ຈົ່ງຕາມເຮົາມາ

ການສິດສອນ, ການຮຽນຮູ້, ແລະ ການນຳໃຊ້ຂ່າວສານຈາກກອງປະຊຸມໃຫຍ່ສາມັນ

ກຸ່ມແອວເດີ ແລະ ສະມາຄົມສະຕີສົງເຄາະ ມີບົດບາດສຳຄັນໃນວຽກງານແຫ່ງຄວາມລອດ ແລະ ຄວາມສູງສົ່ງ. ລະຫວ່ງການປະຊຸມໃນວັນອາທິດຂອງເຂົາເຈົ້າ, ເຂົາເຈົ້າຈະສົນທະນາເຖິງວິທີທີ່ຈະນຳໃຊ້ຄຳສອນ ຢູ່ໃນຂ່າວສານຈາກກອງປະຊຸມໃຫຍ່ສາມັນເທື່ອລ່າສຸດ ກັບຄວາມພະຍາຍາມຂອງເຂົາເຈົ້າໃນວຽກງານນີ້. ຝ່າຍປະທານກຸ່ມແອວເດີ ແລະ ຝ່າຍປະທານສະມາຄົມສະຕີສົງເຄາະ ຈະເລືອກເອົາຂ່າວສານຈາກກອງປະຊຸມໃຫຍ່ ເພື່ອຮຽນຮູ້ລະຫວ່າງການປະຊຸມແຕ່ລະວັນອາທິດ, ອີງຕາມຄວາມຕ້ອງການຂອງສະມາຊິກ ແລະ ຕາມການນຳພາຈາກພຣະວິນຍານ. ອະທິການ ຫລື ປະທານສະເຕກ ອາດແນະນຳຂ່າວສານໃດໜຶ່ງເປັນບາງຄັ້ງ. ໂດຍທົ່ວໄປແລ້ວ, ຜູ້ນຳຄວນເລືອກເອົາຂ່າວສານຈາກສະມາຊິກໃນຝ່າຍປະທານສູງສຸດ ແລະ ກຸ່ມອັກຄະສາວົກສິບສອງ. ເຖິງຢ່າງໃດກໍຕາມ, ກໍສາມາດນຳຂ່າວສານໃດໜຶ່ງ ຈາກກອງປະຊຸມໃຫຍ່ສາມັນເທື່ອລ່າສຸດ ມາສົນທະນາໄດ້.

ຄູສອນຈະສຸມໃສ່ວິທີທີ່ຈະຊ່ວຍສະມາຊິກໃຫ້ນຳໃຊ້ຄຳສອນຢູ່ໃນຂ່າວສານຂອງກອງປະຊຸມໃຫຍ່ສາມັນ ໃນຊີວິດຂອງເຂົາເຈົ້າ. ຜູ້ນຳ ແລະ ຄູສອນຈະຫາວິທີທີ່ຈະຊຸກຍູ້ສະມາຊິກ ໃຫ້ສຶກສາຂ່າວສານທີ່ໄດ້ຖືກເລືອກໄວ້ລ່ວງໜ້າ ກ່ອນການປະຊຸມ.

ສຳລັບຂໍ້ມູນເພີ່ມເຕີມກ່ຽວກັບການປະຊຸມຂອງກຸ່ມແອວເດີ ແລະ ຂອງສະມາຄົມສະຕີສົງເຄາະ, ໃຫ້ເບິ່ງ General Handbook: Serving in The Church of Jesus Christ of Latter-day Saints, 8.2.1.2, 9.2.1.2, ChurchofJesusChrist.org.

ການກະກຽມເພື່ອສິດສອນ

ຄຳຖາມດັ່ງຕໍ່ໄປນີ້ ສາມາດຊ່ວຍຄູສອນ ຂະນະທີ່ເຂົາເຈົ້າກະກຽມທີ່ຈະໃຊ້ຂ່າວສານຈາກກອງປະຊຸມໃຫຍ່ ເພື່ອສິດສອນ. ເມື່ອຈຳເປັນ, ຄູສອນຈະປຶກສາກັບຝ່າຍປະທານກຸ່ມແອວເດີ ຫລື ຝ່າຍປະທານສະມາຄົມສະຕີສົງເຄາະ ຂະນະທີ່ເຂົາເຈົ້າໄຕ່ຕອງຄຳຖາມເຫລົ່ານີ້.

