Leksyon 17: Ang Manluluwas Nag-antus ug Namatay sa Krus sa Kalbaryo
17
Ang Manluluwas Nag-antus ug Namatay sa Krus sa Kalbaryo
Pasiuna
Dihang nagkaduol na ang katapusan sa Iyang mortal nga pangalagad, “Siya gidakop ug gihukman sa bakak nga mga pasangil, gipahamtangan og sala aron matagbaw ang manggugubot nga panon, ug gihukman nga mamatay diha sa krus sa Kalbaryo” (“Ang Buhi nga Kristo: Ang Pagpamatuod sa mga Apostoles,” Ensign o Liahona, Abr. 2000, 2). Niini nga leksyon gihatagan nato og emphasis ang kaimportante sa kamatuoran nga gitugutan ni Jesukristo ang Iyang kaugalingon nga mag-antus ug mamatay sa mga kamot sa uban; walay tawo nga mitapos sa Iyang kinabuhi.
Background nga Basahunon
Jeffrey R. Holland, “Walay Bisan Usa nga Nakig-uban Kaniya,”Liahona, Mayo 2009, 86–88.
Adunay gahum si Jesukristo sa pagtugyan sa Iyang kinabuhi
I-display ang litrato nga Ang Paglansang (Libro sa mga Hulagway sa Ebanghelyo [2009], nu. 57; tan-awa usab sa LDS.org).
Imahe
Ang Paglansang
Dapita ang mga estudyante sa paghunahuna nga usa sila sa matinud-anong magtatan-aw sa mahanduraw nga litrato samtang magbasa ka og kusog sa Mateo 27:26–54. Awhaga ang mga estudyante sa pagsunod ug pagpamalandong kon unsa kaha ang pagbati nga ikaw kanang tawhana ug makasaksi sa Pagkalansang ni Jesukristo. Pagkahuman nimo og basa, dapita ang mga estudyante sa paghulagway unsa ang mga hunahuna ug pagbati ang masulod sa ilang hunahuna nga nasinati sa maong tawo. Human sa pipila ka tubag, pangutan-a ang klase:
Unsay inyong mga pagbati para sa Manluluwas human mabasa ug mahisgutan kini nga istorya?
Dapita ang mga estudyante sa pagbasa og hilum sa Juan 10:11, 17–18. Human sa igong panahon, ipangutana:
Unsa ang gitudlo niini nga mga bersikulo mahitungod sa Pagkalansang ug kamatayon ni Jesukristo? (Siguroa nga masabtan sa mga estudyante nga si Jesukristo dunay gahum gikan sa Amahan sa pagtugyan sa Iyang kinabuhi ug pagbawi niini og balik.)
I-display ang mosunod nga mensahe ni Elder James E. Talmage sa Korum sa Napulog Duha ka mga Apostoles, ug hangyoa ang usa ka estudyante sa pagbasa niini og kusog:
Imahe
Elder James E. Talmage
“Usa ka natural nga epekto sa imortal nga kagikan ni [Jesus], isip natawo sa kalibutan nga anak sa imortal nga Amahan, mao ang pagkadili Niya madutlan og kamatayon gawas kon Siya ang motugyan niini. Ang kinabuhi ni Jesus nga Kristo dili mahimong kuhaon gawas kon Iyang pagbuot ug pagtugot. Ang gahum sa pagtugyan sa Iyang kinabuhi Iya nang daan sa Kaugalingon, mao usab ang gahum sa pagpabangon og balik sa Iyang patay nga lawas ngadto sa pagkahimong imortal nga kahimtang” (Jesus the Christ, 3rd ed. [1916], 418).
Dapita ang usa ka estudyante sa pagbasa og kusog sa Mateo 26:53–54 ug ang laing estudyante sa pagbasa og kusog sa Juan 19:10–11. Hangyoa ang klase sa pagsunod, nga ikumpara ug itandi ang duha ka tudling.
Sumala sa istorya diha sa Mateo, unsa ang tabang nga posibling madawat si Jesukristo?
Unsa ang inyong nakat-unan gikan sa tudling sa Juan? (Posibling mogamit og lain-laing mga pulong ang mga estudyante, apan kinahanglan nga ilang mahibaloan ang mosunod nga kamatuoran: Walay tawo nga makakuha sa kinabuhi ni Jesukristo; Siya ang andam nga miantus sa kamatayon.)
Kon mahimo rang tawagon ni Jesus ang hut-ong sa mga anghel para motabang, ngano kaha nga gitugutan man Niya ang Iyang kaugalingon nga ilansang?
Dapita ang usa ka estudyante sa pagbasa og kusog sa 1 Nephi 19:9. Hangyoa ang klase sa paghatag sa depinisyon sa pulong nga mag-antus. (Sigun sa gigamit dinhi, ang mag-antus nagpasabut nga motugot o mouyon. Mahimo nimong isugyot nga isulat sa mga estudyante ang “motugot” diha sa margin sa ilang mga kasulatan tupad sa 1 Nephi 19:9.)
