Mga Seminary ug mga Institute
Leksyon 14: Si Jesukristo Mao ang Mesiyas

14

Si Jesukristo Mao ang Mesiyas

Pasiuna

Ang mga propeta sa Daang Tugon mipamatuod sa moabut nga Mesiyas—nga usa ka kaliwat ni Haring David nga moluwas sa Iyang katawhan. Si Jesukristo mao “ang Halangdong Jehova sa Daang Tugon, ang Mesiyas sa Bag-ong Tugon” (“Ang Buhi nga Kristo: Ang Pagpamatuod sa Buhing mga Apostoles,” Ensign o Liahona, Abr. 2000, 2). Niini nga leksyon, suhiron sa mga estudyante ang pipila ka mga panagna sa Daang Tugon mahitungod ni Jesukristo ug diskubrihon unsay reaksyon sa ubang mga tawo dihang naghunahuna sila kon dawaton ba o isalikway si Jesukristo isip Mesiyas.

Pagbasa sa Background

  • G. Homer Durham, “Jesus the Christ: The Words and Their Meaning,” Ensign, Mayo 1984, 14–16.

  • “Ang Balaan nga Misyon ni Jesukristo: Mesiyas,” Liahona, Ago. 2014, 7.

Mga Sugyot alang sa Pagtudlo

Isaias 61:1–2; Lucas 4:16–24

Gipahibalo ni Jesus nga Siya ang Mesiyas

Pangutan-a ang mga estudyante kon nakasinati na ba sila nga makadungog og dugay na kaayong gihulat nga pahibalo o nakakita sa pag-abut sa dugay na kaayong gihulat nga higala o sakop sa pamilya. Sultihi ang mga estudyante nga ang leksyon karon magsuhid sa susamang kasinatian sa karaang mga Judeo. Dapita ang usa ka estudyante sa pagbasa og kusog sa Isaias 61:1–2. Dayon ipangutana:

  • Kinsa ang gihisgutan niini nga panagna?

Ipakita ang video nga “Jesus Declares He Is the Messiah” (3:24) gikan sa The Life of Jesus Christ Bible Videos. (I-download ug i-preview ang video sa dili pa magklase.) Dapita ang mga estudyante sa pagsunod sa Lucas 4:16–21 samtang magtan-aw sila.

Human mapasalida ang video, ipangutana:

  • Unsaon nimo pag-summarize ang mensahe sa Manluluwas nianang adlawa didto sa Nazareth? (Samtang motubag ang mga estudyante, isiguro nga mag-focus ang diskusyon sa bersikulo 18 ug sa bersikulo 21.)

  • Unsa man kaha ang kahulugan sa mga pulong nga “iya akong gidihugan” ug “niining adlawa karon, kining bahina sa kasulatan natuman diha sa inyong pagpatalinghug niini”? (Aron matabangan sa pagsabut ang mga estudyante nga ang Mesiyas ug ang Kristo parehong nagpasabut isip “ang Usa nga Dinihugan,” dapita sila nga basahon ang pasiuna alang sa “Mesiyas” sa Giya sa mga Kasulatan (tan-awa sa scriptures.lds.org).

  • Giunsa man sa pagtuman ni Jesus ang panagna gikan sa Isaias nga gikutlo niya gikan sa (tan-awa sa mga bersikulo 18–19)?

Mateo 21:1–11

Mianhi si Jesukristo isip ang Mesiyas

I-display o isulat sa pisara ang mosunod nga hut-ong sa scripture passage, ug dapita ang mga estudyante sa pagpili og usa o duha aron tun-an. Samtang itandi ug ikumpara sa mga estudyante ang mga tudling nga ilang gipili, pahunahunaa sila kon nganong gipangpundok man ang mga tudling ug kon unsay gitudlo niini mahitungod ni Jesukristo.

Isaias 7:14; Mateo 1:21–23

Miqueas 5:2; Lucas 2:4–7

Zacarias 9:9; Mateo 21:6–11; Juan 12:12–15

Salmo 22:16, 18; Mateo 27:35

Isaias 53:9; Mateo 27:59–60; Juan 19:18, 38–42

Dapita ang mga estudyante sa pagpaambit kon unsay ilang nakat-unan. (Bisan og mogamit sila og lahi nga mga pulong kinahanglang masabtan sa mga estudyante nga mianhi si Jesus, nabuhi, ug namatay alang sa katumanan sa mesiyanikanhong pagpanagna.) Ipasabut gayud nga kini nga kamatuoran mao ang gipahibalo na sa Manluluwas didto sa Nazareth. Basaha og kusog ang Lucas 4:28–29. Dayon ipangutana:

  • Unsay reaksyon sa mga tawo sa sinagoga didto sa Nazareth bahin sa gipahibalo ni Jesus?