ເປັນຫຍັງຝ່າຍປະທານກຸ່ມ ຫລື ຝ່າຍປະທານສະມາຄົມສະຕີສົງເຄາະຈຶ່ງເລືອກຂ່າວສານນີ້ເພື່ອສົນທະນາ? ເຂົາເຈົ້າຄາດຫວັງໃຫ້ສະມາຊິກຮູ້ຈັກ ແລະ ເຮັດຫຍັງ ຫລັງຈາກການສົນທະນາກ່ຽວກັບຂ່າວສານນີ້?
ຜູ້ກ່າວປາໄສຢາກໃຫ້ສະມາຊິກເຂົ້າໃຈຫຍັງແດ່? ເພິ່ນສິດສອນຫລັກທຳພຣະກິດຕິຄຸນກ່ຽວກັບຫຍັງ? ຫລັກທຳເຫລົ່ານີ້ກ່ຽວຂ້ອງກັບກຸ່ມແອວເດີ ແລະ ສະມາຄົມສະຕີສົງເຄາະຂອງເຮົາແນວໃດ?
ຜູ້ກ່າວປາໄສໄດ້ໃຊ້ຂໍ້ພຣະຄຳພີໃດແດ່ ເພື່ອສົ່ງເສີມຂ່າວສານຂອງເພິ່ນ? ມີຂໍ້ພຣະຄຳພີອື່ນໃດບໍ ທີ່ຈະຊ່ວຍສະມາຊິກໃຫ້ເຂົ້າໃຈເລິກເຊິ່ງກວ່າເກົ່າ? (ທ່ານສາມາດຊອກຫາຂໍ້ພຣະຄຳພີ ຢູ່ໃນແຫລ່ງອ້າງອີງຂອງຂ່າວສານ ຫລື ຢູ່ໃນຄູ່ມືພຣະຄຳພີ [scriptures.ChurchofJesusChrist.org].)
ມີຄຳຖາມໃດແດ່ທີ່ເຮົາສາມາດຖາມ ເພື່ອໃຫ້ສະມາຊິກໄຕ່ຕອງ ແລະ ນຳໃຊ້ຄຳສອນໃນຂ່າວສານ? ມີຄຳຖາມໃດແດ່ທີ່ຈະຊ່ວຍເຂົາເຈົ້າໃຫ້ເຫັນຄວາມກ່ຽວຂ້ອງຂອງຂ່າວສານເຫລົ່ານີ້ໃນຊີວິດຂອງເຂົາເຈົ້າ, ໃນຄອບຄົວຂອງເຂົາເຈົ້າ, ແລະ ໃນວຽກງານຂອງພຣະຜູ້ເປັນເຈົ້າ?
ເຮົາສາມາດເຮັດຫຍັງ ເພື່ອເຊື້ອເຊີນພຣະວິນຍານໃຫ້ມາສະຖິດຢູ່ໃນການປະຊຸມຂອງເຮົາ? ເຮົາສາມາດໃຊ້ສິ່ງໃດແດ່ ເພື່ອສົ່ງເສີມການສົນທະນາ, ຮ່ວມທັງເລື່ອງເລົ່າ, ຄຳປຽບທຽບ, ເພງ, ຫລື ງານສິລະປະ? ຜູ້ກ່າວປາໄສເຮັດສິ່ງໃດເພື່ອຊ່ວຍສະມາຊິກໃຫ້ເຂົ້າໃຈຂ່າວສານຂອງເພິ່ນ?
ຜູ້ກ່າວປາໄສໄດ້ສະເໜີຄຳເຊື້ອເຊີນໃດບໍ່? ເຮົາຈະຊ່ວຍສະມາຊິກໃຫ້ຮູ້ສຶກປາດຖະໜາທີ່ຈະເຮັດຕາມຄຳເຊື້ອເຊີນເຫລົ່ານັ້ນໄດ້ແນວໃດ?

ແນວຄິດສຳລັບກິດຈະກຳ

ມັນມີຫລາຍວິທີທາງ ທີ່ຄູສອນສາມາດຊ່ວຍສະມາຊິກໃຫ້ຮຽນຮູ້ ແລະ ນຳໃຊ້ຂ່າວສານຂອງກອງປະຊຸມໃຫຍ່ສາມັນ. ຕໍ່ໄປນີ້ແມ່ນຕົວຢ່າງຈຳນວນໜຶ່ງ; ຄູສອນອາດມີແນວຄິດອື່ນອີກ ທີ່ຈະໃຊ້ໄດ້ດີກວ່າ ຢູ່ໃນກຸ່ມ ຫລື ໃນສະມາຄົມສະຕີສົງເຄາະຂອງເຂົາເຈົ້າ.

