Mataupu Faavae o le Auaunaga
O Le Auaunaga o Le Vaai Atu i Isi e Pei ona Faia e le Faaola
Sa faaaluina e Iesu le tele o Lona taimi faatasi ma i latou o e sa vaaia e ese mai i latou; na Ia silasila i lo latou gafatia paia.
Liahona, Iuni 2019
Faamatalaga mai le O Keriso ma le Taulealea Mauoa, saunia e Heinrich Hofmann
I a tatou taumafaiga e auauna atu e pei o le Faaola, atonu e talosagaina i tatou e auauna atu i se tasi e ese mai ia i tatou. O lenei mea ua maua ai se avanoa mo i tatou e aoao ma tuputupu aʻe ai.
O tulaga faaleaganuu, aoaoga, faalapotopotoga, tamaoaiga, matua, amioga i le taimi ua mavae po o le taimi nei, po o isi eseesega e mafai ona faigofie ai le faamasinoina o se tasi ae tatou te leʻi masani i ai. O lenei muai faamasinoina o loo i le totonugalemu o le faailoga tagata, ma o lea na lapatai ai le Faaola e uiga i ai (tagai 1 Samuelu 16:7; Ioane 7:24).
Mata e mafai ona tatou autilo i tua atu o eseesega ae vaai atu i isi e pei ona faia e le Faaola? E faapefea ona tatou aoao ia alolofa i isi mo le tagata moni o i ai i latou ma le tagata e mafai ona avea ai i latou?
Silasila Atu ma Alofa Atu
O loo taʻu mai e le Tusi Paia le tala masani o le alii mauoa na fesili pe faapefea ona maua le ola e faavavau: “Ua silasila atu Iesu ia te ia, ua alofa atu ia te ia, ua fetalai atu foi ia te ia, E tasi le mea e le o ia te oe: Ina alu ia, faatau atu au mea uma, ma avatu i e ua matitiva, ona e maua lea o le oa i le lagi: i le ē sau ai, ma ave le satauro, a e mulimuli mai ia te au.” (Mareko 10:21).
Ina ua suesueina e Elder S. Mark Palmer o le Fitugafulu lenei mau i nai tausaga ua mavae, sa faafuasei lava ona tumatilatila mai se vaega fou o le tala ia te ia.
‘Ua silasila atu Iesu ia te ia, ua alofa atu ia te ia.’
“A o ou faalogo i upu nei, sa faatumulia lo’u mafaufau i se ata manino o le Alii o loo tu ma silasila atu i lenei alii talavou. Silasila atu—e pei o le vaai totoa ma le mamana i totonu o lona agaga, silafiaina o lona agalelei ma lona gafatia foi, faapena foi le silafiaina o lona manaoga silisili.
“Sosoo ai ma upu faigofie—ua alofa atu Iesu ia te ia. Sa ia lagona le alofa faagaeetia ma le agalelei mo lenei alii talavou lelei, ma ona o lenei alofa, ma faatasi ai ma lenei alofa, sa talosagaina e Iesu nisi mea mai ia te ia. Sa ou vaai faalemafaufau pe na faapei mo lenei alii talavou le lagonaina o lea ituaiga o alofa a o talosaga foi e faia se mea sa faigata tele e pei o le faatauina atu o mea uma na ia te ia ma tuuina atu i e matitiva. …
[Na ou fesili ia te a’u lava ia] ‘E mafai faapefea ona faatumulia au i le alofa faaKeriso, ina ia mafai e [isi] ona lagona le alofa o le Atua e ala ia te au ma manao ia sui?’ E mafai faapefea ona ou vaai atu [i tagata o siomia a’u] i le ala e tasi na silasila atu ai le Alii i le alii talavou mauoa, vaai ia i latou i le tagata moni o i ai i latou ma le tagata e mafai ona avea ai, nai lo na o mea o loo latou faia pe le o faia? E mafai faapefea ona avea atili a’u e pei o le Faaola?”1
Aoao e Vaai Atu i Isi
O le aoao e vaai atu i isi e pei ona faia e le Faaola e maua ai taui sili. O nisi nei o fautuaga e mafai ona fesoasoani ao tatou galulue agai i lenei sini.
