Relief Society ne Mpanimfoɔ Kuo
Adekyerɛ, Adesua, ne Amansan Nhyiamu Nkransɛm a Wɔde Di Dwuma

Bra, Di M’akyi

Adekyerɛ, Adesua, ne Amansan Nhyiamu Nkransɛm a Wɔde Di Dwuma

Ɛldafoɔ akuo ne Relief Society foɔ di dwuma titire pa ara wɔ nkwagyeɛ ne mmasoɔ adwuma no mu. Ɛduru wɔn Kwasiada nhyiamu a, wɔdwennwene sɛdeɛ wɔde nkyerɛkyerɛ a ɛwɔ amansan nhyiamu a ɛtwaam nkyɛree mu nkransɛm bɛdi dwuma wɔ mmɔden a wɔrebɔ wɔ saa adwuma yi mu. Ɛldafoɔ kuo ne Relief Society atitenafoɔ gyina asɔremma no adehia ne akwankyerɛ a ɛfiri Honhom no hɔ so yi nhyiamu nkrasɛm bi sua ho adeɛ Kwasiada nhyiamu biara. Ɛwom a, ɔhwɛfoɔ anaa pɛɛwa titenani nso bɛtumi ayi nkrasɛm bi. Ne nyinaa mu no, ɛwɔ sɛ akannifoɔ no yi nkransɛm a ɛfiri Atitenafoɔ a Wɔdi Kan ne Asomafoɔ Dumienu Kuo no hɔ. Nanso, wɔbɛtumi asua nkrasɛm biara a ɛfiri amansan nhyiamu a ɛnkyɛree mu.

Akyerɛkyerɛfoɔ twe adwene kɔ sɛdeɛ wɔbɛboa asɔremma ma wɔde nkyerɛkyerɛ a ɛwɔ amansan nhyiamu nkransɛm mu adi dwuma wɔ wɔn abrabɔ mu. Akannifoɔ ne akyerɛkyerɛfoɔ pɛ akwan bi hyɛ asɔremma no nkuran ma wɔsua nkransɛm a wɔayi no ansa na wɔahyiam wɔ asɔre.

Wɔ nsɛm a ɛfa mpanimfoɔ kuo ne Relief Society nhyiamu ho no, hwɛ Amansan Akwankyerɛ nwoma: Ɔsom wɔ Yesu Kristo Asɔre a Ɛwɔ hɔ ma Nna a Ɛdi Akyire Ahotefoɔ, 8.2.1.2, 9.2.1.2, ChurchofJesusChrist.org.

Adekyerɛ Nhyehyɛeɛ

Nsɛmmisa a ɛdidi soɔ yi bɛtumi aboa akyerɛkyerɛfoɔ berɛ a wɔreyɛ nhyehyɛeɛ a wɔde amansan nhyiamu nkransɛm kyerɛ adeɛ. Ɛhia sɛ, akyerɛkyerɛfoɔ ne ɛldafoɔ akuo ne Relief Society atitenafoɔ susu ho wɔ berɛ a wɔredwene saa nsɛmmisa yinom ho.

  • Adɛn nti na ɛldafoɔ kuo ne Relief Society atitenafoɔ yii saa nkrasɛm yi sɛ yɛnsua? Deɛn na wɔhwehwɛ sɛ yɛbɛhunu na yɛayɛ wɔ saa nkrasɛm yi sua akyi?

  • Deɛn na ɔkasafoɔ no pɛ sɛ asɔremma te aseɛ? Asɛmpa nnyinasosɛm bɛn na ɔrekyerɛ? Sɛn na saa nnyinasosɛm yi fa ɛldafoɔ kuo anaa Relief Society ho?

  • Twerɛnsɛm bɛn na ɔkasafoɔ no de yɛɛ nnyinasoɔ wɔ ne nkrasɛm no mu? Twerɛnsɛm foforɔ bi wɔ hɔ a asɔremma bɛtumi akan ama wɔn nteaseɛ asi pi anaa? (Wobɛtumi ahunu bi wɔ nkrasɛm no aseɛ ntwerɛ anaa wɔ Akwankyerɛ a ɛkɔ Twerɛnsɛm no mu [scriptures.ChurchofJesusChrist.org].)

  • Nsɛmmisa bɛn na mɛtumi abisa a ɛbɛboa asɔremma no ama wɔadwene ho na wɔde nkyerɛkyerɛ a ɛwɔ nkrasɛm no mu adi dwuma? Nsɛmmisa bɛn na ɛbɛboa ama wɔahunu sɛdeɛ saa nkyerɛkyerɛ yi ho hia ma wɔn abrabɔ, wɔn mmusua, ne Awurade adwuma no mu?

  • Deɛn na mɛtumi ayɛ de ato nsa afrɛ Honhom no aba yɛn nhyiamu ase? Deɛn na mɛtumi de aboa adesua no, te sɛ abasɛm, mfatoho, dwom ne mfoni? Deɛn na ɔkasafoɔ no yɛɛe de boa maa wɔtee ne nkrasɛm no ase?

  • Ɔkasafoɔ no too nsa frɛɛ obi? Sɛn na mɛtumi aboa ama asɔremma no atu ɔfrɛ no ho anammɔn?

Dwumadie Nsusuiɛ

Akwan pii wɔ hɔ a akyerɛkyerɛfoɔ bɛboa ama asɔremma asua adeɛ na wɔde amansan nhyiamu nkransɛm adi dwuma. Yei yɛ nhwɛsoɔ kakra; akyerɛkyerɛfoɔ bɛtumi nso anya adwene foforɔ a ɛbɛboa ayɛ adwuma yie wɔ wɔn ɛldafoɔ kuo anaa Relief Society mu.

