign nilang mga basahunon sa estudyante ug uban sa kaandam nga mopaambit og mga panabut, mangutana, ug moapil sa diskusyon.

Mga Basahunon sa Estudyante