Valaauga o le Misiona
7. Faaopoopoga

7

Faaopoopoga

7.0

Faatomuaga

Pe a manaomia ma talafeagai ai ma lau misiona ma tulaga moomia, mulimuli i taiala faaopoopo o loo otooto atu i le faaopoopoga.

7.1

Tiutetauave Faaletaitai mo Faifeautalai Talavou

O tofiga ma tiutetauave o taitai faifeautalai talavou e aofia ai ae le faamutaina i mea o loo lisiina atu i lalo.

Soa Sinia a Faifeautalai

O se tasi o soa taitasi e tofia o le soa sinia a faifeautalai. O le soa sinia faifeautalai:

  • Taitaia le soa faifeautalai e faataunuu le galuega i se eria ua tofia e aoao atu ai.

  • Faamalosiau le soa faifeautalai e suesue, tatalo, mulimuli i faatulagaga o aso taitasi, ma tausia faamaumauga sao.

  • Fesoasoani i lona soa faifeautalai ina ia avea ma faifeautalai sili ona lelei.

  • Iloa ma faasino atu tomai agavaa, taleni, ma taumafaiga i lana soa.

  • Faatino le auala e galue atoatoa ai ma taitai o le lotoifale ma tagata o le Ekalesia e faamaopoopo taumafaiga a faifeautalai.

Faiaoga

O se tasi o faifeautalai e tofia e fai ma faiaoga ma soa sinia mo faifeautalai fou taitasi. O se faiaoga:

  • E galue ma aoao atu se faifeautalai fou i le alofa, onosai, alofa mama, ma lagona malamalama.

  • E faaaloalogia le sao ma manatu o le faifeautalai fou o se soa e tusapau lava ma ia.

  • Faaalu se taimi faaopoopo mo aoaoga i aso taitasi i sailiiliga faalesoa (tagai i le “Mo Faifeautalai Fou: Suesuega Faaopoopo Faalesoa” i le “Faatomuaga: E Faapefea ona Ou Faaaogaina Atoatoa le Talai Lau Talalelei?” i le Talai La’u Talalelei [2018], ix–x).

  • Suesue tulaga faatonuina i lenei tusitaulima ma lona soa i aso taitasi.

  • Aoao le faifeautalai fou i autu o loo maua i le Faaaogaina Saogalemu o Tekinolosi ma punaoa i le Fetuunai i le Olaga Faafaifeautalai .

  • Faataitai le auala e faamaopoopo lelei ai taumafaiga faafaifeautalai ma taitai o le lotoifale ma tagata o le Ekalesia.

Taitai Itu

O se tasi o faifeautalai alii e tofia e galue o se taitai itu i se itu, e aofia ai le tele o eria e aoao atu ai. O le taitai itu e:

  • Taitai, aoao, ma fautua atu ma faifeautalai i vaiaso taitasi i aufono a le itu.

  • Taitaia faatalanoaga o le papatisoga (tagai 2.3.6).

  • Taitaia fesuiaiga o soa ma faifeautalai alii i lana itu (tagai 2.3.1).

  • Galulue ma taitai o le lotoifale ma tagata o le Ekalesia e faamaopoopo taumafaiga a faifeautalai.

  • Lipoti sao i le taitai sone.

Taitai Faiaoga Faifeautalai Tamaitai ma Taitai Sone

E toalua faifeautalai tamaitai e tofia e auauna atu faalesoa o ni taitai faiaoga i se tasi po o le sili atu foi o sone. E nafa i laua ma le aoaoina ma le soifua manuia o faifeautalai tamaitai ua tofiaina atu ia i laua. O i laua foi o sui o itu ma sone ma fesoasoani i le peresitene o le misiona, taitai sone, ma taitai itu i fonotaga faaleaoaoga ma konafesi a sone.

E toalua faifeautalai alii e tofia e auauna atu faalesoa o ni taitai sone i se sone se tasi. E nafa i laua ma le aoaoina ma le soifua manuia o faifeautalai uma ua tofiaina atu i la laua sone. E fesoasoani foi i laua i le peresitene o le misiona i fonotaga faaleaoaoga ma konafesi a sone.

Taitai faiaoga faifeautalai tamaitai ma taitai sone:

  • Taitai, aoao atu, ma taitaia fesuiaiga faalesoa ma faifeautalai i la latou sone ua tofia iai. E taitai e taitai faiaoga tamaitai fesuiaiga faalesoa ma faifeautalai tamaitai, ae taitai e taitai sone fesuiaiga ma faifeautalai alii.

  • Galulue ma taitai o le lotoifale ma tagata o le Ekalesia e faamaopoopo taumafaiga a faifeautalai.

  • Auai i le Aufono a taitai o le misiona.

  • Lipoti sao i le peresitene o le misiona.

E taitai foi e taitai sone faatalanoaga o le papatisoga (tagai 2.3.6).

Fesoasoani i le Peresitene

E toalua faifeautalai alii e tofia e auauna atu faalesoa o ni fesoasoani i le peresitene o le misiona. Fesoasoani:

  • Taitaia fesuiaiga o soa ma taitai sone ma isi faifeautalai alii (tagai 2.3.1).

  • Tuuina atu aoaoga i aufono a taitai o misiona ma konafesi a sone pe a talosagaina mai e le peresitene o le misiona.

  • E mafai ona tuuina atu fautuaga e faatatau i siitaga o faifeautalai po o tofiga faaletaitai, ae latou te le faia faaiuga mulimuli.

  • Lipoti sao i le peresitene o le misiona.

7.2

Taiala mo Auaunaga

Mulimuli i taiala o auaunaga o loo otooto atu i vaega o loo mulimuli mai.

7.2.1

Gaoioiga Faatulagaina Aloaia mo Auaunaga

E mafai ona e maua avanoa o auaunaga i faalapotopotoga e pei o le JustServe.org (i nofoaga o loo i ai), e pei ona faatonuina e ou taitai o le misiona.

Pe a auai i se auaunaga faatulaga lelei, ia tausia tulaga faatonuina nei i lou mafaufau:

  • Faatapulaa auaunaga i taimi o le ao.

  • Aloese mai le faia o auaunaga i taimi sili ona lelei e saili ma aoao atu ai sei vagana ua faatonuina ai oe e lau peresitene o le misiona.

  • Auai i galuega auaunaga a le alalafaga pe a mafai.

  • Aloese mai gaoioiga o auaunaga i aso sauniuni po o taimi e feteenai ai ma fonotaga a aufono o itu po o konafesi a sone.

  • Aua le faaleaogaina pe toe fesuiai taimi o aoaoga ona o ni gaoioiga o auaunaga sei vagana ua faatonuina e lau peresitene o le misiona.

  • Nonofo faatasi ma lau soa a o e auauna atu.

  • Fai lau pine o lou igoa pe a faatagaina ma talafeagai, tusa lava po o e laei i ofu galue.

  • Aua nei auai i gaoioiga e te totogi ai se tupe pe maua ai foi se totogi.

  • Aua nei e ofoina atu oe lava i se galuega faaumiumi e aunoa ma le faatagana mai ou taitai o le misiona.

7.2.2

Saogalemu i taimi o Avanoa Faaleauaunaga

Mo lou saogalemu i le taimi o avanoa o auaunaga, faaaoga le mafaufau tatau ma mulimuli i musumusuga o le Agaga Paia ma taiala o loo mulimuli mai:

  • Fai na o gaoioiga e mafai e lou malosi faaletino ona fai.

