Mataupu Faavae o le Auaunaga

Auala e Mafai Ona (ma O le a) Fesoasoani Ai le Agaga Ia Te Oe e Auauna Atu

O le tofiga faaleperisitua e auauna atu, ua tuuina mai uma i alii ma tamaitai, e aofia ai le aia tatau e mauaina faaaliga.

Liahona, Setema 2019

O le valaau e auauna atu ma galue mo isi ma oo lava ina alofa atu e pei ona sa faia e le Faaola e mafai ona avea ma luitau i nisi taimi—aemaise lava pe a aafia ai le aapa atu ia i latou atonu tatou te le iloa lelei. Faatasi ai ma le miliona o auala e auauna atu ai, tatou te tau tuufesili ai pe faapefea la ona tatou iloa auala silisili ona lelei e aapa atu ai ia i latou ua tofia i ai i tatou.

E le manaomia ona umi ona tatou tau tuufesili aua o a tatou taumafaiga faamaoni e mafai ona taialaina e le Agaga Paia.

“E tuuina atu e lou tofiga paia o le auaunaga ia te oe le aia tatau faalelagi i musumusuga,” sa saunoa mai ai Sister Bonnie H. Cordon, o le Peresitene Aoao o Tamaitai Talavou. “E mafai ona e sailia lena musumusuga ma le mautinoa.”¹

A tatou saili e auauna atu e pei ona sa faia e le Faaola, e mafai ona taitaia i tatou e le Agaga lava lea e tasi lea sa taitaia o Ia. E faapitoa lava le moni o lenei mea pe a auauna atu e ala i tofitofiga, e pei o auaunaga, sa faia i lalo o le pule o ki o le perisitua a le epikopo. O fautuaga ia e ono mo auaunaga faatasi ma le Agaga.

E Faapefea Ona Ou Maua le Agaga Pe a Faia Auaunaga?

Ata mai le Getty Images

• Talosaga mo le Taitaiga. E finagalo le Tama Faalelagi ia i tatou e fesootai atu ia te Ia e ala i le tatalo. O le tatalo e le gata ina faatagaina i tatou e faalatalata atili atu ia te Ia, ae e faapea foi ona faamautuina mai “faamanuiaga ua naunau le Atua e to mai, ae e faalagolago i lo tatou ole atu mo na faamanuiaga.”² “Ao tatou tatalo ma saili ina ia malamalama i o latou loto,” sa saunoa mai ai Sister Gordon, “Ou te molimau atu o le a taitaia i tatou e le Tama Faalelagi ma o le a faatasi mai Lona Agaga mai tatou.”³

• Aua le Faatalitali mo se Musumusuga. Ia manatunatu lelei. Ia “auai ma le naunautai” (Mataupu Faavae ma Feagaiga 58:27), ma o le a e iloa ai o au taumafaiga e mafai ona taialaina ma faalauteleina. “O le agai i luma i a tatou auaunaga ma galuega o se auala taua e agavaa ai mo faaaliga,” o le saunoaga lea a Peresitene Dallin H. Oaks, Fesoasoani Muamua i le Au Peresitene Sili. “I a’u suesuega o tusitusiga paia ua ou matauina ai, o le tele o faaaliga i fanau a le Atua e oo mai i taimi latou te galulue ai, e le o taimi latou te nofonofo ai i o latou apitaga ma faatalitali i le Alii e ta’u atu ia i latou le laasaga muamua e faia.”⁴

E Faapefea Ona Ou Iloaina Musumusuga e Auauna Atu?

• Faaaoga le Fautuaga a Mamona. E le manaomia ona tatou nofonofo solo ma popole pe faamata o se manatu e oo mai o se musumusuga pe leai. E le manaomia pe afai ua ia i tatou le ki faigofie a Mamona i le iloaina. Afai e iai sou manatu e musuia oe e faia mea lelei ma talitonu pe e fesoasoani i isi e talitonu ia Keriso, e mafai ona e iloaina e mai le Atua (tagai i le Moronae 7:16).

• Aua le Popole i ai. “Na o lou oso lava i le vai ma aau,” sa faapea mai ai Elder Jeffrey R. Holland o le Korama a Aposetolo e Toasefululua. “Agai atu ia i latou e le tagolima. Aua le nofo ma tuufesili i lou mafaufau pe tatau ona e aau agai i tua pe aau faapei o se taifau. Afai tatou te mulimuli i mataupu faavae autu ua aoaoina, tumau le ogatusa ma ki o le perisitua, ma saili atu i le Agaga Paia e taiala i tatou, e le mafai ona tatou toilalo.”⁵

O le a le Auala Sili e Mulimuli Ai i se Musumusuga?

