Misyonaryo nga Pagpangandam

Pag-adjust sa Kinabuhing Misyonaryo

Congratulations nga nakita nga takus ug andam nga modawat og tawag sa pagserbisyo sa Ginoo. Walay laing panahon nga labaw pa ka madasigon sa pagkahimong misyonaryo. Ang Unang Kapangulohan miingon: “Walay labaw pa ka maagnihon nga trabaho kay sa [pagkahimong misyonaryo], ni bisag unsa nga mas makahatag og mas dako nga katagbawan. … Ang kada misyonaryo adunay importante nga tahas sa pagtabang ‘sa pagpahinabo sa pagka-imortal ug kinabuhi nga dayon sa tawo’ (Moises 1:39)” Isangyaw ang Akong Ebanghelyo [2004], v). Oportunidad na karon ninyo sa paggahin og 18–24 ka bulan sa full-time nga pagserbisyo sa Ginoo.

Ang misyonaryo nga buhat nagkinahanglan nga mobiya sa naandan nga kahimtang sa kinabuhi ug magpalambo og mga kahanas nga makatabang ninyo nga magmalampuson sa bag-o ug dili pamilyar nga kalibutan. Kini nga transisyon mahimong makadasig ingon man usab makapabalaka. Komon ra nga makasinati niini nga mga emosyon.

Kini nga transisyon matandi sa kausaban nga giaagian sa usa ka tawo nga inyong bunyagan sa inyong misyon. Ang bag-ong miyembro ug ang bag-ong misyonaryo nakasabut nga kinahanglan silang mobiya sa seguridad sa ilang kanhi pamaagi sa pagpakabuhi apan walay siguro unsay mapaabut o unsaon sa pag-atubang ang bag-ong kinabuhi nga ilang gipili isip disipulo ni Kristo. Kon ang mga tawo makasugat og bag-ong kahimtang, daghang mga kinaiya nga ilang naandan kinahanglang hunungon na.

Usa ka misyonaryo mipadayag niining paagiha: “Ang akong investigator mibati sa Espiritu ug gustong mosunod sa Manluluwas, apan nahadlok usab siya kon magmalampuson ba siya ug madawat. Mibati siya nga morag walay labut ug wala makasiguro unsay damhon. Nakasabut ko unsay iyang gibati! Pareha ang akong gibati nga mahimong misyonaryo: Nalipay ko ug nabalaka usab, ug sa sinugdanan dili ko komportable. Gipahinumduman ako sa Espiritu niana nga kasinatian, ug nakatabang kini nako nga makasabut sa iyang mga pagbati ug unsaon sa pagtabang kaniya.”

Sama sa bag-ong miyembro nga mobiya sa karaang mga pagtuo, mga higala, ug mga kinaiya, komon usab sa bag-ong mga misyonaryo nga makasinati og kalisud o dili komportable kon sila mobiya sa pamilya, mga higala, ug sa ubang butang nga gibuhat kaniadto. Ang pagbiya sa pamilyar nga palibut ug mosulod sa kinabuhing misyonaryo—diin ang pagkaon, iskedyul, panamit, ug bisan tingali sa pinulongan lahi—mahimong lisud sa sinugdanan. Ang pagsagop niining bag-ong matang sa kinabuhi susama sa kasinatian sa usa ka bag-ong miyembro kinsa sa sinugdanan maglisud sa pagbayad sa ikapulo, pagsunod sa Pulong sa Kaalam, o pagbalaan sa Igpapahulay nga adlaw, bisan og siya dunay sinsero nga tinguha sa pagbuhat niining mga butanga.

Ayaw ikasurprisa kini nga proseso. Pagmapailubon sa imong pagdawat sa mga panalangin sa paghalad sa mas hingpit sa imong kinabuhi ngadto sa Manluluwas. Hinumdumi, ang Espiritu magauban kanimo sa imong paghimo niini nga transisyon ug motabang nimo sa pag-adjust sa imong bag-ong misyonaryo nga mga responsibilidad.

Pag-adjust sa Bag-ong mga Kasinatian

Sama sa kadaghanan nga mosulod sa bag-ong sitwasyon, ang mga misyonaryo sa kasagaran moagi sa mga ang-ang o mga bahin sa ilang emosyonal nga pag-adjust kon sila mosulod sa MTC ug usab kon sila mosulod na sa misson field:

1. Pagpaabut

Mahimong madasig ka sa hagit (tan-awa sa 1 Nephi 3:7).
Mahimong mobati ka og dugang pagsabut sa katuyoan ug pagpasalig ngadto sa Langitnong Amahan (tan-awa sa 3 Nephi 5:13).

