Mataupu Faavae mo le Auaunaga

E Lima Mea e Fai e Tagata e Faalogo Lelei

O le faalogo moni lava o le a fesoasoani ia te oe ia iloa le auala e fesoasoani atu ai lea e faamalieina ai manaoga faaleagaga ma faaletino o isi e pei ona faia e le Faaola.

Liahona, Iuni 2018

Atapue mai le Getty Images

Na saunoa mai Elder Jeffrey R. Holland o le Korama a Aposetolo e Toasefululua, “Atonu o le mea e sili atu le taua nai lo o le tautala, o le faalogo. … Afai tatou te faalogo ma le alofa, o le a tatou le tau mafaufau po o le a se upu e fai atu. O le a tuuina mai ia i tatou—e le Agaga.”¹

O le faalogo o se tomai e mafai ona tatou aoaoina. O le faalogo e faaalia ai lo tatou alolofa mo isi, fesoasoani e atiae ai sootaga malolosi, ma valaaulia ai le Agaga e faamanuia i tatou i le meaalofa o le iloatino e fesoasoani ai ia i tatou ia malamalama i manaoga o isi.² O auala nei e lima e mafai ona tatou faaleleia ai le auala tatou te faalogo ai.

1. Tuu Atu ia i Latou le Taimi

E toatele tagata e manaomia le taimi e āoāo ai o latou manatu a o le’i saunoa atu. Tuu atu ia i latou le taimi e mafaufau muamua ai ma pe a maea foi ona latou fai maia se tala (tagai i le Iakopo 1:19). Talu ai ona ua maea ona latou saunoa e le faapea ai la ua latou saunoa i mea uma na manaomia ona latou saunoa ai. Aua ne’i fefe i le leleoa (tagai i le Iopu 2:11–3:1 ma le Alema 18:14–16).

2. Gauai Atu

E vave atu lo tatou mafaufau i lo le tautala o isi. Tetee atu i le faaosoosoga o le vave oso i faaiuga pe muai mafaufau i mea o le a e tautala ai pe a uma ona saunoa mai i latou (tagai Faataoto 18:13). Ae, faalogo ma le naunautai ia malamalama. O le a lelei atu lou tali atu ona o le a faailoa atu i se malamalamaaga sili atu.

3. Faamanino

Aua ne’i fefe e fai atu ni fesili e faamanino ai se mea e te le’i malamalama ai (tagai Mareko 9:32). O le faamaninoina e faaitiitia ai le malamalama sese ma faaalia ai lou naunau i mea sa talanoaina.

4. Manatunatu

Toe faaupu mea na e faalogo i ai ma le auala na e malamalama i ai i le isi tagata ina ia e lagonaina ai. O le a fesoasoani lenei mea ia latou iloa ai pe ua latou malamalama ma tuu atu ai ia i latou se avanoa e faamanino ai.

5. Mauaina o se Tulaga Laugatasia

Atonu e te le ioe i mea uma ua talanoaina, ae ia ioe i mea e mafai ona e ioe i ai e aunoa ma le aveseseina o ou lava lagona. O le ioe [i se mea] e mafai ona fesoasoani e faaitiitia le atuatuvale ma le faatautee (tagai i le Mataio 5:25).

Sa aoao mai Peresitene Russell M. Nelson e tatau ona tatou “aoao e faalogo, ma faalogo e aoao mai le tasi ma le isi.”³ A e faalogo ma le naunautaiga e aoao e uiga i isi, o le a e i ai i se tulaga lelei atu e malamalama ai i o latou manaoga ma faalogo ai i uunaiga e uiga i le auala e mafai ai ona e popole mo i latou o siomiaina oe e pei ona faia e le Faaola.

O Le Faalogo O Le Alofa

O se tala mai ia Elder Holland ua faaalia ai le mana o le faalogo:

“Sa faasolomuli lemu mai i fafo e la’u uo o Troy Russell lana pikiapu mai lana faletaavale … Sa ia lagona le pa’u pito i tua ua oso i luga o se patupatu. … Sa ia oso i fafo ae iloa atu o lona atalii faapelepele e iva tausaga le matua o Austen, o loo faō i luga o le auala … ua maliu Austen.