• I le taimi lava lenei. O Sister Susan Bednar (faletua o Elder David A. Bednar o le Korama a Aposetolo e Toasefululua) o se faataitaiga sili o le mulimuli ai i musumusuga. I le maea ai ona tatalo “mo ona mata faaleagaga ia vaai ia i latou o e o iai se manaoga,” ona ia vaavaai solo ai lea i le aupaia ma masani lava ona ia “lagonaina se uunaiga faaleagaga e asiasi atu pe faia se valaau i le telefoni i se tagata patino,” o le faasoa lea a Elder Bednar. “Ma a maua e Sister Bednar se uunaiga faapena, e vave lava ona ia tali atu ma usitai. O le mea masani o le taimi lava e ta’u ai le ‘amene’ i le tatalo faaiu, e talanoa atu ai o ia i se tagata talavou pe opo se uso pe, a oo atu i le fale, o le taimi lava lea e piki ai i luga le telefoni ma fai ai se valaau.”⁶

• Ma le lototele. O le fefe i le teena ma lagona o le matamuli, o le le atoatoa, po o le fai ma faalavelave i isi e mafai ona taofia i tatou mai le mulimuli i se musumusuga e auauna atu. “I taimi ma auala eseese, tatou te lagona uma lava le le atoatoa, le le mautonu, atonu foi o le le agavaa,” sa saunoa mai ai Elder Gerrit W. Gong o le Korama a Aposetolo e Toasefululua. “Ae i la tatou taumafaiga faamaoni ina ia alofa i le Atua ma auauna atu i o tatou tuaoi, e mafai ona tatou lagona le alofa o le Atua ma le musumusuga e manaomia mo o latou olaga ma o tatou olaga i auala fou ma paia atu.”⁷

  Sa faasoa mai e se tasi o uso le auala na ia faataututū ai i le aapa atu i le tane a se fafine lea sa taumafai muamua e pule i le ola. Ae sa iu lava ina ia talosagaina le tane mo se ‘aiga o le aoauli. “Ina ua ou fai atu, ‘Sa taumafai lou toalua e pule i le ola. Atonu o se mea lea e matuā lofituina ai oe. E te fia talanoa e uiga i ai?’ sa ia tagi ma le le maasiasi,” o lana faasoa mai lea. “Sa ma maua se talanoaga alofa ma mafanafana ma atiaeina se vavalalata ofoofogia ma le faatuatuaina i totonu o ni nai minute.”⁸

Faamatalaga

1. Bonnie H. Cordon, “Avea ma se Leoleo Mamoe,” Liahona, Nov. 2018, 76.

2. Taiala i Tusitusiga Paia, “Tatalo.”

3. Bonnie H. Cordon, “Avea ma se Leoleo Mamoe,” 76.

4. Dallin H. Oaks, “I Lona Lava Taimi, i Lana Lava Ala,” Liahona, Aok. 2013, 24.

5. Jeffrey R. Holland, “O le Galuega o le Faaleleiga,” Liahona, Nov. 2018, 77.

6. David A. Bednar, “Ia Atamai,” Liahona, Tes. 2006, 17.

7. Gerrit W. Gong, “O La Tatou Afi o le Tolauapiga o le Faatuatua,” Liahona, Nov. 2018, 42.

8. Tagai ia Bonnie H. Cordon, “Avea ma se Leoleo Mamoe,” 76.

O Le Faataitaiga a le Faaola

Sa saunia le Faaola mo Lana galuega. “O Iesu o le Nasareta, o le na faauuina e le Atua i le Agaga Paia,” ona afio lea o Keriso “femaliuai ma agalelei” (Galuega 10:38). Sa “tumu o Ia i le Agaga Paia” ma sa masani ona “ave lea o Ia e le Agaga” (Luka 4:1). E moni lava sa femaliua’i Keriso ma agalelei atu a o le i faauuina o ia i le Agaga Paia, ae o le mauaina o le Agaga Paia ma maua o lena aia tatau i musumusuga o se vaega taua o Lana galuega—e pei lava ona avea o se vaega taua o la tatou galuega.

Valaaulia e Faatino

A o e femalagaa’i i le faia o lau auaunaga i aso taitasi, saili ma tali atu ma le loto tatalo i musumusuga a le Agaga Paia. Ia manatua o le a faamanuia oe e le Tama Faalelagi ma i latou e te auauna i ai e pei ona e faia!

Faasoa Ou Aafiaga

Auina mai ou aafiaga ia i matou a o e auauna atu i isi pe na e mauaina ni auaunaga. Alu i le liahona.ChurchofJesusChrist.org ma kiliki i le “Auina Mai se Tusiga po o ni Manatu Faaalia.”

Suesue Atili

Ua aoao mai le perofeta i auala e maua ai faaaliga faaletagata lava ia, tagai i le “Faaaliga mo o Tatou Olaga,” saunia e Peresitene Russell M. Nelson (Liahona, Me 2018).