Noqu Veikacivi vaka-Daunivakasala ena Kuoramu ni Dikoni

iTavi eso

E vakavinavinakataka na Turaga na nomu lomasoli mo veiqaravi ena Nona Lotu. E tiko era na ivakamacala raraba ni itavi ena nomu veikacivi.

iNaki ni Matabete i Eroni

Na veikuoramu ni Matabete i Eroni e vukei ira na cauravou mera cakava ka maroroya na veiyalayalati tabu ka vakatitobutaka na nodra saumaki vei Jisu Karisito kei na Nona kosipeli. Na inaki ni dua na kuoramu sai koya na nodra vukei na lewe ni matabete me ra cakacaka vata ka vakaitavi ena Nona cakacaka ni veivakabulai kei na bula vakacerecerei na Kalou. Raica na iVoladusidusi Raraba: Veiqaravi ena Lotu i Jisu Karisito ni Yalododonu Edaidai 10.1, Valenivola Vakosipeli.)

Kuoramu ni Dikoni

Era na lewena na kuoramu ni dikoni na cauravou tekivu ena Janueri ni yabaki era yabaki 12 kina. Ena gauna oqo sa rawa talega nira tabaki mera dikoni kevaka era sa vakarau tu ka kilikili kaya. Na itavi tale eso e oka kina na votai ni sakaramede ka vukea na bisopi ena kena “qaravi na veika vakayago” (Vunau kei na Veiyalayalati 107:68). (Raica na 10.1.3.1.)

Daunivakasala

Eratou na tokoni peresitedi na daunivakasala ni kuoramu ni dikoni ena nona itavi, oka kina na kena liutaki na sasaga ni kuoramu ena vakaitavi ena cakacaka ni veivakabulai kei na bula vakacerecerei ni Kalou; kilai ira ka qaravi ira yadua na lewe ni kuoramu, oka kina o ira era sega ni dau tiko ena soqoni ni kuoramu; vaqaqacotaki ni lewenilotu vou kei ira era lesu mai; vakavulici ira na lewe ni kuoramu ena nodra itavi vakamatabete; kei na tuvanaki kei na liutaki ni bose ni kuoramu (raica na 10.4.2). Me ratou dau sota wasoma na mataveiliutaki ni kuoramu (raica na 10.4.3).

Veiqaravi kei na iTaviqaravi

Eratou na tuvalaka na matabisopi kei na veiliutaki ni kuoramu ni itabagone, ena nodra veitokoni na dauvakasala, na ituvatuva ni veiqaravi kei na itaviqaravi. Oqo ena vukea na kena vakayacori na cakacaka ni veivakabulai kei na bula vakacerecerei. E dodonu mera vakatautauvatataki ena va na iwasewase ni tubu yadudua: vakayalo, veimaliwai, vakayago, kei na vakasama. (Raica na 10.2.1.3.)

iDusidusi kei na Lawatu

Na ikuri ni idusidusi kei na lawatu, oka kina na nodra tokoni na cauravou vakaleqai tu vakayago, ciqomi ni ivakatakilakila ni Gonelalai kei na iTabagone, kei na soqoni ni isolisoli ni lolo, era sa kunei ena iwasewase 10.8 ni iVoladusidusi Raraba.