Mga Milagro sa Kadalanan sa Palestina

Pasiuna

“[Si Jesukristo] naglakaw sa mga dalan sa Palestina, nag-ayo sa masakiton, naghimo nga ang buta makakita, ug nagbuhi sa patay.” (“Ang Buhi nga Kristo: Ang Pagpamatuod sa mga Apostoles,” Ensign o Liahona, Abr. 2000, 2). Ang mga milagro importanting mga bahin sa manggiloy-on nga mortal nga pangalagad sa Manluluwas, apan ebidensya usab kini sa Iyang gahum ug awtoridad, naghatag og kamatuoran sa Iyang gipangangkon nga Siya ang Mesiyas. Pinaagi sa paggamit og pagtuo kang Jesukristo, kita usab makasaksi o makasinati sa gugma sa Manluluwas, kamanggiloy-on, ug gahum pinaagi sa mga milagro.

Pagbasa sa Background

Dallin H. Oaks, “Miracles,” Ensign, Hunyo 2001, 6–17.
Sydney S. Reynolds, “A God of Miracles,” Ensign, Mayo 2001, 12–13.

Mga Sugyot alang sa Pagtudlo

Marcos 1:39–42; 2:1–12; 5:1–8, 19, 22–43; 8:1–9; Lucas 7:11–15; 3 Nephi 17:5–9

Naghimo og mga milagro ang Manluluwas atol sa Iyang mortal nga pangalagad

Isulat sa pisara ang mosunod nga mga pulong: gipalinaw ang dagat, gibuhi ang patay, ug mipagula sa dautang mga espiritu. Pangutan-a ang mga estudyante asa niini nga mga milagro nga gihimo sa Manluluwas sa ilang hunahuna maoy pinakalabaw sa tulo. Human motubag ang mga estudyante, idugang ang milalang sa yuta sa gilista sa pisara ug ipangutana hain ang pinakalabaw. Sublia ang kalihokan gamit ang nakabig nga mga kalag ug, sa katapusan, gamit ang nag-antus ug namatay para sa atong mga sala.

Pangutan-a ang mga estudyante kon unsaon nila sa pagpasabut ang pulong nga milagro. Human motubag ang mga estudyante, i-display ang mosunod nga depinisyon ug dapita ang usa ka estudyante sa pagbasa og kusog niini:

“[Ang milagro] usa ka talagsaon nga hitabo nga nahimo pinaagi sa gahum sa Dios. Ang mga milagro mahinungdanon nga elemento sa buluhaton ni Kristo. Naglakip kini sa mga pagpang-ayo, pagbuhi sa mga patay, ug sa pagkabanhaw. Ang mga milagro kabahin sa ebanghelyo ni Jesukristo. Ang hugot nga pagtuo gikinahanglan aron sa pagpakita sa mga milagro” (Giya sa mga Kasulatan, “Milagro”; scriptures.lds.org).

Unsa ang uban pang dugang nga ehemplo sa mga milagro nga gihimo ni Jesus atol sa mortal Niya nga pangalagad? (Ilista sa pisara ang tubag sa mga estudyante.)
Nganong importante ang pagkahibalo kon asa kutob ang maabut sa gahum sa Manluluwas?

Ilista sa pisara ang mosunod nga mga reference sa kasulatan, ug dapita ang mga estudyante sa pagpili og usa nga katun-an: Marcos 1:40–42; Marcos 5:1–8, 19; Marcos 8:1–9; Lucas 7:11–15; ug 3 Nephi 17:5–9. Ipa-identify nila diha sa gibasa nila nga tudling ang usa ka milagro nga gihimo sa Manluluwas ug kon unsay gihulagway niini mahitungod sa Iyang gahum. Human sa igong panahon, hisguti ang mosunod nga mga pangutana:

Kabahin sa unsa nga milagro ang inyong gibasa, ug unsa ang gihulagway niini mahitungod sa gahum sa Manluluwas?
Sa unsang paagi ang pagsabut sa gahum sa Manluluwas sa paghimo og mga milagro nakatabang kanimo sa pagbaton og pagtuo Kaniya? (Samtang motubag ang mga estudyante, mahimo nimong ipasabut nga sulod sa mga siglo sa wala pa matawo ang Manluluwas, nakita sa mga propeta nga mohimo Siya og mga milagro atol sa Iyang pagpangalagad sa kalibutan [tan-awa sa 1 Nephi 11:31; Mosiah 3:5–6]. Kini nga kahibalo nakatabang niadtong mga nanagpuyo kaniadto sa wala pa Siya matawo aron makabaton og pagtuo Kaniya.)

