Leksyon 13: Mitawag si Jesukristo og Napulog Duha ka mga Apostoles
13
Mitawag si Jesukristo og Napulog Duha ka mga Apostoles
Pasiuna
Atol sa Iyang mortal nga pagpangalagad, ang Manluluwas, mitawag, miorden, ug mihatag og awtoridad sa napulog duha ka mga Apostoles. Gitugyan Niya ang mga yawe sa priesthood kanila, ug nakadawat sila og saksi sa Iyang kabalaan. Ubos sa direksyon sa Manluluwas, mitabang ang mga Apostoles sa pagdumala sa Simbahan ug giandam para sa panahon kon wala na Siya sa kalibutan. Kini nga leksyon magsuhid sa awtoridad sa priesthood sa Manluluwas ug sa Iyang pag-andam sa mga Apostoles para mogiya sa Simbahan.
Pagbasa sa Background
Boyd K. Packer, “Ang Napulog Duha,”Liahona, Mayo 2008, 83–87.
Edward J. Brandt, “And He Gave Some, Apostles,” Liahona, Sept. 2001, 32–39.
Gitugyan ni Jesukristo ang mga yawe sa priesthood ngadto sa Iyang mga Apostoles
Sugdi ang klase pinaagi sa pagpangutana sa mosunod:
Unsaon man nato sa pag-ila sa mga indibidwal nga dunay awtoridad nga mangulo sa atong komunidad?
Sa unsang paagi ang tawo nga nagpuyo sa panahon ni Jesukristo miila sa Iyang awtoridad? (Ang posibling mga tubag naglakip sa Iyang gahum, mga milagro, ug mga pagtulun-an.)
Ipakonsiderar sa klase kini nga pangutana: “Sa unsang paagi, kanus-a, ug pinaagi ni kinsa nadawat sa Manluluwas ang Melchizedek Priesthood?” Dayon ipaambit ang mosunod nga mga pamahayag ni Elder B. H. Roberts (1857–1933) sa Seventy ug ni Elder Bruce R. McConkie (1915–85) sa Korum sa Napulog Duha ka mga Apostoles:
Imahe
Elder B. H. Roberts
“Kini nga tudling [D&P 107:2–4] tin-aw nga nag-establisar sa kamatuoran nga ang Melchizedek Priesthood diha nang daan sa wala pa ang labaw nga High Priest Melchizedek, apan lahi lang ang ngalan niini, mao ang—‘Balaan nga Priesthood subay sa han-ay sa Anak sa Dios.’ Buot ipasabut, sama ra kini nga matang sa priesthood, sama ra nga han-ay sa priesthood, nga gihuptan sa Anak sa Dios. Apan kaniadto ra kini sa wala pa ang kapanahunan ni Melchizedek, sa wala pa si Abraham, ug mga gatusan pa ka tuig sa wala pa matawo si Kristo sa kalibutan. … Dayon, gihuptan ni Jesus, ang gitawag nato karon og Melchizedek Priesthood sa wala pa siya mopakita dinhi sa kalibutan, ug walay pagduda niini sa wala pa pormaha kini mismo nga kalibutan, … apan ‘sa unsang paagi, diin ug pinaagi ni kinsa’ niya nadawat kini, walay nasayud, gawas lang tingali sa katapusan, ginganlan og., ‘kang kinsa.’ Sigurado, siyempre, nadawat Niya kini gikan sa Dios” (B. H. Roberts, Improvement Era, Mayo, 1908, 557).
Imahe
Elder Bruce R. McConkie
“Apan mahitungod sa iyang mortal nga pangalagad, nadawat ni Kristo … ang Melchizedek Priesthood dinhi sa kalibutan, ug niana giorden sa office sa high priest, sa ingon ang pagpakita og ehemplo para sa uban ug para sa tanang butang ang orihinal nga modelo sa kaluwasan” (Bruce R. McConkie, Doctrinal New Testament Commentary, vol. 3 [1973], 157).
I-display o isulat sa pisara ang mosunod nga mga pangutana, ug ipapangita sa mga estudyante ang mga tubag diha sa Mateo 10:1–8 ug Juan 15:16:
Unsa nga awtoridad ang gitugyan ni Jesukristo ngadto sa Iyang mga Apostoles?
Niini nga awtoridad unsa man ang pwede nilang mahimo?
Human sa igong panahon, dapita ang mga estudyante nga makigpares og laing sakop sa klase sa paghisgot unsay ilang nakit-an. Dayon dapita ang pipila ka estudyante nga ipaambit sa klase ang ilang mga tubag. Tabangi nga mahibaloan sa mga estudyante nga gihatagan ni Jesus og awtoridad sa priesthood ang Iyang mga Apostoles aron makahimo sila sa sama nga buluhaton nga nakita nila nga Iyang gibuhat.
