Mataupu Faavae o le Auaunaga

Auauna atu e ala i Auaunaga i le Malumalu

A tatou fesoasoani i isi ia olioli i faamanuiaga o le malumalu, ua tatou auauna atu.

Liahona, Mati 2020

O le auai i le malumalu e matuā tauia le taumafaiga. Sa aoao mai Peresitene Russell M. Nelson faapea “o le malumalu e taua tele i lo tatou faaolataga ma le faaeaga faapea ai ma o tatou aiga. …

“… E manaomia e i tatou taitoatasi le faamalosiauga ma le aoaoina faifai pea faaleagaga lea e na o le maota o le Alii e mafai ai.”¹

O le auai atu i le malumalu e manaomia ai le puleaina o o tatou taimi, tiutetauave, ma punaoa, faapea foi ma le saunia ai faaleagaga. O loo tatou auauna atu pe a tatou iloaina papupuni ia e tausia ai o tatou uso ma tuafafine mai le malumalu ma fesoasoani ia i latou e saili ni vaifofo.

O le Malumalu O Se Faamanuiaga E Mafai Ona Fiafia I Ai Soo Se Tasi

Sa savali atu se faifeautalai faatoa foi mai, o Meg, agai atu i faitotoa o le Malumalu o Kona Hawaii ae ia vaaia se tamaitai talavou o loo nofo na o ia i se nofoa i fafo. Sa lagona e Meg e tatau ona ia tautala atu i le tamaitai talavou, ae sa ia le mautinoa po o le a se tala e fai atu. O lea sa ia fesili ai faatatau i le uiga o se pe’a i luga o le tapuvae o le tamaitai talavou. O lena mea na amata ai se talanoaga na faatagaina ai le tamaitai talavou, o Lani, e faasoa mai lana tala.

Sa ta’u atu e Lani ia Meg e uiga i lona tauiviga ina ia toe foi atu i le auai atoatoa i le Ekalesia, o tagata lelei o le Ekalesia o loo fesoasoani ia te ia, ma lona faamoemoe e faamau i se aso lana pepe teine.

Sa valaaulia e Meg ia Lani e sau la te nofonofo faatasi i le potu faatalitali o le malumalu. O le a lē mafai ona la o atu i totonu o le malumalu ae o le a mafai ona la laasia le faitotoa. Sa ioe Lani, ma sa la o faatasi atu ai i faitotoa autu. Sa faasino atu i la’ua e se tagata faigaluega o le malumalu i se nofoa i lalo ifo o se ata vali o le Faaola.

A o la nonofo faatasi, sa musumusu mai Lani, “Sa ou matuai manao lava e sau i totonu o le malumalu, ae sa ou popole.” Talu ai sa mulimuli Meg i le Agaga, sa ia fesoasoani e tali le tatalo le leoa a Lani.

Manatu e Fesoasoani Ai i Ē e leai se Pepa Faataga

E oo lava ia i latou e lei agavaa mo se pepa faataga e mafai ona faamanuiaina e le malumalu.

Faasoa atu ou lagona e uiga i le auala ua faamanuiaina ai oe e le Alii e ala i galuega o le malumalu.
Valaaulia se tasi e auai atu i se fale tatala o le malumalu po o se nofoaga autu mo tagata asiasi mai. Saili ni fale tatala o loo loma i totonu o le temples.ChurchofJesusChrist.org.

Ia Faafaigofie Atu Mo Isi Le Auai i le Malumalu

E oo lava foi i tagata e i ai se pepa faataga o le malumalu, o le auai i le malumalu e mafai ona avea ma se luitau. O nisi atonu e manaomia ona malaga mamao atu. O isi atonu e i ai ni tamaiti laiti po o ni tagata o le aiga ua matutua e manaomia le tausiga. E mafai ona tatou galulue faatasi ina ia mafai ona avanoa auaunaga i le malumalu mo tagata uma.

Na lagona e Leola Chandler le lofituina e ala i le tausiga o lana tane ma’i ma le la fanau e toafa. O lea sa ia filifili ai e faataatia ese se taimi i aso Lua taitasi e auai atu ai i se malumalu lata ane. Na avea lea ma se punavai o le filemu ma le mana i lona olaga.

I se tasi aso sa ia faalogo ai, sa matua mananao lava ni nai uso matutua o lana uarota e auai i le malumalu, ae sa leai ni auala e feoai ai. Sa ofo atu Leola na te aveina i latou i le taavale. Mo le isi 40 tausaga i luma ane, sa seāseā ona alu atu na o ia i le malumalu.²

Sa faamanuiaina Leola, ma sa ia faamanuiaina isi ina ua ia ofo atu e ave i latou i le malumalu.