Dapita ang mga estudyante nga tan-awon og balik ang tudling nga ilang gitun-an ug sa pag-identify sa gisulti nga rason nganong mihimo og milagro si Jesus. Hisguti ang mosunod nga mga pangutana:

Unsa man ang gisulti nga rason sa paghimo sa Manluluwas og milagro diha sa imong gibasa? (Tuguti ang pipila ka estudyante sa pagtubag. Ang kamanggiloy-on sa Manluluwas gihisgutan diha sa matag example. Sultihi ang mga estudyante nga samtang magkat-on sila sa pag-identify sa mga pattern o sundanan ug sa mga tema nga sama niini nga naa sa mga kasulatan, mapalawman pa nila ang ilang kahibalo sa mga kasulatan.)
Sa unsang mga paagi kini nga mga milagro nagpakita sa kamanggiloy-on sa Manluluwas?
Unsay nahimong kalainan sa pagkahibalo nga usahay mohimo og mga milagro ang Manluluwas tungod sa dako kaayo Niya nga kalooy? (Samtang motubag ang mga estudyante, ipasabut og maayo nga kon mogamit kita og pagtuo kang Jesukristo, madawat nato ang Iyang talagsaong gahum ug mobati sa Iyang kamanggiloy-on para kanato.)

Tapusa kini nga porsyon sa leksyon pinaagi sa pagdapit og usa ka estudyante nga mobasa sa Mga Buhat 10:38 samtang ang uban sa klase magsunod. Dayon pangutan-a ang mga estudyante:

Unsay buot ipasabut sa giingon nga giayo ni Jesus ang “ tanang gisakit sa yawa”? (Kini nga mga pulong nag-refer sa mga milagro ni Jesus nga mipagula og mga yawa ingon man usab sa pinakatalagsaong milagro sa tanan—ang espiritwal nga pagpang-ayo nga gihimo ni Jesus niadtong tanang gisakit sa sala. Ipasabut nga bisan og ang pisikal nga pagpang-ayo usa ka importanting bahin sa pangalagad sa Manluluwas, temporaryo lamang ang mga epekto niini. Ang panalangin sa espirituhanong pagkaayo sukad pa—ug hangtud karon—walay katapusan.)

Marcos 2:1–12; 5:22–43

Ang pagtuo kang Jesukristo magdala og mga milagro sa atong kinabuhi

Sultihi ang mga estudyante nga bisan og importante ang pagkahibalo nga mihimo si Jesus og mga milagro samtang “naglakaw Siya sa mga dalan sa Palestina” (“Ang Buhi nga Kristo: Ang Pagpamtuod sa mga Apostoles,” 2), tingali mas importanting mahibaloan nga padayon gihapon Siyang naghimo og mga milagro karon. Ipabasa og hilum sa mga estudyante ang Ether 12:12, 18 ug dayon ipasulat ang baruganan sa ebanghelyo nga ilang nakat-unan gikan niini nga mga bersikulo. Dapita ang pipila ka mga estudyante nga ipaambit sa klase unsay ilang gisulat. (Ang mga tubag kinahanglang maglakip sa mosunod nga kamatuoran: Kon ipakita nato ang atong pagtuo kang Jesukristo, masaksihan nato ang Iyang milagrusong gahum sa atong kinabuhi.)

Aron matabangan ang mga estudyante sa pagsuhid niini nga kamatuoran isulat sa pisara ang mosunod nga mga reference sa kasulatan: Marcos 2:1–12; Marcos 5:22–24, 35–43; ug Marcos 5:25–34. (Pahinumdom: Mahimo nimong ipasabut nga kini nga tudling naglangkob og lahi nga paghulagway sa pattern o tema diha sa mga kasulatan.) Bahina ang klase ngadto sa tagtulo. I-assign ang matag grupo sa pagbasa sa usa sa mga tudling, nga mangita sa mga paagi nga napakita ang pagtuo kang Jesukristo. Human sa igo nga panahon, ipangutana:

Unsa nga ebidensya sa pagtuo kang Jesukristo ang inyong nakita?

Hatagi ang matag estudyante og kopya sa handout nga “Pag-ayo sa Masakiton.”

