“Reyna Ester,” Mga Istorya sa Daang Tugon (2022)
“Reyna Ester,” Mga Istorya sa Daang Tugon
Ester 2–5; 7–9
Reyna Ester
Maisug sa panahon nga makuyaw
Ang pipila sa mga Israelihanon gitawag og mga Judeo. Si Ester usa ka Judeo kinsa mipuyo sa Persia. Ang iyang mga ginikanan namatay, busa ang iyang ig-agaw nga si Mardocheo miamuma kaniya. Gidapit siya ngadto sa palasyo sa hari uban sa batan-ong mga babaye sa gingharian. Ang hari gusto og bag-ong reyna ug gipili niya si Ester.
Ang hari dihay usa ka sulugoon nga gihinganlan og Aman kinsa nakabaton og dakong gahum. Gitabangan ni Aman ang hari sa pagmando sa yuta. Gihimo sa hari nga ang tanan moyukbo ngadto ni Aman.
Apan si Mardocheo dili moyukbo ngadto ni Aman. Si Mardocheo moyukbo lamang ngadto sa Ginoo. Kini nakapasuko ni Aman. Gusto niyang silutan si Mardocheo ug ang tanan nga mga Judeo.
Gisultihan ni Aman ang hari nga ang mga Judeo wala mosunod sa mga balaod sa hari. Busa si Aman gipahimo sa hari og bag-ong balaod: sa usa ka piho nga adlaw, tanan nga mga Judeo pagapatyon.
Si Mardocheo mihangyo ni Ester sa pagpakigsulti ngadto sa hari. Ang hari makausab sa balaod ni Aman ug maluwas ang mga Judeo. Apan si Ester nahadlok. Usahay ang hari mopatay og mga tawo kinsa moduol sa pagpakigsulti kaniya nga walay pagdapit.
Si Mardocheo mihangyo ni Ester sa paghunahuna mahitungod sa mga Judeo kinsa pagapatyon. Miingon si Mardocheo nga ang Ginoo tingali gani mibutang ni Ester diha sa palasyo sa hari aron sa pagluwas sa mga Judeo.
Nahibalo si Ester nga siya kinahanglan gayud nga makigsulti ngadto sa hari, bisan kon kini mipasabut nga siya mahimong pagapatyon. Gihangyo ni Ester ang tanang mga Judeo ug ang iyang mga sulugoon sa pagpuasa uban kaniya.
Human magpuasa sulod sa tulo ka mga adlaw, giandam ni Ester ang iyang kaugalingon ug miadto sa pakigkita sa hari.
Sa dihang siya miduol sa hari, gitunol sa hari ang iyang setro. Kini mipasabut nga ang hari nalipay sa pagkakita kaniya ug dili siya ipapatay. Nangutana siya kon unsa ang iyang tuyo. Gisultihan ni Ester ang hari nga ang iyang mga katawhan namiligro. Tungod sa balaod ni Aman, siya ug ang tanan nga mga Judeo diha sa gingharian ipapatay.
Ang hari nasuko ni Aman ug gipapatay siya. Ang hari mihimo og bag-ong balaod nga mipanalipod sa mga Judeo. Karon sila gitugutan sa pagpanalipod sa ilang mga kaugalingon kon bisan kinsa mosulay sa pagpasakit kanila.
Ang hugot nga pagtuo ni Ester sa Ginoo ug ang iyang kaisug sa pagpakigsulti sa hari miluwas sa iyang mga katawhan. Imbis kamatayon ug kasubo, dihay kumbira. Ang mga Judeo nagsaulog.