Dali, Magsunod sa Akon

Pagtudlo, Pagtuon, kag Paggamit sang mga Mensahe halin sa Pangkabilogan nga Komperensya

Ang mga elders quorum kag mga Relief Society may importante nga papel sa buluhaton sang kaluwasan kag pangkahitaasan. Sa ila mga klase kon Domingo, ginahambalan nila kon paano gamiton ang mga pinanudlo sa mga mensahe sang pinakaulihi nga pangkabilogan nga komperensya sa ila mga pagpaninguha sa sining buluhaton. Ang mga pangulohan sang elders quorum kag Relief Society nagapili sang mensahe sa komperensya nga tun-an sa tagsa ka Domingo nga miting, base sa panginahanglan sang mga miyembro kag paggiya sang Espiritu. Kon kis-a, ang bishop ukon stake president mahimo man magpanugyan kon ano ang mensahe. Sa kabilogan, dapat magpili ang mga lider sang mga mensahe halin sa mga miyembro sang Unang Pangulohan kag sang Korum sang Dose ka Apostoles. Pero, ang bisan ano nga mensahe nga halin sa pinakaulihi nga pangkabilogan nga komperensya mahimo hambalan.

Ang mga titser nagatutok kon paano mabuligan ang mga miyembro nga gamiton ang mga pinanudlo sa mga mensahe sa pangkabilogan nga komperensya sa ila mga kabuhi. Ang mga lider kag mga titser nagapangita sang mga paagi agud paisogon ang mga miyembro sa pagbasa sang pinili nga mga mensahe antes sang mga miting.

Para sa dugang nga impormasyon parte sa mga miting sang elders quorum kag Relief Society, tan-awa sa General Handbook: Serving in The Church of Jesus Christ of Latter-day Saints, 8.2.1.2, 9.2.1.2, ChurchofJesusChrist.org.

Pagplano sa Pagtudlo

Ang masunod nga mga pamangkot makabulig sa mga titser sa ila pagplano nga gamiton ang mensahe sa pangkabilogan nga komperensya sa pagtudlo. Kon kinahanglan, ang mga titser magakonsulta sa pangulohan sang elders quorum ukon Relief Society sa ila pagbinagbinag sining mga pamangkot.

Ngaa ginpili sang pangulohan sang elders quorum ukon Relief Society ining mensahe nga hambalan? Ano ang ginalauman nila nga mahibal-an kag himuon sang mga miyembro pagkatapos mahambalan ining mensahe?
Ano ang luyag sang manughambal nga maintiendihan sang mga miyembro? Ano nga mga prinsipyo sang ebanghelyo ang iya ginatudlo? Paano magamit ining mga prinsipyo sa akon elders quorum ukon Relief Society?
Ano nga balaan nga mga kasulatan ang gingamit sang manughambal agud suportahon ang iya mensahe? May iban pa bala nga balaan nga mga kasulatan nga mahimo basahon sang mga miyembro agud magdugang ang ila pag-intiendi? (Mahimo nga may makita kamo sa mga tanda sa katapusan sang mensahe ukon sa Guide to the Scriptures [scriptures.ChurchofJesusChrist.org].)
Ano ang mga mahimo ko ipamangkot nga makabulig sa mga miyembro sa pagbinagbinag kag pagpangabuhi sang mga panudlo sa mensahe? Ano nga mga pamangkot ang makabulig sa ila nga makita ang kapuslanan sini nga mga pinanudlo sa ila mga kabuhi, sa ila mga pamilya, kag sa buluhaton sang Ginuo?
Ano ang sarang ko himuon agud maagda ang Espiritu sa amon miting? Ano ang pwede ko gamiton agud mas mapaayo ang paghambalanay, lakip na ang mga istorya, mga paanggid, musika, kag mga laragway? Ano ang ginhimo sang manughambal agud buligan ang mga miyembro nga maintiendihan ang iya mensahe?
Ang manughambal bala nagtanyag sang mga pangagda? Paano ko mabuligan ang mga miyembro nga magbatyag sang kaluyag sa pag-akto sa sinang mga pangagda?

Mga Ideya para sa Kahiwatan

May madamo nga mga pamaagi nga mabuligan sang mga titser ang mga miyembro nga makatuon halin sa kag ipangabuhi ang mga mensahe sa pangkabilogan nga komperensya. Ari ang pila ka mga halimbawa; basi may iban pa nga mga ideya ang mga titser nga mangin mas epektibo sa ila elders quorum ukon Relief Society.