Pag-ayo sa Masakiton

Si Elder Dallin H. Oaks sa Korum sa Napulog Duha ka mga Apostoles mitudlo nga mahinungdanon ang pagtuo para mahitabo ang mga milagro:

“Ang hugot nga pagtuo mahinungdanon alang sa pagpang-ayo pinaagi sa mga gahum sa langit. Gani ang Basahon ni Mormon nagtudlo nga “kon wala ang hugot nga pagtuo taliwala sa mga katawhan ang Dios dili makahimo og milagro taliwala kanila’ (Ether 12:12) [tan-awa usab sa 1 Nephi 7:12; D&P 35:9]. Sa usa ka talagsaon nga pagpamulong kabahin sa pagpangalagad ngadto sa masakiton, si Presidente Spencer W. Kimball miingon: ‘Ang panginahanglan sa hugot nga pagtuo kanunay nga gibaliwala. Ang usa ka tawo nga masakiton ug ang pamilya daw kanunay nga nagsalig lamang diha sa gahum sa priesthood ug sa gasa sa pagpang-ayo nga ilang gilauman nga anaa sa nagdumala nga mga lalaki, nga ang dakong responsibilidad anaa man unta kaniya nga gipanalanginan. … Ang labing dako nga elemento mao ang hugot nga pagtuo sa usa ka indibidwal kon kana nga tawo nahibalo ug makapanubag. “Ang imong pagsalig nakapaayo kanimo” [Mateo 9:22] kanunay nga gibalik-balik sa Manluluwas nga hapit na kini nahimong usa ka gubaon nga plaka’ [“President Kimball Speaks Out on Administration to the Sick,” New Era, Okt. 1981, 47]” (“Pag-ayo sa Masakiton,” Liahona, Mayo 2010, 49).

Gipahinumduman usab kita ni Elder Dallin H. Oaks nga ang usa ka importanting bahin sa pag-angkon og pagtuo mao ang kaandam sa pagdawat sa kabubut-on sa Dios:

“Samtang atong gamiton ang dili madudahan nga gahum sa priesthood sa Dios ug samtang atong gihatagan og bili ang Iyang saad nga Siya maminaw ug motubag sa pag-ampo inubanan sa hugot nga pagtuo, hinumduman gayud nato kanunay nga ang hugot nga pagtuo ug ang gahum sa pagpang-ayo sa priesthood dili makahimo og resulta nga sukwahi sa Iyang kabubut-on kansang priesthood Iyaha. Kini nga baruganan gitudlo sa pinadayag nga nagtudlo nga ang mga elder sa Simbahan mopandong sa ilang mga kamot sa mga masakiton. Ang saad sa Ginoo mao nga ‘siya nga adunay hugot nga pagtuo kanako mamaayo, ug wala ikatakda ngadto sa kamatayon, pagaayohon’ (D&P 42:48; emphasis gidugang). Sa samang paagi, sa laing bag-o nga pinadayag ang Ginoo namahayag nga kon ang usa ka tawo ‘nangayo sumala sa kabubut-on sa Dios … kini nahimo ingon sa iyang gipangayo’ (D&P 46:30) [tan-awa usab sa 1 John 5:14; Helaman 10:5].

“Gikan niining tanan atong nakat-unan nga bisan ang mga sulugoon sa Ginoo, nga naggamit sa Iyang balaanong gahum sa usa ka kahimtang diin adunay igo nga pagtuo nga pagaayohon, dili makahatag og panalangin sa priesthood nga makapaayo sa tawo kon kana nga pag-ayo dili mao ang kabubut-on sa Ginoo.

“Isip mga anak sa Dios, nga nasayud sa Iyang dakong gugma ug sa Iyang dili masukod nga kahibalo kon unsay labing maayo alang sa atong mahangturon nga kaayohan, mosalig kita Kaniya. Ang unang baruganan sa ebanghelyo mao ang hugot nga pagtuo diha ni Ginoong Jesukristo, ug ang hugot nga pagtuo nagkahulugan og pagsalig. Akong gibati kana nga pagsalig sa usa ka pagpamulong nga gihatag sa akong ig-agaw sa panahon sa usa ka lubong sa batan-ong babaye kinsa namatay sa grabe nga sakit. Namulong siya niini nga mga pulong, nga sa sinugdanan mipahingangha kanako ug dayon milig-on kanako: ‘Nasayud ako nga kabubut-on kadto sa Ginoo nga siya mamatay. Siya adunay maayo kaayo nga medikal nga pag-atiman. Gihatagan siya og mga panalangin sa priesthood. Ang iyang pangalan gibutang sa prayer roll sa templo. Siya ang gihisgutan sa gatusan ka mga pag-ampo aron mahimsog og balik. Ug nasayud ako nga adunay igo nga hugot nga pagtuo niini nga pamilya nga mamaayo unta siya gawas kon kabubut-on sa Ginoo nga pagakuhaon siya niining higayuna.’ Akong gibati kanang sama nga pagsalig diha sa mga pulong sa amahan sa usa ka laing pinili nga batang babaye kansang kinabuhi gikuha tungod sa kanser sa iyang batan-on nga pangidaron. Siya mipahayag, ‘Ang hugot nga pagtuo sa among pamilya anaa kang Jesukristo, ug wala magdepende sa mga resulta.’ Kadto nga mga pagtulun-an mga tinuod gayud alang kanako. Atong himoon kutob sa atong mahimo aron ayohon ang usa ka minahal, ug dayon mosalig kita sa Ginoo alang sa resulta” (“Pag-ayo sa Masakiton,” Liahona, Mayo 2010, 50).