  • Aua nei faaaogaina meafaigaluega malolosi pe ave po o le tietie i soo se masini (e pei o masini toso masini, taavale toso, po o pusa tatala o loli).

  • Laei ofu talafeagai (e pei o totigilima po o ofu lima uumi).

  • Aua e te galue i mea e te ono pau ifo ai mai mea maualuluga (e pei o taualuga o fale po o laau).

  • Aua e te galue i mea e te ono omia pe faamanualia ai i nofoaga tapunipuni (e pei o autu loloto).

  • Aua e te auauna atu i aoga, nofoaga e tausi ai tamaiti, po o seisi lava nofoaga e tuua ai na o oe ma taimaiti, e aofia ai le Peraimeri po o le vasega pepe (tagai 3.5.2).

Matamata i le vitio lenei mo nisi faamatalaga e faatatau i galuega auauna atu.

7.3

Faaaloalo mo Isi

Tausi pea lava pea i isi i le agalelei ma le faaaloalo. Mulimuli foi i taiala faaopoopo i le vaega lenei.

7.3.1

Mataupu o Talanoaga e Aloese Mai ai

Ina ia faaalia le faaaloalo mo isi ma ia malu puipuia lou saogalemu, aloese mai le talanoaina o mataupu e ono fai ma faafitauli. O mataupu e aloese mai ai e aofia ai polokiki o le lotoifale ma le malo o eria o loo e galue ai, aloese mai foi i le faia o faamatalaga faapolokiki faalilolilo po o nofoaga lautele. E le gata i lea, aua lava nei:

  • Faia ni tala faamalie e uiga i faiga po o gaoioiga a tagata faatupu faalavelave.

  • Fautua atu i tagata e malaga ese atu i isi atunuu—e tusa mo galuega po o aoaoga.

  • Ofo atu pe faia ni folafolaga e uiga i ni lagolago tautupe po o visa mo femalagaaiga mo tagata i lau eria o le misiona, e aofia ai mo galuega, aoaoga, fale, po o le faateaina o tamaiti.

7.3.2

Tulafono ma Aganuu Faalelotoifale

Usiusitai i tulafono ma aiaiga faalelotoifale e uiga i le tufatufaina o mea, aiaiga o femalagaaiga ma tuaoifanua, tulaga moomia mo tusifolau ma visa faataga mo femalagaaiga. Afai e te le masani ma tulafono faalelotoifale, aganuu, ma amioga talia, fesili i au taitai misiona mo se fesoasoani.

Matamata i le vitio lenei mo nisi faamatalaga e faatatau i amioga talafeagai.

7.4

Auai i le Malumalu

Pe a e auai i le malumalu, ia manatua mea nei:

  • Nonofo faatasi ma lau soa.

  • Auai i soo se sauniga o faatinoina i totonu o le malumalu. Ae peitai, ina ia taofia le faamatala seseina o lagona faaleagaga o ni lagona o le alofa, aua nei e auai e fai oe ma sui o se toalua po o se ava i se sauniga o faamauga po o se molimau i sauniga o le faaeega paia.

  • Aua le popole e ave ni laei o le malumalusa, e maua laei o le malumalusa mo faifeautalai i le malumalu e aunoa ma se totogi.

  • Mulimuli i amioga talafeagai i le faaaogaina o telefoni. E mafai ona e aumai lau telefoni i totonu o le malumalu e lolomi ai kata o sauniga. Ae peitai, e le mafai ona e faaaogaina lau meapue ata, talanoa i lau telefoni, pe auina atu se feau feaveai a o e iai i totonu o le malumalusa.

  • Aua nei aumaia ni meapue ata po o tusi ma mea faitau, e aofia ai faamanuiaga faapeteriaka, e faaaoga i totonu o le malumalusa.

  • Aua nei faapotopoto o ni faifeautalai pe tootutuli e tatalo i le potu selesitila.

Ia manatua ona laei pea lava pea ofusa o le malumalu e pei ona faatonuina. Afai e i ai ni au fesili e uiga i le laeiina o ofusa po o le auai i le malumalu, fesili i au taitai o le misiona.

7.5

Tekinolosi

Mulimuli i tulaga faatonuina faatekinolosi o loo otooto atu i soa-vaega o loo mulimuli mai.

7.5.1

Mulimuli i Tulaga Faatonuina Faalauaitele mo Tekinolosi

Taulai atu i tagata, ae le o le tekinolosi. Pe a feiloai faafesagai, tuuina atu i tagata lou agaga atoa. O le siakiina o imeli, tali atu i feau feaveai, po o le matamata i faasalalauga faaleagafesootai a o e i ai faatasi ma isi e faalavelave ma le migao.

E mafai ona e faaaoga:

  • Wi-Fi i le falelotu ma isi nofoaga o le Ekalesia.

  • O komepiuta faitele, e pei ona iai i faletusi ma nofoaga e maua ai le initoneti.

  • O se komepiuta patino a se tagata mo le aoaoga pe afai e maua mai se faatagana mai lena tagata.

  • E mafai ona faaaoga meafaalogo mo gaoioiga ua faatagaina a faifeautalai, e pei o le fesootai atu i lou aiga po o le faia o ni vasega faafaifeautalai.

Aua nei puleaina tekinolosi o uarota po o siteki o le lotoifale, uepisaite, lautusi, po o ala o faasalalauga faaleagafesootai.

Matamata i le vitio lenei mo nisi faamatalaga e faatatau i le faaaogaina o masini feaveai i le galuega faafaifeautalai.

7.5.2

Faaaogaina ma le Saogalemu o Tekinolosi

E tatau ona e faamaeaina le vasega initoneti o le “Malupuipuia mo le Faaaogaina o Tekinolosi” a o e i ai i le nofoaga tutotonu o aoaoga faafaifeautalai. O taiala nei o le a fesoasoani foi ia te oe i le faaaogaina saogalemu o tekinolosi ma le faamoemoega o faifeautalai:

  • Faaaogaina o tekinolosi faamoemoeina. Fuafua gaoioiga e fesoasoani ia te oe e valaaulia ai isi e o mai i le Faaola.

  • Aua le faaaogaina tekinolosi e faaitiitia ai le atuatuvale po o le fiu ona o le leai o se mea e fai.

  • Faalogo mo ma mulimuli i musumusuga mai le Agaga Paia. O se fesootaiga malosi i le Agaga o le Alii o lau talipupuni sili lea e tetee atu ai i le faaaogaina le tatau ai o le tekinolosi.

  • Ia e i ai pea lava pea i se tulaga e mafai ai e oe ma lau soa ona fevaai ai i le lau o masini a le tasi ma le isi. Aua le faaaogaina masini feaveai pe a na o oe toatasi, e pei o le iai i le faletaele.

  • Galulue ma lau soa pe a sailiili pe aoao atu i luga o le initoneti. Iloilo faamatalaga ma feau feaveai a le tasi ma le isi a o lei tuuina i luga o le initoneti po o le auina atu o se feau feaveai ina ia mafai ai e oulua ona fefaasoaai manatu ma talia le iuga o le fesootaiga Mo le silafia E le aofia ai lenei mea fesootaiga ma lou aiga (tagai 3.9.1), ofisa o le misiona, po o le peresitene o le misiona.

