Parau hi’u

7.0

’Ōmuara’a

Mai te mea e tītauhia, ’e e tano nō tā ’outou misiōni ’e nō te mau huru orara’a, ’a pe’e i te mau arata’ira’a hau i fa’a’itehia i roto i teie parau hi’u.

7.1

Te mau hōpoi’a a te fa’atere misiōnare taure’are’a

Teie i raro nei te mau fa’auera’a ’ohipa ’e te mau hōpoi’a a te mau fa’atere misiōnare taure’are’a, e ’ere rā i te reira ana’e.

Te hoa mātuatua

I roto i te pupu misiōnare tāta’itahi e fa’auehia te hō’ē misiōnare ’ei hoa mātuatua. Nā te hoa mātuatua :

E fa’atere i te pupu misiōnare nō te fa’aoti i te ’ohipa i roto i te vāhi ha’api’ira’a i fa’ata’ahia.
E fa’aitoito i te pupu misiōnare ’ia ha’api’i, ’ia pure, ’ia pe’e i te tārena ’ohipa o te mahana, ’e ’ia tano maita’i te mau pāpa’a parau.
E tauturu i tōna hoa ’ia riro mai ’ei misiōnare maita’i a’e.
E ’ite ’e e fa’a’ite i te mau ’aravihi maita’i, te mau tāreni, ’e te mau tauto’ora’a i roto i tōna hoa.
E fa’a’ite e nāhea i te ’ohipa maita’i a’e i pīha’i iho i te feiā fa’atere ’e te mau melo i reira, nō te fa’atano māite i te mau tauto’ora’a misiōnare.

Te ta’ata ha’api’ipi’i

E fa’auehia te hō’ē misiōnare ’ei ta’ata ha’api’ipi’i ’e ’ei hoa mātuatua nō te misiōnare ’āpī tāta’itahi. Nā te ta’ata ha’api’ipi’i :

E ’ohipa ’e e ha’api’ipi’i ho’i i te hō’ē misiōnare ’āpī ma te here, te fa’a’oroma’i, te aroha, ’e te auma’i.
E fa’atura i te tauturu ’e te huru hi’ora’a a te misiōnare ’āpī ’ei hoa ’aifāito.
E fa’ata’a i te taime ha’api’ipi’ira’a hau atu i te mahana tāta’itahi, i roto i te ha’api’ira’a ’e te hoa misiōnare (hi’o « Nō te mau misiōnare ’āpī : Tē tahi atu tuatāpapara’a ’e te hoa » i roto « ’Ōmuara’a : Nāhea vau ’ia fa’a’ohipa maita’i a’e i te ’Ia poro haere i tā’u nei ’Evanelia ? » i roto ’Ia poro haere i tā’u nei ’Evanelia [2019], ix–x).
E tuatāpapa ’e tōna hoa, i te mau ture i roto i teie buka arata’i, i te mau mahana ato’a.
E ha’api’ipi’i i te misiōnare ’āpī i te mau tumu parau e ’itehia i roto i te mau rāve’a tauturu Te mau pārurura’a nō te fa’a’ohipara’a i te mau rāve’a rorouira ’āpī ’e Te fa’atanora’a i ni’a i te orara’a misiōnare.
E fa’a’ite nāhea i te fa’aau maita’i i te mau tauto’ora’a misiōnare ’e te feiā fa’atere ’e te mau melo i reira.

Te fa’atere mata’eina’a

E fa’auehia te hō’ē taea’e misiōnare ’ia tāvini ’ei fa’atere mata’eina’a i roto i te hō’ē mata’eina’a, te hō’ē mata’eina’a e rave rahi ïa vāhi ha’api’ira’a i roto. Nā te fa’atere mata’eina’a :

E fa’atere, e ha’api’ipi’i, ’e e a’o ’e te mau misiōnare i roto i te mau ’āpo’ora’a mata’eina’a i te hepetoma hō’ē.
E rave i te mau uiuira’a nō te bāpetizora’a (hi’o 2.3.6).
E rave i te mau tāuiuira’a hoa ’e te mau taea’e misiōnare i roto i tōna mata’eina’a (hi’o 2.3.1).
E ’ohipa ’e te feiā fa’atere pāroita ’e te mau melo nō te fenua iho nō te fa’aau i te mau tauto’ora’a ’ohipa misiōnare.
E parau ’āfaro ti’a i te mau parau fa’a’ite i te fa’atere ārea misiōnare.

Te mau fa’atere ha’api’ipi’i tuahine ’e te mau fa’atere ārea misiōnare

E fa’auehia e piti tuahine misiōnare ’ia tāvini i roto i te hō’ē pupu misiōnare ’ei fa’atere ha’api’ipi’i tuahine i roto i te hō’ē ārea misiōnare ’aore rā, hau atu. E parauhia te hō’ē o nā tuahine te hoa mātuatua. E hōpoi’a nā rāua te ha’api’ipi’ira’a ’e te au maita’i o te mau tuahine misiōnare tei fa’ata’ahia nā rāua e ha’apa’o. E melo ato’a rāua nō te mau mata’eina’a ’e nō te mau ārea misiōnare, ’e e tauturu rāua i te peresideni misiōni, te mau fa’atere ārea misiōnare, ’e te mau fa’atere mata’eina’a i roto i te mau rurura’a ha’api’ipi’ira’a ’e te mau ’āmuira’a ārea misiōnare.

E fa’auehia e piti taea’e misiōnare ’ia tāvini i roto i te hō’ē pupu misiōnare ’ei fa’atere ārea misiōnare i roto i te hō’ē noa ārea misiōnare. E parauhia te hō’ē o nā taea’e misiōnare te hoa mātuatua. E hōpoi’a nā rāua te ha’api’ipi’ira’a ’e te au maita’i o te mau misiōnare ato’a tei fa’ata’ahia nō tā rāua ārea misiōnare. E tauturu ato’a rāua i te peresideni misiōni i roto i te mau rurura’a ha’api’ipi’ira’a ’e i te mau ’āmuira’a ārea misiōnare.

Nā te mau fa’atere ha’api’ipi’i tuahine ’e te mau fa’atere ārea misiōnare :

E fa’atere, e ha’api’ipi’i, ’e e rave i te mau tāuiuira’a hoa ’e te mau misiōnare i roto i tā rātou ārea misiōnare ’aore rā, mau ārea misiōnare i fa’ata’ahia. E rave te mau fa’atere ha’api’ipi’i tuahine i te mau tāuiuira’a hoa nā muri i te mau tuahine misiōnare, ’e nā te mau fa’atere ārea misiōnare e rave i te mau tāuiuira’a nā muri i te mau taea’e misiōnare.
E ’ohipa ’e te feiā fa’atere ’e te mau melo i reira nō te fa’aau māite i te mau tauto’ora’a ’ohipa misiōnare.
E ’āmui atu i roto i te ’āpo’ora’a fa’aterera’a a te misiōni.
E parau ’āfaro ti’a i te mau parau fa’a’ite i te peresideni misiōni.

E rave ato’a te mau fa’atere ārea misiōnare i te mau uiuira’a nō te bāpetizora’a (hi’o 2.3.6).

Te mau rima tauturu o te peresideni

E fa’auehia e piti taea’e misiōnare nō te tāvini i roto i te hō’ē pupu misiōnare ’ei rima tauturu nō te peresideni misiōni. Nā te mau rima tauturu :

E rave i te mau tāuiuira’a hoa nā muri i te mau fa’atere ārea misiōnare ’e te tahi atu mau taea’e misiōnare (hi’o 2.3.1).
E hōro’a i te ha’api’ipi’ira’a i roto i te mau ’āpo’ora’a fa’aterera’a a te misiōni ’e i roto i te mau ’āmuira’a ārea misiōnare mai tei tītauhia e te peresideni misiōni.
E nehenehe e hōro’a i te mana’o nō ni’a i te vāhi ’āpī e tono i te mau misiōnare ’aore rā, te mau misiōnare e tano ’ei fa’atere, e ’ere rā nā rāua e rave i te mau fa’aotira’a hope’a.
E parau ’āfaro ti’a i te mau parau fa’a’ite i te peresideni misiōni.

7.2

Te mau arata’ira’a nō te tāvinira’a

’A pe’e i te mau arata’ira’a nō te tāvinira’a tei vauvauhia i roto i te mau tuha’a raro i muri nei.

7.2.1

Te mau ’ātivite tauturura’a tei fa’anaho-ti’a-hia

E ’ite mai ’outou i te mau rāve’a nō te tāvinira’a nā roto i te mau fa’anahora’a mai te JustServe.org (i te vāhi e roa’a), mai te au i te arata’ira’a a tō ’outou mau fa’atere misiōni.

’Ia ’āmui atu ana’e ’outou i roto i te hō’ē ’ohipara’a tāvinira’a tei fa’anahohia, e tu’u i teie mau fa’aturera’a i muri nei i roto i te ferurira’a :

Fa’atano i te tāvinira’a i te ao.
’Eiaha te tāvinira’a ’ia tupu i te mau taime e mea pūai roa te ’imira’a ’e te ha’api’ira’a, maori rā, ’ia arata’ihia mai e tō ’outou peresideni misiōni.
E ’āmui atu i roto i mau fa’anahora’a tāvinira’a a te ’oire mai te mea e nehenehe.
’Eiaha e rave i te mau ’ātivite tauturura’a i te mahana fa’aineinera’a ’aore rā, i te mau taime e ha’afifi te reira i te mau ’āpo’ora’a mata’eina’a ’aore rā, i te mau ’āmuira’a ārea misiōnare.
’Eiaha e fa’a’ore ’aore rā, e tārena fa’ahou i te mau fārereira’a ha’api’ira’a nō te mau fa’anahora’a tāvinira’a, maori rā, e parau mai tō ’outou peresideni misiōni.
E fa’aea noa i pīha’i iho i tō ’outou hoa ’a tāvini ai ’outou.
E tāmau i tō ’outou tāreta i’oa mai te peu ē, e fa’ati’ahia ’e e mea tano te reira, noa atu e ’ahu ’ohipa tō ’outou.
’Eiaha e ’āmui atu i roto i te mau ’ātivite ’aufau ’aore rā, terā e ’aufauhia ’outou.
’Eiaha e hōro’a i tō ’outou taime i roto i te mau fa’anahora’a tau roa ma te parau fa’ati’a ’ore a tō ’outou feiā fa’atere nō te misiōni.