“I le le mafai ai ona moe pe maua se filemu, sa lē mafaamafanafanaina Troy. … Ae i lena taimi o tiga matuitui na oo atu ai … John Manning.

“Ou te le iloa po o le a le faatulagaga a John ma lana soa talavou na faia e asiasi ai i le aiga o Russell. … Ae o le mea ou te iloa, o le tautotogo ua mavae sa aapa atu ai Uso Manning i lalo ma piki ifo i luga ia Troy Russell mai le faalavelave i lena auala taavale e pei lava ona pikiina i luga e Troy lava ia ia Austen. E pei lava o le … uso i le talalelei sa tatau ona avea ai o ia, sa faia ai e John le tausiga ma le vaavaaiga faaleperisitua o Troy Russell. Sa ia amata i le faapea atu ‘Troy, e manao Austen ia e tu i luga i ou vae—e aofia ai le malae paseketipolo—o lea la o le a ou i ai iinei i taeao uma i le 5:15 a.m. Ia e sauni. …’

“‘Ou te lei fia alu,’ sa ta’u mai e Troy ia te au mulimuli ane, ‘ona sa ou aveina lava Austen i taimi uma. … Ae sa finau pea John, o lea sa ou alu ai. Mai lena aso muamua, sa ma talanoa—pe ou te tautala foi ae faalogo John. … I le taimi muamua sa faigata, ae i le gasologa o taimi sa ou maua ai lo’u malosi i le tulaga o [John Manning], o le sa alofa ia te a’u ma faalogo ia te a’u seia i’u lava ina toe oso a’e le la i lo’u olaga.’”⁴

Faamatalaga

1. Jeffrey R. Holland, “Molimau ia te A’u,” Liahona, Iulai 2001, 16.

2. Tagai David A. Bednar, “Panel Discussion” (fonotaga faaleaoaoga a le au taitai, Nov. 2010), broadcasts.lds.org.

3. Russell M. Nelson, “Faalogo e Aoao,” Liahona, Me 1991, 25.

4. Jeffrey R. Holland, “Sui Vaaia i le Ekalesia,” Liahona, Nov. 2016, 66–67.

Auauna Atu e pei ona Faia e le Faaola

A o malaga ese atu Iesu mai Ieriko, sa alalaga atu ni alii tauaso se toalua ia te Ia ma faapea atu, “Le Alii e, … ia e alofa mai ia te i maua.

“Ona tu ai lea o Iesu, ua valaau atu ia te i laua, ona faapea atu lea o ia, Se a se mea lua te mananao ai ou te faia mo oulua?

“Ona la fai mai ai lea ia te ia, Le Alii e, ia pupula o maua mata.

“Ona mutimutivale ai lea o le alofa o Iesu, ua pa’i atu i o la mata; ona vaai [ai] loa lea o la mata, ona la mulimuli mai ai lea ia te ia” (Mataio 20:30, 32–34).

O le a se mea e mafai ona tatou aoao mai le auala na faalogo atu ai le Faaola?

Valaaulia e Faatino

Mafaufau pe o le a faapefea ona e faaaogaina nei mataupu faavae i le auala e te auauna atu ai. Fesili atu ia i latou o e e te auauna i ai po o a mea latou te manaomia. Faalogo i a latou tali ma uunaiga a le Agaga Paia. Faatino le mea e te faalogo i ai.

O mataupu faavae o le auaunaga ua faamoemoeina e fesoasoani ia i tatou e aoao e fetausia’i ai le tasi ma le isi—ae aua ne’i faasoaina atu o se savali. A o tatou iloaina i latou ua tofia i ai i tatou, o le a uunaia i tatou e le Agaga Paia ia iloa po o le a le savali latou te ono manaomiaina e faaopoopo atu i la tatou tausiga ma le agaalofa.