Sultihi ang mga estudyante nga paglabay sa pipila ka tuig, nasinati ni Jesus ang lahi kaayo nga reaksyon gikan sa ubang tawo sa Jerusalem. Dapita ang mga estudyante nga magpuli-puli sa pagbasa og kusog sa Mateo 21:1–11. Sa dili pa mobasa ang mga estudyante, awhaga ang klase sa pag-visualize nga naa sila atol sa hitabo nga gihulagway niini nga tudling. Pasabta ang mga estudyante nga samtang magkat-on sila sa pag-visualize kon unsay nanghitabo diha sa mga kasulatan, nga hatagan nila og dugang nga oportunidad ang Espiritu Santo sa pagtudlo kanila.

  • Ngano kaha nga ang mga tawo sa Jerusalem ingon man niini og reaksyon? (Ilang namatikdan nga si Jesus mao diay ang Mesiyas nga dugay nang giapaabut.)

  • Kon kamo pa, unsa man kaha ang inyong reaksyon?

Ipasabut gayud ang pulong nga Hosanna sa bersikulo 9; dayon ipaambit ang mosunod nga depinisyon:

Ang “[Hosanna usa ka] pulong sa Hebrew nga nagpasabut nga “palihug luwasa kami” ug gigamit alang sa pagdayeg ug pagpangamuyo.

“… Sa madaugong pagsulod sa Ginoo ngadto sa Jerusalem, ang panon sa katawhan nanagsinggit ‘Hosanna’ ug nagkatag sila’g mga palwa sa palmera nga agian ni Jesus, sa ingon nagpakita sa ilang panabut nga si Jesus mao ra gihapon ang Ginoo nga miluwas sa Israel sa karaang panahon (Sal. 118:25–26; Mat. 21:9, 15; Marcos 11:9–10; Juan 12:13). Kining mga tawhana miila nga si Kristo mao ang dugay na nga gipaabut nga Mesiyas. Ang pulong nga Hosanna nahimong usa ka selebrasyon sa Mesiyas sa tanang kapanahunan (1 Ne. 11:6; 3 Ne. 11:14–17). Ang singgit nga hosanna gilakip sa pagpahinungod sa Kirtland Temple (D&P 109:79) ug karon usa na kini ka bahin sa pagpahinungod sa modernong mga templo” (Giya sa mga Kasulatan, “Hosanna”; scriptures.lds.org).

Ikonsiderar ang pag-display sa mosunod nga mga katuyoan sa mesiyanikanhong mga panagna (gikuha gikan sa Bruce R. McConkie, The Promised Messiah: The First Coming of Christ [1978], 28–32):

1. Ang Mesiyanikanhong mga panagna naghimo nga makabaton og pagtuo Kaniya kadtong nanagpuyo sa wala pa ang pagkatawo ni Jesukristo, nga gumikan niana natabangan sila aron maangkon ang kaluwasan (tan-awa sa 1 Nephi 10:4–6; 2 Nephi 25:18–20, 26; Mosiah 3:13).

2. Ang Mesiyanikanhong mga panagna naghimo nga mailhan Siya niadtong nanagpuyo sa kapanahunan ni Kristo nga Siya diay ang katumanan niadtong mga panagna, nga sa ingon niana, natabangan sila aron maangkon ang kaluwasan (tan-awa sa Juan 4:25, 29).

3. Ang Mesiyanikanhong mga panagna naghimo nga masayran niadtong nanagpuyo human sa mortal nga pagpangalagad ni Jesukristo nga Siya ang katumanan sa mga panagna, nga sa ingon niana nagtabang aron ilang maangkon ang kaluwasan (tan-awa sa Mga Buhat 3:12–18; 26:22–23).

  • Samtang ikonsiderar ninyo kining tulo ka katuyoan, sa unsang paagi kaha kini nakabenipisyo nga makakat-on kamo sa pag-identify sa mesiyanikanhong mga panagna nga naa sa mga kasulatan ug aron makita nga si Kristo mao ang katumanan niana nga mga panagna?