  • Tagai i le Malupuipuia mo le Faaaogaina o Tekinolosi pea lava pea i suesuega patino a le tagata lava ia faapea ma le soa.

7.5.3

Aloese mai Ponokalafi

O le ponokalafi e oo mai i ituaiga auala eseese. O le fuafua mamao ma le faia o filifiliga faamaoni e mafai ona fesoasoani ia te oe e taofia ai ponokalafi (tagai Malupuipuia mai Faaaogaina o Tekinolosi). Afai e te vaai iai, aloese, tape le masini, pe aluese mai lea tulaga. O loo mulimuli mai ni fautuaga e fesoasoani ia te oe e taofia ai le ponokalafi:

  • Aloese mai uepisaite, mea, ma nofoaga e faigofie ona e faalogo, faitau, po o le vaai ai i mea e faaosoosoina ai po o le ponokalafi.

  • Aoao ina ia iloa taimi e ono faaosoosoina ai oe e faaaoga le tekinolosi i auala le tatau, e faapei o le taimi ua e lelava pe fiu ona o le leai o se mea e fai.

  • Fai se fuafuaga o mea e mafai ona e fai. E mafai e au taitai o le misiona ona fesoasoani. E mafai foi ona e maua faamatalaga i le ChurchofJesusChrist.org/addressing-ponography.

O soo se tasi o sailiili ina ia aloese pe taofia le ponokalafi e mafai ona maua le fesoasoani ma le faamalologa e ala i le Togiola a Iesu Keriso. Afai o e tauivi, talanoa ma lau peresitene o le misiona, o le na te tuuina mai le lagolago alofa, fautuaga, ma le fesoasoani.

7.5.4

Aoao Atu e Faaaoga ai le Tekinolosi

Pe a faamaonia, faaaoga le tekinolosi i luga o le initoneti ma tagata o le Ekalesia ma i latou o loo e aoaoina e fesootai ai ma i latou, fesoasoani ia i latou, ma faasoa atu le savali o le talalelei ma i latou.

  • Fesoasoani atu i isi e aoao auala silisili e faasoa atu ai le talalelei, ma lagolagoina ai tagata o le Ekalesia a o latou faaaogaina tekinolosi i a latou taumafaiga faafaifeautalai.

  • Galulue i luga o le initoneti ma tagata o loo e aoaoina o loo nonofo i fafo atu o lau eria ua tofia iai oe, ma fesoasoani ia i latou i le faagasologa o lo latou liliu mai.

  • A o e aoaoina se tasi e nofo i fafo atu o lau eria, galulue faatasi ma faifeautalai ua tofia i lena eria o loo nofo ai le tagata o loo aoaoina. Galulue faatasi ai, e fesoasoani i lena tagata e faalatalata atili mai i le Tama Faalelagi ma Iesu Keriso.

  • Faaaoga ata, vitio, ma isi ala o faasalalauga mai le Ekalesia Media Library ma isi lau aloaia a le Ekalesia i au aoaoga taumafai talafeagai. I au fesootaiga, aua le faaaogaina ala o faasalalauga e le aloaia e le Ekalesia (mo se faataitaiga, o vitio na tuufaatasia e tagata o iunite o le lotoifale).

  • Pe a tuu i luga o ala o faasalalauga, faasoa atu savali e uiga i le talalelei ma ou aafiaga o se faifeautalai nai lo le taulai atu i au femalagaaiga.

Matau taiala nei ina ia malupuipuia ai tagata taitoatasi ma o latou faamatalaga patino:

  • Ia iloa o igoa atoa, ata (tagai 3.7), faamatalaga e fesootai ai, ma tulaga patino o tagata o loo e aoaoina e le mafai ona faailoa atu i seisi. O le faasoa atu po o le tuu i luga o lenei faamatalaga e mafai ona solia ai le tulafono e puipuia ai aia a tagata taitasi. Ia matua faaeteete lava i mea e te tusia i tagata o lou aiga, atonu latou te tuuina i luga au tusi ma feau i luga o le initoneti.

  • Faamautu mai se faatagaga mai soo se tasi o loo i le ata po o le vitio a o lei faasoa atu ma se isi poo le tuuina i luga o le initoneti. Ia maua se faatagaga mai matua a e te lei faasoa atu ata po o vitio o fanau (tagai 3.7).

Matamata i le vitio lenei mo nisi faamatalaga e faatatau i le malupuipuia lelei o le aia tutoatasi a isi.

7.5.5

Faaaogaina o le Imeli

I le taimi o lau misiona, e tuuina atu ia te oe se tuatusi imeli faapitoa e faaaoga e sui ai isi imeli patino uma. Faaaoga le tuatusi imeli lenei mo fesootaiga uma sei vagana ai lau tusi faalevaiaso i le peresitene o le misiona, e te lafo atu e ala i le Saite a le Faifeautalai.

7.5.6

Faaaogaina o Ala o Faasalalauga Faaleagafesootai

E mafai ona faaaoga ala o faasalalauga faaleagafesootai e faasoa atu ai le talalelei. Ia mautinoa e te faaaogaina na o ala o faasalalauga faaleagafesootai e faatagaina mo lau misiona, ona o tulafono e faatatau i ala o faasalalauga faaleagafesootai e eseese mai lea atunuu i lea atunuu.

Mulimuli i soo se tulaga faatonuina e patino lava i le misiona e faatatau i ala o faasalalauga faaleagafesootai faapea foi ma tulaga faatonuina o loo mulimuli mai:

  • Ia mautinoa o lau tuatusi o ala o faasalalauga faaleagafesootai e faailoa mai ai ou faamoemoega ma le valaauga o se faifeautalai.

  • Ia mautinoa o le ata o lau talaaga otooto ma tagata taitoatasi ma vaega o loo e mulimuli ai e faailoa mai ai o oe o se tasi o faifeautalai a le Alii.

  • Aua nei faia seisi tuatusi i le lau o le ala o faasalalauga faaleagafesootai ina ia taofia ai le faia o suiga i le tuatusi o loo iai nei. O se solitulafono lea i le maliega ma le tele o lau o ala o faasalalauga faaleagafesootai.

  • Aua nei faaaogaina le ulutala Faifeautalai Alii (Elder) po o le Faifeautalai Tamaitai (Sister) i lau tuatusi. O ulutala faapenei e le faaaogaina e nisi o ala o faasalalauga faaleagafesootai.

  • Taulai atu i fesootaiga aoga ma taitoatasi nai lo le sailia o le “fiafia” po o le faasoa atu o lau feau i luga o le initoneti.

  • Aua nei e manatu faapea o mea ua e faasalalau o ni fesootaiga aloaia a le Ekalesia.

  • Ia malupuipuia lelei lau lava aia tatau. Ia faaeteete pe a faasoa atu ou taimi faatulagaina ma nofoaga i luga o le initoneti. Ia faaeteete e uiga i tagata e te talia i lau upega fesootai; o nisi o i latou o le a faaaoga faifeautalai mo mea latou te mananao ai.

