Gipasiugdahan ni Jesukristo ang Sakrament

Pasiuna

“Ang Buhi nga Kristo: Ang Pagpamatuod sa mga Apostoles” mabasa nga: “[Si Jesukristo] mitukod sa sakramento isip usa ka handumanan sa Iyang labing dako nga sakripisyo sa pag-ula.” (Ensign o Liahona, Abr. 2000, 2). Kon moambit kita sa sakrament, mapahinumduman kita nga miagas ang dugo sa Manluluwas sa matag lungag sa iyang panit ug namatay para kanato; mobag-o usab kita sa atong mga pakigsaad sa Ginoo.

Background nga Basahunon

Dallin H. Oaks, “Ang Miting sa Sakrament ug ang Sakrament,” Liahona, Nob. 2008, 17–20.
Jeffrey R. Holland, “This Do in Remembrance of Me,” Ensign, Nob. 1995, 67–69.

Mga Sugyot alang sa Pagtudlo

Mateo 26:26–28; Lucas 22:15

Miestablisar si Jesukristo og bag-ong pakigsaad

I-display ang kauban nga imahe o laing imahe nga nagpakita sa Katapusang Panihapon, ug dapita ang mga estudyante nga ipasabut kon unsa nga hitabo ang gipakita sa litrato:

Pangutan-a ang mga estudyante:

Unsay inyong bation kon ang Manluluwas mismo ang miandam, mipanalangin, ug mihatag kaninyo sa sakrament?

Dapita ang usa ka estudyante sa pagbasa og kusog sa Lucas 22:15. Awhaga ang klase nga ikonsiderar atol sa leksyon nganong tinguha sa Manluluwas nga igahin ang Pagpalabay kauban sa Iyang mga Apostoles.

Dapita ang usa ka estudyante sa pagbasa og kusog sa Mateo 26:26–28 samtang magsunod ang klase. Ihatag ang kahulugan sa pulong nga testamento pinaagi sa pagpasabut nga gihubad kini gikan sa Greek nga pulong nga nagpasabut og “pakigsaad” (mahimo nimong isugyot nga isulat sa mga estudyante kini nga depinisyon diha sa margin sa ilang mga kasulatan). Hisguti ang mosunod nga pangutana:

Kon mipasiugda si Jesus og bag-ong testamento, o pakigsaad, unsa nga pakigsaad ang gipulihan niini?

Ang mosunod nga impormasyon mohatag og background o konteksto nga makatabang sa imong diskusyon: Sa karaang panahon, dihang gihimo ni Jehova ang Iyang pakigsaad uban sa mga anak sa Israel, gitudloan sila ni Moises sa mga pulong ni Jehova ug nakigsaad ang katawhan nga motuman niadto nga mga pulong. Dayon mihalad si Moises og hayop nga isakripisyo, gikuha ang dugo gikan sa hayop, ug gisablig kini ngadto sa katawhan, nga nag-ingon, “Ania karon ang dugo sa tugon, nga gibuhat sa Ginoo uban kaninyo.” (Tan-awa sa Exodo 24:3–8.) Ang gipasabut ni Jesus mao ang pamahayag ni Moises dihang gitudlo Niya nga tukuron na Niya ang bag-ong pakigsaad uban sa mga anak sa Dios pinaagi sa pagpaagas sa Iyang dugo (sama nga ang pagsablig sa dugo sa mga mananap nagsimbolo sa mga anak ni Israel nga misulod sa karaang pakigsaad uban ni Jehova). Dihang gipresentar ni Jesus ang kopa sa bino ngadto sa Iyang mga Apostoles, Iyang gitimaan ang katumanan sa karaang pakigsaad ug ang pagtukod og bag-o (tan-awa sa Mga Hebreohanon 9:12–15). Ang Balaod ni Moises (ang karaang pakigsaad) kaniadto, sa daghang paagi, mao ang labing dako nga panagna sa Mesiyas. Si Jesukristo ang katumanan niana nga panagna (tan-awa sa 2 Nephi 11:4; Jacob 4:5; Alma 34:13–14), ilabi na kabahin sa nakab-ot Niya nga kinatas-ang katuyoan niana nga balaod pinaagi sa Iyang makatubos nga sakripisyo.

Unsa man ang gi-focus sa paghalad sa dugo diha sa karaan ug sa bag-ong mga pakigsaad? (Ang Pag-ula ni Jesukristo ug ang pagpaagas sa Iyang dugo para sa kapasayloan sa atong mga sala.)