Dapita ang usa ka estudyante sa pagbasa og kusog sa Mateo 16:15–19. Ipangutana:
Giunsa man sa pagkahibalo ni Pedro sa awtoridad ni Jesus? (Pinaagi sa pagpadayag, nga mao ra gihapong paagiha nga ang modernong mga disipulo nahibalo sa Iyang awtoridad.)
Unsay gisaad ni Jesus nga Iyang ihatag kang Pedro?
Dapita ang mga estudyante nga magpuli-puli sa pagbasa og kusog sa Mateo 17:1–8. Dayon ipangutana:
Nganong si Moises ug sa Elias mipakita kang Pedro, Santiago, ug Juan?
Aron matabangan ang mga estudyante nga makatubag niini nga pangutana, i-display ang mosunod nga pamahayag ni Propeta Joseph Smith (1805–44) ug ni Presidente Joseph F. Smith (1838–1918):
Imahe
Prophet Joseph Smith
“Ang Manluluwas, si Moises, ug Elias [Elijah], mihatag sa mga yawe ngadto ni Pedro, Santiago, ug Juan, didto sa bungtod, sa dihang nausab ang ilang panagway sa iyang atubangan” (Mga Pagtulun-an sa mga Presidente sa Simbahan: Joseph Smith [2007], 123).
Imahe
President Joseph F. Smith
“Ang Priesthood sa kinatibuk-an mao ang awtoridad nga gihatag ngadto sa tawo aron makalihok alang sa Dios. Ang matag tawo nga giordinahan sa bisan unsa nga ang-ang sa Priesthood aduna niini nga awtoridad nga gitugyan kaniya.
“Apan gikinahanglan nga ang matag lihok nga gipahigayon ubos niini nga awtoridad kinahanglan nga buhaton sa tukma nga panahon ug dapit, sa tukma nga paagi, ug pinasubay sa tukma nga han-ay. Ang gahum sa paggiya niini nga mga paningkamot naglangkob sa mga yawe sa Priesthood” (Mga Pagtulun-an sa mga Presidente sa Simbahan: Joseph F. Smith [1998], 141).
Ipasabut nga nakat-unan nato sa Doktrina ug mga Pakigsaad 110 nga si Moises ug Elijah mipakita usab kang Propeta Joseph Smith ug kang Oliver Cowdery sa Kirtland Temple ug mitugyan sa mga yawe sa priesthood ngadto kanila. Kini nga istorya diha sa Doktrina ug mga Pakigsaad nagtabang nga atong masabtan unsay panghitabo sa Bukid sa Transpigurasyon. Mahimo nimong isugyot nga isulat sa mga estudyante ang Doktrina ug mga Pakigsaad 110:13–16 isip cross-reference diha sa margin tupad sa Mateo 17:1–8.
I-follow up pinaagi sa pagpangutana sa mga mosunod:
Nganong importante man para sa mga Apostoles ni Jesukristo ang pagbaton og mga yawe? (Mahimong mogamit ang mga estudyante og lahi-lahing mga pulong sa pagpahayag sa mosunod nga kamatuoran: Gitugyan ni Jesus ang mga yawe ngadto sa Iyang mga Apostoles aron aduna silay awtoridad sa pagdumala sa Simbahan sa wala pa ug human sa Iyang kamatayon. Mahimo nimong ipasabut og maayo nga gikan sa usa ka mahangturong panglantaw, importante kaayo ang mga yawe sa pag-establisar ug pagbaton og kahan-ay sa Simbahan sa Ginoo, nga makatabang nga mahitabo ang pagka-imortal ug kinabuhing dayon sa tawo.)
Sa unsang paagi ang kasinatian ni Pedro, Santiago ug Juan sa Bukid sa Transpigurasyon makatabang sa pag-andam nila sa pagdumala sa Simbahan human sa pagkamatay sa Manluluwas?
Mahimo nimong ipasabut nga sa Mateo 18:18–19 atong nakat-unan nga ang mga yawe sa priesthood gihatag ngadto sa tanang Apostoles ni Jesus.
I-assign ang mga estudyante nga magpares sa pagtuon og usa o duha niini nga mga tudling ug sa pagkonsiderar unsa nga mga baruganan ang nakat-unan sa mga Apostoles gikan sa ilang mga kasinatian uban sa Manluluwas. Dayon dapita ang pipila ka mga estudyante nga ipaambit sa klase unsay ilang nahisgutan. Mahimo nimong isulat ang ilang mga tubag diha sa pisara. Dayon i-follow up og pangutana sama sa mosunod:
Nganong importante man nga makat-unan sa mga Apostoles kini nga mga baruganan?
