Lako Mai, Mo Muri Au

Veivakavulici, Vuli, kei na Bulataki ni iTukutuku mai na Koniferedi Raraba

Era vakaitavi bibi na kuoramu ni italatala qase kei na Soqosoqo ni Veivukei ena cakacaka ni veivakabulai kei na bula vakacerecerei. Ena nodra soqoni ena Sigatabu, era na veivosakitaka na sala mera bulataka kina na ivakavuvuli ena itukutuku ni koniferedi raraba sa oti ki na nodra sasaga ena cakacaka oqo. Eratou na digitaka na mataveiliutaki ni kuoramu ni italatala qase kei na iSoqosoqo ni Veivukei e dua na itukutuku ni koniferedi me vulici mai na soqoni ni Sigatabu, ka yavutaki ena nodra gagadre na lewenilotu kei na veidusimaki ni Yalotabu. Ena so na gauna, ena dau rawa ni vakatura talega o bisopi se peresitedi ni iteki e dua na itukutuku. Vakararaba, e dodonu mera dau vakabibitaka na iliuliu na itukutuku mai vei iratou na lewe ni Mataveiliutaki Taumada kei na Kuoramu ni iApositolo Le Tinikarua. Ia, sa rawa me veivosakitaki e dua ga na itukutuku mai na koniferedi se qai oti ga.

Era vakanamata na qasenivuli ena ivakarau me ra vukei kina na lewenilotu me ra bulataka na ivakavuvuli ena itukutuku ni koniferedi raraba ena nodra bula. E dodonu mera vakasaqara na iliuliu na sala mera vakayaloqaqataki kina na lewenilotu mera wilika na itukutuku digitaki eso ni bera na soqoni.

Me baleta na itukutuku tale eso me baleta na soqoni ni kuoramu ni italatala qase kei na iSoqosoqo ni Veivukei, raica na iVolavakarau Raraba: Veiqaravi ena Lotu i Jisu Karisito ni Yalododonu Edaidai, 8.2.1.2, 9.2.1.2, ChurchofJesusChrist.org.

Vakavakarau mo Veivakavulici

Na taro eso oqo e rawa ni vukei ira na qasenivuli ni ra tuvanaka mera vakayagataka e dua na itukutuku ni koniferedi raraba mera vakavulica. Kevaka e gadrevi, era na veitalanoa na qasenivuli vata kei na mataveiliutaki ni kuoramu ni italatala qase se iSoqosoqo ni Veivukei ni ra vakasamataka vakatitobu na veitaro oqo.

Na cava na vuna e digitaka kina na mataveiliutaki ni kuoramu ni italatala qase se iSoqosoqo ni Veivukei na itukutuku oqo me veivosakitaki? Na cava era nuitaka ni ra na kila ka cakava na lewenilotu ni oti na veivosakitaki ni itukutuku oqo?
Na cava e vinakata vei keda o koya e vosa meda kila vinaka? Na ivakavuvuli cava ni kosipeli e vakavulica tiko o koya? Ena vakayagataki vakacava na ivakavuvuli oqo ena noda kuoramu se iSoqosoqo ni Veivukei?
Na ivolanikalou cava a vakayagataka o koya me tokona na nona itukutuku? E tiko beka eso tale na ivolanikalou eda rawa ni wilika ka na vakatitobutaka na noda kila? (O na rawa ni kunea eso ena idusidusi e ra ni itukutuku se ena Guide ki na iVolanikalou [scriptures.ChurchofJesusChrist.org].)
Na taro cava eso ena rawa ni vukei ira na lewenilotu mera vakasamataka vakatitobu ka bulataka na ivakavuvuli e loma ni itukutuku? Na taro cava eso ena vukei ira mera raica na yaga ni itukutuku ena nodra bula, ena nodra matavuvale, kei na cakacaka ni Turaga?
Na cava beka au rawa ni cakava me sureta na Yalotabu ki na noda soqoni? Na cava au rawa ni vakayagataka me vakavinakataka cake na veivosaki, oka kina na italanoa, vosa vakatautauvata, sere kei na ivakatagi, kei na cakacaka ni liga? Na cava e cakava o koya e vosa me vukei ira na lewenilotu me ra kila na nona itukutuku?
A solia beka eso na veisureti o koya e vosa? Au na vukei ira vakacava na lewenilotu mera gadreva mera cakacakataka na veisureti o ya?

Vakasama ni iTaviqaravi

E vuqa tu na sala mera vukei kina na lewenilotu mera vuli mai na itukutuku ni koniferedi raraba. Oqo e vica na kena ivakaraitaki; ena tiko beka eso tale na nomu vakasama ena cakacaka vakavinaka cake ena nomu kuoramu se iSoqosoqo ni Veivukei.

