Ko Hoku Uiuiʻi ko ha Tokoni ʻi he Kōlomu ʻo e Kau Tīkoní

Ngaahi Fatongiá

ʻOku houngaʻia ʻa e ʻEikí ʻi hoʻo loto-fiemālie ke ngāue ʻi Hono Siasí. ʻOku ʻoatu ʻi lalo ha vakai fakalūkufua ki he ngaahi fatongia ki ho uiuiʻí.

Taumuʻa ʻo e Lakanga Taulaʻeiki Faka-ʻĒloné

ʻOku tokoniʻi ʻe he ngaahi kōlomu ʻo e Lakanga Taulaʻeiki Faka-ʻĒloné ʻa e kau talavoú ke nau fakahoko mo tauhi ʻa e ngaahi fuakava toputapú pea mo fakaloloto ʻenau ului kia Sīsū Kalaisi mo ʻEne ongoongoleleí. Ko e taumuʻa ʻo ha kōlomu ke tokoni ki he kau maʻu lakanga fakataulaʻeikí ke nau ngāue fakataha ke kau ʻi he ngāue ʻa e ʻOtuá ki he fakamoʻuí mo e hakeakiʻí. (Vakai, Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 10.1, Gospel Library.)

Kōlomu ʻo e Kau Tīkoní

ʻOku kau ʻa e kau talavoú ki he kōlomu ʻo e kau tīkoní ʻo kamata ʻi Sānuali ʻo e taʻu ʻoku hoko ai honau taʻu 12. ʻI he taimi ko ʻení, ʻoku nau ʻatā foki ke fakanofo ko ha kau tīkoni kapau ʻoku nau mateuteu mo moʻui taau. Ko e ngaahi fatongia kehé ʻoku kau ai hono tufa ʻo e sākalamēnití mo e tokoni ki he pīsopé ʻi hono “fakahoko ʻo e ngaahi meʻa fakatuʻasino kotoa pē” (Tokāteline mo e Ngaahi Fuakava 107:68). (Vakai, 10.1.3.1.)

Tokoni

ʻOku poupouʻi ʻe he ongo tokoni ʻi he kōlomu ʻo e kau tīkoní ʻa e palesitení ʻi hono ngaahi fatongiá, kau ai hono tataki ʻo e ngaahi ngāue fakakōlomú ʻi he kau atu ki he ngāue ʻa e ʻOtuá ki he fakamoʻuí mo e hakeakiʻí; feinga ke ʻiloʻi mo tokoniʻi ʻa e mēmipa takitaha ʻo e kōlomú, kau ai ʻa kinautolu ʻoku ʻikai kau mai ki he ngaahi fakataha fakakōlomú; fakamālohia ʻo e kāingalotu foʻoú mo e foki maí; akoʻi ʻa e kau mēmipa ʻo e kōlomú ʻi honau ngaahi fatongia fakataulaʻeikí; pea mo hono palani mo tataki ʻo e ngaahi fakataha fakakōlomú (vakai, 10.4.2). ʻOku totonu ke fakataha maʻu pē ʻa e kau palesitenisī ʻo e kōlomú (vakai, 10.4.3).

Ngāue Tokoní mo e Ngaahi ʻEkitivitií

ʻE palani ʻe he kau pīsopelikí mo e kau taki fakakōlomu ʻo e toʻu tupú ʻa e ngāue tokoní mo e ngaahi ʻekitivitií, pea poupouʻi ʻe he kau ʻetivaisá. ʻOku totonu ke tokoni ʻeni ke fakahoko ʻa e ngāue ʻo e fakamoʻuí mo e hakeakiʻí. ʻOku totonu ke nau potupotutatau ʻi he ngaahi tafaʻaki ʻe fā ʻo e tupulaki fakafoʻituituí: fakalaumālie, fakasōsiale, fakatuʻasino, mo fakaeʻatamai. (Vakai, 10.2.1.3.)

Ngaahi Fakahinohinó mo e Ngaahi Tuʻutuʻuní

ʻOku maʻu ha ngaahi fakahinohino mo ha ngaahi tuʻutuʻuni lahi ange, kau ai hono poupouʻi ʻo e kau talavou ʻoku faingataʻaʻia fakatuʻasinó, maʻu ʻo e ngaahi fakaʻilonga ʻo e Fānaú mo e Toʻu Tupú, mo hono tānaki ʻo e ngaahi foaki ʻaukaí, ʻi he konga 10.8 ʻo e Tohi Tuʻutuʻuni Fakakātoá.