Mataupu Faavae o le Auaunaga

E Mafai Ona Ou Fesoasoani i se Tasi e SUI?

Ioe. Ae o lau matafaioi atonu e ese nai lo le mea na e mafaufau i ai.

Liahona, Aokuso 2019

Vai Ola, saunia e Simon Dewey

Na foafoaina i tatou ma le gafatia e sui ai. O le tuputupu ae agai i lo tatou gafatia paia o le faamoemoega lea o lo tatou aafiaga faaletino. O se tasi o a tatou sini autu i le auaunaga o le fesoasoani lea i isi e o mai ia Keriso ma faia suiga e tatau ai e toe foi atu ai i Lona afioaga. Ae ona o la latou faitalia, o la tatou matafaioi i le fesoasoani ia latou avea atili faapei o Keriso e tapulaa.

O ni lesona mamana ia e fitu mai le Faaola i auala e mafai ai ona tatou fesoasoani i isi i a latou taumafaiga e sui ma avea atili e faapei o Ia.

1. Aua le Fefe e Valaaulia le Suiga

   

   O Le Fafine Na Molia i le Mulilua, saunia e Harry Anderson

   Sa le fefe le Faaola e valaaulia isi e tuua auala tuai i tua ma opoina Ana aoaoga. Na Ia valaauliaina Peteru ma Iakopo e tuua a la galuega ma “faia oulua ma fai faiva i tagata” (Mareko 1:17). Sa Ia valaauliaina le fafine na molia i le mulilua; e “alu ia oe, aua e te toe agasala” (Ioane 8:11). Sa ia valaauliaina le taulealea mauoa ina ia tuu ese lana sootaga i mea faalelalolagi ma mulimuli ia te Ia. (tagai Mareko 10:17–22). E mafai foi e i tatou uma ona lototetele ma lotoalolofa a o tatou valaauliaina isi e faia ni suiga ma mulimuli i le Faaola.

2. Manatua O La Latou Filifiliga le Suia

   O le ituaiga o suiga e valaaulia e le Faaola e le mafai ona faamalosia. Sa aoao ma valaaulia e le Faaola, ae Na te lei faamalosia. O le alii talavou mauoa “ona alu ese ai lea o ia ma le tiga” (Mataio 19:22). I Kapanaumi, o le toatele o Ona soo na filifili e “toe foi,” ma na Ia fesili atu i le Toasefululua pe latou te o ese foi (tagai Ioane 6:66–67). O nisi o soo o Ioane le Papatiso na filifili e mulimuli i le Faaola, o isi e leʻi faapea ona faia (tagai Ioane 1:35–37; 10:40–42). E mafai ona tatou valaauliaina isi ina ia avea faapei o Ia, ae e le mafai ona tatou faia le filifiliga e sui mo i latou. Ma afai latou te lei filifili lava e sui, e le tatau ona tatou fiu—e le tatau foi ona tatou lagona ua tatou toilalo.

3. Tatalo mo le Gafatia o Isi ia Suia

   

   Faamatalaga mai le Sa Ou Tatalo mo Oe, saunia e Del Parson

   I le taimi o Lana Tatalo Faatoga, na ole atu ai Iesu i le Atua ina ia taofia ona soo mai le leaga, ia avea faapei o Ia ma le Tama, ma o le a faatumuina i le alofa o le Atua (tagai Ioane 17:11, 21–23, 26). Ma o le iloaina o le a manaomia e Peteru le malosi i ana taumafaiga e tuputupu ae i lana matafaioi, na tatalo ai le Faaola mo ia (tagai Luka 22:32). O a tatou tatalo mo isi e mafai ona faia se eseesega (tagai Iakopo 5:16).

4. Aoao i Latou ia Faalagolago i Lona Mana

   Ua na o le Faaola lava e mafai ai ona tatou suia moni ma alualu i luma i le gafatia paia tatou te maua uma. O Ia “o le ala, ma le upu moni, ma le ola: e le alu atu lava se tasi i le tama, pe a le ui mai ia te [Ia]” (Ioane 14:6). O Lona mana lea e mafai ona “faia mea vaivai ia avea ma mea malolosi” (Eteru 12:27). O le faatuatua i Lona mana faaola na mafai ai e Alema le Itiiti ona suia (tagai Alema 36:16–23). E mafai ona tatou aoao isi e faalagolago i le Faaola ina ia latou maua foi Lona mana faamamaina i o latou olaga.

5. Taulimaina i Latou o ni Tagata e Mafai ona Avea ai i Latou

   O le alofa ma le taliaina e mafai ona avea ma malosiaga mamana o suiga. O le fafine i le vaieli sa nonofo ma se tamaloa e le o lana tane. E oo lava i soo o Iesu “ua ofo ina ua tautala i laua ma le fafine” (Ioane 4:27), ae na sili atu le popole o Iesu i le ituaiga tagata e mafai ona avea ai o ia. Na Ia aoaoina o ia ma tuu atu le avanoa e suia ai, lea sa ia faia. (Tagai i le Ioane 4:4–42.)

