Umaykayo, Sumurot Kaniak

Panangisuro, Panagsursuro, ken Panangyaplikar kadagiti Mensahe manipud iti Sapasap a Komperensia

Napateg ti akem dagiti elders quorum ken Relief Society iti aramid ti pannakaisalakan ken pannakaitan-ok. Bayat dagiti panagmitingda iti Domingo, paglilinnawaganda no kasano a mayaplikar dagiti pannursuro kadagiti kallabes a mensahe iti sapasap a komperensia kadagiti panagkagumaanda iti daytoy nga aramid. Mangpili dagiti panguluen ti elders quorum ken Relief Society iti maysa a mensahe iti komperesia nga adalen iti tunggal miting iti Domingo, a maibatay kadagiti kasapulan dagiti miembro ken pannarabay manipud iti Espiritu. Sagpaminsan, mabalin met nga isingasing ti bishop wenno stake president ti maysa a mensahe. Iti sapasap, nasken a pilien dagiti lider dagiti mensahe manipud kadagiti miembro ti Umuna a Panguluen ken ti Korum dagiti Sangapulo-ket-dua nga Apostol. Nupay kasta, mabalin a paglilinnawagan ti ania man a mensahe manipud iti kaudian a sapasap komperensia.

Agpokus dagiti mannursuro no kasano a matulonganda dagiti miembro a mangyaplikar kadagiti pannursuro manipud kadagiti mensahe iti komperensia iti biagda. Mangsapul dagiti lider ken mannursuro kadagiti wagas tapno maallukoy dagiti miembro nga agadal kadagiti napili a mensahe kasakbayan dagiti miting.

Para iti ad-adu pay nga impormasion maipapan kadagiti miting ti elders quorum ken Relief Society, kitaen iti Sapasap a Handbook: Panagserbi iti Ti Simbaan ni Jesucristo dagiti Santo iti Ud-udina nga Aldaw, 8.2.1.2, 9.2.1.2, ChurchofJesusChrist.org.

Panagplano a Mangisuro

Makatulong dagiti sumaganad a saludsod kadagiti mannursuro bayat ti panagplanoda a mangisuro a mangusar iti maysa a mensahe iti sapasap a komperensia. No kasapulan, makiinnuman dagiti mannursuro iti panguluen ti elders quorum wenno Relief Society bayat ti panangutobda kadagitoy a saludsod.

Apay a pinili ti panguluen ti elders quorum wenno Relief Society daytoy a mensahe tapno paglilinnawagan? Ania ti namnamaenda a maammuan ken aramidento dagiti miembro kalpasan a mapaglilinnawaganda daytoy a mensahe?
Ania ti kayat nga ipaawat ti nagsarita kadagiti miembro? Ania dagiti pagbatayan ti ebanghelio nga isursurona? Kasano a mayaplikar dagitoy a pagbatayan iti elders quorum-ko wenno Relief Society?
Ania dagiti nasantuan a kasuratan nga inusar ti nagsarita a mangsuporta iti mensahena? Adda kadi dagiti dadduma pay a nasantuan a kasuratan a mabalin a basaen dagiti miembro a mangpauneg iti pannakaawatda? (Mabalin a masarakam ti sumagmamano kadagiti endnote ti mensahe wenno iti Pangiwanwan iti Nasantuan a Kasuratan [scriptures.ChurchofJesusChrist.org].)
Ania dagiti saludsod a mabalinko a damagen a mangtulongto kadagiti miembro a mangutob ken mangyaplikar kadagiti pannursuro iti mensahe? Ania dagiti saludsod a mangtulongto kadakuada a mangkita iti pakainaigan dagitoy a pannursuro iti biagda, iti pamiliada, ken iti aramid ti Apo?
Ania ti mabalinko nga aramiden a mangawis iti Espiritu iti mitingmi? Ania ti mabalinko nga usaren a mangpapintas iti panaglilinnawag, agraman dagiti estoria, pangngarig, musika, wenno artwork? Ania ti inaramid ti nagsarita tapno matulongan dagiti miembro a maawatan ti mensahena?
Nangted kadi ti nagsarita kadagiti ania man nga awis? Kasano a matulongak dagiti miembro a makarikna iti tarigagay nga agtignay kadagita nga awis?

Dagiti Kapanunotan para iti Aktibidad

Adu dagiti wagas a pakatulongan dagiti mannursuro kadagiti miembro nga agsursuro ken mangyaplikar kadagiti mensahe iti sapasap a komperensia. Adtoy ti sumagmamano a pagarigan; mabalin nga addaan dagiti mannursuro iti dadduma pay a kapanunotan a nasaysayaat a maaramatto iti elders quorum-da wenno Relief Society.

