Dali, Sunod Kanako

Pagtudlo, Pagkat-on, ug Paggamit sa mga Mensahe gikan sa Kinatibuk-ang Komperensiya

Ang mga Elders quorum ug mga Relief Society adunay mahinungdanon kaayo nga papel diha sa buhat sa kaluwasan ug kahimayaan. Atol sa ilang mga miting sa Dominggo, sila maghisgot unsaon sa paggamit sa mga pagtulon-an diha sa bag-ohay nga kinatibuk-ang komperensiya nga mga mensahe ngadto sa ilang mga paningkamot dinhi niini nga buhat. Ang mga kapangulohan sa Elders quorum ug Relief Society magpili og usa ka mensahe sa komperensiya nga tun-an atol sa matag Dominggo nga miting, base sa mga panginahanglan sa mga miyembro ug giya gikan sa Espiritu. Usahay, ang bishop o presidente sa stake mahimong mosugyot usab og mensahe. Sa kinatibuk-an, ang mga lider kinahanglang mopili sa mga mensahe nga gikan sa mga sakop sa Unang Kapangulohan ug sa Korum sa Napulog Duha ka Apostoles. Hinuon, ang bisan unsang mensahe gikan sa labing ulahi nga komperensiya mahimo nga hisgotan.

Ang mga magtutudlo magtutok kon unsaon pagtabang sa mga miyembro sa paggamit sa mga pagtulon-an nga anaa sa mga mensahe sa kinatibuk-ang komperensiya diha sa ilang kinabuhi. Ang mga lider ug mga magtutudlo mangita og mga paagi sa pagdasig sa mga miyembro sa pagtuon daan sa pinili nga mga mensahe sa dili pa ang mga miting.

Alang sa dugang nga impormasyon mahitungod sa mga miting sa elders quorum ug sa Relief Society, tan-awa ang Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 8.2.1.2, 9.2.1.2, https://www.churchofjesuschrist.org/study/manual/general-handbook?lang=ceb.

Pagplano sa Pagtudlo

Ang mosunod nga mga pangutana makatabang sa mga magtutudlo samtang magplano sila sa paggamit og mensahe sa kinatibuk-ang komperensiya nga itudlo. Kon gikinahanglan, ang mga magtutudlo makigtambag uban sa kapangulohan sa elders quorum o sa Relief Society samtang mamalandong sila niini nga mga pangutana.

Ngano nga ang kapangulohan sa elders quorum ug ang Relief Society mipili niini nga mensahe aron hisgotan? Unsa ang ilang gipanghinaot nga mahibaloan ug himoon sa mga miyembro human mahisgotan kini nga mensahe?
Unsay gusto sa mamumulong nga masabtan sa mga miyembro? Unsa nga mga baroganan sa ebanghelyo ang iyang gitudlo? Sa unsang paagi kini nga mga baroganan magamit sa akong elders quorum o sa Relief Society?
Unsa nga mga kasulatan ang gigamit sa mamumulong aron sa pagsuporta sa iyang mensahe? Aduna bay laing mga kasulatan nga mabasa sa mga miyembro nga makapalawom sa ilang pagsabot? (Mahimong makita nimo ang uban diha sa mga endnote sa mensahe o diha sa ang Giya ngadto sa mga Kasulatan [https://www.churchofjesuschrist.org/study/scriptures/study-helps?lang=ceb].)
Unsa nga mga pangutana ang akong mapangutana nga makatabang sa mga miyembro sa pagpamalandong ug sa paggamit sa mga pagtulon-an diha sa mensahe? Unsa nga mga pangutana ang makatabang kanila nga makakita sa kalabotan niini nga mga pagtulon-an diha sa ilang kinabuhi, sa ilang mga pamilya, ug sa buhat sa Ginoo?
Unsa ang akong mabuhat aron makadapit sa Espiritu diha sa atong miting? Unsa ang akong magamit aron mapalambo ang diskusyon, lakip ang mga istorya, mga pagkasusama, musika, o buhat sa arte? Unsa ang gibuhat sa mamumulong aron sa pagtabang sa mga miyembro nga makasabot sa iyang mensahe?
Mihatag ba og bisan unsa nga mga pagdapit ang mamumulong? Sa unsang paagi ako makatabang sa mga miyembro nga magtinguha sa pagbuhat niadto nga mga pagdapit?

Mga Ideya para sa Kalihokan

Adunay daghang paagi nga ang magtutudlo makatabang sa mga miyembro nga makakat-on gikan sa ug magamit ang mga mensahe sa kinatibuk-ang komperensiya. Aniay pipila ka mga ehemplo; ang mga magtutudlo mahimong adunay ubang mga ideya nga mas mohaom sa ilang elders quorum o sa Relief Society.

