Koling blong Mi olsem wan Praemeri Presiden

Ol Responsabiliti

Lod i tangkyu from tingting blong yu blong wantem givim seves insaed long Jos blong Hem. Andanit ia i wan sot lukluk blong ol responsabiliti blong koling blong yu.

Stamba Tingting blong Praemeri

Praemeri i helpem ol pikinini blong filim lav blong Papa blong olgeta long Heven; lanem abaot plan blong hapines blong Hem; laef folem gospel blong Jisas Kraes; mo filim, luksave mo mekem folem insperesen blong Tabu Spirit. Praemeri tu i wan taem blong rere blong mekem mo kipim ol kavenan taem ol pikinini oli tekpat long wok blong God blong fasin blong sevem man mo hemia blong kam olsem wan god. (Luk long Jeneral Hanbuk : Stap Givim Seves Insaed long Jos Ia blong Jisas Kraes blong Lata-dei Sent, 12.1.)

Presiden mo Presidensi

Praemeri Presidensi i helpem ol papa mo mama blong mekem rere ol pikinini blong kam insaed mo progres folem kavenan rod ia. Hemia i wan long ol moa impoten responsabiliti blong olgeta. Presiden i givim seves olsem wan memba blong wod kaonsel. Hem mo ol kaonsela blong hem oli mit tugeta oltaem mo tu gat ol miting wetem bisop o kaonsela blong hem ia we i lukaot long Praemeri. Presidensi i lukluk long ol Praemeri miting, wok blong givhan long wanwan pikinini, ol tija mo ol lida, mo ol administretiv nid blong Praemeri. (Luk long 12.3.2.)

Ol Klas mo Singsing Taem

Hem i wan tabu spesel janis blong stap tijim ol pikinini. Ol Praemeri lida oli lavem mo tijim ol pikinini long wei blong Sevya. Ol Praemeri klas, oli oganaesem olgeta folem yia mo namba blong ol tija we oli gat i stap (luk long 12.1.3). Singsing taem i helpem ol pikinini blong oli filim lav blong Papa long Heven, mo blong oli lanem abaot plan blong Hem blong hapines (luk long 12.1.4).

Ol Miting mo Ol Kaonsel

Praemeri presiden i presentem ol nid blong ol pikinini long miting mo taem blong kaonsel wetem ol lida long wod. Hemia i tekem tu gogohed blong ol miting wetem bisop o kaonsela blong hem we i lukluk long ol praemeri, wod kaonsel, presidensi mo sekretari, papa mo mama mo ol narafala. (Luk long 12.3.2.)

Ol Tija mo Ol Lida

Blong stap tijim ol pikinini blong God hem i wan tabu spesel janis. Ol Praemeri presidensi oli givim sapot long ol Praemeri tija mo ol lida long taem blong ol klas, neseri, mo singsing taem (luk long 12.3.5). Praemeri presidensi i givim ol nem long bisoprik blong ol man mo ol woman we bae oli givim seves insaed long Praemeri mo long ol neseri koling.

Ol Praemeri Aktiviti

Ol Praemeri aktiviti lida oli mekem plan blong holem ol aktiviti we oli help blong mekem wok ia blong fasin blong sevem man mo hemia blong kam olsem wan god, i hapen. Ol seves mo ol aktiviti ia, oli mas bildimap ol testemoni, mekem ol famli oli kam strong moa, mo i givim ol janis blong blesem ol narawan. Ol praemeri aktiviti, oli holem olgeta tu taem long wan manis blong ol pikinini we oli gat yia blong 8 kasem 11. (Luk long 12.3.6.)

Sam Moa Gaedlaen mo Polisi

Evri adalt we oli wok wetem ol pikinini mo yut oli mas finisim Proteksen trening blong Ol Pikinini mo Ol Yut, hemia bifo wan manis i pas afta we oli sastenem olgeta (ProtectingChildren.ChurchofJesusChrist.org Ol gaedlaen mo polisi abaot ol pikinini wetem ol spesel nid, ol impoten sefti, ol Pikinini mo ol Yut program, mo ol narafala samting yu save faenem long seksen 12.5 blong Jeneral Hanbuk.