7.2.2

Te pārurura’a i roto i te mau ’ohipa tauturura’a

Nō tō ’outou pārurura’a i te roara’a o te mau ’ohipa tauturura’a, e fa’a’ohipa i te mana’o tano, ’e ’a pe’e i te mau muhumuhu a te Vārua Maita’i ’e i teie mau arata’ira’a i muri nei :

E rave noa i te mau ’ātivite e mara’a i tō ’outou pūai tino ’ia rave.
’Eiaha e fa’a’ohipa i te mau mauiha’a uira ’aore rā, e fa’a’ohipa ’aore rā, e fa’ahoro i te mau pere’o’o mātini (mai te ’ārote, te mau tāvere, ’aore rā, te mau pere’o’o tahua).
E ’ō’omo i te ’ahu e tano (mai te mau rimarima ’aore rā, te mau ’ahu tāne rima roa).
’Eiaha e rave i te ’ohipa i te vāhi e nehenehe ’outou e topa mai nā te vāhi teitei (i ni’a i te punu fare ’aore rā, te mau tumu rā’au).
’Eiaha e rave i te ’ohipa i te mau vāhi e nehenehe ’outou e pirihia ’aore rā, e pēpē i te mau vāhi ’ōpanipanihia (mai te mau ’āpo’o hōhonu).
’Eiaha e tāvini i roto i te mau fare ha’api’ira’a, te mau pū ’atu’atura’a i te ao, ’aore rā, i te tahi atu huru vāhi e vai noa ’outou ana’e iho ’e te mau tamari’i, tae noa atu i roto i te Paraimere ’aore rā, te vāhi ha’apa’ora’a tamari’i (hi’o 3.5.2).

E māta’ita’i i teie video nō te mau ha’amāramaramara’a hau atu nō ni’a i te hōro’ara’a i te tāvinira’a.

15:26

7.3

Te fa’aturara’a ia vetahi ’ē

E tāmau noa i te rave maita’i ’e i te fa’atura ia vetahi ’ē. ’A pe’e ato’a i te mau arata’ira’a hau atu i roto i teie tuha’a.

7.3.1

Te mau tumu parau e ’ape i roto i te mau ’āparaura’a

Nō te fa’a’ite i te fa’atura ia vetahi ’ē, ’e nō tō ’outou pārurura’a, ’a ’ape i te mau tumu parau ’āparaura’a e tupu mai te fifif. Te mau tumu parau e ’ape, tei roto ïa te poritita i te vāhi ’e te fenua tā ’outou e tāvini ra ; e ’ape ato’a i te mau fa’ahitira’a poritita, i te vāhi ’ōmo’e ’aore rā, i te vāhi ta’ata. Hau atu i te reira, ’eiaha roa :

E parau ha’uti nō ni’a i te mau ’ohipa tōtōāra’a ’aore rā, te mau ’ohipa a te feiā tōtōā.
E hōro’a i te mana’o i te ta’ata ’ia haere i roto i te tahi atu fenua—noa atu nō te ’ohipa ’aore rā, nō te ha’api’ira’a.
E pūpū atu ’aore rā, e rave i te mau fafaura’a nō ni’a i te tauturu faufa’a ’aore rā, tauturu parau tītiro mana (visa) nō te mau ta’ata i roto i te fenua o tā ’outou misiōni, noa atu nō te ’ohipa, nō te ha’api’ira’a, nō te nohora’a ’aore rā, nō te mau fa’a’amura’a.

7.3.2

Te mau ture ’e te hīro’a tumu o te fenua iho

E ha’apa’o i te mau ture ’e te mau arata’ira’a o te fenua iho nō ni’a i te ’ōperera’a mātēria, te mau fa’aturera’a tuanie ’e te ’ōti’a fenua, ’e te mau tītaura’a nō te buka rātere (passeport) ’e te parau tītiro mana (visa). Mai te peu ’aita ’outou i ’ite maita’i i te mau ture, te mau peu ’e te mau hīro’a tumu o te fenua iho, ’a ani i te tauturu i te mau ti’a fa’atere o te misiōni.

’A māta’ita’i i teie video nō te mau ha’amāramaramara’a hau atu nō ni’a i te mea ti’a ’ia rave.

16:32

7.4

Te haerera’a i te hiero

’Ia haere ’outou i te hiero, ’a ha’amana’o i teie i muri nei :

’A fa’aea noa i pīha’i iho i tō ’outou hoa.
’A ’āmui atu i roto i te mau huru ’ōro’a e ravehia i roto i te hiero. Teie rā, nō te ’ore e hape i te putapūra’a pae vārua ’ei mana’o moeānihi, ’eiaha e ti’a atu ’ei mono nō te hō’ē tāne ’aore rā, nō te hō’ē vahine fa’aipoipo i roto i te ’ōro’a tā’atira’a ’aore rā, ’ei ’ite i roto i te hō’ē ’ōro’a hiero.
’Eiaha e ha’ape’ape’a nō ni’a i te ’ahu o te hiero ; e hōro’ahia mai te mau ’ahu o te hiero i te mau misiōnare ma te tāmoni ’ore.
E pe’e i te peu nō te niuniu. E nehenehe ’outou e ’āfa’i i tā ’outou niuniu i roto i te hiero nō te nene’i i te mau tāreta ’ōro’a. Terā rā, ’eiaha ’outou e fa’a’ohipa i tā ’outou pata hōho’a, e paraparau i ni’a i tā ’outou niuniu, ’aore rā, e hāpono i te mau poro’i ’a vai ai ’outou i roto i te hiero.
’Eiaha e ’āfa’i mai i te mau pata hōho’a ’aore rā, te mau mātēria tai’o, tae noa atu i te mau ha’amaita’ira’a patereareha, nō te fa’a’ohipa i roto i te hiero.
’Eiaha e putuputu ’ei misiōnare ’aore rā, e tūturi i raro nō te pure i roto i te piha tīrētiēra.

E ha’amana’o ’ia ’ō’omo noa i te ’ahu hiero (garmen) mai tei ha’api’ihia mai. Mai te peu e uira’a tā ’outou nō ni’a i te ’ō’omora’a i te ’ahu hiero ’aore rā, nō ni’a i te haerera’a i te hiero, e ani i tō ’outou mau ti’a fa’atere nō te misiōni.

7.5

Te rāve’a rorouira ’āpī

’A pe’e i te mau fa’aturera’a nō te mau rāve’a rorouira ’āpī i fa’ata’ahia i roto i te mau tuha’a pene i muri nei.

7.5.1

Te pe’era’a i te mau fa’aturera’a rahi nō te rāve’a rorouira ’āpī

E rōtahi i ni’a i te ta’ata, ’eiaha rā i ni’a te mau rāve’a rorouira ’āpī. ’Ia ruru ana’e ’outou mata ’e mata, ’a hōro’a i tō ’outou mana’o ato’a i ni’a i te ta’ata. Te hi’ora’a i te rata uira, te pāhonora’a i te mau parau putu niuniu ’āfa’ifa’i (SMS), ’aore rā, te patara’a i te hōho’a nō te mau rāve’a tūreiara’a tōtiare, ’a vai ai ’outou i pīha’i iho ia vetahi ’ē, e riro ïa te reira ’ei mea pe’ape’a ’e te fa’atura ’ore.

E nehenehe ’outou e fa’a’ohipa :

I te natira’a WI-FI mai te peu e mea ’ōhie i te noa’a mai ’e ’ua ha’amanahia e te peresideni misiōni.
I te mau rorouira nō te huira’atira, mai terā i roto i te mau fare vaira’a buka nā te hau ’e te mau fare inura’a taofe.
I te rorouira a te hō’ē ta’ata nō te ha’api’ira’a, mai te mea e fa’ati’a te reira ta’ata.
E nehenehe e fa’a’ohipa i te fa’aro’o tari’a nō te mau ’ohipa tei fa’ati’ahia nō te hō’ē misiōnare, mai te paraparaura’a i tō ’outou ’utuāfare ’aore rā, te ravera’a i te mau ha’api’ira’a misiōnare.

’Eiaha e fa’atere i te mau rāve’a rorouira ’āpī nō te fenua iho a te pāroita ’aore rā, a te titi, te mau tahua natirara, te mau pūharara’a parau i ni’a i te natirara (blogs), ’aore rā, te mau parau o te tūreiara’a tōtiare.

’A māta’ita’i i teie video nō te mau ha’amāramaramara’a hau atu nō ni’a i te fa’a’ohipara’a i te mau mātini ’āfa’ifa’i i roto i te ’ohipa misiōnare.

4:40

7.5.2

Te fa’a’ohipara’a i te rāve’a rorouira ’āpī ma te pāruruhia

E tītauhia ia ’outou ’ia rave fa’aoti i te ha’api’ira’a nō te fa’a’ohipara’a i te mau rāve’a rorouira ’āpī ma te pāruruhia nā ni’a i te natirara, ’a haere ai ’outou i te pū ha’api’ipi’ira’a misiōnare. E tauturu ato’a te mau fa’aturera’a i muri nei ia ’outou ’ia fa’a’ohipa i te mau rāve’a rorouira ’āpī ma te pāruruhia, ’e ma te hō’ē ’ōpuara’a misiōnare :

E fa’a’ohipa i te mau rāve’a rorouira ’āpī ma te ’ōpuahia. E fa’anaho i te mau ’ātivite ’o tē tauturu ia ’outou ’ia ani ia vetahi ’ē ’ia haere mai i te Fa’aora ra.
’Eiaha e fa’a’ohipa i te mau rāve’a rorouira ’āpī nō te tāmarū i te hitahita ’aore rā, i te fiu.
E fa’aro’o ’e e pe’e i te mau muhumuhu a te Vārua Maita’i. Te hō’ē natira’a pūai ’e te Vārua o te Fatu, ’o tō ’outou ïa pāruru maita’i a’e i mua i te fa’a’ohipara’a tano ’ore i te mau rāve’a rorouira ’āpī.
’Ia vai noa ’ōrua i roto i te hō’ē ti’ara’a e nehenehe ai ia ’oe ’e i tō ’oe hoa ’ia ’ite i te paruai a te tahi ’e te tahi. ’Eiaha e fa’a’ohipa i te mau rāve’a ’āfa’ifa’i i te taime o ’outou ana’e, mai te piha hopura’a pape
E ’ohipa ’e tō ’outou hoa nō te ’imira’a ’aore rā, nō te ha’api’ira’a nā ni’a i te natirara. E hi’o i tā te tahi ’e tā te tahi mana’o e hāpono ’e te mau poro’i hou ’a pūhara ai ’aore rā, ’a hāpono ai i te reira, ’ia nehenehe ia ’ōrua to’opiti ’ia fa’a’ite i te mau mana’o ’e ’ia amo i te hōpoi’a nō te mea e matara mai mai roto mai i taua ’āparaura’a ra. Fa’ata’ara’a : ’Eiaha teie ’ia fa’a’ohipahia nō te ’āparaura’a i tō ’outou ’utuāfare (hi’o i 3.9.1), i te piha tōro’a o te misiōni, ’aore rā, i te peresideni misiōni.
E hi’o tāmau noa i Te mau pārurura’a nō te fa’a’ohipa i te mau rāve’a rorouira ’āpī i roto i te tuatāpapara’a a te ta’ata hō’ē ’e te tuatāpapara’a ’e te hoa.