Juan 6:5–69

Pagsunod kang Jesukristo nga mao ang Mesiyas

Ipasabut og balik nga ang mga Judeo sa kapanahunan sa Bag-ong Tugon mituo nga ugma damlag moabut ang Mesiyas gikan sa kaliwatan ni David aron moluwas sa Iyang katawhan. Daghan ang mituo nga Iya silang luwason gikan sa pag-ulipon kanila sa mga Romano sama sa gihimong pagluwas ni Jehova sa mga Israelite gikan sa Ehipto.

Sa madali, ipabasa sa mga estudyante ang istorya nga naa sa Juan 6:5–15. Ipangutana:

  • Unsa nga milagro ang gihimo ni Jesus niini nga istorya?

  • Unsaon ninyo sa paghulagway ang reaksyon sa mga tawo diha sa mga bersikulo 14–15?

  • Ngano kaha nga ingon man niini ang ilang reaksyon?

Ipaambit ang mosunod nga panabut gikan ni Elder Bruce R. McConkie (1915–85) sa Korum sa Napulog Duha ka mga Apostoles:

Elder Bruce R. McConkie

“Dunay tradisyon nga gitudlo sa mga Rabbi ug nakatuhop gayud sa hunahuna sa katawhan, nga inig abut kuno sa Mesiyas, mopakaon siya kanila og pan gikan sa langit” (The Mortal Messiah, 4 vols. [1979–81], 2:367).

Pasabta nga susama kaayo kini dihang gipakaon ni Jehova og mana ang mga anak sa Israel (tan-awa sa Exodus 16), dihang gipakaon ni Jesus ang panon sa katawhan gamit ang lima ka hiwa nga pan ug duha ka isda, daghan ang mihubad sa Iyang milagro isip usa ka timailhan nga Siya mao ang Mesiyas.

Dapita ang pipila ka estudyante nga magpuli-puli sa pagbasa og kusog sa Juan 6:31–32, 49–53, 60, 66. Hangyoa ang klase sa pagsunod ug pagpangita kon unsa ang reaksyon sa mga tawo kang Jesus sa pagkasunod adlaw ug unsay Iyang gitubag kanila.

  • Ngano kaha nga daghan ang misalikway ni Jesus nianang adlawa?

  • Unsa man ang wala nila masabti? (Si Jesus ang tinubdan sa espirituhanong kinabuhi; Siya ang Pan sa Kinabuhi.)

Dapita ang usa ka estudyante sa pagbasa og kusog sa Juan 6:67–69. Dayon pangutan-a ang klase:

  • Unsay gipamatud-an diha sa pagpamatuod ni Pedro sa bersikulo 69?

  • Sa unsang paagi ang pagpamatuod ni Pedro sa Manluluwas nakaapekto sa iyang kinabuhi?

Isulat sa pisara ang mosunod nga dili kompleto nga pamahayag ug hangyoa ang mga estudyante nga ipasabut nila kon unsaon nila kini sa pagkompleto: Kon atong dawaton si Jesukristo nga mao ang Mesiyas, niana _________________________ .

Human sa pipila ka tubag, dapita ang usa ka estudyante sa pagbasa og kusog sa mosunod nga mga pamahayag ni Presidente David O. McKay (1873–1970):

President David O. McKay

“Kon unsa gayuy inyong gihunahuna diha sa inyong kasingkasing kabahin ni Kristo maoy modeterminar kinsa kamo, mao usab ang modeterminar unsay inyong pagabuhaton. Walay tawo nga makatuon niining balaang pagkatawo, nga makadawat sa iyang mga pagtulun-an nga dili makahibalo sa usa ka makabayaw ug makalunsay nga impluwensya diha sa iyang kaugalingon” (Mga Pagtulun-an sa mga Presidente sa Simbahan: David O. McKay [2003], 8–9).

Hatagi og panahon nga makasulat ang mga estudyante kon unsay ilang hunahuna mahitungod kang Kristo. Dapita ang pipila ka estudyante sa pagpaambit kon unsa ang ilang nasulat.

Awhaga ang mga estudyante sa paghunahuna kon unsay ilang mahimo karong semanaha aron ikapakita ang ilang pagtuo kang Jesukristo.

Mga Basahunon sa Estudyante