Mataupu Faavae mo le Auaunaga

Mauaina o le Fesoasoani e Fesoasoani ai i Isi

E faapefea ona tatou faaaofiaina isi pe a tatou manaomia le fesoasoani ia tatou taumafaiga e auauna atu? Auai ai i faatalanoaga mo auaunaga ma fonotaga a le aufono i Aso Sa muamua.

Liahona, Oketopa 2018

Ina ua le mafai e Kathy ona savali ma ua manaomia ai le nofoafaataavale ona ua afaina i se mai neura, sa ia iloa ai ua na manaomia se fesoasoani i po uma e sii ese mai ai o ia mai le nofoafaataavale i lona moega. E tele tele le galuega mo se tagata toatasi. O lea sa talanoa ai le korama a toeaina e uiga i lona tulaga ma tonu ai e fai se faasologa o taimi e fesoasoani ai ia te ia i afiafi taitasi.¹

A oo ina tatou iloaina manaoga ma malosiaga o i latou tatou te tautuaina, e mafai ona tatou iloa tatou te manaomia le fesoasoani e fesoasoani ai e faafetaui o latou manaoga. O faatalanoaga mo auaunga ma fonotaga a aufono i Aso Sa muamua o ni avanoa ia se lua e talanoaina ai pe faapefea ona faaaofia lelei ai isi.

Faatalanoaga o Auaunaga

O nei faatalanoaga faalekuata i le va o tuafafine o auaunaga ma le au peresitene o le Aualofa po o uso o auaunaga ma le au peresitene o le korama a toeaina e na o le pau lea o le lipoti aloaia tatou te faia e tusa ai ma i latou tatou te auauna i ai. O se faatalanoaga o se avanoa lea e le itiiti ifo i lo se tulaga faalekuata e (1) fefautuaai ai e uiga i malosiaga, manaoga, ma luitau o aiga ma tagata taitoatasi ua tofia i ai, (2) e fuafua ai po o a manaoga e mafai ona fesoasoani i ai le korama, Aualofa, po o le aufono a le uarota, ma le (3) ia aoao mai taitai ma ia faamalosiauina i taumafaiga faaleauaunaga.

E talanoaina sa’o e le peresitene o le korama a toeaina ma le peresitene o le Aualofa ia manaoga i le epikopo ona maua mai ai lea o le fautuaga ma le taitaiga mai ia te ia.

E mafai ona e maua isi faamatalaga e uiga i faatalanoaga o auaunaga i le ministering.lds.org.

O Le Faia o Faatalanoaga o Auaunaga ia Anoa

I le lagolagoina o le saunoaga a Peresitene Russell M. Nelson faapea o le polokalama o auaunaga o le a avea o se vaega tonu e fua i ai aafiaga o le Ekalesia i le lumanai, na aoao mai ai Elder Gary E. Stevenson o le Korama a Aposetolo e Toasefululua, “O le faataunuuina o lana vaaiga … e mafai ona faavae i luga o le lelei o le aoaoina o uso ma tuafafine i le auaunaga ma punouai i ai i le faatalanoaga o auaunaga.”²

O ni fautuaga se fa mo uso ma tuafafine mo auaunaga:

Alu i le faatalanoaga e saili ni fautuaga. Ia saunia e aoao.
Ia saunia e talanoaina manaoga e te ono manaomia se fesoasoani e faafetaiaia.
Taulai atu i malosiaga ma gafatia o le tagata, ae le na o mea e manaomia.
Faafesootai le au peresitene e talanoa i ai i le va o faatalanoaga faalekuata pe a manaomia ai.