Yaplikar dagiti kinapudno iti biagtayo. Awisem dagiti miembro a mangrebyu iti mansahe iti komperensia a mangsapsapul kadagiti kinapudno a makatulong kadakuada a mangipatungpal iti aramid nga inted ti Dios kadakuada kas indibidual wenno kas maysa nga elders quorum wenno Relief Society. Kas pagarigan, ania ti masursurotayo a makatulong kadatayo kas minister? kas nagannak? kas miembro a misionario? Kasano a makaimpluensia daytoy a mensahe iti panunot, rikna, ken aramidtayo?
Paglilinnawagan kas grupo. Bingayen dagiti miembro iti babassit a grupo, ket idutok iti tunggal grupo ti sabali a benneg ti mensahe iti komperensia tapno basaen ken paglilinnawaganda. Kalpasanna awisen ti tunggal grupo a mangibinglay ti maysa a kinapudno a nasarakanda ken kasano a mayaplikar kadakuada daytoy. Wenno mabalinmo ti mangbukel kadagiti grupo dagiti miembro a nangadal iti nadumaduma a benneg ti mensahe ket paibinglay kadakuada iti tunggal maysa no ania ti nasarakanda.
Biroken dagiti sungbat dagiti saludsod. Mangawis kadagiti miembro a mangsungbat kadagiti saludsod kas iti sumaganad maipapan iti mensahe iti komperensia: Ania dagiti kinapudno iti ebanghelio a masarakantayo iti daytoy a mensahe? Kasano a mayaplikartayo dagitoy a kinapudno? Ania dagiti awis ken naikari a bendision a naited? Ania ti isuro daytoy a mensahe kadatayo maipapan iti trabaho a kayat ti Dios nga aramidentayo? Wenno mangparnuay kadagiti sumagmamano a bukodmo a saludsod a mangallukoy kadagiti miembro nga agpanunot iti nauneg maipapan iti mensahe wenno mangyaplikar kadagti kinapudno nga isuro daytoy. Pagpiliem dagiti miembro iti maysa kadagitoy a saludsod ken pasapulmo dagiti sungbat manipud iti mensahe.
Mangibinglay kadagiti palawag manipud iti mensahe. Mangawis kadagiti miembro ti klase a mangibinglay kadagiti palawag manipud iti mensahe iti komperensia a mangparegta kadakuada a mangipatungpal kadagiti pagrebbenganda iti aramid ti pannakaisalakan ken pannakaitan-ok. Allukoyen ida a mangpanunot no kasano a maibinglayda dagitoy a palawag a mangbendision iti maysa a tao, agraman dagiti ipatpateg ken dagiti tao a pagministeranda.
Ibinglay ti maysa a banag nga adalen. Iti nasapsapa, mangawis iti sumagmamano a miembro a mangitugot kadagiti banag [objects] manipud iti pagtaengan a mabalinda nga usaren a mangisuro maipapan iti mensahe iti komperensia. Kabayatan ti miting, pailawlawag kadagiti miembro no kasano a mainaig dagita a banag iti mensahe ken no kasano a mayaplikar ti mensahe iti biagda.
Isagana ti maysa nga adalen nga isuro iti pagtaengan. Idawat kadagiti miembro nga agtrabaho iti kada paris tapno mangplano iti maysa nga adalen iti home evening a maibasar iti mensahe iti komperensia. Mabalinda a sungbatan dagiti saludsod a kas kadagitoy: Kasano a maaramidtayo ti mensahe a mainaig kadagiti pamiliatayo? Kasano a maibinglaytayo daytoy a mensahe kadagiti tao a pagministerantayo?
Ibiglay dagiti padas. Basaen nga aggigiddan ti sumagmamano a palawag manipud iti mensahe iti komperensia. Idawat kadagiti miembro a mangibinglay kadagiti pagarigan manipud kadagiti nasantuan a kasuratan ken manipud iti biagda a mangipakita wenno mangpatibker iti doktrina a naisuro kadagitoy a palawag.
Mangsapul iti maysa a ragup ti balikas [phrase]. Awisen dagiti miembro a mangsukisok iti mensahe iti komperensia a mangsapsapul kadagiti ragup ti balikas a napnuan kaipapanan kadakuada. Paibinglay kadakuada dagiti ragup ti balikas ken no ania ti masursuroda manipud kadagitoy. Awisen ida a mangibinglay no kasano a makatulong kadakuada dagitoy a pannursuro a mangipatungpal iti aramid ti Apo.

Para iti ad-adu pay a kapanunotan maipapan iti no kasano ti panangadal ken panangisuro manipud kadagiti mensahe iti sapasap a komperensia, kitaen iti “Dagiti Kapanunotan para iti Panagsursuro ken Panangisuro manipud iti Sapasap a Komperensia.” (Iklik ti “Dagiti Kapanunotan iti Panagadal” iti babaen ti “Sapasap a Komperensia” iti Gospel Library.)