Mataupu Faavae o le Auaunaga

O E Misia Lenei Vaega Taua o le Auaunaga?

O le auauna atu o le “olioli faatasi ma i latou e olioli” e pei lava o le “tagi foi faatasi ma e ua fetagisi” (Roma 12:15).

Liahona, Oketopa 2019

Ata na tusia e Augusto Zambonato

Pe a tatou mafaufau e uiga i le auaunaga, e faigofie ona mafaufau i le fesoasoani ia i latou e le tagolima. Tatou te talanoa e uiga i le faia o togalaau mo le fafine ua oti lana tane, aumaia o meaai i e mamaʻi, poʻo le foai atu ia i latou o loʻo feagai ma tauiviga. Tatou te manatua le fautuaga a Paulo ia “tagi foi faatasi ma e ua fetagisi,” ae tatou te taulai atu ea i le vaega muamua o lena fuaiupu—ia “olioli faatasi ma e ua olioli”? (Roma 12:15). O le fiafia faatasi ma i latou tatou te auauna atu i ai—pe o lena auala e faamanatu ai lo latou manuia pe fesoasoani ia i latou e maua le olioli i taimi faigata-–o se vaega taua o le auauna atu e pei ona faia e le Faaola.

O manatu nei e tolu e mafai ona fesoasoani (ma le tasi e aloese mai ai) pe a tatou vaavaai e taulai atu i mea lelei ua tuuina mai e le Atua io tatou olaga.

1. Ia Nofouta

E fesoasoani Bonnie H. Cordon, le Peresitene Aoao o Tamaitai Talavou, ia i tatou ia malamalama e manaomia ona tatou vaai ia i latou o loo tatou auauna atu i ai—vaai e le gata ia latou avega ma tauiviga ae faapea foi o latou malosiaga, taleni, ma manuia. Sa ia faapea mai, e tatau ona avea i tatou ma “siamupini ma se tagata faatuatuaina—o se tasi o loʻo silafia o latou tulaga ma lagolagoina i latou io latou faamoemoega ma faanaunauga.”¹

I le faataoto o mamoe ma ‘oti, na fetalai ai le Faaola ia i latou o le a maua i Lona itu taumatau o le a fesili: “Le Alii e, o anafea na matou iloa ai oe ua fia ai, ma matou fagaina oe? po o le fia inu, ma avane e te inu ai?

“O anafea foi na matou iloa ai oe o le tagata ese, ma matou talia oe?” (Mataio 25:37–38).

“Uso e ma tuagane, o le upu sili ona taua o le iloa,” o le tala lea a Sister Cordon. “Sa iloaina e ē amiotonu i latou na manaomia le fesoasoani aua sa latou leoleo ma matauina. E mafai foi ona tatou mataala ina ia fesoasoani ma faamafanafana, ina ia faamanatu ma miti.”²

2. Saili Mafuaaga e Faamanatu ai

Faʻamanatu manuia pe tele pe laitiiti. Po o le tea ese o le kanesa poʻo le faaumaga o se faigauo, mauaina o se galuega fou poʻo le mauaina o se seevae na leiloa, o le aulia o le masina ina ua mavae le maliu o se tasi e pele, pe aulia se vaiaso e aunoa ma le suka.

Valaʻau e faamalo, momoli atu se kata, pe o e aai i le taimi o le malologa o le aoauli. E ala i le faasoa faatasi o tatou faamanuiaga, ola ai ma le agaga faafetai, ma le faamanatuina o faamanuiaga ma manuia o isi, ua tatou “maua ai le fiafiaga i le olioli o o tatou uso” (Alema 30:34).

3. Vaai i le Aao o le Alii

O nisi taimi o le fiafia faatasi ma isi o lona uiga o le fesoasoani ia i latou ia iloa mafuaaga e fiafia ai—e tusa lava po o a faigata poʻo mea fiafia e ulufale mai io tatou olaga. O le upumoni faigofie e silafia e le Tama Faalelagi i tatou ma saunia e siitia i tatou e mafai ona avea o se punavai ofoofogia o le olioli.