Aron matabangan ang mga estudyante nga masabtan ang mga requirement sa pagtuo diha sa paghimo og mga milagro, dapita ang usa ka estudyante sa pagbasa og kusog sa unang pamahayag nga naa sa handout ni Elder Dallin H. Oaks sa Korum sa Napulog Duha ka mga Apostoles. Dayon ipangutana:

Unsa nga importanting mga kamatuoran ang gitudlo ni Elder Oaks mahitungod sa pagtuo?

Para sa dugang nga mga insight gikan ni Elder Oaks, ikonsiderar ang pagbasa o pagpaambit sa kaugalingon nimong mga pulong ang ikaduhang pamahayag nga naa sa handout. Mahimo nimong isulti nga gitumong ni Elder Oaks kini nga mga pamahayag ngadto sa mga naghupot sa priesthood. Hisguti ang mosunod nga mga pangutana:

Unsa man ang giingon ni Elder Oaks nga gi-require kanato kon mag-ampo kita uban sa pagtuo para mahitabo ang milagro?
Nganong importante nga mahibaloan nga kon unsay atong gitinguha kinahanglang magsubay kon unsay kabubut-on sa Langitnong Amahan?

Ipamatuod nga mahitabo gihapon ang mga milagro karon. Ipakigbahin ang mosunod nga pamahayag ni Elder Dallin H. Oaks sa Korum sa Napulog Duha ka mga Apostoles:

“Ang mga milagro nahitabo matag adlaw sa buhat sa atong Simbahan ug sa kinabuhi sa atong mga miyembro. Daghan kaninyo nakasaksi og mga milagro, tingali sobra pa sa inyong mahunahunaan” (“Miracles,” Ensign, Hunyo 2001, 6).

Ngano kaha nga dili man nato mamatikdan sa kanunay ang mga milagro nga nahitabo sa atong kinabuhi? (Samtang motubag ang mga estudyante, mahimo nimong ipasabut nga ang pipila ka milagro maglakip og katingalahang manipestasyon sa gahum sa Dios. Daghang milagro ang daw gamay ra ug mahitabo ra sa pribado. [Tan-awa sa Sydney S. Reynolds, “A God of Miracles,” Ensign, Mayo 2001, 12–13.])
Unsa ang gipadayag niining ginagmay, pribadong mga milagro mahitungod sa interes sa Langitnong Amahan ug ni Jesukristo kanato?
Unsa nga mga example sa “ginagmay” o “inadlaw” nga mga milagro ang inyong mahunahunaan? (Kon walay motubag, ikonsiderar ang pagpaambit og pipila nga gihisgutan ni Sister Sydney S. Reynolds sa kinatibuk-ang presidency sa Primary sa “A God of Miracles” [Ensign, Mayo 2001, 12–13].)

Dapita ang mga estudyante nga isulat ang ilang tubag sa mosunod nga pangutana:

Unsa kaha ang inyong mahimo aron mas maila ug makabaton og mas dakong pasalamat sa dagko ug gagmay—nga mga milagro sa Ginoo—sa inyong kinabuhi?

Awhaga ang mga estudyante nga magmainampuon sa pagkonsiderar kon unsaon nila sa paglihok unsay ilang gisulat. Tapusa pinaagi sa pagpangutana kon duna ba sa imong mga estudyante ang gustong mopaambit sa ilang pagpamatuod sa Manluluwas ug sa gugma nga ilang gibati gikan Kaniya ug para Kaniya.

Mga Basahunon sa Estudyante

Marcos 1:39–42; 2:1–12; 5:1–8, 19, 22–43; 8:1–9; Lucas 7:11–15; 1 Nephi 11:31; Mosiah 3:5–6; 3 Nephi 17:5–9.
Sydney S. Reynolds, “A God of Miracles,” Ensign, Mayo 2001, 12–13.