  • Ia malupuipuia lelei le aia tatau a isi. Afai e te manao e faasalalau se faamatalaga e uiga i se tasi o loo oulua galulue faatasi, e tatau ona e fesiligia lana faatagaga (tuugutu pe tusitusia) a o lei e tuuina i luga lena faamatalaga o loo taua ai o ia i lona igoa pe aofia ai foi ma lona ata (tagai 3.7). Ona o tulafono o aia tatau faalotoifale, i nisi o misiona e le faatagaina faifeautalai ona faasoa atu faalauaitele ata o i latou o loo latou aoaoina.

Matamata i le vitio lenei mo nisi faamatalaga e faatatau i le malupuipuia lelei o le aia tutoatasi a isi.

7.6

Tulaga Faigata

Mulimuli i taiala o loo i lalo e taulimaina ai tulaga faigata.

7.6.1

Taulimaina o Tulaga Lē Lelei

E faapei o le Faaola, o perofeta, ma le tele o faifeautalai na muamua atu ia te oe, o le a e fetaiai ma tetee ma e le gata i lea a o isi foi uiga le faaaloalo o se faifeautalai. O taiala o loo mulimuli mai o le a fesoasoani ia te oe e taulimaina ai le tetee.

  • Aua nei e faatuatuanai i ou lagona.

    • Ia iloa e le afaina ona faailoa atu lou le fiafia ma le lotovaivai i lau soa, taitai faafaifeautalai talavou, taitai o le misiona, ma tagata latalata mai o lou aiga.

    • Ia malamalama o nisi o taimi o le talanoa e uiga i ni tulaga le lelei e mafai ona fesoasoani e faagalo ese ai ia lagona.

    • Aua nei tumau ai pea i se tulaga le lelei pe fai ma mea e suia ai lau amio mo se taimi umi.

  • Faatulaga manatu e faatatau i le teena.

    • Ia iloa o tulaga le lelei e le faamatalaina ai le ituaiga tagata e iai oe, le tauga e tau ai oe, po o le lelei o le mafai e te faia ai.

    • Taumafai ina ia aua le faia ni faamatalaga faalauaitele e pei o le “E le faalogo tagata.”

    • Ia malamalama o le filifiliga saoloto e mafai ai e tagata taitoatasi ona talia pe teena lau savali.

    • Ia manatua e fesuisuiai soifuaga ma tulaga o tagata. O le teena e le faapea o lona uiga o le a le fiafia lava le tagata i le talalelei toefuataiina.

  • Tausi oe lava ma isi i le alofa mutimutivale.

    • Saili le faamafanafanaga e ala i le tatalo. Manatua e silafia oe e le Alii, o lou tulaga, ma ou manaoga.

    • Aua e te faitio ia te oe lava, le tulaga, po o tagata o loo aafia ai.

    • Fai le mea sili e maua ai le lagona lelei.

  • Aoao mai aafiaga. Fuafua le mea ese e te ono fai i leisi taimi.

7.6.2

Taulimaina o Tagata Finauvale

Atonu o le a e fetaiai ma ni tagata e le lelei pe uiga malosi. Afai e le migao se tagata, ia faaaloalo ma aluese mai lea tulaga. Afai e te lagona se faalavelave, aluese faavave loa. O le saogalemu o oe ma lau soa (tagai 4.5) o lou faamuamua lea.

O tagata finauvale ma fesootaiga le lelei e oo mai ai le atuatuvale. Fai ia tulaga e te manaomia e taulimaina ai le atuatuvale (tagai 4.3) ma tausi faaeteete lelei oe lava ia faalelagona ma le faaleagaga.

Ia iloa o soo se ituaiga faatautala i upu, faalelagona, pe faaletino e faia e se tasi, e aofia ai ma se soa, e le taliaina. O lenei e aofia ai upu ma tala, gaoioiga o le tino, po o gaoioiga e faatupu pe faatautala ai i leisi tagata.

Faafesootai vave lau peresitene o le misiona, lona faletua, po o se tasi o taitai faatuatuaina pe a e lagona, vaai, pe faalogo e uiga i se faamalosi faalefeusuaiga pe faaletino, osofai, pe taufaamatau (tagai 7.8.2–7.8.4).

7.7

Atugaluga o le Soifua Maloloina Faaletino ma Faalemafaufau

Mulimuli i taiala o le soifua maloloina o loo otooto atu i vaega o loo mulimuli mai.

7.7.1

Faafesootaiina o le Ofisa o le Misiona e uiga i Atugaluga Faafomai

Aua ne’i faamoemoe i le iloa o le tagata lava ia po o manatu o isi. E ui o ni fautuaga faafomai mai lau soa, isi tagata o le Ekalesa, aiga, po o uo atonu e aoga, faafesootai le tagata o loo faamaopoopoina tulaga faafomai a le misiona pe a i ai ni au fesili po o atugaluga, aemaise lava o ni manuaga ogaoga po o faafitauli o le soifua. O le a fesootai atu lau peresitene o le misiona i lau peresitene o le siteki ma lou aiga e uiga i ni manuaga ogaoga ma ni atugaluga o le soifua maloloina.

Faafesootai le tagata o loo faamaopoopoina tulaga faafomai o le misiona pe afai ua e lagona ni toatuga o le soifua maloloina o loo i lalo:

  • Mai e tigaina atu nai le fulu masani ma faailoga le tumau.

  • Faamanualia ogaoga.

  • O le vave o le tata o le fatu (100 pe sili ae tata i le minute) ae e te le o faia se faamalositino.

  • O se fiva e maualuga ae nai lo le 101°F (38.3°C), o le fiva o le 101°F (38.3°C) i le sili ae i le lua aso, po o se fiva e le aoga iai se fualaau.

  • O le vave po o le tele o le pau o pauna po o le faaopoopo o pauna.

  • Fiainu soo po o le tulai soo.

  • Faasuati pea lava pea, ulutiga, niniva, tale, po o le papala o le tino.

  • Fulafula vae, ogavae, manava, po o mata.

  • Masaa le toto po o le uliuli o feau mamao.

  • Manava mau po o le manava tata mo le sili ae i le lua aso.

  • Nifo tiga.

  • Atigivae ua ola agai i totonu o le aano o le tamaivae.

7.7.2

Tausiaina o le Soifua Maloloina Faaletino

O le a e maua se aafiaga fiafia i lau misiona ma mafai ai ona auauna atu ma le atoatoa i le Alii pe a e tausia lelei lou soifua maloloina. Ia maelega i au taumafaiga faafaifeautalai, ae aua le uunai oe lava ia sili ae nai lo le mea e te mafai ona fai.

Ina ia fesoasoani e tumau ai i lou soifua maloloina faaletino, ia mautinoa ona:

  • Ia faamalositino soo.

  • Ia lava le moe.

  • Taumafa i meaai maloloina ia tele fualaau faisua, fualaau aina, ma fatulaau atoatoa.

  • Inu ia tele o le suavai.

  • Fufulu ou lima pea lava pea.

  • Faaaoga le kulimi e puipuia ai mai le la ma faga namu pe a tatau ai.

  • Saili auala e malolo ai.

  • Fiafia i gaoioiga faafiafia tuufaatasi i aso sauniuni.

7.7.3

Tausiaina o le Soifua Maloloina Faalemafaufau

O se mea e masani ai ona maua lagona faanoanoaga, popolega, maimanatu, ma le lotovaivai a o auauna atu i le misiona. Ae peitai, o lagona ma amioga e puipuia oe mai le galue ai ma le atoatoa e ao ona tausia lelei. O nei tulaga e ona aofia ai:

  • Fesuisuiaiga o lagona.

