Li Komonil re Tenq’ank ut lix molameb’ li xb’eenil
Xk’utb’aleb’, xtzolb’aleb’, ut xyu’aminkileb’ li esil re li jolomil ch’utub’aj-ib’

Kim, Taaqehin

Xk’utb’aleb’, xtzolb’aleb’, ut xyu’aminkileb’ li esil re li jolomil ch’utub’aj-ib’

Aajel ru xk’anjel lix molameb’ li xb’eenil ut li Komonil re Tenq’ank sa’ li k’anjel re li kolb’a-ib’ ut li taqenaqil loq’al. Sa’ xch’utameb’ re domingo, neke’aatinak chirix xyu’aminkil li na’leb’ re li jolomil ch’utub’aj-ib’ sa’ xyalb’aleb’ xq’e chixb’aanunkil li k’anjel a’an. Eb’ li awa’b’ejil re lix molameb’ li xb’eenil ut li Komonil re Tenq’ank neke’xsik’ ru jun esil re li jolomil ch’utub’aj-ib’ choq’ re li junjunq ch’utam, a’ yaal k’a’ru na’ajman ru choq’ reheb’ li komon ut jo’ b’eresinb’ileb’ xb’aan li Musiq’ej. Wan naq, li obiisp malaj li awa’b’ej re oqech naru tixsik’ ru li esil. Us naq eb’ laj jolominel te’xsik’eb’ ru li esil k’eeb’il xb’aaneb’ li komon re li Xb’eenil Awa’b’ejil ut lix Molameb’ li Kab’laju chi Apostol. A’b’anan, yalaq b’ar wan reheb’ li esil re li jolomil ch’utub’aj-ib’ toje’ xnume’ naru taatzole’q.

Eb’ laj k’utunel neke’xyal xq’e chixtenq’ankileb’ li komon re te’xyu’amiheb’ li na’leb’ re li jolomil ch’utub’aj-ib’. Eb’ laj jolominel ut laj k’utunel neke’xtaw chan ru te’xwaklesiheb’ xch’ool li komon chixtz’ilb’al rix li esil sik’b’il ru chi rub’elaj li ch’utam.

Re xtawb’al xkomon chik li na’leb’ chirix xch’utam lix molameb’ li xb’eenil malaj li Komonil re Tenq’ank, chi’ilmanq Manual General: Servir en La Iglesia de Jesucristo de los Santos de los Últimos Días, 8.2.1.2, 9.2.1.2, ChurchofJesusChrist.org.

Li kawresink-ib’ re k’utuk

Eb’ li patz’om a’in naru te’xtenq’aheb’ laj k’utunel naq neke’xsik’ ru jun esil re li jolomil ch’utub’aj-ib’ re te’xk’ut. Wi na’ajman ru, eb’ laj k’utunel te’xtaw xna’leb’ rik’in li awa’b’ejil re li molam malaj li Komonil re Tenq’ank naq yookeb’ chixk’oxlankileb’ li patz’om a’in.

  • K’a’ut naq li awa’b’ejil re lix molameb’ li xb’eenil malaj li Komonil re Tenq’ank kixsik’ ru li esil a’an? K’a’ru neke’raj naq li komon te’xnaw ut te’xb’aanu chirix xtzolb’al li esil a’an?

  • K’a’ru naraj laj aatinanel naq li komon te’xtaw ru? K’a’ruheb’ li na’leb’ re li evangelio li yoo chi aatinak wi’? Chan ru naq li na’leb’ taak’anjelaq sa’ lin molam malaj li Komonil re Tenq’ank?

  • K’a’ruheb’ li raqal reheb’ li loq’laj hu li kiroksi laj aatinanel re xk’utb’al xyaalal li kixye? Ma wankeb’ chik li raqal reheb’ li loq’laj hu naru te’ril ru li komon re naq taanimanq lix nawomeb’? (Naru xtawb’al junjunq sa’eb’ li raqalil li wankeb’ sa’ xraqik li esil malaj sa’ li K’utul Raqal reheb’ li Loq’laj Hu.)

  • K’a’ruheb’ li patz’om tinruuq chiroksinkil li te’xtenq’aheb’ li komon chixk’oxlankil ut chixyu’aminkil li na’leb’ sa’ li esil? K’a’ruheb’ li patz’om li te’xtenq’aheb’ chixk’eeb’al reetal xnimal ru li na’leb’ sa’ xyu’ameb’ a’an, sa’ xjunkab’aleb’, ut sa’ lix k’anjel li Qaawa’?

  • K’a’ru tinb’aanu re xb’oqb’al li Musiq’ej sa’ li qach’utam? K’a’ru tinb’aanu re xchaab’ilob’resinkil li aatinak, jo’eb’ li seraq’, li jaljookil ru aatin, li b’ich, malaj li jalam-uuch? K’a’ru kixb’aanu laj aatinanel re xtenq’ankileb’ li komon chixtawb’al ru li kixye?

  • Ma wan li k’a’ru kooxb’oq chixb’aanunkil laj aatinanel? Chan ru naq tintenq’aheb’ li komon chireek’ankil rajomeb’ xch’ool chixk’anjelankileb’ li b’oqom a’an?

Li na’leb’ choq’ reheb’ li kok’ k’anjel

K’iila paay chan ru naq laj k’utunel naru tixtenq’aheb’ li komon chixtzolb’aleb’ ut chixyu’aminkileb’ li esil re li jolomil ch’utub’aj-ib’. A’in junjunq li eetalil naru xb’aanunkil; naru naq eb’ laj k’utunel wankeb’ jalan chik lix na’leb’ chaab’il wi’chik chiruheb’ a’in sa’ lix molameb’ li xb’eenil malaj li Komonil re Tenq’ank.