  • Yɛmfa nokorɛ nni dwuma wɔ yɛn abrabɔ mu. Ma asɔremma nsusu nhyiamu nkrasɛm no ho, nhwehwɛ nokorɛ a ɛbɛtumi aboa wɔn ma wɔayɛ adwuma a Onyankopɔn de ama wɔn sɛ ankorakoro anaa ɛldafoɔ kuo anaa Relief Society. Sɛ ebia, deɛn na yɛsua a ɛbɛtumi aboa yɛn sɛ asomfoɔ? sɛ awofoɔ? sɛ asɔremma-asɛmpatrɛfoɔ? Sɛn na saa nkrasɛm yi nya nkɛntɛnsoɔ wɔ yɛn adwene, atenka, ne nneyɛɛ mu?

  • Akuakuo nsusu ho Kyɛ nnipa no mu akuakuo nketewa, na ma ekuo biara nkenkan nhyiamu nkransɛm no fa bi na wɔn nsusu ho. Afei ma ekuo biara nkyɛ nokorɛ bi a wɔsuaeɛ ne sɛdeɛ ɛfa wɔn ho. Anaa wobɛtumi akyekyɛ wɔn mu akuakuo a ɛyɛ wɔn a wɔsuaa nkrasɛm no afa afoforɔ na woama wɔne wɔn ho wɔn ho akyɛ deɛ wɔsuaeɛ.

  • Hwehwɛ mmuaeɛ ma nsɛmmisa. Frɛ asɔremma no ma wɔnyi nsɛmmisa a ɛfa nhyiamu nkransɛm no ho te sɛ deɛ ɛdidi soɔ yi: Asɛmpa nokorɛ bɛn na yɛsua firi saa nkrasɛm yi mu? Sɛn na yɛde saa nokorɛ yi bɛyɛ adwuma? Frɛ ne bɔhyɛ nhyira bɛn na wɔde maeɛ? Deɛn na saa nkrasɛm yi kyerɛ yɛn fa deɛ Nyankopɔn pɛ sɛ yɛyɛ ho? Anaa wo ara yɛ nsɛmmisa kakraabi a ɛhyɛ asɔremma nkuran ma wɔdwene nkrasɛm no ho kɔ akyiri anaa wɔde nokorɛ a ɛkyerɛkyerɛ no di dwuma. Ma asɔremma no kwan ma wɔnyi nsɛmmisa yi mu baako na wɔnhwehwɛ mmuaɛ wɔ nkrasɛm no mu.

  • Kyɛ nsɛm firi nkrasɛm no mu. Ma asɔremma nkyɛ nsɛm a ɛfiri nhyiamu no nkrasɛm mu a ɛhyɛ wɔn nkuran ma wɔyɛ wɔn asɛdeɛ wɔ nkwagyeɛ ne mmasoɔ adwuma no mu. Hyɛ wɔn nkuran ma wɔnnwene sɛdeɛ wɔbɛtumi ne afoforɔ akyɛ saa nsɛm no ma ahyira obi, te sɛ wɔn adɔfoɔ ne wɔn a wɔsom wɔn.

  • Kyɛ botaeɛ adesua. Di kan frɛ nnipa no bi ma wɔmfa biribi mfiri fie mmra a wɔde bɛkyerɛ deɛ wɔsuaɛ fa nhyiamu no nkransɛm ho. Nhyiamu no mu no, bisa asɔremma no ma wɔnkyerɛ sɛdeɛ saa nneɛma no ne nkrasɛm no bɔ abusua ne sɛdeɛ nkrasɛm no fa wɔn abrabɔ ho.

  • Hyehyɛ adesuadeɛ a wobɛkyerɛ wɔ fie. Ma asɔremma no nyɛ adwuma mmɔm mmienu mmienu nsiesie sɛdeɛ wɔbɛyɛ efie anwumerɛ adesua fa nhyiamu no nkrasɛm bi ho. Wɔbɛtumi abua nsɛmmisa te sɛ: Sɛn na yɛbɛtumi ama nkrasɛm no ho aba mfasoɔ ama yɛn mmusua? Sɛn na yɛbɛtumi ne wɔn a yɛsom wɔn no akyɛ saa nkrasɛm yi?

  • Kyɛ suahunu. Mo nkenkan nhyiamu no mu nsɛm bebree mmɔm. Bisa asɔremma no ma wɔn kyɛ nhwɛsoɔ mfiri twerɛnsɛm mu ne wɔn abrabɔ mu a ɛkyerɛ anaa ɛhyɛ nkyerɛkyerɛ a ɛwɔ saa nkransɛm yi mu kena.

  • Hwehwɛ ɔkasasini bi. Ma asɔremma no nhwehwɛ nhyiamu nkrasɛm no mu kasasini a ɛtɔ aso mu ma wɔn. Ma wɔnkyɛ saa kasasini no ne deɛ wɔsua firi mu. Ma wɔnkyɛ sɛdeɛ saa nkyerɛkyerɛ yi boa wɔn ma wɔyɛ Awurade adwuma no.

Sɛ wopɛ nsusuiɛ bebree fa sɛdeɛ wɔsua na wɔkyerɛ adeɛ firi amansan nhyiamu nkransɛm mu a, hwɛ “Ideas for Learning and Teaching from General Conference”. (Mia “Adesua Nsusuiɛ” wɔ “Amansan Nhyiamu” ase wɔ Asɛmpa Akoraeɛ no mu.)