  • Popolevale tele po o le tausalaina.

  • Lagona atuatuvale.

  • Faifai pea ona le soifua maloloina o le taumafa.

  • Faigata ona puleaina lagona faalefeusuaiga.

Ia malamalama e leai se maasiasi i le iloaina ma le togafitia o soo se faafitauli faalesoifua maloloina, e aofia ai atugaluga faalagona po o le faalemafaufau. Afai e te lagona o oe po o lau soa e manaomia se fesoasoani, talanoa i lau peresitene o le misiona, lona faletua, po o le tagata o loo faamaopoopoina tulaga faalesoifua maloloina i le misiona. E mafai ona latou fesootai atu i punaoa mo le soifua maloloina faalemafaufau. E mafai foi ona e maua nisi fautuaga fesoasoani i le Fesuiaiga i le Olaga Faafaifeautalai.

7.7.4

Tausiga mo Ū a Manu ma Iniseti

O ū a manu ma iniseti e mafai ona mafua ai faamai tigaina ma i nisi o taimi e anagata Afai e fula se ū a le iniseti pe tiga tele lava, valaau vave le ofisa o le misiona.

Puipuiga

E mafai ona e fesoasoani e puipuia ū a utufiti, namu, ma isi iniseti e ala i le mulimuli i nei taiala:

  • Aloese mai suavai toa, e masani ona tautuufua ai namu.

  • Aloese mai laau pala, e masani ona nonofo ai utufiti.

  • Laei ofu e ufiufi ai ou lima ma vae, e tusa lava i tau mafanafana.

  • Matamata le vitio Puipuiga mai Faamai e Mafua mai Namu.

  • Apalai faasola namu i le pau ma se fana namu i tua o ofu.

Togafitiga

Afai ua ū oe pe valuvalu e se utufiti po o se namu po o seisi iniseti po o se manu, mulimuli i taiala nei:

  • Togafiti ū itiiti a iniseti e faaaoga ai le aisa po o fualaau e le tusia mai e se fomai.

  • Vaai se fomai e aveese saogalemu ai utufiti ua pipii i lou pau ma suesue ai mo le mai o le Lyme.

  • Fufulu mama le ū po o se manua na mafua mai se manu i se fasimoli ma le vai (mo le 15 minute), ona valaau lea o le ofisa o le misiona. Ia iloa le tagata e ona le manu, pe a mafai, ina ia mafai e le ofisa o le misiona ona fesoasoani e taofia mai pipisi po o isi faamai matuia.

  • Afai e fula se ū a se utufiti po o isi iniseti po o manu, ma ua tigaina lava, ma ua mafua ai le papala le masani ai, valaau vave le ofisa o le misiona.

Matamata i le vitio lenei mo nisi faamatalaga e faatatau i le malupuipuia lelei o oe lava mai u a iniseti ma isi manu.

7.8

Tulaga Lamatia

Mulimuli i taiala saogalemu o loo otooto atu i vaega o loo mulimuli mai.

7.8.1

Sauniuni mo Tulaga Lamatia

O le a fesoasoani taiala o loo i lalo ia te oe e saunia ai ma tali atu i tulaga lamatia.

  • Tatalo mo le taitaiga a le Alii i aso uma.

  • Faalogo ma mulimuli i musumusuga a le Agaga, o le na te lapataia oe i puapuaga.

  • Faamasani i le fuafuaga o gaoioiga mo faalavelave faafuasei a lau misiona. Mulimuli i faasologa o le auala e te gaoioi ai i taimi o faalavelave faafuasei.

  • Faamau le faamatalaga o numera o fesootaiga mo faalavelave faafuasei mo lau eria ma le atunuu i lau telefoni. Ia fafaga faatumu le maa o lau telefoni ma ia iai pea ia te oe i taimi uma.

  • Aloese mai eria ua faailogaina e le misiona e lamatia ai le soifua.

  • Ia aua nei iai se manatu o isi e faapea o loo iai ni au mea taua (mo se faataitaiga, o le feaveai o se ato e tumu).

  • Ia mataalia i ni mea e le masani ona vaaia, e pei o se tasi o loo tilotilo totoa mai ia te oe, fai mai fesili patino, pe o taumulimuli foi ia te oe.

  • Taumafai e faaaoga gaoioiga a lou tino e faailoa atu ai o loo e toa ma le fefe.

  • Fai sau numera po o se upu faalilolilo e faaaoga ma lau soa e faailoa atu ai ua e manao e o ese. Faaaoga pe afai ua e i ai i se tulaga ua e lagona ai le le saogalemu.

Faataitai ona faaaoga pea lava pea nei taiala, e tusa lava o nisi (e aofia ai isi faifeautalai) o loo taumafai e tauanau oe e tofotofo lou saogalemu ina ia faataunuu ai lau galuega o le talaiga.

7.8.2

Iloaina o Tulaga Lamatia

Faafesootai vave se tasi o ou taitai o le misiona po o se tasi o taitai faatuatuaina pe a e lagona, molimau, pe faalogo e uiga i soo se uiga le talafeagai faaletino pe faalefeusuaiga. E aofia ai i nei mea osofaiga, taufaamata’u, po o faiga faamalosi. E ui o tulaga lamatia o taua i lalo e faamatalaina eseese e tulafono o le lotoifale, lipoti soo se mea e mafua ai ona e atugalu.

  • Osofaiga e aofia ai soo se gaoioiga e faamalosia ai se tasi faaletino po o faalefeusuaiga. O faataitaiga e aofia ai fesootaiga le manaomia o tino, tago le talafeagai, po o le osofai faaletino.

  • Taufaamatau faaletino e tupu pe a faafefe i se tagata e faamanualia lona tino pe faaoo iai le oti. O faataitaiga e aofia ai upu ma tala taufaamatau po o amioga taufaafefe o ituaiga eseese.

  • Faiga faamalosi e aofia ai faamatalaga poo faailoga mataga, manaoga mo feusuaiga faaleulugalii, po o isi feusuaiga le manaomia. O faataitaiga e mafai ona aofia ai le faatinoao (mulimuli ma le manao e faatei pe faaita) po o le faaaliali o itutino sa.

7.8.3

Tali Atu i Osofaiga, Taufaamata’u, po o Faiga Faamalosi

Fai mea nei pe afai ua gaoia se mea a oe po o lau soa:

  • Faamatuu vave atu a oulua meatotino. Atonu o le a mafai ai e le tagata gaoi ona aluese e aunoa ma le faamanualia o oulua. O lou soifua ma lou manuia e sili atu le taua nai lo au meatotino.

  • Taumafai ina ia aua nei e ita pe tali atu i se tulaga le lelei. Atonu o le a faatetele ai le faaletonu.

Fai mea nei pe afai o oe po o lau soa ua lagona le taufaamatau po ua faamalosia ma e sili atu nai au meatotino ua iai nei i se tulaga matautia:

  • Ua na o oe e mafai ona filifili le auala sili e tali atu ai i lenei tulaga. Atonu e te filifili e momoe, puipui ia te oe lava, pe faia le mea o loo manao ai. Mo se faataitaiga:

    • Afai e te tamoe, atonu o le a aloese oe mai le osofaia.