   Pe a tatou taulimaina isi e pei ona latou i ai nai lo le ituaiga tagata e mafai ona avea ai i latou, e mafai ona tatou taofia i latou. Nai lo lea, e mafai ona tatou faʻamagalo ma faʻagalo mea sese ua tuanai. E mafai ona tatou talitonu e mafai e isi ona suia. E mafai ona tatou le amanaiaina le vaivai ma faasino atu i uiga lelei atonu latou te le mafai ona vaai ia i latou lava. “Ua ia i matou le tiutetauave e vaai atu ai i tagata taitoatasi e le pei oi latou ae pei ona mafai ona avea ai i latou.”¹

6. Tuu ia i Latou e Sui I La Latou Lava Taimi

   O le suia e tele se taimi e alu ai. E tatau ona tatou “faaauau pea i le onosai seia faaatoatoaina [tatou]” (Mataupu Faavae ma Feagaiga 67:13). Sa onosai Iesu i isi ma sa faaauau pea ona aoao atu e oo lava ia i latou na tetee ia te Ia, ma molimau atu i Lana matafaioi na tuuina atu ia te Ia e Lona Tama ma tali a latou fesili (tagai Mataio 12:1–13; Ioane 7:28–29). E mafai ona tatou onosaʻi i isi ma faʻamalosia i latou ia onosai ia i latou lava.

7. Aua le Fiu pe Afai Latou te Toe fo’i i Ala Tuai

   

   Faamatalaga mai le Pe Sili Mai Lou Alofa ia te Au, nai lo Latou Nei? saunia e David Lindsley

   Ina ua mavae le maliu o Keriso, e oo lava ia Peteru ma nisi o Aposetolo na toe foi atu i mea na latou masani ai (tagai Ioane 21:3). Na faamanatu atu e Keriso ia Peteru e tatau ona ia “fafagaina [Ana] mamoe” (tagai Ioane 21:15–17), ma na toe foi Peteru i le galuega. E mafai ona faigofie tele le toe foʻi i auala muamua. E mafai ona tatou faaauau pea ona lagolago atu ma le agamalu ma faamalosiauga musuia e faaauau pea ona mulimuli i le Faaola ma taumafai e avea atili e faapei o Ia.

Faataga Isi ia Tuputupu Aʻe

Na faamatalaina e Elder Jeffrey R. Holland o le Korama a Aposetolo e Toasefululua lenei tala e uiga i le faatagaina o isi ia tuputupu ae: “Sa ta’u mai ia te au e uiga i se taulealea lea na tele lava ona avea ma autu o tausuaga uma i lana aoga mo le tele o tausaga. Sa i ai ni ona vaivaiga, ma na faigofie ai i ana tupulaga ona faalili ia te ia. Mulimuli ane i lona olaga na malaga ese o ia. Na iu ina faatasi atu o ia i le ami ma na mauaina ai ni aafiaga faamanuiaina iina i aoaoga ma faasolosolo ai lava ina laa ese mai le taimi ua tuanai. O le taualuga o na mea uma, e pei ona faia e le toatele i le militeli, na ia mauaina le matagofie ma le mamalu sili o le Ekalesia ma sa toaga ma fiafia ai.

“Ina ua mavae ni nai tausaga, sa toe foi o ia i le aai sa nofo ai a o talavou. O le toatele lava o lana tupulaga ua malaga ese ae le o i latou uma. O le mea moni lava, ina ua ia toe foi mai ma le matuai faamanuiaina ma ua toe fanauina, sa i ai pea lava iina le faiva o mafaufauga sa i ai muamua, o loo faatalitali i lona toe foi mai. I tagata i lona lava nuu, o ia lava lea tuai ‘ma lea mea ma lea.’ …

“O sia mea itiiti ma sia mea itiiti o taumafaiga a lenei alii faapei o Paulo ina ia tuua na mea uma ua tuanai ae pue mai le taui lea na faataatia e le Atua i ona luma, sa mou malie ese atu seia oo ina maliu o ia i le tulaga lava lea na ia ola ai i lona talavou. … E matuai leaga, matuai faanoanoa lava ona ua toe siomia o ia e … i latou o e na manatu e sili atu le manaia o lona taimi ua mavae nai lo lona lumanai. Na mafai ona latou toso ese mai lona lima le mea lea na uuina ai o ia e Keriso. Ma na maliu faanoanoa o ia, e ui e le o sona sese na mafua ai. …

“Tuu atu i tagata ia salamo. Tuu atu i tagata ia tuputupu ae. Talitonu e mafai e tagata ona sui ma faaleleia.”²

Faamatalaga

1. Thomas S. Monson, “Vaai Atu i Isi i Tagata e Mafai ona Avea ai i Latou,” Liahona, Nov. 2012, 68, 70.

2. Jeffrey R. Holland, “Le mea Sili e Oo i Ai,” Liahona, Ian. 2010, 19, 20.

Valaaulia e Faatino

O le a se mea e mafai ona e faia i lenei vaiaso e valaauliaina ai ma lagolago isi i a latou taumafaiga e sui ma avea atili e faapei o le Faaola?

Faasoa Ou Aafiaga

Auina mai ou aafiaga ia i matou a o e auauna atu i isi pe na e mauaina ni auaunaga. Alu i le liahona.lds.org ma kiliki le “Submit an Article po o Feedback.”