2. Pagdiskobre sa wala damha

Tingali magsugod ka nga mingawon sa balay, pamilya, ug mga higala ug gani makapangutana sa imong desisyon sa pagserbisyo (tan-awa sa Alma 26:27).
Tingali makamatikod ka og pisikal nga timailhan sa kalisud, sama sa walay tarung nga pagkatulog, kausaban sa gana sa pagkaon, o dali nga masuko.
Wala nimo tuyoa nga mahimong kritikal ug walay pasensya sa mga lagda ug mga ekspektasyon.

Alang sa kadaghanan, kini nga mga pagbati normal ra. Kon ikaw aduna sa bisan unsa niini o sa tanan niini nga isyu, palihug hibaloi nga temporaryo ra kini nga sitwasyon nga nasinati na sa daghang bag-ong mga misyonaryo. Pagmaisugon nga kini nga mga pagbati molabay ra ug maka-adjust ra ka.

Two sister missionaries stuying the scriptures

3. “Makahimo ko niini”

Ang imong mga kahanas sa pagtudlo ug pinulongan molambo.
Makat-on ka nga andam nga mosunod sa mga lagda ug mga ekspektasyon sa misyon.
Mamatikdan nimo nga mapailubon ka na sa imong kaugalingon samtang ikaw magkat-on sa “lagda ibabaw sa lagda” (tan-awa sa Isaias 28:10; Mosiah 4:27).
Ang imong pisikal nga mga simtoma sa kalisud, kon ikaw aduna, magsugod sa pagkawala.

4. Emosyonal nga pagpaningkamot sa kaugalingon

Komportable ka na nga mobuhat sa inadlaw nga buluhaton.
Imong mamatikdan ang imong personal nga kalig-on ug kauswagan.
Imong masabtan unsay ipasabut sa pag-atubang sa kinabuhi nga pinahimutang (tan-awa sa D&P 98:12).
Makapalambo kamo og mas dakong pagsalig sa kaugalingon ug nagkadugang nga tinguha sa pagserbisyo.

Mga Butang nga Imong Mahimo Karon

Pangita og mga paagi sa pagserbisyo sa uban. Ang misyonaryo nga buhat usa ka tawag sa paserbisyo. Pangayo sa Dios og mga oportunidad sa pagserbisyo niadtong naglibut nimo kon ikaw mobati nga nabalaka. Ayaw pag-focus sa imong kaugalingong kalisud sa pangalagad niadtong nanginahanglan og mabinationg pulong, buhat sa kalooy, o pakighigala. (Tan-awa sa Isangyaw ang Akong Ebanghelyo, 205–206.)
Focus sa pagpalig-on sa imong relasyon uban sa imong Langitnong Amahan. Tinguhaa ang Iyang Espiritu pinaagi sa personal nga pag-ampo, pagtuon sa kasulatan, makabayaw nga musika, pagbasa sa imong patriyarkal nga panalangin, ug ubang mga paagi nga angay nimo. Pangutan-a ang imong kaugalingon unsa ang Iyang gusto nga imong makat-unan sa kasinatian sa imong misyon, ug pamalandungi unsaon Niya pagtabang nimo nga madawat kini nga pagtulun-an.
Panghangyo og returned missionary nga mopakigbahin sa iyang mga panumduman sa inisyal nga pag-adjust ug mohatag og mga sugyot unsaon nga mas sayon ang transisyon.
Ribyuha ang artikulo “Preparing Emotionally for Missionary Service” ni Robert K. Wagstaff (sa Ensign Mar. 2011, 22–26; anaa sa online sa LDS.org).
Pagpalambo og kinaiya sa pagpasalamat. Pag-focus og pipila ka minuto kada adlaw sa unsay matarung, maayo, ug positibo bahin sa imong kaugalingon ug sa calling nga imong nadawat. Pag-ampo sa pagpasalamat kada adlaw sa piho nga butang nga imong pasalamatan kabahin sa imong mission call.
Pagmabination sa imong kaugalingon. Sultihi ang imong kaugalingon sa samang makahupay, mabination nga mga pulong nga imong gamiton ngadto sa uban. Ang tanan mahasol ug masayop usahay. Hibaloi nga ang Ginoo nakasabut. Hunahunaa nga naglingkod ka tupad Niya, naminaw ug nagtanyag og suporta. Hinumdumi, nga ang mga hunahuna nga kawalay mahimo, kawalay paglaum, o grabe nga panghimaraut dili gikan sa Ginoo.
Pangandam sa bisan unsa nga wala damha. Ang imong kasinatian isip misyonaryo dili pareha sa uban. Ang tanan dili mahitabo sama sa imong pagplano o sa imong hunahuna nga maoy mahitabo. Paabuta nga ang mga butang nga mahimong lahi kay sa imong paghunahuna niini. Ang pagsusi sa imong mga ekspektasyon makatabang nimo nga bukas ug makadawat sa kausaban.

