Lin b’oqb’al jo’ aj tz’iib’anel sa’ li Komonil re Tenq’ank sa’ li oqech

Li k’a’ru teneb’anb’il

Nasaho’ xch’ool li Qaawa’ naq wan aach’ool chi k’anjelak sa’ lix Iglees a’an. Rub’el a’in wan jun xtusulal li k’a’ru teneb’anb’il sa’ laa b’oqb’al.

Li rajom li Komonil re Tenq’ank

Li Komonil re Tenq’ank a’an jun ch’uut k’uub’anb’il sa’ choxahilal choq’ reheb’ chixjunileb’ li ixq sa’ li Iglees. Li Komonil re Tenq’ank naxtenq’aheb’ li ralal xk’ajol li Dios chixkawresinkil rib’ re sutq’iik rik’in a’an. Li profeet aj Jose Smith kixk’ut naq li rajom li Komonil re Tenq’ank a’an re “xkolb’aleb’ li aamej ut xk’osb’al li rahilal”—xk’eeb’al li tenq’ li naxk’e li Kolonel (chi’ilmanq K’anjenel Hu: Li k’anjelak sa’ lix Iglees li Jesukristo reheb’ laj Santil Paab’anel sa’ Roso’jikeb’ li Kutan, 9.1).

Laj tz’iib’anel sa’ li Komonil re Tenq’ank sa’ li oqech

Chi b’eresinb’il xb’aan li awa’b’ej re li Komonil re Tenq’ank sa’ li oqech, teneb’anb’il sa’ xb’een laj tz’iib’anel xkawresinkil xtusulaleb’ li ch’utam re li awa’b’ejil, xtz’iib’ankil resil li nayeeman ut xk’eeb’al reetal ani k’eeb’il xtaqlankil, xk’uulankil xkomon chik li tz’iib’anb’il hu jo’ b’eresinb’il xb’aan li awa’b’ejil, xtenq’ankil li awa’b’ejil chixkawresinkil chan ru taa’oksimanq li tumin chiru li chihab’, xk’eeb’al reetal chan ru na’oksiman li tumin, ut xk’eeb’al xtzolb’aleb’ laj tz’iib’anel sa’eb’ li teep naq k’eeb’il xtaqlankil (chi’ilmanq 6.7.3).

Eb’ li ch’utam ut eb’ li jolomil ch’uut

Laj tz’iib’anel sa’ li Komonil re Tenq’ank sa’ li oqech nawulak sa’eb’ li ch’utam re li awa’b’ejil ut nak’anjelak rik’in li awa’b’ejil sa’ li jolomil ch’uut reheb’ laj jolominel sa’ li oqech (chi’ilmanq 6.7.1.1).

Li b’eresink ut li chaq’rab’ink

Naru natawman xkomon chik li chaq’rab’ink chirix li Dominkil Tzoleb’aal sa’ li tasal 9.6 re li Jolomil K’anjenel Hu.