    • Afai e te puipuia oe ia te oe lava, atonu o le a mafai ona e puipuia lou tino e ala i le eē leotele, fetui, vavalu, taū, takiki, pe tatalo.

    • Afai e te filemu ma filifili e fai le mea o manao ai le tagata, o se tali e masani ai, faamolemole aua nei toe tuuaia oe lava i se taimi mulimuli mai.

  • Mafaufau ina ia maua mai se fesoasoani mai se tasi. Mo se faataitaiga:

    • E mafai ona e sailia se fesoasoani mai nisi, aemaise lava o se tasi e i ai sona malosiaga ( e pei o se avepasi) i le mea o loo e iai.

    • Afai o e i se nofoaga faitele ma tagata o loo siomia oe ma e le mafai ona e solaese mai le faatautala faaletino ma le faalefeusuaiga (mo se faataitaiga, pe a o e tietie i se taavale femalagaai faitele), mafaufau e tautala atu ma le lototoa ma taumafai e taofi le tagata mai le faia o isi uiga po o le faamalosi. Mo se faataitaiga, e mafai ona e faaaoga le gagana faitino malosi, vaai sao atu ma le totoa i le tagata, ma tautala leotele. E te tautala atu i le tagata, tau atu le amioga faatufanua, ma fai atu le mea o e manao ai i le tagata nate faia, e pei o le, “E, oe lea i le ofu samasama, aua e te pai mai ia te au. Soso ese ma au.”

    • Afai e leai se tasi e latalata ane, e mafai ona e ee, leotele, pe taumafai e faatosina mai tagata ia te oe; o se tasi o le a ia iloa mai oe ma o le a mafai ona fesoasoani.

7.8.4

Lipoti Atu o Osofaiga, Taufaamata’u, po o Faiga Faamalosi

Afai ua osofaia, faamatau, pe faamalosia oe (tagai 7.8.2) e se tasi, faafesootai vave se tasi o ou taitai o le misiona, se tasi i le ofisa o le misiona, po o se tasi taitai faatuatuaina. O ou taitai o le misiona o loo i ai punaoa e lagolago ai oe i tausiga faafomai, fautuaga, suia o le mea e nofo ai, po o isi fesoasoani moomia. Ia iloa atonu o le a e tei pe a tuanai le mea na tupu ma o le a e aafia foi i faailoga o le mafatiaga. A oo loa ina ua e lagona le saogalemu, taumafai e faamaumau soo se mea e te manatua e uiga i le mea na tupu

Ia malamalama afai ua osofaia oe, poo le a lava lau mea sa fai, o le osofaiga e le o sou sese. E i ai lava ia te oe le filifiliga o le fautuaina e se tasi e te faatuatuaina ma lagona ai le toafilemu, e pei o lau peresitene o le misiona, o lona faletua, taitai sivili, po o tagata i le aiga. O lau filifiliga pe faaauai leoleo.

E masani ona e fesiligia oe lava ma le mea e ono fai e oe po o lau soa e ese mai le mea sa fai. Faatuatua sa e faia le mea sili e mafai ona e faia i lenei faafitauli faigata. E taulimaina e tagata aafiaga mafatia i auala eseese. O le a fesoasoani le Alii ia te oe a o e toe foi i le lelei.

Matamata i le vitio lenei mo nisi faamatalaga e faatatau i le saunia lelei, malamalama, ma le puleaina o tulaga matautia ma le taufaamatau.

7.9

Saogalemu o Fale

Mulimuli i taiala o loo i lalo ina ia tausia ai lou fale ia patino ia te oe, saogalemu ma mama.

7.9.1

Patino ma le Saogalemu

Matau taiala nei ina ia mautinoa ai o lou fale e patino ia te oe lava ma saogalemu:

  • Faapipii ma tausia lelei ia faailo o le kaponi ma le asu. Fai siaki ma sui maa e pei ona fuafuaina e le tagata o faamaopoopoina fale o le misiona. Aua nei tapeina nei masini e faasaoina ai le soifua.

  • Aua nei tutuina ni moligao o soo se ituaiga.

  • Loka faitotoa ma faamalama o i fafo. Pe a manaomia, e mafai ona fautua mai ou taitai o le misiona isi tulaga e maua ai le ea mai fafo.

  • Tapuni pea lava pea pupuni po o pola pe a pogisa.

  • Aua nei faasoa atu faalautele lou tuatusi po o ma tagata o loo e aoaoina.

  • Aua le tatalaina le faitotoa pe afai e te le masani i le tagata o loo i fafo pe ua e lagona le popole ia te ia.

  • Aua lava ona e aoaoina se tagata i lou fale pe valaaulia ni tagata e o mai i totonu sei vagana o i latou o ni faifeautalai po o taitai o le Ekalesia i le lotoifale o a latou asiasiga ua uma ona faatagaina e ou taitai o le misiona.

  • Aua lava e te nofo i se aiga o loo iai ni tagata o le isi itupa e le i faaipoipo po o le toalua o lou lava itupa e masani ona le i ai.

  • Lipoti vave i le ofisa o le misiona atugaluga ona o le le saogalemu, e aofia ai ma se tasi o loo vaavaai mai pea i lou fale ma ua e maua ai le lagona le malupuipuia.

  • Faataga na o nisi o faifeautalai o le itupa tutusa pe a faatagaina i fesuiaiga e faaalu le po i lou fale.

  • Faaalu tupe talafeagai e faasaogalemu ai lou fale. Mo se faataitaiga, sui matauila o moli ua le ola pe a manaomia.

7.9.2

Mama ma le Tausiga

Tausia lou fale i le mama ma le matagofie.

  • Faamama i aso sauniuni (tagai 2.5.1) ma aso taitasi pe a talafeagai ai.

  • Fai se tulaga ina ia puipuia ai mai iniseti (tagai 7.7.4) totonu o lou fale.

  • Ia malamalama le auala e faaaoga saogalemu ai masini, aemaise lava o ogaumu ma ili vevela.

  • Aua nei tausia ni fagafao o soo lava se ituaiga.

O le a asiasia soo lou fale ina ia mautinoa ua lava, saogalemu, ma lelei ona tausia

Matamata i le vitio lenei mo nisi faamatalaga e faatatau i le saogalemu o fale.

7.10

Saogalemu o Femalagaaiga

Mulimuli i taiala saogalemu o loo otooto atu i vaega o loo mulimuli mai.

7.10.1

Savali

Pe a savavali:

  • Pe a mafai, savali agai atu i le itu o loo o mai ai taavale.

  • Savali i nofoaga malamalama pe a pogisa.

  • Fesuisuiai auala ma taimi e te fealuai ai i lau eria. Mulimuli i musumusuga faaleagaga e sui ai lou auala po o faasologa.

Matamata i le vitio lenei mo nisi faamatalaga e faatatau i le saogalemu o femalagaaiga.

7.10.2

Tietie Uila

Pe a tietie i se uila:

  • Mulimuli i tulafono ma taiala o le saogalemu o uila, e aofia ai le pulouina o se pulou saogalemu ua pasiaina, faaaogaina o faata faailo, ma le faaaogaina o faailoga e faaaoga ai lima pe a talafeagai.

  • Ia aua lava e te manatu ua ia te oe pea le avanoa o le auala.

