Global Visual Library Low-Fidelity Symbol Knockout
O le Au Paia sa nonofo i Efeso o e sa avea ma Tagata o Nuu Ese a o lei liua i latou atonu na lagonaina le faapei o ni “tagata ese ma e ua aumau” (Efeso 2:19) a o latou tapuai faatasi ma Kerisiano Iutaia. Sa faamanatu atu e Paulo i le Au Paia i Efeso ua tuufaatasia i latou e ala ia Iesu Keriso o ni “tagatanuu faatasi … o le aiga o le Atua” (Efeso 2:19). O le ekalesia ua latou auai ai nei sa fausia i luga o le faavae o Keriso ma Ana aposetolo ma perofeta ma sa i ai le mana e faamanuia ai i latou a o latou o mai faatasi i le faatuatua ia Iesu Keriso. O lenei lesona e mafai ona fesoasoani ia te oe e iloa ai ma saili faamanuiaga o loo avanoa ona o loo taitaia e Iesu Keriso Lana Ekalesia i aso nei e ala i perofeta ma aposetolo.
O se lagona o le auai ai
Aisea e ono lagona ai e se tasi e le fetaui ona avea ai ma se tagata O Le Ekalesia a Iesu Keriso o le Au Paia o Aso e Gata Ai?
Afai e lagona e se tasi e le fetaui i latou i le Ekalesia, o le a se fautuaga e te tuuina atu ia i latou?
Mafaufau loloto pe o a ni ou lagona e uiga i le Ekalesia a le Alii. O anafea na e lagonaina ai se faalogona malosi o le avea ai ma se tasi ua auai i le Ekalesia? Na i ai ni taimi na e lagonaina ai lou faaesea o oe lava? O a faamanuiaga e te lagona o loo avanoa i le avea ai o se tagata o le Ekalesia a Keriso? A o e suesue i lenei lesona, vaavaai mo upumoni e uiga i mea na faia e le Alii mo i tatou lea e mafai ona tuufaatasia ai i tatou o ni tagata o Lana Ekalesia.
Talepeina i lalo o papupuni
Ata
Faataitaiga o le Malumalu o Ierusalema vaaiga latalata_161
I le taimi o le Aposetolo o Paulo, o tagata e le o ni Iutaia e liliu mai i le faa-Kerisiano (po o i latou sa avea muamua ma Tagata o Nuu Ese) atonu na lagonaina lo latou le pei o tagata uma o le Ekalesia ma atonu na sili ai lo latou faapei o ni “tagata ese ma e ua aumau” (Efeso 2:19). Mo se faataitaiga, i le malumalu i Ierusalema, semanu e le faatagaina i latou e pasia le “pa vaeloto” (Efeso 2:14) i vaega e sili ona paia o le malumalu lea e na o tagata Iutaia, e aofia ai Kerisiano Iutaia, e mafai ona o atu i ai. E le gata i lea, sa lei ofoina atu muamua i Tagata o Nuu Ese ia faamanuiaga o le talalelei vagana ina ua oo le faaaliga a le Tama Faalelagi ia Peteru (tagai i le Galuega 10).
Sa tusi atu Paulo i le Au Paia i Efeso, o e atonu o ni tagata faatoa liliu mai. Faitau le Efeso 2:12–14, 18–21, ma vaavaai pe na faapefea ona faamanuiaina e le Alii tagata o Efeso. Atonu e aoga le iloa o nei fuaiupu e amata i le valaauliaina e Paulo o nei Au Paia e toe manatua o latou olaga a o lei liua i latou. O le “aiga o le Atua” (fuaiupu 19) o loo taua e Paulo e faasino i le Ekalesia a Iesu Keriso.
O le Efeso 2:19–20 o se fuaitau o le atamai i aoaoga faavae. Mafaufau e faailoga fuaitau o mau o le atamai i aoaoga faavae i se auala iloga ina ia mafai ai ona e maua gofie. O le a e aoao atili e uiga i lenei fuaitau i le lesona e sosoo ai.
Afai e te fia vaai i se vitio e faapupula mai ai le Efeso 2:10–22, mafaufau e matamata le “Ye Are No More Strangers” (2:27), o loo maua i le ChurchofJesusChrist.org.
Na faapefea ona faamanuia e le Alii tagata Efeso?