Giunsa kaha sa pag-andam sa Manluluwas ang mga Apostoles sa pagserbisyo?
Sa unsang paagi ang pagkahibalo nga gigiyahan ni Jesukristo ang Iyang mga Apostoles makatabang aron makasalig ka sa ilang tambag?
Ang modernong mga Apostoles dunay tinuod nga pagsaksi kang Jesukristo
Sultihi ang mga estudyante nga ang Buhat 1 naglangkob og istorya mahitungod sa gihimong pagpili sa mga Apostoles nga ipuli kang Judas Iscariote, human sa pagkabanhaw sa Manluluwas. Dapita ang mga estudyante sa pagbasa sa Mga Buhat 1:21–22 ug ipa-identify ang mga rekisito nga kinahanglang makab-ot sa bag-ong Apostol.
Unsa ang mga kwalipikasyon para sa bag-ong Apostol? (Siya “among gikauban [sila]” ug usa ka “saksi … sa pagkabanhaw sa [Manluluwas].”)
Sumala sa bersikulo 22, unsa man ang gi-orden nga buhaton sa bag-ong Apostol? (Ikonsiderar ang pagdapit nga basahon sa mga estudyante ang Mga Buhat 1:8 aron makita nila unsa nga sugo ang gihatag ni Jesus sa tanan Niya nga mga Apostol.)
Iparibyu sa mga estudyante ang mosunod nga mga tudling ug ipa-identify unsay anaa nga komon niini: Mga Buhat 2:22–24, 32; Mga Buhat 3:12–16; Mga Buhat 4:31–33; ug Mga Buhat 5:29–32. Human sa igong panahon, hangyoa sila sa paghisgot sa ilang mga nakita. (Ipaniguro nga mahibaloan sa mga estudyante nga gituman sa mga Apostoles ang gisugo kanila sa pagsaksi kang Jesukristo.)
Dapita ang mga estudyante sa pagkonsiderar sa unsang paagi ang sugo sa modernong mga apostoles susama sa nag-unang mga Apostoles. Ipabasa og kusog sa usa ka estudyante ang Doktrina ug mga Pakigsaad 107:23. Dayon pangutan-a ang klase:
Unsa nga doktrina ang gitudlo niini nga mga bersikulo? (Kinahanglang mahibaloan sa mga estudyante nga ang mga Apostoles gisugo nga mahimong espesyal nga mga saksi sa pangalan ni Kristo sa tibuok kalibutan.)
Sa unsang paagi ninyo naobserbahan nga gituman kini nga responsibilidad sa mga Apostoles?
Dapita ang usa ka estudyante sa pagbasa og kusog sa mosunod nga pamahayag ni Presidente Boyd K. Packer sa Korum sa Napulog Duha ka mga Apostoles:
Imahe
President Boyd K. Packer
“Human sa tanang katuigan nga ako nabuhi ug nagtudlo ug nagserbisyo, human sa minilyon ka milya nga akong nabiyahe ang tibuok kalibutan, nianang tanan nga akong nasinati, adunay usa ka dakong kamatuoran nga akong ipakigbahin. Kini ang akong pagsaksi sa Manluluwas nga si Jesukristo. …
“Mohatag ko sa akong pagsaksi nga ang Manluluwas buhi. Ako nakaila sa Ginoo. Ako Iyang saksi. Ako nasayud sa Iyang dakong sakripisyo ug mahangturong gugma alang sa tanang mga anak sa Langitnong Amahan. Mohatag ko sa akong linain nga pagsaksi sa tanang pagpaubos apan sa hingpit nga kasigurohan” (“Ang Pagsaksi,”Liahona, Mayo 2014, 97).
Kanus-a kamo mibati sa gahum sa pagpamatuod sa usa ka Apostol ni Jesukristo, ug sa unsang paagi miimpluwensya kini sa inyong pagpamatuod?
Sa unsang paagi ninyo mahibaloan nga ang gihatag nga pagsaksi sa modernong mga Apostoles mahitungod ni Jesukristo tinuod? (Kinahanglang mahibaloan sa mga estudyante ang mosunod nga kamatuoran: Pinaagi sa Espiritu Santo, akong mahibaloan nga ang gihatag nga pagsaksi sa buhi nga mga Apostoles mahitungod ni Jesukristo tinuod.)
Hagita ang mga estudyante sa pagpili og usa ka pagsaksi kang Kristo nga gihatag sa usa ka modernong Apostol ug mo-identify sa mainampuong paagi og tawo asa nila kini ipaambit. Awhaga sila nga personal nilang ipamatuod nga tinuod ang mensahe sa Apostol.