  • Taumafai e aloese mai le tietie uila pe a leaga le tau, pe a tele taavale, ma pe a pogisa. Aloese mai le tietie i le itu e tasi po o le felataai tele.

  • Tausi se mamao saogalemu mai lau soa ae ia mafai ona iloa atu.

  • Tausia lau uila i le lelei e fealuai ai, e aofia ai moli i luma ma tua, ma faata faailo i itu ma tua.

  • Loka saogalemu lau uila pe a le faaaogaina.

Matamata i le vitio lenei mo nisi faamatalaga e faatatau i saogalemu o uila.

7.10.3

Faaaogaina o Taavale

Afai ua tofia oe e te aveina le taavale i le taimi o lau misiona, aveina na o taavale a le misiona. Ina ia aveina se taavale a le misiona, e ao ona laiseneina faaletulafono oe i le atunuu o loo e auauna atu ai, faailoa mai e te malamalama i tulaga faatonuina o taavale a le misiona, ma ia iai se faatagaga mai taitai o le misiona. Ia mulimuli foi i taiala nei:

  • Ia malamalama o oe ma lou soa e gafa taulimaina mo le saogalemu, e le afaina poo ai o loo aveina le taavale.

  • Faaaoga fusipau, ave ma le faaeteete, faaaoga moli i luma i le po ma le ao, ma ia mataala ma iloa lelei pe o oe o le pasese po o le avetaavale.

  • Afai o oe o loo aveina le taavale, aua ona faatosina atu i soo se mea, e aofia ai le faaaogaina o telefoni feaveai po o le masini o le leo i le taavale.

  • Afai o oe o le pasese, fesoasoani i le avetaavale ina ia mataala.

  • Afai o oe o le pasese, tu i se nofoaga saogalemu i fafo o le taavale e faasino i le avetaavale pe a faasolomuli le taavale.

  • Mo le saogalemu ma le gafa taulimaina o le saogalemu, e le tatau ona e aveina lava se isi sei vagana ai isi faifeautalai faamisiona o la oulua itupa tutusa.

  • Faatapulaa le aveina o le taavale i maila ua faatagaina mo oe.

  • Aua le taumafai e faaleaga i le fuamaila poo soo lava se masini mo le saogalemu o le taavale.

  • Tausia le mama ma le lipeaina lelei o le taavale.

  • Afai ua e lavea i le taavale, tagai i le tusi O le a Le Mea e Fai Pe a e i ai i se Faalavelave, e tatau ona iai i totonu o le pusa i le taavale. Faafesootai le tagata o loo tausia taavale a le misiona i se taimi vave pe a saogalemu.

Matamata i le vitio lenei mo nisi faamatalaga e faatatau i le saogalemu o taavale.

7.10.4

Faaaogaina o Femalagaaiga Faalauaitele

Pe a faaaoga femalagaaiga faalauaitele:

  • Faaaoga na o auala o femalagaaiga faalauaitele ua faatagaina mo la outou misiona.

  • Ia faamasani i auala o femalagaaiga faalauaitele ma eria e femalagaai ai.

  • Nofo latalata i le avetaavale pe a mafai. Tuu au ato i ou luma pe a saogalemu ai.

7.11

Sauniga ma Faamanuiaga o le Perisitua

Faaaoga nei taiala faalauaitele mo le faatinoina o sauniga ma faamanuiaga o le perisitua. O faamatalaga o i le vaega lenei ua tuufaatasia mai le mataupu 20 o le Tusitaulima 2: Taitaiga o le Ekalesia (2010).

Mo le silafia: E pei ona faamatalaina atu i vaega o loo mulimuli mai, o nisi o sauniga e tatau ona faamaonia e le taitai perisitua faamalumalu o loo umia ki talafeagai.

7.11.1

Taitaiga i le Perisitua: Taiala Lautele mo E Umia le Perisitua Mekisateko

E tatau ia i latou ua umia le Perisitua Mekisateko ona taumafai ina ia agavaa e maua ma ia taialaina e le Agaga Paia. E tatau ona latou faatinoina ia sauniga taitasi ma faamanuiaga i se faiga mamalu, ia mautinoa e ogatasi ma tulaga manaomia nei:

  1. E ao ona faatinoina i le suafa o Iesu Keriso.

  2. E ao ona faatinoina i le pule o le perisitua.

  3. E ao ona faatinoina i soo se faasologa e tatau ai, e pei o le faaaogaina o upu patino po o le faaaogaina o le suauu paia.

  4. E ao ona faatagaina e le taitai pulefaamalumalu o le o loo umia ia ki e tatau ai (e masani lava o le epikopo, le peresitene o le siteki, po o le peresitene o le misiona), pe afai e tatau ai e tusa ma faatonuga i le mataupu lenei.

O i latou e tuuina atu faamanuiaga o le perisitua, e tautala i upu o le faamanuiaga (“Ou te [po o le matou te] faamanuia ia te oe ina ia …”) ae le o le faia o se tatalo (“Le Tama Faalelagi e, faamolemole ia faamanuia lenei tagata ina ia …”).

Afai e toatele ni uso e auai i se sauniga po o se faamanuiaga, e tuu faamama e tagata taitoatasi lona lima taumatau i luga o le ulu o le tagata (po o lalo ifo o le pepe o loo faamanuiaina) ma lona lima tauagavale i luga o le tauau o le uso o loo i lona itu tauagavale.

E na o uso o loo umia le perisitua e tatau ai ma o loo agavaa, e mafai ona faatinoina ia se sauniga po o se faamanuiaga. E pei ona taialaina ai e le Agaga, ua i ai i epikopo ma peresitene o siteki le faautautaga e faataga ai i latou e umia le perisitua, o ē le o atoatoa ona agavaa mo le malumalu e faatino ai pe auai foi i nisi o sauniga ma faamanuiaga (tagai i le Tusitaulima 2: Taitaiga o le Ekalesia, 20.1.2).

O le valaaulia o ni tagata se toatele o le aiga, uo, ma taitai e fesoasoani atu i se sauniga po o se faamanuiaga ua le fautuaina ona atonu e foliga ese i nisi ma faigata ai ona faatinoina le sauniga.

7.11.2

Papatisoina

O le peresitene o le misiona na te umia ki mo le papatisoina o tagata liliu mai. I lalo o le taitaiga a le taitai pulefaamalumalu, e mafai e se ositaulaga agavaa po o se tasi o loo umia le Perisitua Mekisateko ona faatinoina le sauniga o le papatisoga. Ina ia faia, e tatau ona ia:

  1. Tu i totonu o le vai faatasi ma le tagata o le a papatisoina.

  2. Uuina le tapulima taumatau o le tagata i lona lima tauagavale (mo le faigofie ma le saogalemu); e uu e le tagata o le a papatisoina le tapulima tauagavale o le perisitua i lona lima tauagavale.

  3. Sii lona lima taumatau i le sikuea.

  4. Ta’uina atoa le igoa o le tagata ma faapea atu, “Ona ua tofia au e Iesu Keriso, ou te papatiso ia te oe i le suafa o le Tama, ma le Alo, ma le Agaga Paia. Amene” (Mataupu Faavae ma Feagaiga 20:73).

  5. Tuu atu i le tagata ina ia uu lona isu i lona lima taumatau (ina ia faafaigofie). Ona tuu lea o le lima taumatau o le perisitua ia faamaualuga i le tua o le tagata ma faatofu atoa le tagata i lalo, e aofia ai ma lavalava o le tagata.