7.5.3

Te ’apera’a i te hōho’a faufau

’Ua rau te huru o te hōho’a faufau. E nehenehe te fa’anaho-ātea-ra’a ’e te ravera’a i te mau mā’itira’a maita’i e tauturu ia ’outou ’ia ’ape i te hōho’a faufau (hi’o i Te mau pārurura’a nō te fa’a’ohipara’a i te mau rāve’a rorouira ’āpī). ’Ia tupu ana’e mai te reira, ’a fāriu ’ē, ’a tūpohe i te mātini, ’aore rā, ’a haere ’ē atu i te huru tupura’a. Teie i raro nei te tahi ri’i mau mana’o nō te tauturu ia ’outou ’ia ’ape i te hōho’a faufau :

’A ’ape i te mau tahua natirara, te mau mātēria ’e te mau vāhi i reira ’outou e fa’aro’o ai, e tai’o ai ’aore rā, e ’ite ai i te hōho’a faufau ’aore rā, i te mau mātēria e fa’atupu i te mana’o faufau.
’A ha’api’i mai ’ia ’ite i te mau taime e fa’ahema-rahi-hia ai ’outou ’ia fa’a’ohipa i te mau rāve’a rorouira ’āpī ma te tano ’ore, mai te mau taime ’ua rohirohi ’aore rā, ’ua hitahita ’outou.
’Ia vai te hō’ē fa’anahora’a nō te ’ohipa tā ’outou e rave i taua huru taime ra. E nehenehe te mau ti’a fa’atere nō te misiōni e tauturu ia ’outou. E ’ite-ato’a-hia mai ia ’outou te mau ha’amāramaramara’a i ni’a i te ChurchofJesusChrist.org/addressing-pornography.

Te ta’ata e ’imi ra ’ia ’ape ’aore rā, ’ia upo’oti’a i ni’a i te hōho’a faufau, e ’itehia mai iāna te tauturu ’e te fa’aorara’a nā roto i te Tāra’ehara a Iesu Mesia. Mai te peu tē fifi ra ’outou, ’a paraparau i tō ’outou peresideni misiōni, ’o tē hōro’a mai i te pāturura’a, te a’o ’e te tauturu ma te here.

7.5.4

Te ha’api’ira’a ma te mau rāve’a rorouira ’āpī

I te vāhi e fa’ati’ahia, ’a fa’a’ohipa i te mau rāve’a rorouira ’āpī nā ni’a i te natirara ’e te mau melo ’e te mau ta’ata tā ’outou e ha’api’i nei nō te tū’ati atu ia rātou, nō te tauturu ia rātou, ’e nō te fa’a’ite i te mau poro’i o te ’evanelia ia rātou.

E tauturu ia vetahi ’ē ’ia ha’api’i mai i te mau rāve’a maita’i nō te fa’a’ite i te ’evanelia, ’e nō te pāturu i te mau melo o te ’Ēkālesia ’a fa’a’ohipa ai rātou i te mau rāve’a rorouira ’āpī i roto i tā rātou mau tauto’ora’a misiōnare.
’A ha’a nā ni’a i te natirara ’e te mau ta’ata tā ’outou e ha’api’i ra, ’o rātou ’o tē ora nei i rāpae’au i te vāhi i fa’ata’ahia nō ’outou, ’e ’a tauturu ia rātou i te roara’a o tō rātou fa’afāriura’a.
’Ia ha’api’i ana’e ’outou i te hō’ē ta’ata e ora ra i rāpae’au i tō ’outou vāhi, e ha’a pāpū nā muri i te mau misiōnare tei fa’ata’ahia nō taua vāhi ra, i reira terā ta’ata e ora ra. ’A tauturu ’āmui i te reira ta’ata ’ia ha’afātata mai i te Metua i te ao ra ’e ia Iesu Mesia.
’A fa’a’ohipa i te mau hōho’a, te mau videos, ’e te tahi atu mau ha’apararera’a nō roto mai i te Vaira’a Buka ha’apararera’a (Media Library) a te ’Ēkālesia ’e te tahi atu mau tahua natirara a te ’Ēkālesia, i roto i tā ’outou mau tauto’ora’a ha’api’ira’a, ’ia au i tei hina’arohia. I roto i tā ’outou mau ’āparaura’a, ’eiaha e fa’a’ohipa i te mau ha’apararera’a tei ’ore i ha’amanahia e te ’Ēkālesia (’ei hi’ora’a, te mau video tei hāmanihia e te mau melo ’aore rā, e te mau ’āmuira’a nō te fenua iho).
’Ia pūhara ana’e ’outou i ni’a i te mau ha’apararera’a tōtiare, ’a fa’a’ite i te mau poro’i nō ni’a i te ’evanelia ’e nō ni’a i tō ’outou mau ’itera’a misiōnare, ’eiaha rā e rōtahi i ni’a i tō ’outou mau rāterera’a.

’A ha’apa’o i teie mau arata’ira’a i muri nei nō te pāruru i te orara’a ’ōmo’e o te ta’ata ’e te mau ha’amāramaramara’a nō ni‘a i te ta’ata iho :

’Ia ’ite ’outou ē, e mea ’ōmo’e te mau i’oa tā’āto’a, te mau hōho’a (’a hi’o 3.7), te mau ha’amāramaramara’a nō te fārereira’a, ’e te mau orara’a o te mau ta’ata tā ’outou e ha’api’i ra. Te fa’a’itera’a ’aore rā, te pūharara’a i ni’a i te natirara i teie mau ha’amāramaramara’a, e nehenehe e riro ’ei ’ōfatira’a i te ture nō te ha’amāramaramara’a ’ōmo’e. ’Ia ara maita’i i te mau mea tā ’outou e pāpa’i i te mau melo ’o tō ’outou ’utuāfare, inaha ho’i, e nehenehe rātou e pūhara i tā ’outou mau rata ’e te mau rata uira i ni’a i te natirara.
’A ani i te parau fa’ati’a i te mau ta’ata ato’a e ’itehia i ni’a i te hō’ē hōho’a ’aore rā, i te hō’ē video hou ’a fa’a’ite ai i te reira i te mau ta’ata ato’a, ’aore rā, ’a pūharahia ai i ni’a i te natirara. ’A ani i te parau fa’ati’a a te hō’ē metua hou ’a fa’a’ite ai i te mau hōho’a ’aore rā, i te mau video o te mau tamari’i (hi’o 3.7).

E māta’ita’i i teie video nō te mau ha’amāramaramara’a hau atu nō ni’a i te pārurura’a i te orara’a ’ōmo’e o vetahi ’ē.

5:24

7.5.5

Te fa’a’ohipara’a i te rata uira

I roto i tā ’outou misiōni, e fa’ata’ahia te hō’ē ’āfata rata uira nā ’outou nō te fa’a’ohipa ’ei mono i te tahi atu mau ’āfata rata uira tā ’outou. E fa’a’ohipa i teie ’āfata rata uira nō tā ’outou mau fa’ata’era’a mana’o ato’a ’eiaha rā nō tā ’outou rata i te peresideni misiōni i te mau hepetoma ato’a, ’o tā ’outou e hāpono nā roto i te Missionary Portal.

7.5.6

Te fa’a’ohipara’a i te mau rāve’a tūreiara’a tōtiare

E nehenehe e fa’a’ohipa i te tūreiara’a tōtiare nō te fa’a’ite i te ’evanelia. ’Ia pāpū ia ’outou ē, ’ia fa’a’ohipa noa i te mau tahua tūreiara’a tōtiare i fa’ati’ahia e tā ’outou misiōni, nō te mea e mea ta’a ’ē te mau ture i terā fenua ’e terā fenua nō ni’a i te tūreiara’a tōtiare.

’A pe’e i te mau fa’aturera’a ta’a ’ē nō te misiōni nō ni’a i te tūreiara’a tōtiare ’oia ato’a teie mau fa’aturera’a i raro nei :

’Ia pāpū ia ’outou ē, tē fa’ahōho’a nei tā ’outou ’āfata tūreiara’a tōtiare i tā ’outou mau fā ’e tō ’outou pi’ira’a ’ei misiōnare.
’Ia pāpū ia ’outou ē, tō ’outou hōho’a ihota’ata ’e te mau ta’ata ’e te mau pupu tā ’outou e pe’e nei, tē fa’a’ite nei te reira ia ’outou ’ei hō’ē o te mau misiōnare a te Fatu.
’Eiaha e hāmani i te piti o te ’āfata i ni’a i te tūreiara’a tōtiare nō te ’ape i te rave i te mau tauira’a i ni’a i te hō’ē ’āfata e vai nei. E riro te reira ’ei ’ōfatira’a i te parau fa’ati’a a te ta’ata fa’a’ohipa nō te mau tahua tūreiara’a tōtiare e rave rahi.
’Eiaha e fa’a’ohipa i te ti’ara’a « Elder » ’aore rā, « Sister » nō te i’oa o tā ’outou ’āfata. ’Aita te mau ti’ara’a mai teie e fa’ati’ahia nā te tahi mau tahua tūreiara’a tōtiare.
E rōtahi i ni’a i te mau aura’a faufa’a, ’e te ta’ata hō’ē, ’eiaha rā i ni’a i te fāri’ira’a i te mau « likes » ’aore rā, i ni’a i te ha’apararera’a i tā ’outou parau poro’i i ni’a i te natirara.
’Eiaha e parau ē, tā ’outou mau parau poro’i e mau fa’ataera’a mana’o mana ïa nā te ’Ēkālesia.
’A pāruru i tō ’outou iho orara’a ’ōmo’e. E ara maita’i ’ia fa’a’ite ana’e ’outou i tā ’outou mau hora ’e tō ’outou vaira’a i ni’a i te natirara. ’A ha’apa’o maita’i i te mau ta’ata tā ’outou e fāri’i i roto i tā ’outou tūreiara’a tōtiare ; e tāviri te tahi mau ta’ata i te mau misiōnare.
’A pāruru i te orara’a ’ōmo’e o vetahi ’ē. Mai te peu e hina’aro ’outou e pūhara i te hō’ē mea nō ni’a i te hō’ē ta’ata e rave nei i te ’ohipa i pīha’i ia ’outou, e mea ti’a ia ’outou e ani i tāna parau fa’ati’a (e mea parau vaha noa ānei, ’aore rā, e mea pāpa’i) hou ’a pūhara ai i te hō’ē mea ’o tē fa’ahiti i tōna i’oa ’aore rā, tōna hōho’a (hi’o 3.7). Nō te mau ture o te fenua iho nō ni’a i te pārurura’a i te orara’a ’ōmo’e, i roto i te tahi mau misiōni, ’aita te mau misiōnare e fa’ati’ahia ’ia pūahara i te ta’ata te mau hōho’a o te feiā tā rātou e ha’api’i ra.

