Mataupu Faavae mo le Auaunaga
Auauna atu e ala i le Sau, Mulimuli Mai ia te A’u
E mafai faapefea ona fesoasoani ia te oe le Sau, Mulimuli Mai ia te A’u e faia ai se eseesega i isi?
Ata na tusia e Joshua Dennis
Pe o e faatasi ma lou aiga, i se potuaoga o le Aoga Sa o se faiaoga po o se tagata aoao, po o le aoga, galuega, po o se isi mea, o le Sau, Mulimuli Mai ia te a’u o loo lava avanoa o loo ofoina mai ai e auauna atu ai i isi. O le mea moni, o le aoao atu “e sili atu i le na ona taitaia o se talanoaga i le Aso Sa; e aofia ai le auauna atu ma le alofa ma faamanuiaina isi i le talalelei.”1
Fesootai ma Tagata Aoao
Ina ua tofia Ofelia Trejo de Cárdenas e faiaoga i talavou matutua i lana uarota i le Aai o Mekisiko, sa ia lagonaina o le i ai o se sootaga vavalalata ma tagata taitasi o lana vasega o le Aoga Sa, o le a faateleina ai lona tomai e aoao atu ma faamalolosia i latou.
“Afai e le vavalata la matou mafutaga ma a’u tagata aoao ma afai latou te le lagonaina lo’u alofa, atonu o le a latou le talitonu ia te au pe a ou faiaoga i le vasega pe tuu atu la’u molimau,” o lana tala lea. “Latou te ono lagonaina faapea ua na o au o se faiaoga o le Aoga Sa.”
Ae e mafai faapefea e Sister Cárdenas ona atiina ae sea sootaga pe afai e na o le taitasi i le lua vaiaso ona ia aoao atu? Sa ia maua le tali e ala i tekinolosi. O le faaaogaina o le polokalama o le WhatsApp i le telefoni feavea’i, sa lei pine ai ae fesootai o ia ma lana vasega e ala i tesi ma feau faaleo. O le taimi nei, o aso uma ao lei oo i le lesona o le Aso Sa e sosoo ai, e auina atu ai e se volenitia o le vasega i isi tagata o le vasega se fuaiupu o le mau mai le isi lesona faatasi ai ma se mafaufauga patino e faatatau i ai. A uma ona faitau le fuaiupu ma le mafaufauga, ona tali mai lea o tagata o le vasega i o latou foi lava mafaufauga.
“Pe a latou faitauina le mau, latou te auina mai se ata o se foliga fiafia ina ia ou iloa ai ua uma ona latou faitau pe suesueina le mau ma sa latou mafaufau i ai,” o le tala lea a Sister Cárdenas. A oo i le taimi mo le lesona o le isi Aso Sa, ua saunia tamaiti e auai [i le talatalanoaga].
O lea sootaga i aso taitasi na faamanuiaina talu ai nei se tasi o talavou matua o ona matua e le malolosi i le Lotu.
“E ese lo’u fiafia pe a ou vaai ua sau o ia i le lotu aua ua ou iloa, ina ia taunuu iina, e tatau ona ia uia ni luitau,” o le tala lea a Sister Cárdenas. “Ou te talitonu o mau ma mafaufauga na auina atu e lana vasega ma mau ma mafaufauga na te auina atu pe a oo le faasologa ia te ia, ua faamalosia tele ai o ia.”
Fai mai Sister Cárdenas o le auauna atu e ala i mau, e le gata ai i ana lesona o le Aso Sa ma le sootaga i aso taitasi faaletusitusiga paia a lana vasega.
“O la’u tapenaga e aofia ai le tatalo mo a’u tamaiti aoao,” na ia fai mai ai. “Ou te le o mafaufau i a’u tagata aoga i na’o Aso Sa ae o aso uma o le vaiaso. E tofu i latou ma ni manaoga faapitoa ma eseese. O i latou taitoatasi o fanau a le Atua. Ou te mafaufau ia i latou ao o’u tapenapenaina a’u lesona.”
Ma a oo foi ina ia faiaoga, e faalogologo o ia---i ana tamaiti aoga faapea foi i le Agaga Paia.
“O le faiaoga o le Agaga,” lea e tele taimi na te lagonaina ai i leo o ana tamaiti aoao. “E tatau ona ou gauai atu aua o mea latou te fai mai ai o le faaaliga lea e tuu atu e le Agaga ia i latou.”