  6. Fesoasoani e toe faatu a’e le tagata mai le vai.

E pei ona faamatalaina i le Tusitaulima 2: Taitaiga o le Ekalesia, 20.3.7, e toalua molimau e faamautinoaina ua faataunuuina ma le tatau papatisoga taitasi. E tatau ona toe faia le papatisoga pe afai e le o sa’o lelei le ta’uga o upu e pei ona tuuina mai i le Mataupu Faavae ma Feagaiga 20:73 ma pe afai foi e le o lilofia atoa le tino po o lavalava o le tagata i le vai.

7.11.3

Faamauina

O le peresitene o le misiona e umia ki mo le faamauga o tagata liliu mai. Ae peitai, o le epikopo e vaaia le faataunuuina o faamauga uma. E faamautinoa e ia ua faamauina tagata liliu mai i se sauniga faamanatuga i le uarota latou te nonofo ai, ae sili ai le Aso Sa e sosoo ma o latou papatisoga. E le faamauina ia tagata liliu mai i le sauniga o le papatisoga.

E toatasi pe sili atu i latou e umia le Perisitua Mekisateko e mafai ona auai i se faamauga. Latou te tuu faamama o latou lima i luga o le ulu o le tagata. O le tagata na te faia le sauniga e:

  1. Ta’u le igoa atoa o le tagata.

  2. Ta’u atu faapea o loo faatinoina le sauniga i le pule o le Perisitua Mekisateko.

  3. Faamauina le tagata o se tagata O Le Ekalesia a Iesu Keriso o le Au Paia o Aso e Gata Ai.

  4. Faaaoga ia upu “Talia le Agaga Paia” (e lē o le meaalofa o le Agaga Paia”).

  5. Ta’u atu upu o le faamanuiaga e pei ona taitaiina ai e le Agaga.

  6. Faaiu i le suafa o Iesu Keriso.

7.11.4

Faapaiaina o le Suauu

E toatasi pe sili atu i latou e umia le Perisitua Mekisateko e tatau ona faapaiaina le suauu olive a o lei faaaogaina e faauuina ai e mama’i pe o mafatia foi. E leai se isi suauu e mafai ona faaaoga. Ina ia faapaiaina le suauu, o le ua umia le perisitua e:

  1. Uuina se fagu ua tatala o loo i ai le suauu olive.

  2. Faalupe le Tama Faalelagi.

  3. Ta’u atu faapea o loo ia faia i le pule o le Perisitua Mekisateko.

  4. Faapaiaina le suauu (ae le o le fagu) ma vaetofia mo le faauuina ma le faamanuiaina o e mama’i ma mafatia.

  5. Faaiu i le suafa o Iesu Keriso.

7.11.5

Faauuina o ē Mama’i ma Puapuagatia.

Na tuuina atu e Iesu le pule o le perisitua i Ana Aposetolo “e faamalolo ai ma’i, ma tutuli ai temoni” (Mareko 3:15). O e umia le Perisitua Mekisateko o loo i ai le pule lava lea. Faaaoga soo ma le tatau ai lenei meaalofa.

E na o e umia le Perisitua Mekisateko e mafai ona faauuina e mama’i pe mafatia. E masani lava e toalua pe sili atu i latou o loo umia le perisitua e faauuina le ma’i, ae mafai e le toatasi ona faatinoina uma na o ia le faauuga ma le faamauga o le faamanuiaga pe afai ua tatau ai.

Afai e le o i ai se suauu ua faapaiaina, e mafai lava ona tuuina atu se faamanuiaga e ala i le pule o le perisitua e aunoa ma le faauuina.

O se tane agavaa po o se tamā o loo umiaina le Perisitua Mekisateko e masani lava ona ia faauuina tagata mama’i o lona aiga.

E tatau i uso ona faauu i e mama’i pe a talosaga mai le tagata ma’i po o se tasi o i latou e latalata tele i le tagata ina ia faamanuiaina e tusa ai ma lo latou faatuatua. O e umia le Perisitua Mekisateko e asiasi atu i le falemai, e le tatau ona talosagaina ni avanoa e faauu ai e mama’i.

Afai e talosagaina e se tagata ni faamanuiaga e sili atu i lo le tasi mo le ma’i lava e tasi, e le manaomia e le o umia le perisitua ona toe faauuina i le suauu pe a maea le faamanuiaga muamua. Ae na te tuuina atu se faamanuiaga i le faaee atu o lima ma le pule o le Perisitua.

O le faauuina o e mama’i e lua ona vaega: (1) faauuina i le suauu ma le (2) faamauina o le faauuga.

Faauuina i le Suauu ua Faapaiaina

O le faauuga o le suauu e faia e se tagata e toatasi o loo umia le Perisitua Mekisateko. Na te:

  1. Faatulutulu sina mataua o le suauu paia i luga o le ulu o le tagata.

  2. Tuu faamama ona lima i luga o le ulu o le tagata ma ta’u le igoa atoa o le tagata.

  3. Ta’u atu faapea o loo ia faia i le pule o le Perisitua Mekisateko.

  4. Ta’u atu faapea o loo ia faauuina i le suauu ua uma ona faapaiaina mo le faauuina ma le faamanuiaina o e mama’i ma mafatia.

  5. Faaiu i le suafa o Iesu Keriso.

Faamauina o le Faauuga

E masani lava, e toalua pe sili atu i latou e umia le Perisitua Mekisateko e tuu faamāmā o latou lima i luga o le ulu o le tagata ina ia faamauina le faauuga; ae peitai, e mafai e le tagata e toatasi o umia le Perisitua Mekisateko ona faia le sauniga na o ia lava, pe a tatau ai. Pe a faamauina le faauuga, o le o umia le Perisitua Mekisateko e:

  1. Ta’u le tagata i lona igoa atoa.

  2. Ta’u atu faapea o loo ia faamauina le faauuga e ala i le pule o le Perisitua Mekisateko.

  3. Ta’u atu upu o le faamanuiaga e pei ona taitaiina ai e le Agaga.

  4. Faaiu i le suafa o Iesu Keriso.

7.11.6

Tuuina Atu o Faamanuiaga o le Faamafanafanaga ma Fautuaga

E mafai e i latou o loo umia le Perisitua Mekisateko ona tuuina atu foi ia faamanuiaga o le faamafanafanaga ma fautuaga i isi tagata e talosagaina i latou. Mo nei faamanuiaga, e tuu faamāmā e se toatasi pe sili atu o i latou o loo umia le perisitua, o latou lima i luga o le ulu o le tagata. O le perisitua o loo tuuina atu le faamanuiaga na te:

  1. Ta’u le tagata i lona igoa atoa.

  2. Ta’u atu o le faamanuiaga o loo faatinoina e ala i le pule o le Perisitua Mekisateko.

  3. Tuuina atu upu o le faamanuiaga e pei ona taitaiina ai e le Agaga.

  4. Faaiu i le suafa o Iesu Keriso.

O faifeautalai e tuuina atu faamanuiaga i tagata e ao ona lipoti sao atu faamanuiaga i le epikopo o tagata pe ala atu i le peresitene o le korama a toeaina po o le taitai misiona a le uarota, o le na te tauina atu i le epikopo.