E māta’ita’i i teie video nō te mau ha’amāramaramara’a hau atu nō ni’a i te pārurura’a i te orara’a ’ōmo’e o vetahi ’ē.

5:24

7.6

Te mau vaira’a fifi

’A pe’e i te mau arata’ira’a i raro nei nō te āraira’a i te mau vaira’a fifi.

7.6.1

Fa’aruru i te mau ’ohipa au ’ore

Mai te Fa’aora, te mau peropheta, ’e e rave rahi misiōnare nā mua atu ia ’outou, e fārerei ’outou i te mau ’ohipa pāto’i ’e pēnei a’e i te tahi atu huru fa’atura-’ore-ra’a ’ei misiōnare. E tauturu teie mau arata’ira’a i raro nei ia ’outou ’ia ārai i te pāto’ira’a :

’Eiaha e tāu’a ’ore i tō ’outou mau mana’o hōhonu.
- ’Ia ’ite ’outou ē, e ti’a roa ’ia fa’a’ite i tō ’outou hitahita ’e te mana’o paruparu i tō ’outou hoa, i te mau fa’atere misiōnare taure’are’a, i te mau ti’a fa’atere misiōni, ’e i te mau melo fātata o te ’utuāfare.
- ’Ia hāro’aro’a ’outou ē, i te tahi taime nā te ’āparaura’a i te hō’ē ’ohipa au ’ore e fa’aruruhia ra, e tauturu i te fa’atupu fa’ahou i te mana’o hau.
- ’Eiaha e fa’aea noa i ni’a i te hō’ē ’ohipa au ’ore i fa’aruruhia ’aore rā, ’eiaha e vaiiho i te reira ’ia taui i i tō ’outou huru nō te hō’ē tau roa.
’A ferurira’a māite.
- ’Ia ’ite mai ’outou ē, e ’ere nā te mau ’ohipa au ’ore e fa’ata’a ’o vai ’outou, e aha tei pi’ihia ’outou ’ia rave ’aore rā, e aha te fāito e nehenehe ’outou e rave i te reira.
- ’A tāmata ’eiaha e fa’arahi haere noa i te parau, mai teie te huru, « e’ita roa atu te ta’ata e fa’aro’o ».
- ’Ia hāro’aro’a ’outou ē, e ti’amāra’a tō te ta’ata ’ia fāri’i ’aore rā, ’ia pāto’i i tā ’outou parau poro’i.
- ’Ia ’ite mai ’outou ē, e taui te orara’a ’e te mau huru orara’a o te ta’ata. E ’ere te pāto’ira’a i te aura’a noa ē, e’ita roa atu te reira ta’ata e ’ana’anatae i te ’evanelia i fa’aho’ihia mai.
’A fa’a’ite i te aroha ia ’outou iho ’e ia vetahi ’ē.
- ’A ’imi i te tāmāhanahana i roto i te pure. ’A ha’amana’o ē, ’ua ’ite te Fatu ia ’outou, i tō ’outou huru tupura’a ’e i tō ’outou mau hina’aro.
- ’Eiaha e fa’a’ino ia ’outou iho, i te huru tupura’a, ’aore rā, i te feiā i roto.
- ’A rave maita’i roa nō te tāpe’a mai i te mana’o maita’i.
’A ha’api’i mai nā roto mai i te ’ohipa i tupu. ’A feruri e aha tē ti’a ia ’outou ’ia rave ta’a ’ē i te tahi atu taime.

7.6.2

Fa’aruru i te mau ta’ata pāto’ito’i

E nehenehe ’outou e fārerei atu i te mau ta’ata e pāto’i mai ’e e ha’ape’ape’a mai. Mai te peu e ’iriā mai te hō’ē ta’ata, ’a fa’aea fa’atura noa ’e ’a haere ’ē atu i te reira huru tupura’a. Mai te peu tē ’ite ra ’outou e tupu te hō’ē fifi, ’a fa’aātea ’oi’oi atu. Te pārurura’a ia ’outou ’e tō ’outou hoa, (hi’o 4.5) ’o tā ’outou ïa ’ohipa mātāmua.

E mea hepohepo mau te mau ta’ata pāto’ito’i ’e te mau ravera’a au ’ore. ’A rave i te mau ta’ahira’a e tītauhia nō te ārai i te hepohepo (hi’o 4.3) ’e te ’atu’atura’a ia ’outou iho i te pae mana’o hōhonu ’e i te pae vārua.

’Ia ’ite mai ’outou ē, ’aita e fāri’ihia te mau huru hāmani-’ino-ra’a ato’a i te pae nō te parau, i te pae mana’o hōhonu ’aore rā, i te pae tino nā roto mai te hō’ē ta’ata ’e ’oia ato’a i te hō’ē hoa. Tei roto i te reira te mau ta’o, te mau ’apa-rima-ra’a, ’aore rā, te mau ’ohipa e fa’ari’ari’a ’aore rā, e hāmani ’ino i te tahi atu ta’ata.

’A fārerei ’oi’oi atu i tō ’outou peresideni misiōni, tāna vahine, ’aore rā, te tahi atu ti’a fa’atere ti’aturihia, mai te mea ē, tē fārerei nei, tē ’ite nei, ’aore rā, tē fa’aro’o nei ’outou nō ni’a i te mau huru ha’ape’ape’ara’a, te ’arora’a, ’aore rā, te ha’amata’ura’a i te pae ’āpeni ’aore rā, i te pae tino (hi’o 7.8.2–7.8.4).

7.7

Te mau fifi nō te ea i te pae tino ’e i te pae ferurira’a

’A pe’e i te mau arata’ira’a nō te ea tei vauvauhia i roto i te mau pene ri’i i muri nei.

7.7.1

Paraparau i te piha tōro’a a te misiōni nō ni’a i te mau fifi rapa’aura’a ma’i

’Eiaha e ti’aturi i ni’a i tā ’outou iho hi’opo’ara’a ’aore rā, i ni’a i te mana’o o vetahi ’ē. Noa atu e nehenehe te parau a tō ’outou hoa, a te tahi atu mau melo o te ’Ēkālesia, a te ’utuāfare, ’aore rā, a te mau hoa, e riro ’ei parau maita’i, ’a fārerei atu i te ta’ata ha’apa’o ea a te misiōni, mai te mea e uira’a tā ’outou ’aore rā, tē ha’ape’ape’a ra ’outou, nō ni’a iho ā rā i te hō’ē pēpē ’ino, ’aore rā, te mau fifi i te pae nō te ea. E paraparau tō ’outou peresideni misiōni i tō ’outou peresideni titi ’e i tō ’outou ’utuāfare nō ni’a i te mau pēpē ’ino mau ’e te mau fifi i te pae o te ea.

’A fārerei atu i te ti’a’au o te misiōni nō te pae rapa’āra’a, mai te mea e fārerei atu ’outou i te mau fifi i te pae ea i muri nei :

Te mau ma’i i’ō atu i te hota mātarohia ’e te mau tāpa’o nō te taime poto.
Te pēpē ’ino roa
Te tūpa’ira’a vitiviti (100-hau atu tūpa’ira’a i te minuti hō’ē) i te taime ’aita ’outou e fa’a’eta’eta ra i te tino.
Fiva hau atu i te 101°F (38.3°C), e fiva 101°F (38.3°C) hau atu e piti mahana, ’aore rā, e fiva ’aita e pāhono i te rā’au.
Topa-’oi’oi-ra’a ’aore rā, te mara’a-’oi’oi-ra’a te kilo.
Te po’ihā rahi ’aore rā, te ’ōmaha rahi.
Te piha’era’a tāmau, te māuiui upo’o, aniania te upo’o, hota, ’aore rā, e pu’upu’u nā ni’a i te tino.
’Orura’a o nā tapua’e ’āvae, te ni’ara’a o nā ’āvae, te ’ōpū, ’aore rā, te hōho’a mata.
Tahe noa te toto ’aore rā, e tutae ’ere’ere
Te tumoura’a ’aore rā, e hī hau atu i te piti mahana.
Māuiui te niho.
Ma’i’u’u ’āva’e i tupu i roto.

7.7.2

Te ha’apa’o-maita’i-ra’a i te ea i te pae tino

E fāri’i ’outou i te mau ’itera’a maita’i a’e o te ’ohipa misiōnare, ’e e tāvini maita’i a’e ’outou i te Fatu ’ia ’atu’atu maita’i ana’e ’outou i tō ’outou ea i te pae tino. ’Ia vai itoito noa i roto i tā ’outou mau tauto’ora’a misiōnare, ’eiaha rā e tūra’i ia ’outou hau atu i tei tītauhia.

Nō te tauturu ’ia tāpe’a māite noa i tō ’outou ea i te pae tino, ’ia pāpū e :

Fa’a’eta’eta tāmau i te tino.
Ta’oto maita’i.
’Amu i te mau mā’a maita’i, fa’arahi te pota, te mau mā’a hotu, ’e te mau huero.
Inu fa’arahi i te pape.
Tāmā tāmau i tō ’oe nā rima.
Parai atu pāruru mahana ’e i te pāruru manumanu ’ia tītauhia.
’Ite mai i te mau rāve’a nō te ha’amāha.
’Oa’oa i te mau taime fa’afa’aeara’a i te mau mahana fa’aineinera’a.

7.7.3

Te ha’apa’o-maita’i-ra’a i te ea i te pae ferurira’a

E mea mātarohia i te fārerei te ’oto, te pe’ape’a, te mihi, ’e mana’o paruparu i te tahi taime i roto i te hō’ē misiōni. Terā rā, te mau mana’o hōhonu ’e te mau peu ’o tē tāpe’a ia ’outou ’ia rave maita’i i te ’ohipa, e ti’a ïa ’ia paraparauhia. Tei roto i te reira mau huru :

Te mau tāuiuira’a o te huru.
Te ha’ape’ape’ara’a rahi ’aore rā, te fa’ahapara’a iāna iho.
Te hepohepo rahi.
Te mau peu ’amura’a i te mā’a maita’i ’ore.
Te fifi ’ia ārai i te mau mana’o i te pae ’āpeni.