Nganong gitugutan man sa Manluluwas ang Iyang kaugalingon nga malansang sa krus?
Mahimo nimong i-display ang mosunod nga pamahayag ni Elder Alexander B. Morrison sa Seventy ug ipabasa kini og kusog sa usa ka estudyante:
Imahe
Elder Alexander B. Morrison
“Ang gugma para sa tanang anak sa Dios maoy hinungdan nga si Jesus, talagsaon sa Iyang walay sala nga pagkahingpit, aron ihalad ang Iyang kaugalingon isip tubos sa mga sala sa uban. … Niana, kini, mao ang kinadak-ang hinungdan nga mianhi si Jesus sa yuta aron ‘mag-antus, moagas ang dugo, ug mamatay para sa tawo’ [“’Tis Sweet to Sing the Matchless Love,” Hymns, nu. 176]. Mianhi Siya … sa pagtubos sa atong mga sala, aron Siya, nga gituboy sa krus, makadala sa tanang katawhan ngadto Kaniya (tan-awa sa 3 Ne. 27:14)” (“For This Cause Came I into the World,” Ensign, Nob. 1999, 26).
Ipasabut nga giantus ni Jesus ang Pagkalansang sa krus tungod sa Iyang dako nga gugma sa Iyang Amahan ug usab sa Iyang gugma kanato. Dayon ipangutana:
Sa unsang paagi ang pagkahibalo nga andam ang Manluluwas nga magpalansang sa krus tungod sa Iyang gugma sa Iyang Amahan ug sa pagtabang kanato makatabang ninyo aron malahutay ang lisud nga mga kasinatian nga inyong atubangon?
Aron matabangan ang mga estudyante nga mas makasabut kon unsa ang pagkamatay nga ilansang sa krus, ikonsiderar ang pagpaambit sa mosunod:
“Ang kamatayon pinaagi sa paglansang sa krus daw maglakip sa tanan niana nga kasakit ug kamatayon nga maangkon nga labihan kangutngot ug makalilisang—pagkalipong, pagbikog, kauhaw, kagutom, dili makatulog, grabing hilanat, tetanos, kaulaw, walay puas nga pag-antus, kalisang sa manghitabo, pagpagrabe sa wala maatiman nga samad—tanan magkagrabe kutob sa maantus, dayon ang tanan mabugto ra dayon diin mahatagan sa kahupayan ang naghigwaos pinaagi sa pagkawala sa panimuot. Ang dili natural nga pagkahimutang mopasakit bisan sa gamayng paglihok; ang samaran ug nangaigo nga kaugatan walay hunong nga magpitik sa kangutngot; ang mga samad, mohapdos tungod sa kainit, ang anam-anam nga pagpunto sa dugo; ang agianan sa dugo—ilabi na padulong sa ulo ug tiyan—manghubag ug mangauga, ug samtang ang lain-laing kahapdos magkagrabe, madugangan pa kini og daw dili maantus nga kainit ug hilabihang kauhaw; ug tanan kini nga komplikasyon sa pisikal mosangko sa internal nga kakulba ug kahingawa, kinsa mihimo sa hingtungdan sa kamatayon mismo—ang kamatayon, ang makalilisang nga wala hiilhing kaaway, kansang paaagi makapakurog sa hilabihan—nga maangkon ang katagbawan sa usa ka matam-is ug labihan ka nindot nga pagtugyan.
“Mao kana ang kamatayon nga midangat kang Kristo” (Frederic W. Farrar, The Life of Christ [1964], 641).
Sultihi ang mga estudyante nga militok si Jesukristo og pito ka pamahayag samtang naa sa krus. Isulat sa pisara ang mosunod nga mga pakisayran sa kasulatan (ayaw iapil ang mga kutlo nga naa sa parentheses), ug dapita ang matag estudyante sa pagpangita og pipila niini ug sa pagpangita unsay gisulti ni Jesus:
Lucas 23:34 (“Amahan, pasayloa sila; kay wala sila makasabut sa ilang ginabuhat.”)
Lucas 23:43 (“Kaniya si Jesus mitubag nga nag-ingon, “Sa pagkatinuod, magaingon ako kanimo, nga karong adlawa adto ikaw sa Paraiso uban kanako.”)
Juan 19:26–27 (“Babaye, tan-awa ang imong anak! … Tan-awa ang imong inahan!”)
Mateo 27:46 (“Dios ko, Dios ko, nganong gitalikdan mo ako?”)
Lucas 23:46 (“Amahan, nganha sa imong mga kamot itugyan ko ang akong espiritu.”)
