Tō’u pi’ira’a ’ei pāpa’i parau nō te Paraimere o te titi

Te mau hōpoi’a

’Ua māuruuru roa te Fatu nō tō ’oe hina’arora’a e tāvini i roto i tāna ’Ēkālesia. E ’ite mai ’oe i raro nei i te tahi hi’ora’a o te mau hōpoi’a nō tō ’oe pi’ira’a.

Te ’ōpuara’a a te Paraimere

E tauturu te Paraimere i te mau tamari’i ’ia putapū i te here o tō rātou Metua i te ao ra ; ’ia ha’api’i mai nō ni’a i tāna fa’anahora’a nō te ’oa’oa ; ’ia ora i te ’evanelia a Iesu Mesia ; ’e ’ia putapū, ’ia ’ite ’e ’ia rave mai te au i te fa’aurura’a a te Vārua Maita’i. ’Ua riro ato’a te Paraimere ’ei taime nō te fa’aineinera’a, nō te rave ’e nō te ha’apa’o i te mau fafaura’a mo’a ’a ’āmui mai ai te mau tamari’i i roto i te ’ohipa nō te fa’aorara’a ’e te fa’ateiteira’a a te Atua. (Hi’o Buka arata’i rahi : Te rāvera’a i te ’ohipa i roto i Te ’Ēkālesia a Iesu Mesia i te Feiā Mo’a i te mau Mahana Hope’a nei, 12.1).

Pāpa’i parau nō te Paraimere o te titi

E turu te pāpa’i parau nō te Paraimere o te titi i te peresidenira’a Paraimere o te titi. I raro a’e i te arata’ira’a a te peresideni o te Paraimere, e hōpoi’a nā te pāpa’i parau ’ia fa’aineine i te mau tārena nō te mau ’āpo’ora’a a te peresidenira’a, ’ia pāpa’i i te mau parau i te taime o te mau ’āpo’ora’a a te peresidenira’a ’e ’ia hi’opo’a i te mau tāpura ’ohipa, ’ia tāpe’a i te tahi mau pu’e parau ’e ’ia fa’aineine i te mau parau fa’a’ite e anihia mai e te peresidenira’a, e tauturu i te peresidenira’a ’ia fa’aineine i te tāpura faufa’a o te matahiti nō tā rātou ’āvirira’a, ’ia tai’o i te mau ha’amāu’ara’a ’e ’ia hōro’a i te ha’api’ipi’ira’a nō te mau pāpa’i parau o te pāroita, mai tei fa’anahohia (hi’o 6.7.3).

Te mau arata’ira’a ’e te mau fa’aturera’a

E mea tītauhia i te feiā pa’ari ato’a e ’ohipa nei ’e te mau tamari’i ’e te feiā ’āpī, ’ia rave i te ha’api’ipi’ira’a nō ni’a i te Pārurura’a i te mau tamari’i ’e i te feiā ’āpī, i roto i te ’āva’e o tō rātou pāturura’ahia (ProtectingChildren.ChurchofJesusChrist.org) E ’itehia te mau arata’ira’a ’e te mau fa’aturera’a nō te mau tamari’i e mau hina’aro ta’a ’ē tō rātou, te mau tītaura’a o te pārurura’a, te fa’anahora’a nō te mau tamari’i ’e te feiā ’āpī ’e tē vai atu ā, i roto i te tuha’a 12.5 o te Buka arata’i rahi.