’Ia hāro’aro’a mai ’outou ē, e ’ere i te mea ha’amā ’ia ’ite ’e ’ia ha’amaita’ihia i te mau huru fifi i te pae o te ea, tae noa atu i te mau fifi i te pae mana’o hōhonu ’e i te pae ferurira’a. Mai te mea tē mana’o nei ’outou ’aore rā, tō ’outou hoa e tītauhia te tauturu, ’a paraparau atu i tō ’outou peresideni misiōni, tāna vahine, ’aore rā, i te ti’a’au i te pae rapa’āura’a. E roa’a ia rātou te mau rāve’a tauturu i te ea i te pae ferurira’a. E ’ite-ato’a-hia ia ’outou te parau a’o e tauturu i roto Te fa’atanora’a i te orara’a misiōnare.

7.7.4

Te rapa’aura’a i te mau pātia ’ānimara ’e te mau manumanu

E nehenehe te mau pātia ’ānimara ’e te manumanu e fa’atupu i te mau ma’i fifi roa, ’e i te tahi taime, e pohe roa. Mai te peu e fa’a’oru te hō’ē pātia manumanu ’aore rā, e ha’amāuiui ta’a ’ē, ’a niuniu ’oi’oi i te piha tōro’a o te misiōni.

Te āraira’a

E nehenehe ’outou e tauturu i te āraira’a i te mau pātia ’utu (tick), te naonao, ’e te tahi atu pātia manumanu nā roto i te pe’era’a i teie mau arata’ira’a :

E ’ape i te pape vai maoro ’e te tahito, i reira ho’i te naonao e noho ai.
E ’ape i te mau vāhi uru rā’au ’e te mau vāhi ’aihere, i reira te mau ’ānimara e ora ai.
’A ’ō’omo i te ’ahu e tāpo’i roa i tō ’outou rima ’e te ’āvae, noa atu e mea ve’ave’a.
’A māta’ita’i i te video « Missionaries Counseled to Follow Malaria Protocols. »

12:4
’A parai i te rā’au tīahi manumanu i ni’a i te ’iri e vai noa i rāpae, ’e te hō’ē rā’au manumanu i rāpae i te ’ahu.

Te rapa’aura’a

Mai te peu ’ua pātiahia ’aore rā, ’ua para’uhia ’outou nā te hō’ē ’utu ’ānimara ’aore rā, te hō’ē naonao ’aore rā, te tahi atu manumanu ’aore rā, ’ānimara, ’a pe’e i teie mau arata’ira’a :

’A rapa’au i te mau pātia manumanu na’ina’i i te pape pa’ari ’aore rā, i te mau rā’au ho’o-ti’amā-noa-hia.
’A haere e fārerei i te mau ta’ata rapa’au ’aravihi nō te tātara ma te pe’ape’a ’ore i te mau ’utu ’ānimara tei mau i ni’a i tō ’outou ’iri ’e nō te hi’opo’a i te ma’i ’utu ’ānimara (Lyme).
’A horoiroi i te hō’ē hōhonira’a ’aore rā, i te hō’ē pēpē ’ānimara i te pu’a ’e te pape (te mea au roa a’e, 15 minuti te roa), ’e ’a niuniu atu i te piha tōro’a o te misiōni. ’A hi’o ’o vai te fatu o te ’ānimara, mai te mea e tano, ’ia nehenehe i te piha tōro’a o te misiōni ’ia ārai i te ma’i ’ānimara ’aore rā, i te tahi atu mau ma’i fifi.
Mai te mea ē, e fa’a’oru te pātia ’utu ’ānimara ’aore rā, te pātia manumanu ’aore rā te hōhoni ’ānimara, ’e e riro mai i te māuiui rahi, ’aore rā, e fa’atupu i te pu’upu’u mai te mata pua’atoro i ni’a i te tino, ’a niuniu ’oi’oi atu i te piha tōro’a o te misiōni.

’A māta’ita’i i teie video nō te mau ha’amāramaramara’a hau atu nō ni’a i te pārurura’a ia ’outou iho i te mau pātia manumanu ’e i te tahi atu mau pātia ’ānimara.

2:3

7.8

Te mau vaira’a ataata

’A pe’e i te mau arata’ira’a nō te pārurura’a tei vauvauhia i roto i te mau pene ri’i i muri nei.

7.8.1

Te fa’aineinera’a nō te mau vaira’a ataata

E nehenehe te mau arata’ira’a i muri nei e tauturu ia ’outou ’ia fa’aineine ’e ’ia pāhono i te mau vaira’a ataata :

’A pure nō te pārurura’a a te Fatu i te mau mahana ato’a.
’A fa’aro’o ’e ’a pe’e i te mau muhumuhu a te Vārua, ’o tē nehenehe e fa’aara mai ia ’outou i te fifi.
’A ha’amātau maita’i i te fa’anahora’a ’ohipa rū nō tā ’outou misiōni. ’A pe’e i te mau ta’ahira’a nō te ’ite e aha te rave i roto i te mau huru tupura’a rū.
’A tu’u i roto i tā ’outou niuniu i te mau ha’amāramaramara’a nō te mau ta’ata e fārerei atu i te taime rū, i taua vāhi ra ’e te fenua. ’Ia vai ’ī noa tā ’outou niuniu ’e ’ia vai ia ’outou ra i te mau taime ato’a.
’A ’ape i te mau vāhi ’o tā ’outou misiōni i fa’ata’ahia ’ei vāhi ataata.
’Eiaha ’ia mana’ohia e mau tao’a faufa’a rahi tā ’outou (’ei hi’ora’a, nā roto i te amora’a i te hō’ē pūtē rahi).
’A hi’opo’a maita’i i te mau huru ’ohipa mātaro-’ore-hia, mai te hō’ē ta’ata e hi’o tāmau noa ia ’outou, e ui i te mau uira’a nō te ta’ata iho, ’aore rā, e pe’e ia ’outou.
’A tāmata i te fa’a’ohipa i te reo o te tino nō te ’āparau ē, e mea pāpū ’outou ’e ’aita ’outou e mata’u ra.
’Ia vai te hō’ē ta’o ’aore rā, te hō’ē pereota tāpa’o nō te fa’a’ohipa ’e tō ’outou hoa nō te fa’a’ite ē, tē hina’aro ra ’outou e haere ’ē. ’A fa’a’ohipa i te reira mai te mea tē ’ite ra ’outou ē, tei roto ’outou iho i te hō’ē huru tupura’a e ’ere i te mea pāruru roa.

’A ha’amātau i te fa’a’ohipa-tāmau-ra’a i teie mau arata’ira’a, noa atu e fa’aitoito mai vetahi (’oia ato’a te tahi atu mau misiōnare) ia ’outou, ’ia tu’u ia ’outou i mua i te ’ati nō te rave fa’aoti i tā ’outou ’ohipa misiōnare.

7.8.2

Te ’itera’a ē e vaira’a ataata

’A fārerei ’oi’oi atu i te hō’ē o tō ’outou feiā fa’atere misiōni ’aore rā, i te tahi atu ti’a fa’atere ti’aturihia mai te mea tē fārerei nei, tē ’ite nei, ’aore rā, tē fa’aro’o nei ’outou nō ni’a i te mau huru ’ohipa hape ato’a i te pae tino, i te pae ’āpeni. Mai te mau ’arora’a, te mau ha’amata’ura’a, ’aore rā, te fa’ahepora’a. Noa atu ē, e mea ta’a ’ē te fa’ata’ara’a a te ture o te fenua i teie mau fifi, ’a fa’a’ite i te mau mea ato’a e ha’ape’ape’a ra i tō ’outou mana’o :

Te ’arora’a tē vai ra i roto te mau huru ’ohipa ato’a e ha’avī i te hō’ē ta’ata, i te pae tino ānei ’aore rā, i te pae ’āpeni. ’Ei hi’ora’a tei roto te mau huru ’āpitira’a tino hina’aro-’ore-hia, te tāpe’ape’ara’a tano ’ore, ’aore rā, te ha’avīra’a i te pae tino.
Te ha’amata’ura’a i te pae tino e tupu mai te reira ’ia ri’ari’a ana’e te hō’ē ta’ata i te mau pēpē o te tino ’aore rā, i te pohe. ’Ei hi’ora’a tei roto te mau ha’amata’ura’a ma te parau ’aore rā, te mau huru ha’amata’ura’a ato’a.
Te fa’ahepora’a i te pae ’āpeni tei roto te mau parau ’aore rā, te mau peu faufau, te mau anira’a nō te mau maita’i i te pae ’āpeni, ’aore rā, te tahi atu huru ’ohipa ’āpeni hina’aro-’ore-hia. Tei roto i te reira te mau hi’ora’a nō te fa’ahepora’a ’ohipa ’iho (pe’ehia e te hina’aro e fa’aara ’aore rā, e fa’ahuehue) ’aore rā, te fa’a’itera’a i te mau melo huna o te tino.

7.8.3

Te pāhonora’a i te mau ’arora’a, te mau ha’amata’ura’a, ’e te hāmani-’ino-ra’a

’A rave i te ’ohipa i muri nei mai te mea, ’ua riro ’oe ’aore rā, tō ’oe hoa ’ei ta’ata e ’eiāhia ra :

’A hōro’a ’oi’oi i tā ’outou mau tauiha’a. E nehenehe te reira e fa’ahoro ’ē i te ta’ata ’eiā ma te ’ore e ha’amāuiui ia ’outou. Mea faufa’a rahi a’e tō ’outou ora ’e tō ’outou au maita’i i tā ’outou mau tao’a.
’A tāmata ’eiaha ’ia riri ’aore rā, e rave i te hō’ē ’ohipa ’ino. E nehenehe te reira e fa’a’ino roa atu i te tupura’a o te ’ohipa.