ນຳໃຊ້ຄວາມຈິງໃນຊີວິດຂອງເຮົາ. ເຊື້ອເຊີນສະມາຊິກໃຫ້ທົບທວນຂ່າວສານຈາກກອງປະຊຸມໃຫຍ່ ເພື່ອຊອກຫາຄວາມຈິງທີ່ສາມາດຊ່ວຍເຂົາເຈົ້າໃຫ້ສຳເລັດວຽກງານທີ່ພຣະເຈົ້າໄດ້ມອບໃຫ້ເຂົາເຈົ້າແຕ່ລະຄົນ ຫລື ໃຫ້ກຸ່ມແອວເດີ ຫລື ສະມາຄົມສະຕີສົງເຄາະ. ຍົກຕົວຢ່າງ, ເຮົາຮຽນຮູ້ຫຍັງແດ່ທີ່ສາມາດຊ່ວຍເຮົາໃນຖານະເປັນຜູ້ປະຕິບັດສາດສະໜາກິດ? ຖານະພໍ່ແມ່? ຖານະຜູ້ສອນສາດສະໜາ? ຂ່າວສານມີອິດທິພົນຕໍ່ຄວາມຄິດ, ຄວາມຮູ້ສຶກ, ແລະ ການກະທຳຂອງເຮົາແນວໃດ?
ສົນທະນາເປັນກຸ່ມ. ແຍກສະມາຊິກອອກເປັນກຸ່ມນ້ອຍໆ, ແລະ ມອບໝາຍພາກສ່ວນໜຶ່ງຂອງຂ່າວສານຈາກກອງປະຊຸມໃຫຍ່ ໃຫ້ແຕ່ລະກຸ່ມ ເພື່ອອ່ານ ແລະ ສົນທະນາ. ແລ້ວຂໍໃຫ້ແຕ່ລະກຸ່ມແບ່ງປັນຄວາມຈິງທີ່ເຂົາເຈົ້າພົບເຫັນ ແລະ ມັນກ່ຽວຂ້ອງກັບເຂົາເຈົ້າແນວໃດ. ຫລື ທ່ານສາມາດຈັດໃຫ້ມີຫລາຍກຸ່ມເພື່ອສຶກສາພາກສ່ວນທີ່ແຕກຕ່າງກັນຂອງຂ່າວສານ ແລະ ອະນຸຍາດໃຫ້ເຂົາເຈົ້າແບ່ງປັນນຳກັນໃນສິ່ງທີ່ເຂົາເຈົ້າພົບເຫັນ.
ຊອກຫາຄຳຕອບໃຫ້ກັບຄຳຖາມ. ເຊື້ອເຊີນສະມາຊິກໃຫ້ຕອບຄຳຖາມດັ່ງເຊັ່ນຕໍ່ໄປນີ້ ກ່ຽວກັບຂ່າວສານຈາກກອງປະຊຸມໃຫຍ່: ເຮົາພົບເຫັນຄວາມຈິງຂອງພຣະກິດຕິຄຸນຢ່າງໃດແດ່ ຢູ່ໃນຂ່າວສານນີ້? ເຮົາຈະນຳໃຊ້ຄວາມຈິງເຫລົ່ານີ້ໃນທາງໃດແດ່? ມີຄຳເຊື້ອເຊີນ ແລະ ພອນທີ່ສັນຍາໃດແດ່ ທີ່ມອບໃຫ້? ຂ່າວສານນີ້ສອນເຮົາຫຍັງແດ່ກ່ຽວກັບວຽກງານ ທີ່ພຣະເຈົ້າປະສົງໃຫ້ເຮົາເຮັດ? ຫລື ຕັ້ງຄຳຖາມສອງສາມຂໍ້ດ້ວຍຕົວເອງ ທີ່ຊຸກຍູ້ສະມາຊິກໃຫ້ຄິດຢ່າງເລິກເຊິ່ງກ່ຽວກັບຂ່າວສານ ຫລື ນຳໃຊ້ຄວາມຈິງທີ່ມັນສິດສອນ. ອະນຸຍາດໃຫ້ສະມາຊິກເລືອກເອົາຄຳຖາມຂໍ້ໜຶ່ງ ແລະ ຊອກຫາຄຳຕອບຢູ່ໃນຂ່າວສານ.
ແບ່ງປັນຂໍ້ຄວາມຈາກຂ່າວສານ. ເຊື້ອເຊີນສະມາຊິກໃຫ້ແບ່ງປັນຂໍ້ຄວາມຈາກຂ່າວສານຂອງກອງປະຊຸມໃຫຍ່ ທີ່ດົນໃຈເຂົາເຈົ້າໃຫ້ບັນລຸໜ້າທີ່ຮັບຜິດຊອບຂອງເຂົາເຈົ້າ ໃນວຽກງານແຫ່ງຄວາມລອດ ແລະ ຄວາມສູງສົ່ງ. ຊຸກຍູ້ເຂົາເຈົ້າໃຫ້ພິຈາລະນາ ວິທີທີ່ເຂົາເຈົ້າສາມາດແບ່ງປັນຂໍ້ຄວາມເຫລົ່ານີ້ ເພື່ອເປັນພອນໃຫ້ແກ່ບາງຄົນ, ຮ່ວມທັງຄົນທີ່ເຂົາເຈົ້າຮັກ ແລະ ຜູ້ທີ່ເຂົາເຈົ້າປະຕິບັດສາດສະໜາກິດຕໍ່.
