18. kafli
Jesús velur postula sína
Dag nokkurn kenndi Jesús fólkinu úr báti á Galíleuvatni. Maður að nafni Pétur átti bátinn.
Pétur og vinir hans höfðu reynt að veiða alla nóttina án þess að fá nokkurn fisk. Eftir að Jesús lauk við kennsluna, sagði hann Pétri að fara með bátinn út á vatnið þar sem það væri dýpra. Síðan sagði hann Pétri og vinum hans að setja út net sín.
Þeir veiddu svo marga fiska að net þeirra byrjuðu að rifna.
Pétur kallaði á vini sína sem voru á öðrum bát og bað þá að koma og hjálpa. Bátarnir voru báðir það hlaðnir fiskum að þeir tóku að sökkva.
Pétur og vinir hans voru undrandi. Þeir vissu að Jesús Kristur hafði komið þessu til leiðar.
Pétur kraup við fætur frelsarans. Hann sagði að hann væri ekki verðugur þess að vera nálægt Jesú. Jesús sagði Pétri að óttast ekki.
Tveir af vinum Péturs, Jakob og Jóhannes, voru bræður. Jesús sagði Pétri, Jakobi og Jóhannesi að fylgja honum og þeir skyldu „menn veiða“. Mennirnir yfirgáfu allt sem þeir áttu og fóru með Jesú. Frelsarinn bauð einnig fleiri mönnum að fylgja sér.
Jesús valdi tólf postula til að leiða kirkju sína. Hann baðst fyrir alla nóttina svo hann myndi velja réttu mennina. Næsta morgun valdi hann og vígði tólf menn. Hann veitti þeim prestdæmið og gaf þeim vald til að vera postular.
Postularnir fóru til margra borga. Þeir kenndu fagnaðarerindið og læknuðu fólk. Þeir komu til baka og sögðu Jesú frá því sem þeir höfðu gert.