’A rave i te mau ’ohipa i muri nei mai te mea, tē ha’amata’uhia ra ’aore rā, tē ha’ape’ape’ahia ra ’outou ’aore rā, tō ’outou hoa, ’e tei hau atu i tā ’outou mau tao’a e ’ati ra :

’O ’outou ana’e tē nehenehe e fa’aoti e aha te rāve’a maita’i a’e nō te pāhono i te huru tupura’a. E nehenehe ’outou e mā’iti e horo, e pāruru ia ’outou iho, ’aore rā, e fāri’i noa. ’Ei hi’ora’a :
- Mai te mea e horo ’outou, e nehenehe ’outou e ’ape i te hō’ē ’arora’a.
- Mai te mea e pāruru ’outou ia ’outou iho, e nehenehe paha ’outou e pāruru i tō ’outou tino ma te tuōra’a, te tā’irira’a, te pāra’ura’a, te hōhonira’a, te tu’era’a ’aore rā, te purera’a.
- Mai te peu ’ua mau ’outou ’aore rā, e mā’iti ’outou e fāri’i noa, e nehenehe te reira e riro ’ei pāhonora’a mātauhia, ’eiaha rā e fa’ahapa ia ’outou iho a muri a’e.
’A feruri e tītau i te tauturu ’aore rā, i te tau’ara’a a te tahi atu ta’ata. ’Ei hi’ora’a :
- E nehenehe ’outou e ani i te tauturu a vetahi ’ē, i te hō’ē iho ā rā ta’ata e mana tōna (mai te ta’ata fa’ahoro pere’o’o uta ta’ata) i te vāhi tei reira ’outou.
- Mai te peu tei te vāhi ta’ata ’outou, ’ua hā’atihia ’outou e te ta’ata, ’e ’aita e ti’a ia ’outou ’ia horo ’ē i te ’arora’a i te pae tino ’aore rā, i te pae ’āpeni (’ei hi’ora’a, tei ni’a ’outou i te pere’o’o ’uta ta’ata),’a feruri i te paraparau ma te pāpū nō te tāmata i te fa’ataui i te mana’o o te reira ta’ata nō te ’ohipa ’ino tāna e rave ra ’aore rā, e fa’ahepo ra. ’Ei hi’ora’a, e nehenehe ’outou e fa’a’ohipa i te reo o te tino pūai, ’ia hi’o ’āfaro i te ta’ata ’ohipa ’ino, ’e ’ia parau pūai atu. E nehenehe ’outou e parau i te reira ta’ata, e fa’a’ite i tōna huru ’ino, ’e e parau iāna i te mea tā ’outou e hina’aro ’ia rave ’oia, mai teie, « Hei, ’o ’oe terā ta’ata ’ahu re’are’a, ’eiaha e tāpe’a mai iā’u. Fa’aātea atu ».
- Mai te mea ’aita e ta’ata nā reira, e nehenehe ’outou e tuō, e vaha rahi, ’aore rā, e ’imi i te rāve’a ’ia ’ite mai te ta’ata ; e nehenehe te hō’ē ta’ata e ’ite mai ia ’outou ’e e tauturu mai.

7.8.4

Te fa’a’itera’a i te mau ’arora’a, te mau ha’amata’ura’a, ’aore rā, te hāmani-’ino-ra’a i ni’a ia ’outou

Mai te peu ’ua ’arohia ’outou, ’ua ha’amata’uhia, ’aore rā, ’ua fa’ahepohia (hi’o 7.8.2) nā te hō’ē ta’ata, ’a fārerei ’oi’oi atu i te hō’ē ’o tō ’outou feiā fa’atere misiōni, hō’ē ta’ata i te piha tōro’a o te misiōni, ’aore rā, te tahi atu ti’a fa’atere e ti’aturihia. E mau rāve’a tauturu tā tō ’outou feiā fa’atere misiōni nō te pāturu ia ’outou i te pae nō te rapa’āura’a, nō te a’ora’a a te feiā ’aravihi, nō te ha’apārahi fa’ahou ’aore rā, nō te tahi atu mau tauturu e tītauhia. ’Ia ’ite mai ’outou ē, e nehenehe ’outou e fāri’i i te huru ’ē rahi i muri a’e i te reira ’ohipa, ’e e ’ite ato’a paha ’outou i te mau tāpa’o hepohepo hōhonu. ’Ia topa ana’e te hau, ’a tāmata i te pāpa’i i te mau mea tā ’outou e nehenehe e ha’amana’o nō ni’a i te ’ohipa i tupu.

’Ia māramarama ’outou ē, mai te peu e ’arohia ’outou, noa atu te ’ohipa tā ’outou e rave ra, e ’ere te ’arora’a nō ’outou te hape. Tei ia ’outou noa te mā’itira’a e paraparau i te hō’ē ta’ata tā ’outou i ti’aturi ’e e mana’o hau tō ’outou iāna, mai tō ’outou peresideni misiōni, tāna vahine, te mau mana tīvira, ’aore rā, te mau ta’ata i te fare. Nā ’outou e mā’iti e fa’aō ato’a mai ānei i te mūto’i ’aore rā ’aita.

E mea mātarohia ’ia uiui ’outou ia ’outou iho, e aha tā ’outou ’aore rā, tā tō ’outou hoa e nehenehe e rave ta’a ’ē atu. ’A ti’aturi ē, ’ua rave ’outou i te mea maita’i a’e e ti’a ia ’outou ’ia rave i roto i te tupura’a te fifi. E mea ta’a ’ē te ferurira’a o te ta’ata nō te mau fifi ’o te hepohepo hōhonu. E tauturu mai te Fatu ia ’oe ’ia ora.

’A māta’ita’i i teie video nō te mau ha’amāramaramara’a hau atu nō ni’a i te fa’aineinera’a, te ’itera’a, ’e te āraira’a i te mau tupura’a ’e te mau ha’amata’ura’a fifi.

21:8

7.9

Te pārurura’a i te nohora’a

’A pe’e i te mau arata’ira’a i raro nei nō te tāpe’a ’ōmo’e i tō ’outou fare, ’ia pāruruhia ’e ’ia mā.

7.9.1

Te ’ōmo’era’a ’e te pārurura’a

’A pe’e i te mau arata’ira’a i raro nei ’ia pāpū e vai ’ōmo’e noa tō ’oe fare, ’e te pāruruhia :

E tāmau ’e e ’atu’atu māite i te mau mātini fa’aarara’a i te māhu auahi ’e te auauahi. E rave i te mau hi’opo’ara’a ’e e taui i te mau ’ōfa’i mōrī mai tei tārenahia ’e te ta’ata fa’atere nō te mau nohora’a o te misiōni. ’Eiaha e tūpohe i teie mau rāve’a fa’aorara’a.
’Eiaha roa e tūtu’i i te mau huru mōrī hinu ato’a.
E tāmaumau i te mau ’ōpani ’e te mau ha’amāramarama nā roto. Mai te mea e hina’arohia, e nehenehe tō ’outou feiā fa’atere misiōni e hōro’a mai i te tahi atu mau rāve’a nō te fa’ahaere mai i te mata’i i roto.
E huti ’aore rā e ’ōpani i te mau pāruru ia pō.
’Eiaha e fa’a’ite i tō ’outou vāhi nohora’a i mua i te ta’ata ’aore rā, i te mau ta’ata tā ’outou e ha’api’i ra.
’Eiaha e ’īriti i te ’ōpani mai te peu ’aita ’outou i ’ite i te ta’ata i rāpae mai ’aore rā, mai te mea ’aita ’outou e ’āfaro roa ra iāna.
’Eiaha roa atu e ha’api’i i te ta’ata i roto i tō ’outou nohora’a ’aore rā, e ani i te ta’ata ’ia haere mai i roto, maori rā e misiōnare rātou ’aore rā, e feiā fa’atere nō te ’Ēkālesia tei fāri’ihia te tere fārereira’a nā tō ’outou mau ti’a fa’atere nō te misiōni.
’Eiaha roa atu e fa’aea i roto i te hō’ē fare tei reira te mau ta’ata nō te ’āpeni ta’a ’ē ia ’outou ’aita i fa’aipoipohia, ’aore rā, e ma’iri pinepine te hoa fa’aipoipo e ’aifāito i tō ’outou ’āpeni.
’A fa’aara ’oi’oi atu i te piha tōro’a o te misiōni nō ni’a i te mau fifi i te pae pārurura’a, mai te ta’ata e hi’ohi’o noa i tō ’outou nohora’a ’aore rā, e ta’ata e fa’atupu i te mana’o ataata.
E fāri’i noa i te tahi atu mau misiōnare hō’ē ā ’āpeni, i roto i te tauira’a i fa’ati’ahia, ’ia ta’oto i roto i tō ’outou nohora’a.
E ha’amāu’a i te moni e tītauhia nō te tāpe’a pāruru noa i tō ’outou nohora’a. ’Ei hi’ora’a, e taui i te mau mōrī pa’apa’a, ’ia tītauhia.

7.9.2

Te tāmāra’a ’e te ’atu’atura’a

’Ia vai mā noa ’e te nahonaho tō ’outou nohora’a :

E tāmā i te mahana fa’aineinera’a (hi’o 2.5.1) ’e i te mau mahana ato’a, ’ia tītauhia.
’A rave i te mau rāve’a nō te pāruru i te mau manumanu (hi’o 7.7.4) ’ia tomo mai i roto i tō ’outou nohora’a.
’Ia ’ite ’outou i te fa’a’ohipa i te mau mātini tāmāra’a ma te pāruruhia, te mau umu iho ā rā ’e te mau mātini mata’i.
’Eiaha e fa’a’amu i te mau huru ’ānimara.

E hi’opo’a-tāmau-hia tō ’outou nohora’a nō te ha’apāpū ē, e mea tano maita’i, e mea pāruruhia, ’e e mea ’atu’atuhia.

E māta’ita’i i teie nā video e piti nō te mau ha’amāramaramara’a hau atu nō ni’a i te pārurura’a i te nohora’a.

15:26

12:55

7.10

Te pārurura’a i te pae o te utara’a

’A pe’e i te mau arata’ira’a nō te pārurura’a tei vauvauhia i roto i te mau pene ri’i i muri nei.

7.10.1

Te haere-’āvae-ra’a

’Ia haere ’āvae ana’e :

Mai te mea e nehenehe, e haere nā te pae e tere mai te pere’o’o.
’A fa’aea noa nā te mau vāhi māramarama mai te mea e mea pōiri.
E tāuiui i te mau purūmu ’e te mau taime rāterera’a i tō ’outou vāhi. ’A pe’e i te mau muhumuhura’a pae vārua nō te taui i tō ’outou purūmu ’aore rā, te terera’a.

E māta’ita’i i teie video nō te mau ha’amāramaramara’a hau atu nō ni’a i te pārurura’a i te taime haere-’āvae-ra’a.