Paggamit sa mga kamatuoran ngadto sa atong mga kinabuhi. Dapita ang mga miyembro sa pagrebyo sa mensahe sa komperensiya nga mangita sa mga kamatuoran nga makatabang kanila sa pagpatuman sa buhat nga ang Dios mihatag kanila isip mga indibidwal o isip usa ka elders quorum o Relief Society. Sama pananglit, unsa ang atong nakat-onan nga makatabang kanato isip mga tigpangalagad? isip mga ginikanan? isip misyonaryo nga mga miyembro? Sa unsang paagi nga kini nga mensahe makaimpluwensiya sa atong mga hunahuna, mga pagbati, ug mga buhat?
Hisgoti diha sa mga grupo. Bahina ang mga miyembro ngadto sa gagmayng mga grupo, ug sangoni ang matag grupo og lain nga seksiyon sa mensahe sa komperensiya aron basahon ug hisgotan. Dayon hangyoa ang matag grupo sa pagpakigbahin sa kamatuoran nga ilang nakit-an ug sa unsang paagi kini magamit kanila. O mahimo kang maghimo og mga grupo sa mga miyembro nga nagtuon og lainlaing mga seksiyon sa mensahe ug tugoti sila sa pagpaambit sa usag usa kon unsay ilang nakaplagan.
Pangita og mga tubag sa mga pangutana. Dapita ang mga miyembro sa pagtubag og mga pangutana sama sa mosunod kabahin sa mensahe sa komperensiya: Unsa nga mga kamatuoran sa ebanghelyo ang atong makit-an niini nga mensahe? Unsaon nato paggamit niini nga mga kamatuoran? Unsa nga mga pagdapit ug gisaad nga mga panalangin ang gihatag? Unsa ang gitudlo kanato niini nga mensahe mahitungod sa buhat nga gusto sa Dios nga atong buhaton? O paghimo og pipila ka pangutana nga imong kaugalingon nga mag-awhag sa mga miyembro sa paghunahuna pag-ayo bahin sa mensahe o sa paggamit sa mga kamatuoran nga gitudlo niini. Tugoti ang mga miyembro sa pagpili og usa niini nga mga pangutana ug mangita og mga tubag diha sa mensahe.
Pakigbahin og mga pamahayag gikan sa mensahe. Dapita ang mga miyembro sa pagpakigbahin og mga pamahayag gikan sa mga mensahe sa komperensiya nga nakadasig kanila sa pagtuman sa ilang mga responsibilidad sa buhat sa kaluwasan ug kahimayaan. Awhaga sila sa pagkonsiderar kon unsaon nila sa pagpakigbahin niini nga mga pamahayag aron sa pagpanalangin sa usa ka tawo, lakip na sa mga hinigugma ug sa mga tawo nga ilang gialagaran.
Pagpaambit og leksiyon nga maggamit og usa ka butang [object lesson]. Pagdapit daan og pipila ka mga miyembro sa pagdala og mga butang gikan sa balay nga ilang magamit sa pagtudlo bahin sa mensahe sa komperensiya. Atol sa miting, hangyoa ang mga miyembro sa pagpasabot kon unsay kalabotan niadto nga mga butang sa mensahe ug sa unsang paagi nga ang mensahe magamit diha sa ilang mga kinabuhi.
Pag-andam og leksiyon nga itudlo sa panimalay. Hangyoa ang mga miyembro sa pagtrabaho nga magpares aron magplano og leksiyon sa home evening base sa mensahe sa komperensiya. Mahimo silang motubag sa mga pangutana nga sama niini: Unsaon nato paghimo sa mensahe nga mohaom sa atong mga pamilya? Unsaon kaha nato pagpaambit niini nga mensahe ngadto sa mga tawo nga atong gialagaran?
Pagpaambit og mga kasinatian. Basaha og dungan ang pipila ka mga pamahayag gikan sa mensahe sa komperensiya. Hangyoa ang mga miyembro sa pagpakigbahin og mga ehemplo gikan sa mga kasulatan ug gikan sa ilang kaugalingong kinabuhi nga naghulagway o naglig-on sa doktrina nga gitudlo niini nga mga pamahayag.
Pangita og hugpong sa mga pulong. Dapita ang mga miyembro sa pagpangita diha sa mensahe sa komperensiya alang sa mga hugpong sa mga pulong nga makahuloganon ngadto kanila. Hangyoa sila sa pagpaambit sa mga hugpong sa mga pulong ug unsa ang ilang nakat-onan gikan niini. Hangyoa sila nga ipakigbahin kon giunsa niini nga mga pagtulon-an pagtabang kanila sa pagpatuman sa buhat sa Ginoo.

Alang sa dugang nga mga ideya kon unsaon pagtuon ug pagtudlo gikan sa mga mensahe sa kinatibuk-ang komperensiya, tan-awa sa “Mga Ideya alang sa Pagkat-on ug Pagtudlo gikan sa Kinatibuk-ang Komperensiya.” (I-klik ang “Ideas for Study” ubos sa “General Conference” diha sa Gospel Library.)