Mataupu Faavae o le Auaunaga

E Mafai Faapefea Ona Tatou Fatuina se Masani o le Faaaofia i le Ekalesia?

Liahona, Iulai 2019

Ata mai le Getty Images

Pe a tatou vaavaai solo ia tatou uarota ma paranesi, tatou te vaaia ai tagata o e foliga mai e faigofie lava ona masani i isi. O le mea tatou te le iloaina e faapea, e oo lava ia i latou e foliga mai ua masani lelei ma isi, e toatele e lagonaina le tuuesea. O se tasi suesuega, mo se faataitaiga, na maua ai talu ai nei e toeitiiti lava o le afa o tagata matutua i le Iunaite Setete na lipotia mai e lagonaina le tuuatoatasi, tuuesea, po o le taumamao mai isi.¹

E taua le lagonaina ua faaaofia. O se manaoga autu o le tagata, ae afai tatou te lagonaina le tuuesea, e tiga lava. O le tuuesea e mafai ona maua ai lagona o le faanoanoa po o le ita.² A tatou lagonaina ua pei tatou te le auai, e matele ina tatou vaavaai mo se nofoaga tatou te maua ai le mafanafana sili atu. Tatou te manaomia le fesoasoani i tagata uma ia lagonaina latou te auai i le lotu.

Faaaofia e Pei o le Faaola

O le Faaola sa avea ma faataitaiga atoatoa o le faatauaina ma le faaaofiaina o isi. Ina ua Ia filifilia Ana Aposetolo, e lei taulai atu o Ia i tulaga, tamaoaiga, po o galuega taualoa. Sa Ia faatauaina le fafine Samaria i le vaieli, ma molimau atu ia te ia i Lona paia e ui lava sa vaai maualalo tagata Iutaia i tagata Samaria (tagai Ioane 4). E vaai o Ia i le loto ma e le faailoga tagata (tagai 1 Samuelu 16:7; Mataupu Faavae ma Feagaiga 38:16, 26).

Sa fetalai mai le Faaola:

“O le poloaiga fou ou te tuu atu ai ia te outou, ia outou fealofani; faapei ona ou alofa atu ia te outou, ia fealofani foi outou.

“O le mea lea e iloa ai e tagata uma lava o o’u soo outou, pe afai ua outou fealofani” (Ioane 13:34–35).

O Le a se Mea e Mafai ona Tatou Faia?

O nisi taimi e faigata ona iloa pe o lagonaina e se tasi e pei i latou ua faaesea. O le tele o tagata e le tau maia—manino faapea o i latou ua faaesea. Ae faatasi ai ma se loto alofa, le taitaiga a le Agaga Paia, ma se taumafaiga ia iloa, e mafai ona tatou iloa pe a lagonaina e se tasi le faaaofia i sauniga ma gaoioiga o le Ekalesia.

O Faailoga e Ono Iloa ai o se Tasi ua Lagonaina ua le Faaaofia

• Gagana puipuia o le tino, e pei o le piilima mau po o le tilotilo i lalo.

• Nofo i tua o le potu po o le nofo toatasi.

• Le auai i le lotu po o le seasea auai.

• Tuua vave o sauniga po o gaoioiga.

• Le auai i talanoaga po o lesona.

O nei mea e ono avea ma faailoga o isi foi lagona, e pei o le matamuli, popole, po o le le mautonu. E mafai e tagata lotu ona lagonaina le “ese” pe afai o i latou o ni tagata fou o le Ekalesia, e o mai se isi atunuu po o se isi aganuu, pe na aafia i le faalavelave e suia ai le olaga, e pei o le tatalaina o se faaipoipoga, maliu o se tagata o le aiga, po o le toe foi vave mai se misiona.

E tusa lava po o le a le mafuaaga, e le tatau ona tatou faatuai ona aapa atu i le alofa. O mea tatou te fai atu ma mea tatou te faia e mafai ona fatuina ai se lagona faapea e taliaina tagata uma lava ma e manaomia.

O Nisi Auala e Faaaofia ma Taliaina ai

• Aua le nofo i tafatafa o le tagata lava e tasi i taimi uma.

• Vaai i tua atu o foliga vaaia ia iloa ai le tagata moni. (Mo nisi faamatalaga i lenei autu, tagai i le “O Le Auaunaga o le Vaai atu i Isi e pei Ona Faia e le Faaola,” Liahona, Iuni 2019, 8–11.)

• Faaaofia isi i talanoaga.

• Ia valaaulia isi e avea ma se vaega o lou olaga. E mafai ona e faaaofia i latou i gaoioiga ua e fuafuaina.

• Saili ma fausia i luga o mea masani e fiafia i ai.

• Aua le taofia le faauoga ona o se tasi e le tutusa ma ou faamoemoega.

• Pe a e vaai i se mea e faapitoa i se tagata, ia fiafia i ai nai lo le faapasi pe aloese ai.

• Faaleo atu le alofa ma ofo atu ni faamatalaga alofa.

• Faaalu se taimi e mafaufau ai e uiga i le uiga moni lava pe a tatou fai atu o le Ekalesia e mo tagata uma, po o le a lava o latou eseesega. E mafai faapefea ona tatou faia lenei mea o se mea moni?

