Te Pāsa a te ’āti Iuda

Pāruruhia e te Fatu

’Aita Phara’o i vaiiho i te ’āti ’Īserā’ela ’ia haere, nō reira ’ua parau te Fatu ia Mose ē e tono mai ’oia i te hō’ē ma’i hope’a. E pohe te mau matahiapo o te mau ’utuāfare ato’a i roto i te fenua nō ’Aiphiti, ’oia ato’a ho’i te mau matahiapo o tā rātou mau ’ānimala.

Exodo 11:1, 4–10

’Ua fafau te Fatu ē mai te mea e pe’e te ’āti ’Īserā’ela i tāna mau arata’ira’a, e nā ni’a atu te ma’i ia rātou ’e e’ita rātou e ha’amāuiuihia.

Exodo 12:3, 13, 23

E ta’ata e pēni ra i te pou ’ūputa ’e te te’a i ni’a a’e, tē māta’ita’i ra te mau tamari’i

’Ua parau te Fatu i te ’utuāfare ’Īserā’ela tāta’itahi ’ia ha’atusia i te hō’ē ’ārenio oni maita’i roa ’e ’ia pēni i te toto o te ’ārenio i ni’a i te pou ’ūputa ’e te te’a i ni’a a’e o tō rātou mau fare.

Exodo 12:4–7

’Ua parau te Fatu i te ’āti ’Īserā’ela ’ia tunu i te ’ārenio ’e ’ia ’amu vitiviti i te reira. ’A tāmā’a ai rātou, e mea ti’a ia rātou ’ia ’ahuhia ’e ’ia ineine nō te fa’aru’e i tō rātou fare. ’Ua parau te Fatu ē mai te mea e rave te ’āti ’Īserā’ela i teie mau mea, e pāruruhia tā rātou mau matahiapo i te ma’i pohe.

Exodo 12:8–11

Mai tā te Fatu i fa’aara, ’ua tae mai ra te ’ati. ’Ua pohe te tā’āto’ara’a o te mau matahiapo i ’Aiphiti, ’e tae noa atu te tamaiti matahiapo a Phara’o. ’Ua nā ni’a a’era te ma’i i te mau fare tāta’itahi tei pēnihia te toto o te ’ārenio i te mau pou ’ūputa ’e te te’a i ni’a a’e. ’Ua fa’aorahia te mau matahiapo o te ’āti ’Īserā’ela nō te mea ’ua ha’apa’o rātou i te parau a te Fatu.

Exodo 12:12–13, 29–30

Tē ’oto ra ’o Phara’o ’e tē parau ra ’oia ia Mose rāua ’o Aarona ’ia fa’areva

I te ’itera’a ’o Phara’o i tāna iho tamaiti i te pohera’a nō teie ma’i rahi, ’ua parau ’oia ia Mose rāua ’o Aarona ’ia rave i te mau ’āti ’Īserā’ela ato’a ’e ’ia fa’aru’e ia ’Aiphiti.

Exodo 12:31–33

’Ua riri ’o Phara’o ’e ’ua tono atu ’oia i te nu’u

’Ua fa’aru’e te ’āti ’Īserā’ela, ’ua riri rā ’o Phara’o. ’Ua ha’aputuputu ’oia i tāna nu’u ’e te mau pere’o’o ’e ’ua a’ua’u atu ra nā muri i te ’āti ’Īserā’ela.

Exodo 12:37–41 ; 14:5–8

Tō te nu’u a’ua’ura’a i te ’āti ’Īserā’ela

’Ua pūhapa te ’āti ’Īserā’ela i te miti ’Ute’ute. ’Aita i maoro roa ’ua ha’afātata ’o Phara’o ’e tōna nu’u ia rātou. I te ’itera’a te ’āti ’Īserā’ela i te taera’a mai o te mau ’āti ’Aiphiti, ’ua mata’u rātou. ’Ua parau rā ’o Mose i te ’āti ’Īserā’ela ē e pāruru te Fatu ia rātou.

Exodo 14:9–14

’Ua amo ’o Mose i tāna turu to’oto’o i ni’a, tē vāhi ra te miti ’Ute’ute

Tē fātata noa mai nei te mau ’āti ’Aiphiti, ’ua parau te Fatu ia Mose ’ia fa’ateitei i tāna turu to’oto’o. ’Ua nā reira Mose, ’e ’ua vāhi te Fatu i te miti. ’Ua haere te ’āti ’Īserā’ela nā roto i te miti ’Ute’ute ma te ’ē’a pāpāmarō. ’Ua ma’ue rātou i te ātea ia Phara’o ’e tāna nu’u.

Exodo 14:15–16, 21–22

Te topara’a te miti ’Ute’ute i ni’a i te nu’u nō ’Aiphiti

’Ua a’ua’u te nu’u a ’Aiphiti i te mau ’āti ’Īserā’ela. I te tāpaera’a te mau ’āti ’Īserā’ela i te tahi atu pae’au o te moana, ’ua tu’u mai te Fatu i te pape ’ia pou mai i raro. ’Ua paremo te nu’u fa’ehau a Phara’o i roto i te miti.

Exodo 14:23–30

’E inaha ’ua ti’amā te mau ’āti ’Īserā’ela. ’Ua hīmene rātou i te mau hīmene, ’ua ’ori ’e ’ua ha’amāuruuru i te Fatu. ’Ua ha’amana’o noa rātou i te Pāsa a te ’āti Iuda ’a fa’aora ai te Fatu ia rātou ’e ’a arata’i ai ia rātou i rāpae’au ia ’Aiphiti.

Exodo 14:31 ; 15:1–22