E ala i Lana Togiola, na aveesea ai e Iesu Keriso papupuni uma na vavaeeseina ai Iutaia mai Tagata Nuu Ese ma vavaeese ai foi Tagata Nuu Ese mai le Atua. Ua le toe tatau ona avea Tagata o Nuu Ese ma tagata Iutaia, ola i le tulafono a Mose, pe peritomeina ina ia auai ai i le Ekalesia. A o latou o mai ia Iesu Keriso ma taliaina Lana talalelei, o i latou o “le aiga o le Atua” (Efeso 2:19)—o se vaega o tagata o le feagaiga a le Atua.
O a ni auala e talepeina ai e le Faaola papupuni i le va o i tatou ma isi?
O le a sou lagona e uiga i le mauaina e tagata uma o le “ala … i le Tama” (fuaiupu 18) e ala i “le toto o Keriso” (fuaiupu 13)?
E faapefea ona e aoteleina faamanuiaga o fuaiupu 19–21 i se tasi e lagonaina le faaesea o i latou lava?
Aisea e te manatu na faatusaina ai e Paulo le Ekalesia i se auaiga po o se aiga?
O le maa tulimanu autu
I ona po o Paulo, o se maa tulimanu autu o se maa tele na faataatia i le tulimanu o se faavae. O maa tulimanu taitasi o se faavae e lagolagoina le tele o le mamafa o le fale ma sa fai ina ia faafesootai i ai puipui. O le taatia ma le faataotoga o isi maa uma sa fuaina mai le maa tulimanu autu.
Ata
Atapue o le maatulimanu o se malumalu
Tusi se faatusa o mea o loo faamatala mai i le Efeso 2:19–21. E mafai ona e faaigoaina lau ata tusi i faaupuga mai le fuaitau o le mau.
O a upumoni e mafai ona tatou aoao mai i le ala na faavaeina ai e Iesu Keriso Lana Ekalesia?
1. Tali fesili nei i totonu o lau api talaaga mo suesuega:
O le a se mea ua e iloa e uiga ia Iesu Keriso lea ua talafeagai ai le faatusatusaga o Ia i se maa tulimanu autu?
O a ni auala e mafai ona tatou fausia ai o tatou olaga i luga o le Faaola ma Ana aposetolo ma perofeta?
E faapefea e le fausiaina o o tatou olaga i luga o le faavae o Iesu Keriso ma Ana perofeta ma aposetolo ona fesoasoani tatou te maua ai se nofoaga ma se faamoemoega i le Ekalesia?
O lou faavae
A o e faia nisi o gaoioiga nei, mafaufau loloto i fesili nei:
O le a la’u mea o fai e fausia ai lo’u olaga i luga o le faavae o perofeta ma aposetolo faatasi ma Iesu Keriso o le maa tulimanu autu? O a ni faamanuiaga ua ou mauaina?
O a ni auala e ono finagalo le Alii ou te fausia atili ai i luga o lenei faavae?
2. Fai ia le itiiti ifo ma le lua o gaoioiga nei:
Faaalu sina taimi e mafaufau loloto ai pe faape‘i lou olaga e aunoa ma perofeta ma aposetolo a le Alii i le lalolagi i aso nei. Vaai faalemafaufau i le olaga e aunoa ma la latou pule mai le Alii, ma a latou aoaoga musuia, taitaiga, ma faataitaiga faaKeriso. Tusi i lau api talaaga mo suesuega pe faapefea ona ese le olaga ma mea o le a e misia.
Mulimuli ane i lana tusi, sa ta’ua ai e Paulo ni faamanuiaga faaopoopo e oo mai e ala i perofeta, aposetolo, ma isi taitai o le Ekalesia. Faitau le Efeso 4:11–14 ma mafaufau e faailoga nei faamanuiaga. Atonu e fesoasoani le iloa o se fai evagelia o se peteriaka, ma o se faifeau e faasino i se taitai o se aulotu, e pei o se peresitene o le siteki po o le itu, epikopo po o le peresitene o le paranesi. Tusi i lalo se auala se tasi pe lua ua e maua ai nei faamanuiaga.
Filifili se autu se tasi pe lua i le Mo Le Malosi o le Autalavou (tamaitusi, 2011). Tusi i lalo ni auala patino na fesoasoani ai lenei taiala mai aposetolo ma perofeta a le Alii ia te oe.
