Sopun 3

Ewe Tingoren Papatias me Kopunguno

Nongonongun Afanafan

Kich meinisin noun ewe Sam won Nang. Sia fen feitto ngeni fonufan an epwe wor rech ewe tufichin kaeo, marita, me anapano ach sipwe ussun I pwe sipwe tongeni niwin ngeni mwen mesen I (nengeni Moses 1:39). Sise tongeni sipwe ussun I ika niwiniti I nge ese wor aninis seni nang. Samach won Nang a tinato Noun we, Jises Kraist, an epwe achasefan fan itach me ataeno ewe fofon mano (nengeni 3 Nifai 27:13–22).

Sia angei akoko ngeni an Kraist ewe manamanen angasano ren ach anganga nuku non I ren aier, papatais, angei ewe niffangen ewe Ngun mi Fel seni ach kopunguno chon memper, me nikitu tori soponon. Aponueta ewe pwonen papatais ina ewe aewin kinikin non ochufengeni inisich ngeni Kot pwe ewe Ngun mi Fel a tongeni nimeti, apochokuna, me emwirinouono nonomuch. Ach sia sinei ei mokutukutun epinono a iteni upusefan non pekin ngun. (Nengeni 2 Nifai 31:7, 13–14, 20–21; Mosaia 5:1–7; 18; 27:24; 3 Nifai 27:20; John 3:5.)

Upusefan non pekin ngun a poputa nupwen sia papatais ren konik me ewe Ngun. Papatais ew apwapwan me epinukunukun angangepin. Nupwen sia papatais fiti ew netipechou me netip niamam, sia poputani manauach non ew minefon nikinik fiti an Kot manamanen aninis. Mwirin ach sia papatais me kopunguno, sia tongeni soposopono ne pochokunono ren ach sia nimenimoch ne angei ewe sakramen. (Nengeni 2 Nifai 31:13; Mosaia 18:7–16; Moronai 6:2; Doctrine and Covenants 20:37.)

Atoura ewe Tingor

Nupwen ka mefi emwen seni ewe Ngun, kokorato aramas repwe papatais me kopunguno. Ei mi tongeni fis fansoun ese nifinifin kewe nesen.

Osukuna ewe afanafanen papatais me anisi aramas repwe weweiti ewe afanafanen Kraist (nengeni nesen 3). Osukuna ussun ewe auchean me apwapwan ewe pwonen papatais, ren ach sipwe angei ew omusomusen ekkewe tipis, me ren ach sipwe angei ewe niffangen ewe Ngun mi Fel ren ach sia kopunguno.

Amonata aramas ren ewe tingorun papatais ren om kopwe tumunochu repwe weweiti met ka fen osukuna me ewe pwon mi pin repwe fori. Ekkewe pwonen papatais ussun mi tettenitiw:

• Mochen wata woch iten Jises Kraist.

• Aponueta ekkewe annukun Kot.

• Angang ngeni Kot me ekkoch.

• Nikitu tori Nesoponon. (Nengeni nesen 4.)

Meni kopwe aporousa ekkewe mi tettenitiw:

“Nupwen sia papatais, sia ‘pwarata mwen [Kot] pwe [sia] fen tonong non ew pwon mi pin fiti i, pwe [kich] sipwe angang ngeni i me aneasochisi an kewe annuk.’ Nupwen sia fori ei pwon mi pin, I a pwon pwe I epwe wau ngunun we fan chommong won [kich]’ (Mosaia 18:10).”

Om ewe tingoren kopwe papatais epwe fatafatoch me wenechar. Meni kopwe apasa:

“Kopwe tapweno mwirin ewe minen appiru an Jises Kraist ren om kopwe papatais me ren emon mi seikita an epwe fori ei angangepin? Aupwe anisuk ne amonata ren papatais. Aua nuku pwe ka tongeni moneta non [ran]. Kopwe amonata om kopwe papatais non ena ran?”

Ussun ren ese nifinifin tingor ka atoura, pwonei ekkewe watten feioch aramas repwe angei nupwen ra etiwa ewe tingor ar repwe papatais me aponueta ekkewe pwon mi fiti. Apasa om kapasen pwarata ussun ekkei feioch.

Osukuna pwe papatais me kopunguno esap ir omuchunon neni sipwe no ngeni. Nge fen, ir ew neni won ewe anen ekkesiwin ewe a wato unusen epinukunuk, pwapwa, me ewe manamanen Kot non manauen emon aramas (nengeni Mosaia 27:25–26). Mwirin an aramas ra papatais me kopunguno, ra tongeni mwonengeni ar repwe epinipinino ren ewe Ngun nupwen ra fefeita non ewe anen pwon.

Ika mi tufich, kokkorato ekana ka osukuner ar repwe fiti ew angangen papatais me ew mwichen sakramen fansoun emon a kopunguno.

Ekkoch ekiek ren ewe Tingoren Papatais

Ekieki kopwe anneani ewe uruon pukefel ussun an Jises papatais (nengeni Matthew 3:13–17). Ka pwan tongeni fichi ewe videon non Paipen a anapanapa an ewe Chon Amanau papatais ika ewe Puken Mormon video ren an noun ewe Chon Amanau kewe chon kaeo papatais.

Ka pwan tongeni anneani an Nifai uruo ussun an Jises papatais (nengeni 2 Nifai 31:4–12). Anneani ewe porousen ewe papatais an Jises Kraist a tongeni apochokuna ekkana ra kaeo.

Kaeo Pukefel

Kaeo ekkewe uwokisin pukefel mi tetenitiw:

• 2 Nifai 31:4–12

• Moroni 6

• Doctrine and Covenants 20:37; 22

• Matthew 3:13–17

Makkei ew mochomochen porousen met ka fen kaeo.

Osukun non Pungun me Tichikin

Meni Samach non Nang epwe efeiochu ekkewe aramas ka kuna fiti auchean monetar non pekin ngun. Ekkei mokutukutun eipweip ra fen angei meni ra fen amonereta ar repwe fori ekkewe pwon mi pin ngeni Kot ren papatais non Ewe Mwichefenin Jises Kraist ren Aramas mi Pin non Fansoun Soponon.