Ipangabuhi ang mga kamatuoran sa aton mga kabuhi. Imbitara ang mga miyembro nga rebyuhon ang mensahe sa komperensya nga nagapangita sang mga kamatuoran nga makabulig sa ila nga matuman ang buluhaton nga ginhatag sang Dios sa ila bilang mga indibidwal ukon bilang elders quorum ukon Relief Society. Halimbawa, ano ang aton ginatun-an nga makabulig sa aton bilang mga alagad? bilang mga ginikanan? bilang miyembro nga misyonero? Paano ini nga mensahe nagaimpluwensiya sa aton mga hunahuna, mga balatyagon, kag mga buhat?
Maghinambalanay sing grupo-grupo. Tungaa ang mga miyembro sa magagmay nga mga grupo, kag hatagi ang tagsa ka grupo sang lainlain nga bahin sang mensahe sa komperensya nga basahon kag hambalan. Dayon pangabaya ang tagsa ka grupo nga magpaambit sang isa ka kamatuoran nga ila nakita kag kon paano ini magamit sa ila. Ukon mahimo mo grupuhon ang mga miyembro nga nagtuon sang lainlain nga bahin sang mensahe kag tugoti sila nga magpaambit sa isa kag isa sang ila natun-an.
Magpangita sang mga sabat sa mga pamangkot. Imbitara ang mga miyembro sa pagsabat sang mga pamangkot pareho sang mga masunod parte sa mensahe sa komperensya: Ano nga mga kamatuoran sang ebanghelyo ang makita naton sa sining mensahe? Paano naton magamit ining mga kamatuoran? Ano nga mga pangagda kag ginpromisa nga mga bugay ang ginhatag? Ano ang ginatudlo sining mensahe sa aton parte sa buluhaton nga luyag sang Ginuo nga aton himuon? Ukon maghimo sang imo mismo nga mga pamangkot agud paisogon ang mga miyembro nga panumdom sing madalom ang mensahe ukon ipangabuhi ang mga kamatuoran nga ginatudlo sini. Tugoti ang mga miyembro nga magpili sang isa sining mga pamangkot kag pangitaon ang mga sabat sa mensahe.
Magpaambit sang mga pahayag halin sa mensahe. Agdaha ang mga miyembro nga magpaambit sang mga pahayag halin sa mensahe sa komperensya nga nagainspirar sa ila nga tumanon ang ila mga responsibilidad sa buluhaton sang kaluwasan kag pangkahitaasan. Paisoga sila sa pagbinagbinag kon paano nila mapaambit ining mga pahayag agud bugayan ang iban, lakip na ang ila mga pinalangga kag mga tawo nga ila ginaministeran.
Magpaambit sang leksyon nga nagagamit sang mga bagay. Agdaha sing abanse ang pila ka mga miyembro nga magdala sang mga bagay halin sa ila balay nga ila magamit sa pagtudlo parte sa mensahe sa komperensya. Sa tion sang miting, pangabaya ang mga miyembro sa pagpaathag kon paano inang mga bagay naangot sa mensahe kag kon paano ang mensahe magamit sa ila mga kabuhi.
Maghanda sang leksyon nga itudlo sa balay. Pangabaya ang mga miyembro nga magparisay agud magplano sang isa ka leksyon sa home evening nga nabase sa mensahe sa komperensya. Mahimo nila sabton ang mga pamangkot pareho sini: Paano naton himuon ang mensahe nga mapuslanon sa aton mga pamilya? Paano naton ipaambit ining mensahe sa mga tawo nga aton ginaministeran?
Magpaambit sang mga eksperiyensya. Ululupod nga magbasa sang pila ka mga pahayag halin sa mensahe sa komperensya. Pangabaya ang mga miyembro nga magpaambit sang mga halimbawa halin sa balaan nga mga kasulatan kag halin sa ila mga kabuhi nga nagapakita ukon nagapabakod sang doktrina nga ginatudlo sa sining mga pahayag.
Magpangita sang isa ka dinalan. Agdaha ang mga miyembro sa pagbasa sang mensahe sa komperensya nga nagapangita sang mga dinalan nga makahulugan sa ila. Pangabaya sila nga ipaambit ang mga dinalan kag ang ila natun-an halin sa sini. Pangabaya sila nga ipaambit kon paano ining mga pinanudlo nagabulig sa ila sa paghimo sang buluhaton sang Ginuo?

Para sa dugang nga mga ideya sa pagtuon kag pagtudlo gikan sa mga mensahe sa pangkabilogan nga komperensya, tan-awa sa “Ideas for Learning and Teaching from General Conference” (Iclick ang “Ideas for Study” sa idalom sang “General Conference” sa Gospel Library.)