E le masani ona faigofie ona lagona le mafanafana i talaane o tagata e ese mai ia i tatou. Ae a faataitai, e mafai ona tatou sili atu i le mauaina o le taua i eseesega ma faafetaia le saofaga faapitoa e aumaia e tagata taitasi. E pei ona aoao mai e Elder Dieter F. Uchtdorf o le Korama a Aposetolo e Toasefululua, o o tatou eseesega e mafai ona fesoasoani e avea ai i tatou o ni tagata e sili atu le lelei, ma sili atu le fiafia: “O mai, fesoasoani mai ia i matou e fausia ma faamalosia se aganuu o le faamalologa, agalelei, ma le alofa tunoa i fanau uma a le Atua.”³

Faamanuiaina e ala i le Faaaofia

Na siitia atu Christl Fechter i se isi atunuu i le mavae ai ona faatafunaina e le taua lona atunuu. E le tautala lelei o ia i le gagana ma e lei iloaina se tasi i lona tuaoi fou, o lea sa ia lagona ai le tuuesea ma le tuuatoatasi i le taimi muamua.

I le avea ai ma se tagata o le Ekalesia, sa ia maua le lototele ma amata ona auai i lana uarota fou. Na popole o ia faapea o lana gagana ese o le a taofia ai tagata mai le fia talanoa ia te ia pe o le a faamasinoina o ia mo le avea ma tamaitai nofo toatasi.

Ae na ia feiloai i isi na le popole i ona eseesega ma taliaina o ia i totonu o lo latou nuu o uo. Na latou aapa atu i le alofa, ma na vave lava ona ia iloaina lona pisi e fesoasoani e aoao se vasega i le Peraimeri. O tamaiti na avea o ni faataitaiga sili o le taliaina, ma o le lagona o le alofagia ma manaomia na faamalosia ai lona faatuatua ma fesoasoani e faamalosia ai lona tuuto i le olaga i le Alii.

Faamatalaga

1. Tagai Alexa Lardieri, “Study: Many Americans Report Feeling Lonely, Younger Generations More So,” U.S. News, May 1, 2018, usnews.com.

2. Tagai Carly K. Peterson, Laura C. Gravens, and Eddie Harmon-Jones, “Asymmetric Frontal Cortical Activity and Negative Affective Responses to Ostracism,” Social Cognitive and Affective Neuroscience, vol. 6, no. 3 (June 2011), 277–85.

3. Dieter F. Uchtdorf, “Talitonu, Alofa, Faia,” Liahona, Nov. 2018, 48.

Suesue Atili

Mo nisi manatu, faitau “E Mafai Ona Lelei Atu Ona Tatou Faia: Faafeiloaiina o Isi i totonu o le Lafu,” Liahona, Set. 2017.

Faasoa Ou Aafiaga

Auina mai ou aafiaga ia i matou a o e auauna atu i isi pe na e mauaina ni auaunaga. Alu i le liahona.lds.org ma kiliki le “Submit an Article po o Feedback.”

Ia Faataitai Loa

Na aoao mai Sister Linda K. Burton, o le sa avea muamua ma Peresitene Aoao o le Aualofa, “Muamua matau, ona auauna atu ai lea” (Liahona, Nov. 2012, 78). O le mulimuli i lenei fautuaga e mafai ona fesoasoani ia i tatou e fatuina ni uarota ma paranesi e faaaofia ai tagata uma lava ma manaomia. O nisi nei o manatu e mafaufau i ai:

• Pe a tatou ulufale atu i lo tatou fale lotu, e mafai ona tatou vaavaai solo ma matauina po o ai e finagalo le Alii ia i tatou e aumai i lo tatou lio o le faauoga i lena aso.

• O nisi taimi tatou te aloese mai ia i latou e ese mai ia i tatou pe o aafia i se taimi faigata ona tatou te fefefe i le fai atu o se faamatalaga sese. O lenei mea e tuua ai i latou e lagonaina le tuuesea, ma mafaufau ai pe aisea e le talanoa atu ai se isi ia i latou. Nofo i tafatafa o i latou, faaali atu le alofa, ma fai atu ni fesili faamaoni. Fesili atu ia i latou e uiga i la latou aafiaga ma o latou luitau ma pe faapefea ona e mafai ona fesoasoani atu.

• Ia tatou lauga ma a tatou lesona i aso Sa, e mafai ona tatou filifili e faaaoga faataitaiga e faaalia ai faapea o tagata ma aiga i tulaga eseese e mafai ona ola i le talalelei ma olioli i ona faamanuiaga.

• O tagata o le vasega e mafai ona faamanuiaina tele lava pe a faaaofia e faiaoga tagata mai tausaga eseese, atunuu, ma tulaga o aiga. E tele mea tatou te aoao mai le tele o tagata faatuatua o le Ekalesia na oo i ni aafiaga eseese nai lo i tatou.

• E mafai e faiaoga ona saunia se tulaga saogalemu mo tagata uma e faasoa mai ai o latou aafiaga i le ola ai i le talalelei. Soo se taimi lava e faasoa mai ai se faamatalaga, e mafai e se faiaoga ona tali lelei atu i se mea na ofoina mai. Ona mafai lea e tagata o le vasega ona lagonaina le toafimalie ma le mafanafana i le faasoaina atu o o latou manatu.