PAGTABANG SA UBAN

Kon imong mahibaloan nga ang usa ka sakop sa pamilya o higala nahisugamak sa pornograpiya, mahimong mawad-an ka og gana, mobati ka nga giluiban, o mapungot. Niini nga mga kalisdanan, makadawat ka og kalig-on samtang magpatambag ka sa imong bishop. Mahimo sab ka nga mangayo og panalangin sa priesthood gikan sa usa ka takus nga naghupot sa priesthood. Dili nimo angay basulon ang imong kaugalingon alang sa mga binuhatan sa uban. Ang kada usa mao ang responsable sa iyang kaugalingong batasan.

Makatabang ka sa imong higala o sakop sa pamilya samtang magpadayon ka sa pagpausbaw sa imong kaugalingong espirituhanong kusog. Ang kahayag sa ebanghelyo diha sa imong kinabuhi mobayaw kanimo ug dako ang mahimo sa pagpahawa sa kangitngit sa kinabuhi niadtong imong gimahal. Samtang ikaw magtinguha sa panag-uban sa Espiritu, ang Ginoo mogiya kanimo. Tinguhaa ang Iyang tabang pinaagi sa pag-ampo, pagtuon sa mga kasulatan, ug pagtambong sa templo.

Ang mosunod nga mga baruganan makatabang usab kanimo samtang ikaw makiguban sa imong higala o sakop sa pamilya:

• Paminaw pag-ayo. Ayaw pagtubag uban sa kakurat o kasuko. Ayaw pagdali-dali og hatag og tambag. Pakig-istorya sa maong tawo sa mahigugmaon ug masaligon nga paagi.

• Pagmabination ug mahigugmaon, apan ayaw pagtugot o pag-apil sa dili maayo nga batasan.

• Likayi ang pagpanaway o pagbuot. Ang imong higala o sakop sa pamilya posibleng dili mohisgot sa mga problema kon ikaw motubag sa pagsaway o masuk-anon nga paagi. Ang pagpanaway mohimo sa uban sa pagtago nalang hinoon sa mga problema imbis mangayo og tabang.

• Suportahi ang mga paningkamot nga maghinulsol. Ipadayag ang imong pagsalig sa imong higala o sakop sa pamilya. Iampo siya. Tabangi siya nga makakita og solusyon sa pagsulbad sa problema, lakip ang tino nga mga plano sa paglikay sa pornograpiya ug sa paghinulsol. Awhaga siya sa pagpakigsulti sa bishop.

• Dayga ang tino nga mga kalig-on ug maayo nga mga gibuhat.

• Istoryahi ninyo ang mga paagi sa pagtangtang sa tintasyon.

• Pagkat-on sa pagpasaylo.

Kon ang imong higala o sakop sa pamilya nakigsulti sa bishop ug ang bishop wala mopahamtang og tataw o makita nga pagkastigo, mahimong mobati ka nga ang problema wala kaayo giseryoso. Hibaloi nga ang bishop nagsalig sa Espiritu sa pagdeterminar sa unsay pinakamaayo nga makatabang sa matag indibidwal.