Bulataka na dina ena noda bula. Sureti ira na lewenilotu me ra railesuva na itukutuku ni koniferedi ka vaqara na dina ka na rawa ni vukei ira me ra rawata na cakacaka sa solia vei ira yadua na Kalou se vaka e dua na kuoramu ni italatala qase se iSoqosoqo ni Veivukei. Me ivakaraitaki, na cava eda vulica e rawa ni vukei keda me da italatala? ni da itubutubu? me vaka ni da lewenilotu daukaulotu? E veivakauqeti vakacava na itukutuku oqo ki na noda vakasama, veika eda vakila, kei na noda ivalavala?
Veivosaki vakailawalawa. Wasea vakailawalawa lalai na lewenilotu, ka lesia ki na ilawalawa yadua e dua na iwasewase duidui ni itukutuku ni koniferedi mera wilika ka veivosakitaka. Qai kerea na ilawalawa yadua me wasea e dua na dina era sa kunea kei na sala e rawa ni vakayagataki kina. Se e rawa ni o bulia eso na ilawalawa era a tauyavutaka na lewenilotu era a vulica na veiwase duidui ni itukutuku ka mera veiwaseitaka vakai ira na veika era sa kunea.
Vakaraica na isau ni taro Sureta na lewe ni kalasi mera sauma na taro me vaka na kena oqo me baleta na itukutuku ni koniferedi: Na dina cava ni kosipeli eda kunea ena itukutuku oqo? Eda na bulataka vakacava na dina oqo? Na veisureti kei na veivakalougatataki yalataki cava so a soli mai? Na cava e vakavulica vei keda na itukutuku oqo me baleta na cakacaka e gadreva na Kalou meda cakava? Se cakava e vica na nomu taro ka na vakayaloqaqataki ira na lewenilotu me ra vakasamataka vakatitobu na itukutuku se bulataka na dina e vakavulica tiko. Vakatarai ira na lewenilotu me ra digitaka e dua vei ira na taro oqo ka kunea na kena isau ena itukutuku.
Wasea na iyatuvosa mai na itukutuku. Sureti ira na lewenilotu mera wasea eso na iyatuvosa mai na itukutuku ni koniferedi e vakauqeti ira me ra vakayacora na nodra itavi ena cakacaka ni veivakabulai kei na vakacerecerei. Vakayaloqaqataki ira mera raica na sala e rawa ni ra wasea kina na iyatuvosa oqo mera vakalougatataka kina e dua, oka kina o ira era daulomana kei ira era veiqaravi vei ira.
Wasea e dua na lesoni ivakaraitaki. Tataunaka ki na vica na lewenilotu mera na kauta tiko mai eso na iyaya mai vale mera na mai vakayagataka mera vakavulica kina na itukutuku ni koniferedi. Ena gauna ni soqoni, kerei ira na lewenilotu me ra vakamacalataka se veiwekani vakacava na veiyaya oqori ki na itukutuku kei na sala e vakayagataki kina na itukutuku ki na nodra bula.
Vakarautaka e dua na lesoni me vakavulici e vale. Kerei ira na lewenilotu mera cakacaka yarurua mera tuva e dua na lesoni ni lotu ni matavuvale e yavutaki ena itukutuku ni koniferedi. E rawa ni ra sauma na taro vakaoqo: Eda na cakava vakacava me vakatauvatani na itukutuku ki na noda matavuvale? Eda na wasea vakacava na itukutuku oqo vei ira na tamata eda veiqaravi vei ira?
Wasea na veika sotavi. Wilika vata e vica na iyatuvosa mai na itukutuku ni koniferedi. Kerei ira na lewenilotu mera wasea na ivakaraitaki mai na ivolanikalou kei na nodra bula e vakaraitaka se vaqaqacotaka na ivunau e vakavulici tiko ena veiyatuvosa oqo.
Vakaraica e dua na malanivosa. Sureti ira mera vakasaqaqara ena itukutuku ni koniferedi, ka vakaraica na malanivosa eso e vakaibalebale vei ira. Kerei ira me ra wasea na veimalanivosa kei na cava era sa vulica mai kina. Kerei ira me ra wasea na sala e vukei ira kina na ivakavuvuli oqo me ra rawata na cakacaka ni Turaga.

Me baleta na vakasama tale eso ni iwalewale ni vuli kei na veivakavulici mai na itukutuku ni koniferedi raraba, raica na “Vakasama ni Vuli kei na Veivakavulici mai na Koniferedi Raraba.” (Kiliki ena “Vakasama ni Vuli” ena ruku ni “Koniferedi Raraba” ena Gospel Library.)