Manatu e Fesoasoani Ai i Isi ia Oo Atu i le Malumalu

E mafai faapefea ona e fesoasoani i isi ia o atu soo i le malumalu? Atonu o le a e mauaina e fesoasoani foi ia lava manatu ia te oe.

O faatasi. Ofo atu e saunia pe faatulaga ni feoaiga mo se tasi. Atonu e mafai ai foi ona uunaia se isi tagata e alu i le malumalu.
Fai atu i tagata o lou aiga po o le uarota e fesoasoani atu ia te oe e faatino sauniga mo ou tuaa, ae maise lava pe afai e i ai le tele o igoa o lou aiga ua saunia mo sauniga.
Mafaufau e ofo atu e te tausitama ina ia mafai ai e matua ona o i le malumalu. Pe fai se fuafuaga e auauai e vaavaai e le tasi le fanau a le isi. (Mo nisi manatu, faitau le “Faafaigofieina Po o le Malumalu: 6 Motugaafa e Faafaigofie ai Malaga i le Malumalu” [na’o tusiga faatekinolosi], Liahona, Ian. 2018.)

Pe a Mamao Ese le Malumalu

O Chandras Roshan ma Sheron Antony o Colombo Sri Lanka, sa tonu ina ia faamauina i le malumalu. Sa matua fiafia a laua uo o Ann ma Anetone Kumarasamy mo i laua. Peitai sa latou iloa o le oo atu i le Malumalu o Manila Filipaina sa lē faigofie pe taugofie.

Sa faasaoina e Roshan ma Sheron a la tupe ma totogi mamao lava i masina i luma mai le la faigamalaga ina ia maua se pasese la te gafatia. Mulimuli ane, na oo mai le aso. Ae peitai, i le taimi o faatalitali i le malaevaalele i Meleisia, sa la iloa ai ina ia faaauau atu i Filipaina, e manaomia e i laua se visa pe e manaomia ona malaga i se isi vaalele ese. Sa lē mafai ona maua se visa, ma sa lē gafatia e i laua le faatauina o ni pepa ulufale i se isi vaalele. Ae sa lē mafai ona laua taliaina le manatu o le toe foi atu i le fale e aunoa ma le faamauina.

Ma le lē mautonu po o le a se isi mea a fai, sa valaau atu ai Roshan ia Anetone. Sa matua mananao lava Anetone ma Ana e fesoasoani atu. O i laua o se tasi o nai ulugalii toaitiiti i Sri Lanka o e na faamauina i le malumalu, ma sa la iloa lea faamanuiaga. Ae sa la faaaogaina talu ai nei lava a la tupe teu e fesoasoani ai i se tagata o le aiga e manaomia le fesoasoani, ma sa lē lava ni a latou tupe e fesoasoani ai ia Roshan ma Sheron e faatau ni pepa malaga mo se faigamalaga fou.

I Sri Lanka o se aga masani mo le alii faaipoipo le faatau mo le tamaitai faaipoipo o se asoa auro ina ia maua sana tupe pe afai e maliu lona toalua. Sa filifili Ana e faatau atu lana asoa e fesoasoani ai i le faatauina o pepa ulufale fou. O lana meaalofa agalelei na mafai ai e Roshan ma Sheron ona faia lo la avanoa mo le malumalu i Manila.

“Ua ou iloa le taua o se faamauga i le malumalu,” o le tala lea a Ana. “Sa ou iloa o le a avea Sheron ma Roshan ma se malosiaga maoae i le paranesi. Ou te le i manao la te misia lenei avanoa.”³

Manatu e Fesoasoani Ai ia i Latou e Lē Mafai Ona Asiasi Atu i le Malumalu

E mafai ona valaauina oe e auauna atu ia i latou e lē masani ona oo atu i le malumalu pe lē oo atu foi ona o le mamao po o le tau. Ae e mafai lava ona e sailia ni auala e fesoasoani ai ia i latou e talisapaia faamanuiaga o le malumalu.

Aoao atu pe auai faatasi i se vasega faasauniuni mo le malumalu po o se vasega o talafaasolopito o aiga.
Tuu atu ia i latou se ata o se malumalu e tautau i lo latou fale.
Afai sa e i ai i le malumalu, faasoa atu ou lagona e uiga i lou aafiaga ma lau molimau i sauniga o le malumalu.
Fesoasoani ia i latou e aoao atili e uiga i feagaiga na latou osia ma auala e tausia ai. Mafaufau e faaaoga le “Malamalama i a Tatou Feagaiga ma le Atua: O Se Vaaiga Aoao i a Tatou Folafolaga Sili Ona Taua,” i le Iulai 2012 Liahona.