E mafai ona e fesoasoani i isi ia iloa le aao o le Alii io latou olaga e ala i le faasoa atu o le auala na e vaaia ai i lou lava olaga. Ia lava le maualalo e faasoa mai ai auala na fesoasoani ai le Tama Faalelagi ia te oe e ala i ou luitau. O lenei molimau e mafai ona fesoasoani i isi ia iloa ma faailoa atu ai pe na faapefea ona Ia fesoasoani ia i latou (tagai Mosaea 24:14).

4. Aua le Faatapulaaina Lou Malosi e Olioli Ai

Ae paga lea, e mafai ona tatou faʻatapulaʻaina lo tatou lava malosi e fiafia ai ma isi, aemaise lava pe a tatou lagona le le mautinoa e uiga i mea tatou te ofoina atu po o fea o tatou i ai i le olaga. Nai lo le mauaina o le olioli i le fiafia o se isi, tatou te pauu atu i le mailei o le faatusatusaga. Ma e pei ona aoao mai Elder Quentin L. Cook o le Korama a Aposetolo e Toasefululua: “O le faatusatusaina o faamanuiaga e toetoe lava a mautinoa e tuliesea ai le olioli. E le mafai ona tatou lotofaafetai ma lotoleaga i le taimi e tasi.”³

“E mafai faapefea ona tatou faatoilaloina se ituaiga naunautaiga e taatele i le toetoe o tagata uma?” O le fesili lea a Elder Jeffrey R. Holland o le Korama a Aposetolo e Toasefululua. “… E mafai ona tatou faitauina o tatou faamanuiaga e tele ma e mafai ona tatou faamalo atu i mea na ausia e isi. O le auala sili, e mafai ona tatou auauna i isi, o le gaoioiga sili ona lelei mo le fatu.”⁴ Nai loo le faatusatusa, e mafai ona tatou faamalo atu ia i latou o tatou auauna atu i ai. Saoloto e faasoa atu vaega e te talisapaia e uiga ia i latou po o tagata o o latou aiga.

E pei ona faamanatu mai e Paulo, o i tatou uma o le tino o Keriso, ma pe a “viia le tasi itu tino, ia olioli faatasi ai itu tino uma lava” (1 Korinito 12:26). Faatasi ai ma le fesoasoani a le Tama Faalelagi, e mafai ona tatou nofouta i aafiaga o isi, faamanatu manuia tetele ma laiti, fesoasoani ia i latou ia iloa le aao o le Alii, ma faatoilalo le lotoleaga ina ia tatou olioli moni faatasi i faamanuiaga, taleni, ma le fiafia o isi.

Faamatalaga

1. Bonnie H. Cordon, “Avea ma se Leoleo Mamoe,” Liahona, Nov. 2018, 75.

2. Bonnie H. Cordon, “Avea ma se Leoleo Mamoe,” 75.

3. Quentin L. Cook, “Rejoice!” Ensign, Nov. 1996, 30.

4. Jeffrey R. Holland, “O le Isi Atalii Faama’imau ‘Oa,” Liahona, Me 2002, 64.

O Le Faataitaiga a le Faaola

E masani ona olioli Iesu Keriso i le fiafia o isi. Sa Ia auai i le faaipoipoga i Kana, lea na le gata ina faamanatuina ai le taimi fiafia ae na Ia liua le vai i le uaina (tagai Ioane 2:1--11). E mafai foi ona tatou faia se taumafaiga e auai atu i ni fuafuaga taua i olaga o i latou o tatou auauna atu i ai.

Tatou te vaai ai foi i le olioli o Iesu Keriso i le amiotonu o isi. Ina ua Ia asiasi atu i sa Nifae, sa Ia fetalai atu ia te i latou, “Amuia lava outou ona o lo outou faatuatua. Ma o lenei faauta, ua atoatoa lou olioli” (3 Nifae 17:20).

Valaaulia e Faatino

Mafaufau ia i latou o e auauna i ai. O a ni taleni ma malosiaga o ia i latou? O a ni avanoa poʻo ni manuia na latou mauaina? E faʻapefea ona e fiafia faʻatasi ma i latou, faamalo atu ia i latou, pe faʻamalosia i latou?

Faasoa Ou Aafiaga

Auina mai ou aafiaga ia i matou a o e auauna atu i isi pe na e mauaina ni auaunaga. Alu i le liahona.ChurchofJesusChrist.org ma kiliki le “Submit an Article po o Feedback.”