Ko Hoku Uiuiʻi ko ha Palesiteni ʻo e Kōlomu ʻo e Kau Akonakí

Ngaahi Fatongiá

ʻOku houngaʻia ʻa e ʻEikí ʻi hoʻo loto-fiemālie ke ngāue ʻi Hono Siasí. ʻOku ʻoatu ʻi lalo ha vakai fakalūkufua ki he ngaahi fatongia ki ho uiuiʻí.

Taumuʻa ʻo e Lakanga Taulaʻeiki Faka-ʻĒloné

ʻOku tokoniʻi ʻe he ngaahi kōlomu ʻo e Lakanga Taulaʻeiki Faka-ʻĒloné ʻa e kau talavoú ke nau fakahoko mo tauhi ʻa e ngaahi fuakava toputapú pea mo fakaloloto ʻenau ului kia Sīsū Kalaisi mo ʻEne ongoongoleleí. Ko e taumuʻa ʻo ha kōlomu ke tokoni ki he kau maʻu lakanga fakataulaʻeikí ke nau ngāue fakataha ke kau ʻi he ngāue ʻa e ʻOtuá ki he fakamoʻuí mo e hakeakiʻí. (Vakai, Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 10.1, Gospel Library.)

Kōlomu ʻo e Kau Akonakí

ʻOku kau ʻa e kau talavoú ki he kōlomu ʻo e kau akonakí ʻo kamata ʻi Sānuali ʻo e taʻu ʻoku hoko ai honau taʻu 14. ʻI he taimi ko ʻení, ʻoku nau ʻatā foki ke fakanofo ko ha kau akonaki kapau ʻoku nau mateuteu mo moʻui taau. ʻOku ʻa e kau akonakí ʻa e ngaahi fatongia tatau mo e kau tīkoní. ʻOku nau toe teuteu foki ʻa e sākalamēnití pea hoko ko ha kau tangata ngāue fakaetauhi. ʻOku ʻi ai mo ha ngaahi fatongia kehe ʻoku fakamatalaʻi ʻi he Tokāteline mo e Ngaahi Fuakava 20:53–59; 84:111. (Vakai, 10.1.3.2.)

Palesiteni

ʻOku kau ʻi he ngaahi fatongia ʻo e palesiteni ʻo e kōlomu ʻo e kau akonakí hono tataki ʻa e ngaahi ngāue fakakōlomú ʻi he kau ki he ngāue ʻa e ʻOtuá ki he fakamoʻuí mo e hakeakiʻí; feinga ke ʻiloʻi mo tokoniʻi ʻa e mēmipa takitaha ʻo e kōlomú, kau ai ʻa kinautolu ʻoku ʻikai kau mai ʻi he ngaahi fakataha fakakōlomú; fakamālohia ʻo e kāingalotu foʻoú mo foki maí; akoʻi ʻa e kau mēmipa ʻo e kōlomú ʻi honau ngaahi fatongia fakataulaʻeikí; pea mo hono palani mo tataki ʻo e ngaahi fakataha fakakōlomú (vakai, 10.4.2). ʻOku totonu ke fakataha maʻu pē ʻa e kau palesitenisī ʻo e kōlomú (vakai, 10.4.3).

Fakataha Alēlea ʻa e Toʻu Tupú

Ko e palesiteni ʻo e kōlomu ʻo e kau akonakí ko ha mēmipa ia ʻo e fakataha alēlea fakauooti ʻa e toʻu tupú. Ko e taumuʻa ʻo e fakataha alēlea fakauooti ʻa e toʻu tupú ke tokoniʻi ʻa e toʻu tupú ke ʻomi ha niʻihi kehe kia Sīsū Kalaisi pea mo tokoni ke fakahoko ʻa e ngāue ʻo e fakamoʻuí mo e hakeakiʻí. ʻOku tokangaʻi ʻe he pīsopé ʻa e fakataha alēlea fakauooti ʻa e toʻu tupú. (Vakai, 10.4.4.)

Ngāue Tokoní mo e Ngaahi ʻEkitivitií

ʻE palani ʻe he kau pīsopelikí mo e kau taki fakakōlomu ʻo e toʻu tupú ʻa e ngāue tokoní mo e ngaahi ʻekitivitií, pea poupouʻi ʻe he kau ʻetivaisá. ʻOku totonu ke tokoni ʻeni ke fakahoko ʻa e ngāue ʻo e fakamoʻuí mo e hakeakiʻí. ʻOku totonu ke nau potupotutatau ʻi he ngaahi tafaʻaki ʻe fā ʻo e tupulaki fakafoʻituituí: fakalaumālie, fakasōsiale, fakatuʻasino, mo fakaeʻatamai. (Vakai, 10.2.1.3.)

Ngaahi Fakahinohinó mo e Ngaahi Tuʻutuʻuní

ʻOku maʻu ha ngaahi fakahinohino mo ha ngaahi tuʻutuʻuni lahi ange, kau ai hono poupouʻi ʻo e kau talavou ʻoku faingataʻaʻia fakatuʻasinó, maʻu ʻo e ngaahi fakaʻilonga ʻo e Fānaú mo e Toʻu Tupú, mo hono tānaki ʻo e ngaahi foaki ʻaukaí, ʻi he konga 10.8 ʻo e Tohi Tuʻutuʻuni Fakakātoá.