O La Matou Vasega e “Pei o se Afiafi Faaleaiga”
E lagona e Carla Gutiérrez Ortega Córdoba le faamanuiaina o se tasi o le vasega a Sister Cárdenas i le Aoga Sa ona o lona siosiomaga faafailele ma le auauna atu. E patipatia e Carla lena siosiomaga ona o ni mea moni e aofia ai:
-
Tapenaga: Fefaasoaai o mau ma mafaufauga e fesoasoani i tagata aoao e saunia ai mo le isi vasega. “O mau i aso taitasi ua faafaileleina ai i matou ma faalautele ai lo matou malamalama,” o lana faamalamalamaga lea.
-
Saofagaga: “Matou te tautatala uma lava. O le mea lenei e mafai ai ona loloto lo’u iloa o tagata o la’u vasega, o ni uo ma o ni tuagane ma ni uso.”
-
Alofa: “O Sister Cárdenas na te taitaiina oe i lou lima. E pei le matou vasega o se afiafi faaleaiga, faatasi ma nai uso ma tuagane. E faapitoa tele.”
-
O Le Agaga Paia: “Matou te maua se agaga manaia, ma le logomalie i le matou vasega aua e ogatusa lava mea matou te faia ma le Agaga.”
-
Molimau: O le “Sau, Mulimuli Mai ia te A’u ua fesoasoani ia te au e saunia ai e faasoa atu la’u molimau. Ua ou maua se malamalama loloto atu i le Tusi a Mamona ma le Tusi Paia. O lena mea ua mafai ai ona ou faasoa atu mea ou te aoaoina i tagata o la’u vasega i le aoga ma tagata i le galuega.”
Auauna Atu i Manaoga Faaleagaga
Ina ua faitau ia Greg ma Nicky Christensen, mai Kentucky, ISA, ma o la atalii e toatolu e uiga i le feagaiga faaAperaamo i tusitusiga paia, sa faigata ia i la’ua ona faamalamalama atu ia i latou. Sa tonu ia i latou i le avea ai o se aiga, o le a tofu suesue le tagata lava ia i le feagaiga faaAperaamo ona faasoa mai lea o mea latou te mauaina.
“Na matou maua ni faamatalaga mananaia,” o le tala lea a Greg. “Sa aoaoina e lo ma atalii e valu-tausaga sa faaaoga e Aperaamo le igoa Aperamo. Sa suia lona igoa ia Aperaamo ona sa ia faia se folafolaga i le Atua e fulitua i le agasala ae ola i se olaga amiotonu. Sa ou matuai ofo lava ona sa mafai ona ia maua mai lena mea.”
Sa latou taufai aoaoina uma se mea fou ma sa manaia se talanoaga e uiga i le feagaiga faaAperaamo ma lona uiga mo le Au Paia o Aso e Gata Ai i ona po nei.
“Sa masani ona na ona matou faasolosolo ma feauaua’i e faitau fuaiupu o tusitusiga paia mo la matou suesuega faaleaiga o tusitusiga paia,” o le tala lea a Nicky. O le “Sau, Mulimuli Mai ia te A’u e tele ina taulai agai atu i le aoao atu e ala i le Agaga. O lenei, pe a matou suesue faatasi, ou te lagonaina nai uunaiga laiti mai le Agaga e tata’i a matou talanoaga i se isi itu e faavae i mea o manaomia e lo matou aiga.
O le faaaogaina o le Sau Mulimuli Mai ia te A’u ua le gata ina fesoasoani i lo latou aiga ia gauai atili ma naunau ai i le suesueina o le talalelei i le aiga, ae ua fesoasoani foi ia Greg ma Nicky e auauna atu i manaoga faaleagaga o le la fanau.
O le “Sau, Mulimuli Mai ia te A’u ua fesoasoani ou te aoao ai la’u fanau,” o le tala lea a Nicky. “Ua fesoasoani foi ia te au e taulima ai luitau eseese matou te oo i ai i nisi o taimi ma la’u fanau. Ua ou maua atili se mafutaga ma le Agaga, ua ou faalogo atili, ma ua ou maua uunaiga i auala e mafai ona ou fesoasoani ai i tamaiti taitasi.”
Ua fiafia lava Greg i talanoaga uumi o le talalelei lea ua fesoasoani ai le Sau Mulimuli Mai ia te A’u e faatupuina i le aiga. E eseese uma lava le ma fanau i mea ua latou i ai e tusa ma lo latou malamalama i le talalelei,” na ia fai mai ai. “O le Sau, Mulimuli Mai ia te A’u ua saunia ai se auala mo i ma’ua e fesoasoani ai ia i latou e aoao e fua i o latou manaoga. O le vaaia o i latou o tuputupu ae i lo latou fiafia i le talalelei ma le vaavaai atu o latou manatunatu pe mafai faapefea ona latou faaaogaina le malamalama i le talalelei i o latou olaga, o se faamanuiaga matagofie lea.”