Mafaufau pe na faapefea ona fesoasoani perofeta ma aposetolo ia te oe ia iloa le Faaola ma avea atili ai e faapei o Ia. Tusi ou manatu i totonu o lau api talaaga mo suesuega. O vitio nei (o loo maua i le ChurchofJesusChrist.org) e ono fesoasoani ia te oe e manatunatu ma tusitusi ai.
“Vaega mai le ‘O Le Keriso Soifua: O Le Molimau a le Au Aposetolo’” (2:45)
“O Loo Soifua o Ia: O Molimau ia Iesu Keriso” (2:11)
O le a se mea na e aoaoina?
Ina ia faamaea ai lenei lesona, mafaufau e uiga i mea sa e aoaoina. Mafaufau pe faapefea e le fausiaina o lou olaga i luga o le faavae o perofeta ma aposetolo faatasi ma Iesu Keriso o le maa tulimanu autu ona tuufaatasia oe ma “le auaiga o le Atua” (Efeso 2:19). Mafaufau pe o le a faapefea ona e fausia atili lou olaga i luga o le faavae o perofeta ma aposetolo faatasi ma le Faaola o le maa tulimanu autu.
Tuu i le faitalia: O e Manao e Aoao Atili?
Efeso 2:14. O le a le “pa vaeloto o le vaeluaina” na tautala i ai Paulo?
O le malumalu i Ierusalema sa i ai ni lotoa po o ni eria, ma e na o ni tagata patino e mafai ona ulu atu i lotoa taitasi. Sa faataga ia Tagata o Nuu Ese e ui ae i le matietie o le malumalu ma ulu atu ai i le lotoa i fafo, e igoa o le Lotoa o Tagata o Nuu Ese. Peitai, o lotoa i totonu o le malumalu, sa pupuni mai le oo atu i ai o Tagata o Nuu Ese i se pa vaeloto faapitoa po o se papuipui sa i ai pe tusa ma le tasi le mita le maualuga. Afai e laasia e se Tagata o Nuu Ese tala atu o lenei papuipui, e mafai ona fasiotia o ia. Na maua e le au suesue o fausaga anamua ni poloka maamora se lua na fausia ai lenei papupuni, ma o loo i ai faaupuga faa-Eleni ma le faa-Latina na tosivane e faitauina: “E le tatau ona laasia e se tagata ese talaatu o papupuni o loo siomia ai le malumalu. Po o ai lava e maua o faia o le a tuua’ia o ia lava mo lona oti o le a mulimuli mai” (Richard Neitzel Holzapfel, Eric D. Huntsman, Thomas A. Wayment, Jesus Christ and the World of the New Testament [2006], 160).
Ina ua mavae le malaga lona tolu faafaifeautalai a Paulo, sa tuuaia e nisi o Iutaia i Ierusalema ia Paulo i le aumaia o Tagata o Nuu Ese i talaatu o le papupuni, na mafua ai se vevesi ma iu ai ina pueina faapagota ia Paulo (tagai i le Numera 1:51; Galuega 21:27–29).
Efeso 2:20. Aisea ua faavae ai le Ekalesia a Iesu Keriso i luga o aposetolo ma perofeta, faatasi ai ma Keriso o le maa tulimanu autu?
Na saunoa mai Elder Jeffrey R. Holland o le Korama a Aposetolo e Toasefululua e uiga i le faavae o le Ekalesia a Keriso:
Ata
Atatosi Aloaia o Elder Jeffrey R. Holland. Na pueina ia Ianuari 2018.
I taimi o le Feagaiga Fou, i taimi o le Tusi a Mamona, ma taimi o ona po nei, o nei taitai ua avea ma maa faavae o le Ekalesia moni, ua faatulagaina faataamilo ma mauaina lo latou malosi mai le maa tulimanu autu, “le papa o lo tatou Togiola, o [Iesu] Keriso lea, o le Alo o le Atua” [Helamana 5:12]. … O lea faavae ia Keriso sa i ai ma e avea pea lava o se puipuiga i taimi “e auina mai ai e le tiapolo ana matagi malolosi, ioe, ana ufanafana i le asiosio, ioe, pe a pesi mai ia te oulua ana uatoa uma ma lana afa malosi.”
(Jeffrey R. Holland, “Perofeta, Tagatavaai ma Tali Faaaliga,” Liahona, Nov. 2004, 7)