I-display ang mosunod nga pamahayag ni Elder Dallin H. Oaks sa Korum sa Napulog Duha ka mga Apostoles, ug dapita ang usa ka estudyante sa pagbasa niini og kusog:

“Ang sakrament mao ang ordinansa nga gipuli sa mga pagsakripisyo sa dugo ug sa mga sinunog nga mga halad sa balaod ni Moises, ug uban niini miabut ang saad sa Manluluwas: ‘Ug kadto kinsa moduol ngari kanako uban ang usa ka masulub-on nga kasingkasing ug usa ka mahinulsulon nga espiritu, kaniya Ako mobunyag uban sa kalayo ug uban sa Espiritu Santo’ (3 Nephi 9:20)” (“Ang Miting sa Sakrament ug ang Sakrament,” Liahona, Nob. 2008, 19).

Unsaon ninyo sa pag-summarize ang mga kamatuoran nga ato nang gihisgutan mahitungod sa Katapusang Panihapon? (Samtang motubag ang mga estudyante, hatagi og emphasis nga gituman ni Jesukristo ang karaang pakigsaad, ug giestablisar Niya ang bag-ong pakigsaad pinaagi sa sakrament.)

Lucas 22:14–20; 3 Nephi 18:7, 11

Ang sakrament makatabang nga atong mahinumduman ang Manluluwas

Ipares-pares ang mga estudyante. Dapita ang managpares sa pagbasa sa Lucas 22:19–20 ug 3 Nephi 18:7, 11. Hangyoa nga pangitaon nila ang laing rason (agig dugang sa pag-establisar og bag-ong pakigsaad) nganong gipasiugdahan sa Manluluwas ang sakrament. Hisguti ang mosunod nga mga pangutana:

Unsay gihatag nga rason sa Manluluwas sa pagpasiugda sa sakrament? (Kinahanglang mahibaloan sa mga estudyante ang mosunod nga kamatuoran: Sa atong pag-ambit sa sakrament kinahanglang hinumduman nato ang Manluluwas.)
Nganong importante man nga paningkamutan nato ang paghinumdom sa Manluluwas sa atong pag-ambit sa sakrament?
Kon pakyas kita sa paghinumdom sa Manluluwas ug kon unsay Iyang nahimo kanato, unsa man kaha ang anaa nga kahulugan sa sakrament?

Ikonsiderar ang paghatag sa matag estudyante og kopya sa kauban nga handout, nga naglangkob og mga porsyon sa pakigpulong ni Elder Jeffrey R. Holland sa Korum sa Napulog Duha ka mga Apostoles. Dapita ang mga estudyante sa pagbasa og hilum sa handout. Human sa igong panahon, hisguti ang mosunod nga mga pangutana:

Unsa ang inyong itambag ngadto sa tawo nga nanglimbasug sa pag-focus sa Manluluwas ug sa Iyang sakripisyo atol sa pagpangalagad sa sakrament? (Kon motubag ang mga estudyante, mahimo nimong ipasabut nga samtang mangita kita og mga oportunidad sa paghunahuna sa kinabuhi ug pagpangalagad sa Manluluwas atol sa semana, mas sayon para nato ang pag-focus Kaniya atol sa pagpangalagad sa sakrament inig ka Dominggo.)
Unsa ang gibati ninyong mga panalangin dihang gipaningkamutan ninyo ang paghinumdom sa Manluluwas ug sa Iyang Pag-ula samtang miambit kamo sa sakrament?

1 Mga Taga-Corinto 11:27–30; 3 Nephi 18:28–29; 20:8–9

Ang takus nga pag-ambit sa sakrament makabag-o sa atong mga pakigsaad

Dapita ang mga estudyante sa pagbasa og hilum ug pagkumpara sa 1 Mga Taga-Corinto 11:27–30 ug sa 3 Nephi 18:28–29; 20:8–9. Hangyoa sila sa pag-ila sa pasidaan nga gihatag mahitungod sa sakrament. Dayon ipangutana:

Nganong dili man maayo ang pag-ambit sa sakrament kon dili takus?

Tingali makatabang ang pagpaambit sa mosunod nga pamahayag ni Elder John H. Groberg sa Seventy, kinsa mipasabut kon unsay buot ipasabut sa pag-ambit sa sakrament sa takus nga paagi:

“Kon nagtinguha kita nga molambo (nga mao ang paghinulsol) ug dili ubos sa restriksyon sa priesthood, niana, sa akong hunahuna, kita takus. Hinoon, kon, kita walay tinguhang molambo, kon kita walay intensyon nga mosunod sa giya sa Espiritu, kinahanglan nga mangutana kita: Andam ba kitang moambit, o giyama-yamaan ra ba nato ang importanting katuyoan sa sakrament, nga mao ang buhat isip usa ka pagpasiugda sa personal nga paghinulsol ug kalamboan?” (“The Beauty and Importance of the Sacrament,” Ensign, Mayo 1989, 38).