18:0

7.10.2

Te ta’ahira’a i te pere’o’o tāta’ahi

’Ia ta’ahi ana’e i te pere’o’o tāta’ahi :

’A pe’e i te mau ture ’e te mau arata’ira’a pārurura’a nō ni’a i te pere’o’o tāta’ahi, tae noa atu i te ’ō’omora’a i te tāupo’o ’auri i ha’amanahia, te fa’a’ohipara’a i te mau tauiha’a ’ana’ana, ’e te fa’a’ohipara’a i te mau tāpa’o rima i tītauhia.
’Eiaha e mana’o ē, tei ia ’outou te ti’ara’a nō te haere.
’A tāmata ’eiaha e fa’a’ohipa i te pere’o’o tāta’ahi i te mau taime e mea ’ino te reva, e mea rahi te pere’o’o i ni’a i te purūmu, ’aore rā, ia pō. ’Eiaha e ta’ahi i te pere’o’o te tahi i pīha’i iho i te tahi ’aore rā, e ha’afātata roa.
E fa’aea noa i te hō’ē āteara’a e pāruruhia i tō ’oe hoa, ’ia ’ite noa atu rā ’oe iāna.
’Ia ’atu’atu maita’i noa tō ’oe pere’o’o tāta’ahi, tae noa atu i te mōrī nō mua, te mōrī nō muri ’e te mau mōrī fa’a’anapanapa i te ’ao’ao ’e i muri.
E pōnao ’aore rā, e pāruru i tō ’oe pere’o’o tāta’ahi ’ia ’ore ana’e e ta’ahihia.

E māta’ita’i i teie video nō te mau ha’amāramaramara’a hau atu nō ni’a i te pārurura’a i te pere’o’o tāta’ahi.

15:17

7.10.3

Te fa’a’ohipara’a i te mau pere’o’o uira

Mai te peu ’ua fa’auehia ’oe e fa’ahoro i te pere’o’o uira i roto i tā ’oe misiōni, ’a fa’a’ohipa noa i te mau pere’o’o uira o te misiōni. Nō te fa’ahoro i te hō’ē pere’o’o uira o te misiōni, ’ei parau fa’ahoro ha’amanahia tā ’oe i roto i te fenua tei reira ’oe i te tāvinira’a, ’ia fa’a’ite ē ’ua māramarama ’oe i te mau fa’aturera’a nō te pere’o’o uira o te misiōni, ’e e parau fa’ati’a tā ’oe nā te feiā fa’atere o te misiōni. ’A pe’e ato’a i teie mau arata’ira’a :

’Ia māramarama ’oe ē, e hōpoi’a nā ’oe ’e tō ’oe hoa i te pārurura’a, noa atu ē, nā vai e fa’ahoro ra.
’A tā’amu i te hatua pāruru, ’a fa’ahoro ma te ara māite, ’a fa’a’ohipa i te mau mōrī nō mua i te pō ’e te ao, ’e ’a ha’apa’o māite ’e ’ia vai ara noa, noa atu ē, e ta’ata fa’ahoro ’oe ’aore rā, e horopātete.
Mai te peu tē fa’ahoro ra ’oe, ’eiaha e ’onevaneva noa a’e, ’oia ato’a ’eiaha e fa’a’ohipa i te mau mātini ’āfa’ifa’i ’aore rā, te mātini fa’aro’o i roto i te pere’o’o.
Mai te peu e horopātete ’oe, ’a tauturu i te ta’ata fa’ahoro nā roto i te arara’a.
Mai te peu e horopātete ’oe, ’a ti’a i rāpae i te pere’o’o i te hō’ē āteara’a tano, nō te arata’i i te ta’ata fa’ahoro ’a fa’a’otohe ai ’oia i te pere’o’o.
Nō te mau tumu pārurura’a ’e te hōpoi’a, e’ita ’oe e nehenehe e fa’ahoro i te ta’ata maori rā vetahi mau misiōnare rave tāmau nō te hō’ē ā ’āpeni ’e tō ’oe.
’A ha’apa’o i te rahira’a tiromētera i fa’ati’ahia ia ’oe ’ia fa’ahoro.
’Eiaha e taui i te tāpura tirometera ’aore rā, i te mau rāve’a pārurura’a i tāmauhia i roto i te pere’o’o.
’Ia vai mā ’e te tere maita’i noa te pere’o’o.
Mai te peu tei roto ’oe i te hō’ē ’ati purūmu, ’a hi’o i te pū’ohu parau E aha tē rave ’ia tupu ana’e te hō’ē ’ati purūmu ’o tē ti’a ’ia vai noa i roto i te ’āfata vaira’a parau o te pere’o’o. ’A fārerei i te tia’au nō te pere’o’o o te misiōni i te taime iho e nehenehe ’outou e rave i te reira ma te fifi ’ore.

E māta’ita’i i teie video nō te mau ha’amāramaramara’a hau atu nō ni’a i te pārurura’a i te pere’o’o uira.

18:43

7.10.4

Te fa’a’ohipara’a i te pere’o’o utara’a ta’ata

E aha te taime e fa’a’ohipa ai i te pere’o’o utara’a ta’ata :

E fa’a’ohipa noa i te pere’o’o utara’a ta’ata i ha’amanahia nō tā ’outou misiōni.
’Ia ha’amātau ia ’oe i te tārena terera’a o te pere’o’o utara’a ta’ata ’e te mau vāhi tā ’oe e rātere.
’A pārahi i pīha’i iho i te ta’ata fa’ahoro pere’o’o mai te mea e nehenehe. ’A tu’u i tā ’oe mau pūtē i mua ia ’oe mai te peu e mea maita’i ia nā reira.

7.11

Te mau ’ōro’a ’e te mau ha’amaita’ira’a o te autahu’ara’a

’A fa’a’ohipa i teie mau arata’ira’a rahi nō te ravera’a i te mau ’ōro’a ’e te mau ha’amaita’ira’a o te autahu’ara’a. Te mau ha’amāramaramara’a i roto i teie tuha’a, e ha’apotoara’a ïa nō te pene 18 o te Buka arata’i rahi : Te tāvinira’a i roto i Te ’Ēkālesia a Iesu Mesia i te Feiā Mo’a i te mau Mahana Hope’a nei.

Nota : Mai tei fa’ata’ahia i roto i te mau tuha’a i muri nei, e tītauhia te tahi mau ’ōro’a i te parau fa’ati’ahia a te mana fa’atere tei mau i te mau tāviri ti’a.

7.11.1

Te fa’aterera’a i te autahu’ara’a : Mau arata’ira’a rahi nā te mau taea’e nō te autahu’ara’a a Melehizedeka

E tauto’o tāmau noa te feiā tei mau i te autahu’ara’a a Melehizedeka ’ia vai ti’amā ’e ’ia ’arata’ihia e te Vārua Maita’i. E ti’a ia rātou ’ia rave i te fa’atōro’ara’a ’e te ha’amaita’ira’a tāta’itahi ma te tura, ’e ma te ha’apāpū ē, tē ha’apa’ohia ra teie mau tītaura’a i muri nei :

’Ia ravehia te reira nā roto i te i’oa o Iesu Mesia.
’Ia ravehia te reira nā roto i te mana o te autahu’ara’a.
’Ia ravehia te reira nā roto i te mau ravera’a i tītauhia, mai te fa’a’ohipara’a i te mau parau i fa’ata’ahia, ’aore rā, te fa’a’ohipara’a i te hinu i ha’amo’ahia.
E ti’a i te reira ’ia fa’ati’ahia e te mana fa’atere tei mau i te mau tāviri ti’a, (’oia ho’i, te ’episekōpo ’aore rā, te peresideni titi, ’aore rā, te peresideni misiōni), ’ia tītauhia, mai te au i te mau arata’ira’a i roto i teie tuha’a.

Te feiā e hōro’a i te mau ha’amaita’ira’a autahu’ara’a, e fa’ahiti rātou i te mau parau o te ha’amaita’ira’a (« Tē ha’amaita’i nei au [’aore rā, mātou ] ia ’oe ») ’eiaha rā, e pure ē, (« E te Metua i te ao ra, ha’amaita’i mai i teie ta’ata »).

’Ia rahi ana’e te taea’e i roto i te hō’ē fa’atōro’ara’a ’aore rā, te hō’ē ha’amaita’ira’a, e tu’u ha’amāmā noa te ta’ata tāta’itahi i tōna rima ’atau i ni’a i te upo’o o te ta’ata (’aore rā, i raro a’e i te ’aiū e ha’amaita’ihia ra) ’e tōna rima ’aui i ni’a i te tapono o te taea’e i tōna pae ’aui.

Te mau taea’e ana’e tei mau i te autahu’ara’a i tītauhia, ’e tei ti’amā, ’o tē nehenehe e rave i te hō’ē ’ōro’a ’aore rā, i hō’ē ha’amaita’ira’a. Ma te arata’ihia e te Vārua, nā te mau ’episekōpo ’e te mau peresideni titi e fa’aoti e fa’ati’a i te mau taea’e o te autahu’ara’a ’aita ā i ti’amā hope roa nō te haere i te hiero, ’ia rave ’aore rā, ’ia ’āmui i roto i te tahi mau fa’atōro’ara’a ’e te mau ha’amaita’ira’a (hi’o Buka arata’i rahi, 18.3).

’Aita e fa’aitoitohia e ani e rave rahi melo o te ’utuāfare, te mau hoa, ’e te feiā fa’atere nō te ’āmui mai i roto i te hō’ē ’ōro’a ’aore rā, te hō’ē ha’amaita’ira’a, nō te mea, e nehenehe e riro ’ei ’ohipa huru ’ē nō te tahi mau ta’ata, ’e te au ’ore ato’a nō te rave i te ’ōro’a.

7.11.2

Te bāpetizora’a

Tē mau nei te peresideni misiōni i te mau tāviri nō te bāpetizo i te feiā fa’afāriuhia. I raro a’e i te arata’ira’a a te mana fa’atere, e nehenehe te hō’ē tahu’a ’aore rā, te hō’ē melo nō te autahu’ara’a a Melehizedeka e rave i te ’ōro’a o te bāpetizora’a. Nō te rave i te reira :

E ti’a ’oia i roto i te pape ’e te ta’ata e bāpetiohia.
E tāpe’a ’oia i te fatira’a rima o te ta’ata i tōna rima ’aui (ma te aumaita’i ’e nō te pārurura’a ); e tāpe’a te ta’ata e bāpetizohia i te fatira’a rima o te taea’e tei mau i te autahu’ara’a i tōna rima ’aui.
E ’āfa’i fa’atuea ’oia i tōna rima ’atau i ni’a.
E fa’ahiti ’oia i te i’oa tā’āto’a o te ta’ata ’a parau ai ē, « nō te mana i tu’uhia mai iā’u e Iesu Mesia, tē bāpetizo nei au ia ’oe i te i’oa o te Metua, ’e nō te Tamaiti, ’e nō te Vārua Maita’i. ’Āmene » (Te Ha’api’ira’a Tumu ’e te mau Fafaura’a 20:73).
E vaiiho i te ta’ata ’ia tāpe’a i tōna ihu i tōna rima ’atau (ma te aumaita’i). I reira te taea‘e o te autahu‘ara’a e tu’u ai i tōna rima ’atau i te pae ni‘a o te tua o te ta’ata, ’e ’a ’utuhi hope roa ai i te ta’ata i raro i te pape, tae noa atu i tōna ’ahu tā’āto’a.
’A tauturu i te ta’ata ’ia ti‘a mai i rāpae i te pape.