ແບ່ງປັນບົດຮຽນທີ່ໃຊ້ສິ່ງຂອງ. ຂໍໃຫ້ສະມາຊິກສອງສາມຄົນຕຽມສິ່ງຂອງລ່ວງໜ້າຈາກເຮືອນ ທີ່ເຂົາເຈົ້າສາມາດໃຊ້ເພື່ອສິດສອນກ່ຽວກັບຂ່າວສານຈາກກອງປະຊຸມໃຫຍ່. ລະຫວ່າງການປະຊຸມ, ຂໍໃຫ້ສະມາຊິກອະທິບາຍກ່ຽວກັບສິ່ງຂອງເຫລົ່ານັ້ນກ່ຽວຂ້ອງກັບຂ່າວສານແນວໃດ ແລະ ຂ່າວສານກ່ຽວຂ້ອງກັບຊີວິດຂອງເຂົາເຈົ້າແນວໃດ.
ກະກຽມບົດຮຽນເພື່ອສອນຢູ່ທີ່ບ້ານ. ຂໍໃຫ້ສະມາຊິກຊ່ວຍກັນເປັນຄູ່ໆ ເພື່ອວາງແຜນບົດຮຽນການສັງສັນໃນຕອນແລງ ທີ່ກ່ຽວກັບຂ່າວສານຈາກກອງປະຊຸມໃຫຍ່. ເຂົາເຈົ້າສາມາດຕອບຄຳຖາມດັ່ງເຊັ່ນ: ເຮົາຈະເຮັດໃຫ້ຂ່າວສານກ່ຽວຂ້ອງກັບຄອບຄົວຂອງເຮົາໄດ້ແນວໃດ? ເຮົາຈະສາມາດແບ່ງປັນຂ່າວສານນີ້ກັບຜູ້ທີ່ເຮົາປະຕິບັດສາດສະໜາກິດຕໍ່ໄດ້ແນວໃດ?
ແບ່ງປັນປະສົບການ. ອ່ານບົດຄວາມຫລາຍຕອນຈາກຂ່າວສານຂອງກອງປະຊຸມໃຫຍ່ນຳກັນ. ຂໍໃຫ້ສະມາຊິກແບ່ງປັນຕົວຢ່າງຈາກພຣະຄຳພີ ແລະ ຈາກຊີວິດຂອງເຂົາເຈົ້າ ທີ່ສະແດງ ຫລື ສົ່ງເສີມຄຳສອນ ທີ່ໄດ້ສິດສອນຢູ່ໃນບົດຄວາມເຫລົ່ານັ້ນ.
ຊອກຫາວະລີ. ເຊື້ອເຊີນສະມາຊິກໃຫ້ໃຊ້ຂ່າວສານຢູ່ໃນກອງປະຊຸມໃຫຍ່ ເພື່ອຊອກຫາວະລີຕ່າງໆ ທີ່ມີຄວາມໝາຍຕໍ່ເຂົາເຈົ້າ. ຂໍໃຫ້ເຂົາເຈົ້າແບ່ງປັນວະລີເຫລົ່ານັ້ນ ແລະ ສິ່ງທີ່ເຂົາເຈົ້າໄດ້ຮຽນຮູ້ຈາກມັນ. ຂໍໃຫ້ເຂົາເຈົ້າແບ່ງປັນວິທີທີ່ຄຳສອນເຫລົ່ານີ້ຊ່ວຍເຂົາເຈົ້າໃຫ້ສຳເລັດວຽກງານຂອງພຣະຜູ້ເປັນເຈົ້າແນວໃດ.

ສຳລັບແນວຄິດເພີ່ມເຕີມເພື່ອຮຽນຮູ້ ແລະ ສິດສອນຈາກຂ່າວສານຂອງກອງປະຊຸມໃຫຍ່ສາມັນ, ໃຫ້ເບິ່ງ “Ideas for Learning and Teaching from General Conference.” (ໃຫ້ກົດ “Ideas for Study” ຢູ່ກ້ອງຫົວຂໍ້ “General Conference” ໃນ ຫ້ອງສະໝຸດພຣະກິດຕິຄຸນ.)