Unsa ang mga panalangin para niadtong mga takus nga moambit? (tan-awa sa 3 Nephi 20:8–9). (Siguroa nga masabtan sa mga estudyante nga kon moambit kita sa sakrament sa mainampuong paagi ug sa mahinulsulon nga espiritu, makadawat kita og kapasayloan sa atong mga sala, sama niadtong gibunyagan kita.)

I-display ang mosunod nga pamahayag ni Elder Dallin H. Oaks sa Korum sa Napulog Duha ka mga Apostoles, ug ipabasa kini og kusog sa usa ka estudyante:

“Kon walay pipila ka probisyon para sa dugang nga paglimpyo human sa bunyag, ang matag usa kanato mawagtangan og kasinatian sa mga butang nga espiritwal. Dili kita makaangkon sa pakig-uban sa Espiritu Santo, ug unya sa katapusang paghukom sigurado nga kita ‘isalikway sa kahangturan’ (1 Ne. 10:21). Kadako sa atong pasalamat sa Ginoo nga gihatag Niya ang usa ka proseso sa matag nabunyagan nga miyembro sa Iyang Simbahan nga sa matag karon ug unya malimpyo gikan sa mga negatibong epekto sa sala. Ang sakrament usa ka mahinungdanong bahin niana nga proseso” (“The Aaronic Priesthood and the Sacrament,” Ensign, Nob. 1998, 38).

Sumala ni Elder Oaks, ngano nga ang sakrament usa man ka importante kaayong ordinansa sa ebanghelyo?

Ipaambit kining dugang nga pamahayag ni Elder Oaks:

“Kita gimandoan sa paghinulsol sa atong mga sala ug sa pagduol ngadto sa Ginoo uban sa mapainubsanong kasingkasing ug mahinulsulong espiritu ug sa pag-ambit sa sakrament agi og pagsunod sa mga pakigsaad niini. Kon atong bag-ohon ang atong mga pakigsaad sa bunyag niini nga paagi, ang Ginoo nagbag-o sa epekto sa paglimpyo sa atong bunyag. Niining paagiha gihimo kitang limpyo ug makabaton kanunay sa Iyang Espiritu uban kanato. Ang kaimportante niini klaro kaayo diha sa mga sugo sa Ginoo nga kita moambit sa sakrament matag semana (tan-awa sa D&P 59:8–9)” (“The Aaronic Priesthood and the Sacrament,” Ensign, Nob. 1998, 38).

Mahimo nimong ipasabut nga kon takus kita nga moambit sa sakrament, atong “gibag-o ang tanan natong mga pakigsaad nga atong gihimo uban sa Dios” (Delbert L. Stapley, sa Conference Report, Okt. 1965, 14; mga italic gidugang; tan-awa usab sa L. Tom Perry, “Sa Atong Pagkalawat Karon sa Sakramento,” Liahona, Mayo 2006, 41).

Dapita ang mga estudyante sa pagribyu sa Lucas 22:15. Dayon ipangutana:

Kon dunay mangutana ninyo ngano kaha nga matinguhaon man kaayo si Jesus nga igahin ang panahon sa Pagpalabay kauban sa Iyang mga Apostoles, unsaon ninyo sila sa pagtubag? Unsa nga pagpamatuod ang inyong ihatag?

Ipamatuod nga kon hinumduman nato si Jesukristo ug ang makatubos Niya nga sakripisyo, ug kon takus kitang moambit sa sakrament, atong gibag-o ang atong pakigsaad uban sa Dios. Awhaga ang mga estudyante nga pamalandungan sa unsang paagi sila sa tinagsa makahalad og “masulub-on nga kasingkasing ug mahinulsulon nga espiritu” kon moambit sila sa sakrament. Hagita sila nga himoon ang ordinansa sa sakrament nga usa ka regular nga espirituhanong kasinatian.

Mga Basahunon sa Estudyante

Mateo 26:26–28; Lucas 22:17–20; 1 Mga Taga-Corinto 11:27–30; 3 Nephi 18:1–11, 28–29; 20:8–9; Doktrina ug mga Pakigsaad 20:75–79.
Dallin H. Oaks, “Ang Miting sa Sakrament ug ang Sakrament,” Liahona, Nob. 2008, 17–20.