-
Ia Faamasani ia i Latou
Fai le taumafaiga ia iloa tagata i tua atu o auiliiliga papau [superficial details]. Ia iloa o le fausiaina o sootaga e manaʻomia ai le taimi ma taumafaiga faamaoni. (Tagai i le tusiga o le Mataupu Faavae mo le Auaunaga ia Aokuso 2018 “Fausiaina o Sootaga Anoa” mo se fesoasoani.) -
Iloilo Oe Lava Ia
Gauai atu i faamasinoga atonu o e faia ma le iloa po o le leiloa foi. Tusi manatu o loʻo e faia e uiga i isi ma taumafai ia malamalama pe aisea e faapea ai ou lagona e uiga ia i latou. -
Taofi le Faamasino Atu
Ia iloa e le o faamatalaina e tulaga le taua o se tagata. Tuu oe i o latou tulaga ma mafaufau i le auala e te manao ai i se tasi e vaai mai ia te oe pe afai e te oo i lea foi tulaga. O le vavaeeseina o filifiliga ma amioga a se tasi mai lo latou taua ma le gafatia faalelagi e mafai ona fesoasoani ia i tatou e vaai atu ai ia i latou e pei ona faia e le Faaola. -
Tatalo ia Alofa ia i Latou
Tatalo e le aunoa mo i latou e ala i le igoa ma mo le onosai e atiina ae se faigauo moni. Tagai atu ma le agaga tatalo i lau auaunaga. E i ai se va i mea o loʻo e faia ma mea latou te matuai manaomia?
Faamatalaga mai le Tamaitai na Faamaloloina, saunia e J. Kirk Richards
Sa faaalu e Iesu Lona taimi e faatasi ai ma tagata mai le tele o auala eseese o le olaga: o e mauoa, o e matitiva, faipule, ma tagata lautele. Na masani ona aafia o ia i faamasinoga le tonu a isi tagata pe a latou tilotilo atu ia te Ia ma Ona foliga mativa po o le le taua. “A tatou vaai ia te ia, e leai sona lalelei tatou te mananao ai ia te ia. … Sa inosia o Ia, ae sa tatou lē manatu ia te ia” (Isaia 53:2–3).
Vaai Faa-Keriso
Ua faasoa mai e se tuafafine lenei tala e uiga i le aoao e vaai atu i se tuaoi ma fofoga o Keriso:
“O Iulia (ua suia le igoa) na nofo latalata ia te au ma na foliga mai e leai ni ana uo. Sa masani ona foliga e le fiafia ma ita o ia. E ui lava i lena, na tonu ia te au e avea ma se uo ia te ia. E le na o se uo faamasani, ae o se uo moni. Sa ou talanoa ia te ia i soo se taimi lava ou te vaai ai ia te ia ma faaalia loʻu fiafia i soo se mea na ia faia. E le’i umi, ae ou faia se sootaga faa-le-uo ma ia, ma aumaia ai le olioli i loʻu loto.
“I se tasi aso, sa ou filifili ai e asiasi ia Iulia ma fesili atu ia te ia e uiga i lana filifiliga o le le auai i le lotu.
“Sa ou iloaina e leai sona aiga e lata ane. Na o le tasi lava lona tei, o se tuagane e nofo mamao, ma e faa-tasi i le tausaga ona talanoa ma ia e ala i le telefoni. A o ou faalogologo atu ia te ia o sasaa mai lona le fiafia, ita, ma le le mautonu e uiga i lona aiga ma le Ekalesia, o se lagona e lemafaafitia o le agaalofa ma le alofa mo lenei uso na matua malosi lava ona oo mai ia te au. Na ou lagonaina lona tiga ma le le fiafia. Sa ou iloaina le tuuatoatasi o lona olaga. Na pei na ou faalogo i se fuaiupu filemu i oʻu tua: ‘Ou te alofa foi ia te ia. Alofa ma faaaloalo ia te ia.’
“Sa ou nofo ma faalogologo seia oo ina le toe i ai sana tala. Sa ou lagonaina le alofa ma le agaalofa mo ia. O se uso lenei e leʻi iloa lava pe faapei le alofagia. Na faafuasei ona ou malamalama lelei ia te ia. Sa ou faafetai ia te ia mo le faatagaina o aʻu ou te asiasi atu ia te ia, ma sa ou tuua o ia ma se fusi mai ma faatasi ai ma loʻu alofa ma le faaaloalo mo ia. O le a le iloa lava e ia le tele o lona paʻi mai ia te aʻu i lena asiasiga. Ua tatalaina e le Tama Faalelagi oʻu mata ma aoaoina au o loo ia te au se gafatia ia alofa atu ai ma le faateleina o le agaalofa. Ua ou naunau i laʻu faaiuga ia le gata o se uo ia te ia ae ia avea foi ma se aiga ia te ia.”
O se mea paia le valaʻauliaina i totonu o le olaga o se isi tagata. Faatasi ai ma le tatalo, onosai, ma le fesoasoani mai le Agaga, e mafai ona tatou aoao e faia faapea ma se vaaiga e faapei o Keriso.