2 Mga Hari 5

Eliseo Miayo ni Naaman

Sa unsang paagi ang talagsaong milagro magsunod sa yano nga pagtuo

Sa layong dapit sa Siria nagpuyo ang usa ka tawo nga ginganlan og Naaman. Usa siya ka bantogan nga kapitan sa kasundalohan sa Siria. Apan si Naaman adunay ngulngol kaayo nga sakit sa panit nga gitawag og sanla.

2 Mga Hari 5:1

Ang sulugoon sa asawa ni Naaman usa ka Israelita nga batang babaye. Ang maong batang babaye adunay hugot nga pagtuo sa Ginoo. Miingon siya nga kon si Naaman makabisita sa propeta nga si Eliseo, si Naaman maayo gikan sa iyang sakit.

2 Mga Hari 5:2–4

Si Naaman mibiyahe og layo aron sa pagpangita ni Eliseo. Naghunahuna si Naaman nga mamaayo siya pinaagi sa talagsaong milagro.

2 Mga Hari 5:5–8

Miadto si Naaman sa balay ni Eliseo dala ang iyang mga sulugoon, mga kabayo, ug mga karwahe. Si Eliseo mipadala sa iyang sulugoon aron ihatag kang Naaman ang mga instruksiyon sa Ginoo. Ang Ginoo moayo ni Naaman kon hugasan niya ang iyang kaugalingon sa Suba sa Jordan og kapito ka higayon.

2 Mga Hari 5:9–10

Nasuko si Naaman tungod kay gusto siya nga ang propeta sa Ginoo mogawas ug moayo niya diha-diha dayon. Nagbagulbol si Naaman nga ang Suba sa Jordan dili sama kamaayo sa dagkong mga suba sa Siria.

2 Mga Hari 5:11–12

Apan ang mga sulugoon ni Naaman nangutana nganong si Naaman dili makahimo sa ingon ka gamay nga buluhaton. Bisan og kini walay hinungdan para ni Naaman, ang propeta sa Ginoo mihangyo kaniya sa paghimo niini.

2 Mga Hari 5:13

Si Naaman mihunong sa pagkamapahitas-on ug naminaw sa iyang mga sulugoon. Gihugasan niya ang iyang kaugalingon sa Suba sa Jordan og kapito ka higayon. Dayon ang Ginoo miayo ni Naaman, sama sa giingon ni Eliseo. Nasayod si Naaman nga si Eliseo propeta ug nga ang Ginoo tinuod.

2 Mga Hari 5:14–15