  • Xyu’aminkileb’ li na’leb’ sa’ li qayu’am. B’oqeb’ li komon chirilb’al li esil re li jolomil ch’utub’aj-ib’ re te’xtaw k’a’ru taatenq’anq reheb’ chixb’aanunkil li k’anjel k’eeb’il reheb’ xb’aan li Dios sa’ junesal malaj sa’ lix molameb’ li xb’eenil malaj li Komonil re Tenq’ank. K’a’ru naqatzol li tooxtenq’a jo’ aj ilol komon? jo’ na’b’ej yuwa’b’ej? jo’ misioneer? Chan ru naq li esil naxjal li qak’oxlahom, li qeek’ahom, ut li qab’aanuhom?

  • Aatinak sa’ kok’ ch’uut. K’eheb’ li komon sa’ kok’ ch’uut, ut k’e re li junjunq ch’uut jun raqal re li esil re te’ril ru ut te’aatinaq wi’. Patz’ reheb’ naq te’xwotz jun na’leb’ xe’xtaw ut chan ru naq nak’anjelak sa’ xyu’ameb’. Malaj tatruuq chixk’eeb’aleb’ li komon sa’ kok’ ch’uut b’ar wi’ li junjunq jalan li xe’ril ru, ut taakanab’eb’ chixwotzb’al chirib’ileb’ rib’ li xe’xtaw.

  • Xsik’b’aleb’ lix sumenkileb’ li patz’om. Patz’ reheb’ li komon naq te’xsume li patz’om a’in chirix li esil re li jolomil ch’utub’aj-ib’: K’a’ruheb’ li na’leb’ re li evangelio naqataw sa’ li esil a’in? Chan ru naru naqayu’amiheb’ li na’leb’ a’in? K’a’ruheb’ li b’oqok li k’eeb’ileb’ ut k’a’ruheb’ li osob’tesink li yeechi’inb’ileb’ sa’ li esil? K’a’ru naxk’ut chiqu li esil a’in chirix li k’anjel naraj li Dios naq taqab’aanu? Malaj taawoksi jalank chik patz’om re xtenq’ankileb’ li komon chixtz’ilb’al rix li esil malaj xyu’aminkil li na’leb’ naxk’ut. Kanab’eb’ li komon chixsik’b’al ru jun li patz’om ut chixtawb’al xsumenkil sa’ li esil.

  • Xwotzb’al li aatin sa’ li esil. Patz’ reheb’ li komon naq te’xwotz li aatin wan sa’ li esil re li jolomil ch’utub’aj-ib’ li naxmusiq’aheb’ chixb’aanunkil lix teneb’ankileb’ sa’ li k’anjel re li kolb’a-ib’ ut li taqenaqil loq’al. Waklesi xch’ooleb’ chixk’oxlankil chan raj ru te’ruuq chixwotzb’al li aatin a’an re rosob’tesinkil li ras riitz’in, jo’eb’ li raarookeb’ xb’aan ut eb’ li komon li neke’ril.

  • Roksinkil jun ch’ina k’anjeleb’aal. Chi rub’elaj, b’oqeb’ junjunq li komon chixk’amb’al chaq junaq k’a’aq re ru sa’ rochocheb’ li naru te’roksi re k’utuk chirix li esil re li jolomil ch’utub’aj-ib’. Sa’ li ch’utam, kanab’eb’ li komon chixch’olob’ankil chan ru naq li k’a’aq re ru a’an naxk’am rib’ rik’in li esil, ut chan ru naq nak’anjelak li esil sa’ xyu’ameb’.

  • Xkawresinkil jun tzolok re xk’utb’al sa’ li ochoch. Patz’ reheb’ li komon naq te’k’anjelaq chi ka’kab’il re xkawresinkil jun tzolok sa’ li ochoch chirix li esil re li jolomil ch’utub’aj-ib’. Naru te’xsume li patz’om a’in: K’a’ru naru taqab’aanu re naq taawanq xyaalal li esil a’an choq’ re li qajunkab’al? Chan ru naru taqawotz li esil a’an rik’ineb’ li komon naqileb’?

  • Xwotzb’al li numsihom. Ilomaq ru junjunqeb’ li ch’ol aatin sa’ li esil re li jolomil ch’utub’aj-ib’. Patz’ reheb’ li komon naq te’xwotz li seraq’ sa’eb’ li loq’laj hu ut sa’ xyu’ameb’ a’an li neke’xk’utb’esi malaj neke’xka’suti li tzol’leb’ li k’utb’il sa’eb’ li ch’ol aatin a’an.

  • Xtawb’al jun ch’ol aatin. Patz’ reheb’ li komon naq te’ril li esil re li jolomil ch’utub’aj-ib’ re te’xtaw ch’ol aatin li neke’xtoch’ xch’ooleb’. Patz’ reheb’ naq te’xwotz li ch’ol aatin ut li k’a’ru xe’xtzol. Patz’ reheb’ naq te’xye chan ru naq li na’leb’ a’an naxtenq’aheb’ chixb’aanunkil lix k’anjel li Qaawa’.

Re xtawb’al xkomon chik li na’leb’ chirix xtzolb’al ut xk’utb’al li aatin re li jolomil ch’utub’aj-ib’, chi’ilmanq “Ideas para aprender y enseñar de la conferencia general.” (Naru xtawb’al sa’ “Ideas para el estudio” sa’ “Conferencia General” sa’ li Biblioteca del Evangelio.)