Mai tei fa’ata’ahia i roto i Buka arata’i tahi, 18.7.6, e ha’apāpū e piti ’ite ē, ’ua rave-ti’a-hia te bāpetizora’a tāta’itahi. Tītauhia ’ia rave fa’ahou i te bāpetizora’a mai te mea ē, ’aita te mau parau i fa’ahiti-tano-hia mai tei fa’a’itehia i roto i Te Parau Ha’api’ira’a ’e te mau Parau Fafau 20:73 ’aore rā, mai te mea ē, ’aita hō’ē tuha’a o te tino ’aore rā, o te ’ahu i mo’e hope roa i raro i te pape.

7.11.3

Te ha’amaura’a

Te mau nei te peresideni misiōni i te mau tāviri nō te ha’amau i te feiā fa’afāriuhia. Terā rā, e hi’opo’a te ’episekōpo i te ravera’a o te mau ha’amaura’a ato’a. E ha’apāpū ’oia ē, ’ua ha’amauhia te feiā fa’afāriu i roto i te hō’ē purera’a ’ōro’a a te pāroita tei reira rātou i te orara’a, te mea maita’i i te sābati i muri noa mai i tō rātou bāpetizora’a. ’Aita te feiā fa’afāriuhia e ha’amauhia i roto i te purera’a bāpetizora’a.

E nehenehe te hō’ē ta’ata ’aore rā, hau atu, tei mau i te autahu’ara’a a Melehizedeka, e ’āmui atu i roto i te ha’amaura’a. E tu’u māmā noa rātou i tō rātou rima i ni’a i te upo’o o te ta’ata. I muri iho, te ta’ata nāna e rave i te ’ōro’a :

E fa’ahiti ’oia i te i’oa tā’āto’a o te ta’ata.
E fa’ahiti ’oia ē, tē ravehia nei te ’ōro’a nā roto i te mana o te autahu’ara’a a Melehizedeka.
E ha’amau ’oia i te ta’ata ’ei melo nō Te ’Ēkālesia a Iesu Mesia i te Feiā Mo’a i te mau Mahana Hope’a nei.
E fa’a’ohipa ’oia i te mau parau ra « ’A fāri’i mai i te Vārua Maita’i » (’eiaha ra « ’a fāri’i mai i te hōro’a o te Vārua Maita’i »).
’A hōro’a i te hō’ē ha’amaita’ira’a mai te au i te fa’aurura’a a te Vārua.
E fa’aoti ’oia nā roto i te i’oa o Iesu Mesia.

7.11.4

Te ha’amo’ara’a i te hinu

Tītauhia i te hō’ē taea’e tei mau i te autahu’ara’a a Melehizedeka, ’aore rā, hau atu, ’ia ha’amo’a i te hinu ’ōlive hou ’a fa’a’ohipa ai nō te fa’atāhinu i te ta’ata ma’i ’aore rā, i ’ati. ’Eiaha e fa’a’ohipa i te tahi atu hinu. Nō te ha’amo’a i te hinu, tītauhia i te taea’e tei mau i te autahu’ara’a :

’Ia tāpe’a i te hō’ē fa’ari’i hinu ’ōlive tei tātarahia te tāpo’i.
’Ia paraparau i te Metua i te ao ra.
E fa’ahiti ’oia ē, tē rave nei ’oia nā roto i te ha’amanara’a o te Autahu’ara’a a Melehizedeka.
E ha’amaita’i ’oia i te hinu (’eiaha te fa’ari’i) ’e e fa’ata’a i te reira nō te fa’atāhinu ’e nō te ha’amaita’i i te feiā ma’i ’e tei ’ati.
E fa’aoti ’oia nā roto i te i’oa o Iesu Mesia.

7.11.5

Te ha’amaita’ira’a i tei ma’ihia ’e tei ro’ohia i te ’ati

’Ua hōro’a Iesu i te mana autahu’ara’a i tāna mau ’Āpōsetolo « ’ia fa’aora i te mau ma’i ’e ’ia ti’avaru i te mau demoni ». (Mareko 3:15). Te feiā tei mau i te autahu’ara’a a Melehizedeka e mana ato’a tō rātou mai te reira. ’A fa’a’ohipa pinepine i teie hōro’a ma te ti’a.

Te feiā ana’e tei mau i te autahu’ara’a a Melehizedeka te nehenehe e ha’amaita’i i te feiā ma’i ’aore rā, i te feiā tei ’atihia. E piti taea’e tei mau i te autahu’ara’a, ’aore rā, hau atu te ha’amaita’i i te feiā ma’i, terā rā, e nehenehe hō’ē ana’e e rave i te fa’atāhinura’a ’e i te tā’atira’a mai te mea e tītauhia.

Mai mea ’aita e vai ra te hinu i ha’amaita’ihia, e nehenehe e hōro’a i te hō’ē ha’amaita’ira’a nā roto i te mana o te autahu’ara’a ma te fa’atāhinu ’ore.

E ti’a i te hō’ē tāne fa’aipoipo ’aore rā, hō’ē metua tāne ti’amā tei mau i te autahu’ara’a a Melehizedeka, e ha’amaita’i i te mau melo ma’i o tōna ’utuāfare.

E ha’amaita’i te mau taea’e i te feiā ma’i nā roto i te anira’a a te ta’ata ma’i, ’’aore rā tei fātata roa i te ta’ata, nā roto i te reira, e ravehia ïa te ha’amaita’ira’a mai te au i tō rātou fa’aro’o. Te mau taea’e tei mau i te autahu’ara’a a Melehizedeka, ’o tē haere nei i te fare ma’i, ’eiaha rātou e tītau i te mau rāve’a nō te ha’amaita’i i te ta’ata ma’i.

Mai te mea e tītau te hō’ē ta’ata hau atu i te hō’ē ha’amaita’ira’a nō taua ā ma’i nei, ’aita e tītauhia i te taea’e tei mau i te autahu’ara’a ’ia fa’atāhinu iāna i muri a’e i te ha’amaita’ira’a mātāmua. E hōro’a rā ’oia i te hō’ē ha’amaita’ira’a nā roto i te tu’ura’a rima ’e te mana o te autahu’ara’a a Melehizedeka.

E piti tuha’a i roto i te ha’amaita’ira’a i te ta’ata ma’i : (1) Te fa’atāhinura’a i te hinu i ha’amo’ahia ’e (2) ’e Te ha’amaura’a i te fa’atāhinura’a.

Te fa’atāhinura’a i te hinu i ha’amo’ahia

Nā te hō’ē ta’ata tei mau i te Autahu’ara’a a Melehizedeka e rave i te fa’atāhinura’a. Ōna :

E tu’u ’oia i te hō’ē tōpata hinu ha’amo’ahia i ni’a i te upo’o o te ta’ata.
E tu’u māmā noa ’oia i tōna nā rima i ni’a i te upo’o o te ta’ata, ’e e pi’i i te ta’ata nā tōna i’oa tā’āto’a.
E fa’ahiti ’oia ē, tē rave nei ’oia nā roto i te ha’amanara’a o te Autahu’ara’a a Melehizedeka.
E fa’ahiti ’oia ē, tē fa’atāhinu nei ’oia i te hinu tei ha’amo’ahia nō te fa’atāhinu ’e nō te ha’amaita’i i te feiā ma’i ’e tei ’atihia.
E fa’aoti ’oia nā roto i te i’oa o Iesu Mesia.

Te ha’amaura’a i te fa’atāhinura’a

Tei mātarohia, e tu’u māmā noa e piti taea’e ’aore rā, hau atu, tei mau i te autahu’ara’a a Melehizedeka, i tō rātou rima i ni’a i te upo’o o te ta’ata nō te ha’amau i te fa’atāhinura’a ; terā rā, e nehenehe hō’ē noa melo nō te autahu’ara’a a Melehizedeka e rave i te ha’amaita’ira’a, mai te mea e tītauhia. Nō te ha’amau i te fa’atāhinura’a, te ta’ata tei mau i te autahu’ara’a a Melehizedeka :

E pi’i ’oia i te ta’ata nā tōna i’oa tā’āto’a.
E fa’ahiti ’oia ē, tē ha’amau nei ’oia i te fa’atāhinura’a nā roto i te ha’amanara’a o te Autahu’ara’a a Melehizedeka.
Fa’ahiti i te mau ha’amaita’ira’a ’ia au i tā te Vārua e fa’auru mai.
Fa’aoti nā roto i te i’oa o Iesu Mesia.

7.11.6

Te hōro’ara’a i te mau ha’amaita’ira’a nō te tāmāhanahana ’e nō te a’o

E nehenehe ato’a te mau taea’e o te autahu’ara’a a Melehizedeka e hōro’a i te mau ha’amaita’ira’a tāmāhanahana ’e te a’o i te tahi atu mau ta’ata ’o tē ani mai i te reira. Nō te reira mau huru ha’amaita’ira’a, e tu’u ha’amāmā noa hō’ē taea’e ’aore rā, hau atu, tei mau i te autahu’ara’a, i tō rātou rima i ni’a i te upo’o o te ta’ata. I muri iho, te taea’e tei mau i te autahu’ara’a ’o te hōro’a i te ha’amaita’ira’a :

E pi’i ’oia i te ta’ata nā tōna i’oa tā’āto’a.
E fa’ahiti ’oia ē, tē ravehia nei te ha’amaita’ira’a nā roto i te mana o te autahu’ara’a a Melehizedeka.
Fa’ahiti i te mau ha’amaita’ira’a ’ia au i tā te Vārua e fa’auru mai.
Fa’aoti nā roto i te i’oa o Iesu Mesia.

Te mau misiōnare e hōro’a i te mau ha’amaita’ira’a i te mau melo, e fa’a’ite ’āfaro ti’a rātou i te reira i te ’episekōpo ’o te melo ’aore rā, i te peresideni o te pupu peresibutero, ’aore rā, i te fa’atere nō te ’ohipa misiōnare o te pāroita, ’e nāna ïa e fa’a’ite atu i te ’episekōpo.