O fautuaga e lima mo taitai:

E le tau manaomia ona uumi faatalanoaga, ae faatulaga se taimi ia lava e talanoa ai i se nofoaga e mafai ona maua ai se talatalanoaga anoa.
Faaaoga le avanoa e auauna atu ai i uso ma tuafafine o auaunaga.
Aua le faia ni fesili e avatu ai se lagona o la e na ona e faitauina asiasiga pe na ona maka ai i le lisi ua uma ona faafesootai (“Ua fai lau auaunaga?”) Fai fesili e faamalolosia ai amioga o loo moomia (“O a ni uunaiga na e lagona ao e tatalo mo le aiga? O le a se mea na tupu ina ua e faatinoina na uunaiga?”)
Faalogologo ma le lotofaamaoni ma tusitusi na manatu.
Fefautuaai faatasi. O soa mo auaunaga ua i ai le aia tatau e maua ai faaaliga mo i latou ua tofia i ai i latou e auauna i ai.

Fesili ma Tali e uiga i Faatalanoaga o Auaunaga

O le a le faatalanoaga o auaunaga?

O se talatalanoaga i le va o uso o auauna ma se tagata o le au peresitene o le korama po o le va o tuafafine o auauna ma se tagata o le au peresitene o le Aualofa i se nofoaga e mafai ai e i latou ona sailia ma maua musumusuga mai le Agaga Paia. O le taunuuga, e mafai ona musuia uso ma tuafafine o auaunaga e vaavaai, alolofa, aoao atu, ma faamafanafana i le ala a le Faaola.

Pe manaomia ona faia faafesagai nei faatalanoaga faalekuata?

E masani lava ona faia faafesagai ma le tagata ae e mafai ona faia i luga o le telefoni po o luga o le initoneti pe afai e le talafeagai le feiloai faafesagai. E masani, ia auai uma le soa i le faatalanoaga pe a talafeagai ai.

O le a le faamoemoega o se faatalanoaga o auaunaga?

O faatalanoaga o auaunaga o se avanoa lea mo uso ma tuafafine o auaunaga e toeiloilo ai tulaga o i ai i le taimi nei, fai faufuaga mo le lumanai, ma maua mai le fesoasoani moomia i tagata po o aiga latou te auauna atu i ai. O se avanoa e talanoa ai e uiga i punaoa e mafai ona tuuina atu e le korama ma le Aualofa.

E faapefea ona ou taulimaina mataupu e le faalauaiteleina pe maaleale?

E na o le peresitene o le korama a toeaina po o le peresitene o le Aualofa e faasoa atu i ai faamatalaga e le faalauaiteleina—pe faasoa sa’o atu i le epikopo. O faamatalaga e le faalauaiteleina pe maaleale e le tatau ona faasoa atu i fonotaga a le aufono i aso Sa muamua.

Fonotaga/Sauniga a le Aufono mo le Aso Sa Muamua

E le gata i faatalanoaga o auaunaga, o fonotaga a le aufono i Aso Sa muamua o se isi lea auala e faaaofia ai isi i le auaunaga. I fonotaga a le Aualofa ma le korama a toeaina, e mafai ona oo mai musumusuga ia i latouu e auai ai e ala i le Agaga ma mai isi o le vaega.

O le faamoemoega o se fonotaga a le aufono o le:

“Fefautuaai faatasi e uiga i tiutetauave i le lotoifale, avanoa, ma luitau;
“Aoao mai malamalamaaga o le tasi ma le isi faapea aafiaga; ma
“Fuafua ni auala e faatino ai uunaiga e maua mai le Agaga.”³

O fonotaga a aufono e le na o ni talanoaga: o fonotaga e taitai atu ai i tatou e galulue o ni tagata taitoatasi pe o se vaega a o musuia ai e le Agaga. E mafai e sui auai ona lagonaina se naunauga e faataunuu le galuega a le Alii o se taunuuga o nei fonotaga.

Valaaulia e Faatino

“O la matou tatalo i le asō,” na saunoa ai Elder Jeffrey R. Holland o le Korama a Aposetolo e Toasefululua, “o le a atili tautino loloto atu e alii ma tamaitai uma—ma o tatou alii ma tamaitai talavou matutua—le tuuto i le tausiga faamaoni mo le tasi ma le isi, ua na o le alofa le pona lava o Keriso o loo uunaia i latou e faia ai.”⁴