Pakighisgot sa mga Ginikanan o mga Lider

Ang pagpakigsulti sa uban niining umaabut nga pag-adjust makatabang. Paggahin og panahon sa paghisgot sa mosunod uban sa mga ginikanan, mga lider sa priesthood, o mga higala nga returned missionary.

Nganong ang positibo nga kinaiya importante kon mag-adjust sa bag-ong mga sitwasyon.
Unsay atong makat-unan gikan sa mga ehemplo sa Dios sa kasulatan nga nagpabuhat sa mga tawo sa mga butang nga sa ilang pagtuo dili nila mahimo (tan-awa sa Exodo 4:10–12; Jeremias 1:6–9; Alma 17:10–12; 26:27; Ether 12:23–27; Moises 6:31–32).
Ngano nga importante nga matulog ug momata sa saktong oras, magmintinar og maayong nutrisyon, kanunay nga ehersisyo, ug dunay personal nga pag-ampo (tan-awa sa Isangyaw ang Akong Ebanghelyo, viii).
Ngano nga ang pagmintinar og maayong pangomedya ug mokatawa sa kaugalingon kon masayop makatabang nga mas masayon ang pag-adjust.
Unsaon nimo sa pagpahinumdom sa kaugalingon nga ang inisyal nga pagbati sa kalisud dili molungtad og dugay.
Unsay ikatabang sa mga ginikanan ug mga higala sa inisyal nga pag-adjust.
Sa unsang paagi nga ang pagsulat sa journal makatabang kon adunay masinati nga hagit.
Unsay buhaton kon ang makahasol nga mga hunahuna dili mawala.

Summary

Ang panahon sa pag-adjust sa mga misyonaryo normal ra, kasagaran dili malikayan, ug dili timailhan nga kulang ka og pagtuo o pagpamatuod. Alang sa kadaghanang bag-ong mga misyonaryo, kinahanglan og panahon aron makaangkon og mga kahanas aron magmalampuson. Hinumdumi ang tambag nga gihatag ngadto ni Propeta Joseph Smith sa malisud nga panahon sa iyang kinabuhi: “Ikaw masayud, akong anak, nga kining tanan nga mga butang makahatag kanimo og kasinatian, ug alang sa imong kaayohan” (D&P 122:7).

Samtang ikaw mag-andam sa pagbiya alang sa misyon, pangandam sa pagdawat og kausaban. Ang kinabuhi isip misyonaryo tingali lahi kay sa bisan unsa nga imong nasinati, apan kon ikaw adunay positibo nga kinaiya, magbaton og hugot nga pagtuo sa Ginoo, ug mangandam sa panginahanglan sa pagpailub sa imong kaugalingon ug sa uban, ang Ginoo moganti ug mopanalangin kanimo. Misaad Siya, “Ako molakaw diha sa inyong atubangan. Ako anaa sa inyong tuo nga kamot ug sa inyong wala, ug ang akong Espiritu mahimo nga anaa sa inyong mga kasingkasing, ug ang akong mga anghel anaa libut kaninyo, aron sa pagtabang kaninyo” (D&P 84:88).

© 2013 pinaagi sa Intellectual Reserve, Inc. Tanang katungod gigahin. Giimprinta sa USA. Pagtugot sa Iningles: 3/11. Pagtugot sa paghubad: 3/11. Hubad sa Missionary Preparation: Adjusting to Missionary Life. Cebuano. PD50032393 853