Aoao e uiga i le Alofa, Faasoa Atu, ma Valaaulia

Sa faatonuina e le Alii toetu Ana Aposetolo, “O atu ia outou i le lalolagi uma, ina talai atu ai le talalelei i tagata uma lava” (Mareko 16:15). O lena lava poloaiga paia e a tatou foi i aso nei. I le Mataupu Faavae ma Feagaiga, ua valaaulia ai i tatou e le Faaola ina ia, “tatala atu o [tatou] fofoga e talai atu la’u talalelei” (Mataupu Faavae ma Feagaiga 30:5).

Ua faamanatu mai e Elder Gary E. Stevenson ia i tatou e faapea, “o le poloaiga sili a le Faaola e mafai ona ausia e ala i mataupu faavae faigofie ma faigofie ona malamalama i ai ua aoaoina ia i tatou taitoatasi mai a o laiti: alofa, faasoa atu, ma valaaulia” (“Alofa, Faasoa Atu, Valaaulia,” Liahona, Me 2022, 85). O nei mataupu faavae o ni auala e galulue faatasi ma mamana e mafai ona e faasoa atu le talalelei i isi i auala masani ma faanatura. E le manaomia ai se pine o le igoa po o se tusi. E leai se valaauga aloaia e manaomia ai.

Alofa: “O le alofa mo isi o le faailoaga matagofie lea o le poloaiga sili lona lua ia alofa atu i o tatou tuaoi; o loo faaalia ai le faagasologa faaatoatoaina a le Agaga Paia o loo galue i totonu o o tatou lava agaga. O le faaalia o le alofa o Keriso i isi, e mafai ai ona tatou faamatua’ia i latou o e vaai ia tatou galuega lelei e ‘vivii atu [i lo tatou] Tama o i le lagi’ [Mataio 5:16]” (Gary E. Stevenson, “Alofa, Faasoa Atu, Valaaulia,” 85).

Faasoa Atu: “Tatou te fefaasoaai uma mea i isi. Tatou te faia soo. Tatou te faasoa atu po o a ata tifaga ma meaai tatou te fiafia i ai, o mea malie tatou te vaai i ai, nofoaga tatou te asiasi i ai, faatufugaga tatou te talisapaia, upusii ua musuia ai i tatou. E mafai faapefea ona tatou faaopoopo atu i le lisi o mea ua uma ona tatou faasoa atu mea tatou te fiafia ai e uiga i le talalelei a Iesu Keriso?” (Gary E. Stevenson, “Alofa, Faasoa Atu, Valaaulia,” 86).

Valaaulia: “E faitau fia selau valaaulia e mafai ona tatou tuuina atu i isi. E mafai ona tatou valaaulia isi e ‘o mai ma vaai’ i se sauniga faamanatuga, se gaoioiga a le uarota, se vitiō i luga o le initoneti e faamatala ai le talalelei a Iesu Keriso. O le ‘O mai ma vaai’ e mafai ona avea o se valaaulia e faitau le Tusi a Mamona pe asiasi i se malumalu fou i le taimi o maimoaga a o lei faapaiaina” (Gary E. Stevenson, “Alofa, Faasoa Atu, Valaaulia,” 86).

Tatalo mo ni avanoa e faasoa atu ai le talalelei. O le a taiala oe e le Tama Faalelagi ia iloa po o le a le mea ua saunia i ai tagata o siomia oe, ma po o le a le valaaulia e tuuina atu.

Aua le popole pe a teena se valaaulia e se tasi. “O lou manuia e lē faalagolago i le auala e filifili ai isi e tali atu ia te oe, i au valaaulia, po o au galuega faamaoni o le agalelei. … O le mea e finagalo ai le Alii o lau lava taumafaiga sili lea—mo oe e ‘auauna atu ia te ia ma lou loto atoa, manatu atoa, mafaufau, ma le malosi atoa’ (Mataupu Faavae ma Feagaiga 4:2; ua faaopoopo le faamamafa)” (Tala’i La’u Talalelei: O Se Taiala i le Faasoaina Atu o le Talalelei a Iesu Keriso [2023], 13).

Ao e ola i lou faatuatua ma mulimuli i uunaiga faaleagaga e faasoa atu le talalelei, e mafai ona e maua le olioli lea e sau mai le fesoasoani i tagata ia o mai ia Keriso i aso uma. “O le faasoa atu o le talalelei e faamumū ai le olioli ma le faamoemoe i agaga o lē na te foai atu ma lē na te taliaina. E moni, ‘e matua tele lou olioli’ [Mataupu Faavae ma Feagaiga 18:15] a o e faasoa atu le talalelei!” (Marcus B. Nash, “Ia Tuu i Luga Lo Outou Malamalama,” LiahonaNov. 2021, 71).