Kon mareport na sa mga estudyante ang ilang mga nakit-an, usaba sa pagporma kini nga pamahayag sa pisara tupad sa may kalabutan nga mga pakisayran [reference]. Pangutan-a ang mga estudyante:
Unsa ang gisulti niini nga mga pamahayag mahitungod sa Manluluwas ug unsa ang Iyang mga nasinati sa krus?
Unsa man ang buot ipasabut ni Jesus dihang miingon Siya, “Tapus na”? (Nahuman Niya ang walay kinutubang pag-antus nga gikinahanglan sa Pag-ula. Mahimo nimong ipasabut og maayo sa mga estudyante nga ang Joseph Smith Translation, sa Mateo 27:54, mabasa nga: “Dihang mituaw pag-usab si Jesus pinaagi sa kusog nga tingog, nag-ingon, Amahan, tapos na, natuman na ang imong kabubut-on, mitugyan sa espiritu”. Namatay si Jesus dihang nahibaloan na Niya nga Iya nang natuman ang tanan nga gipabuhat Kaniya sa Amahan.)
Ipabasa og kusog sa usa ka estudyante ang mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles:
Imahe
Elder Jeffrey R. Holland
“Diha nga ang kinatapusang pagbayad nabayaran na, sa diha nga ang determinasyon ni Kristo nga magmatinud-anon tataw kaayo sama nga kini walay pagkabuntog, sa katapusan ug sa dakong kalooy, kini ‘natapos na’ [tan-awa sa Juan 19:30]. Sa pakigbatok sa tanang dili angay ug walay usa nga anaa sa pagtabang o sa pagtuboy Kaniya, si Jesus sa Nazaret, ang buhing Anak sa buhi nga Dios, mipahiuli sa pisikal nga kinabuhi diin ang kamatayon nagmadaugon ug midala og puno nga kamaya, espirituhanong katubsanan gikan sa pagpakasala, daw impyerno nga kangitngit ug kawalay paglaum. Uban sa hugot nga pagtuo diha sa Dios nga nasayud Siya nga anaa, masulti Niya diha sa kadaugan, ‘Amahan, sa imong mga kamot itugyan ko ang akong espiritu’ [Lucas 23:46]” (“Walay Bisan Usa nga Nakig-uban Kaniya,”Liahona, Mayo 2009, 88).
Dapita ang laing estudyante sa pagbasa og kusog sa mosunod nga pamahayag ni Elder Robert D. Hales sa Korum sa Napulog Duha ka mga Apostoles:
Imahe
Elder Robert D. Hales
“Gipili ni Jesus nga dili mobiya sa kalibutan hangtud Iyang malahutay hangtud sa katapusan ug makompleto ang misyon nga gisangon Kaniya nga himoon para sa katawhan. Didto sa krus sa Kalbaryo, gitugyan ni Jesus ang Iyang espiritu ngadto sa Iyang Amahan pinaagi sa yano nga pagpahayag, ‘Tapus na’ (Juan 19:30). Kay nakalahutay hangtud sa katapusan, gi-release Siya sa pagka-mortal.
“Kita usab kinahanglang molahutay hangtud sa katapusan” (“The Covenant of Baptism: To Be in the Kingdom and of the Kingdom,” Ensign, Nob. 2000, 6).
Unsa ang gitabang kanato niining duha ka Apostoles aron masabtan nato unsay gipasabut ni Jesus dihang gilitok Niya ang, “Tapus na”? (Human makatubag ang mga estudyante, ikonsiderar ang pagsulat sa mosunod nga kamatuoran sa pisara: Matinud-anong gikompleto ni Jesukristo ang tanan nga gisugo sa Langitnong Amahan nga Iyang buhaton sa mortalidad.)
Sa kaugalingon natong mga panahon sa kalisud, unsay ikatabang kon hinumduman nato ang giatubang ug matinud-anong gilahutay sa Manluluwas aron matuman ang Iyang misyon sa pagka-mortal?
Sa unsang paagi ang paghinumdom sa ehemplo ni Jesus makatabang nga matuman ang tuyo sa inyong pagpakatawo?
Sa unsang paagi nato ikapakita ang atong pasalamat sa tanan nga giantus sa Manluluwas para kanato? (Ang mga estudyante mahimong mogamit og lain-laing mga pulong, apan kinahanglang ipadayag nila ang mosunod nga baruganan: Mapakita nato ang atong pasalamat sa pag-antus sa Manluluwas sa krus pinaagi sa pagsunod sa Iyang ehemplo pinaagi sa matinud-anong paglahutay hangtud sa katapusan.)
Dapita ang mga estudyante nga ikonsiderar ang pagpaambit diha sa social media sa ilang mga pagbati bahin sa Manluluwas ug unsay gipasalig nilang buhaton aron magpabiling matinuoron niana nga mga pagbati.
