“Mataupu 3: O Le Valaaulia ina ia Papatiso ma Faamauina,” Tala’i La’u Talalelei: O Se Taiala i le Faasoaina Atu o le Talalelei a Iesu Keriso (2023)
“O Le Valaaulia ina ia Papatisoina ma Faamauina,” Tala’i La’u Talalelei
Mataupu 3
O Le Valaaulia ina ia Papatisoina ma Faamauina
Faavae Faale-Aoaoga Faavae
O i tatou uma o fanau a le Tama Faalelagi. Ua tatou o mai i le lalolagi ina ia maua le avanoa e aoao ai, tuputupu ae, ma avea atili e faapei o Ia ina ia mafai ai ona tatou toe foi atu i Lona afioaga (tagai i le Mose 1:39). E le mafai ona tatou avea faapei o Ia pe toe foi atu ia te Ia e aunoa ma se fesoasoani faalelagi. Na auina mai e lo tatou Tama Faalelagi Lona Alo, o Iesu Keriso, e togiola mo i tatou ma motusia noataga o le oti (tagai i le 3 Nifae 27:13–22).
Tatou te maua le avanoa i le mana togiola o Keriso e ala i le faatinoina o le faatuatua ia te Ia lea e oo atu ai i le salamo, papatisoina, mauaina o le meaalofa o le Agaga Paia e ala i le faamauga, ma le tumau e oo i le iuga. O le tausia o le feagaiga o le papatisoga o le laasaga muamua lea i le fusia faatasi o i tatou lava i le Atua ina ia mafai ai e le Agaga Paia ona faamama, faamalosia, ma suia o tatou natura mo le lelei sili atu. O le aafia ai i lenei faatosinaga faapaiaina ua ta’ua o le toefanauina faaleagaga. (Tagai i le 2 Nifae 31:7, 13–14, 20–21; Mosaea 5:1–7; 18; 27:24; 3 Nifae 27:20; Ioane 3:5.)
E amata le toefanauina faaleagaga pe a papatisoina i tatou i le vai ma le Agaga. O le papatisoga o se sauniga fiafia ma le faamoemoe. Pe a papatisoina i tatou ma se loto momomo ma le agaga salamo, tatou te amata se ola fou faatasi ma le mana lagolago o le Atua. A uma ona papatisoina ma faamauina i tatou, e mafai ona faaauau pea ona faamalosia i tatou e ala i le aai ma feinu ma le agavaa i le faamanatuga. (Tagai i le 2 Nifae 31:13; Mosaea 18:7–16; Moronae 6:2; Mataupu Faavae ma Feagaiga 20:37.)
Tuuina Atu o le Valaaulia
A o e lagonaina le taialaina e le Agaga, valaaulia tagata ina ia papatisoina ma faamauina. Atonu e tupu lenei mea i le taimi o soo se lesona.
Aoao atu le aoaoga faavae o le papatisoga ma fesoasoani i tagata ia malamalama i le aoaoga faavae a Keriso (tagai i le lesona 3). Aoao atu e uiga i le taua ma le olioli o le feagaiga o le papatisoga, o le mauaina o se faamagaloga o agasala, ma le mauaina o le meaalofa o le Agaga Paia e ala i le faamauga.
Saunia tagata mo le valaaulia o le papatisoga e ala i le faamautinoa ua latou malamalama i mea sa e aoaoina atu ma le feagaiga o le a latou osia. O le feagaiga o le papatisoga e faapenei:
-
Ia naunau e tauave i o latou luga le suafa o Iesu Keriso.
-
Tausi poloaiga a le Atua.
-
Auauna atu i le Atua ma isi.
-
Tumau e oo i le iuga. (Tagai i le lesona 4.)
E mafai ona e faasoa atu mea nei:
“Pe a papatisoina i tatou, tatou te ‘molimau atu i luma [o le Atua] ua tatou ulu atu i se feagaiga ma ia, o le a [tatou] auauna atu ia te ia ma tausi ana poloaiga.’ A o tatou osia lenei feagaiga, ua Ia folafola mai o le a Ia ‘sasaa tele mai lona Agaga i luga o [i tatou]’ (Mosaea 18:10).”
O lau valaaulia ina ia papatisoina e tatau ona patino ma tuusa’o. E mafai ona e fai atu:
“Pe o le a e mulimuli ea i le faataitaiga a Iesu Keriso e ala i le papatisoina e se tasi ua faauuina e faia lenei sauniga? O le a matou fesoasoani ia te oe e saunia mo le papatisoga. Matou te talitonu e mafai ona e saunia i le [aso]. E mafai la ona e saunia ina ia papatisoina i le aso lena?”
E pei lava o soo se valaaulia e te tuuina atu, folafola atu faamanuiaga sili o le a maua e tagata a o latou taliaina le valaaulia ina ia papatisoina ma tausia feagaiga e o faatasi ai. Faasoa atu lau molimau e uiga i nei faamanuiaga.
Aoao atu o le papatisoga ma le faamauga e le o se taunuuga faaiu. Ae, o i nei mea ua na o se vaega i luga o le ala o le liua lea e aumaia ai le faamoemoe, olioli, ma le mana o le Atua i le olaga o se tagata (tagai i le Mosaea 27:25–26). A uma ona papatiso ma faamauina tagata, e mafai ona latou tulimatai atu i le faapaiaina e le Agaga a o latou alualu i luma i luga o le ala o feagaiga.
Afai e mafai, ia valaaulia tagata sailiili i se sauniga o le papatisoga ma se sauniga faamanatuga lea e faamauina ai se tasi.
O Manatu mo le Valaaulia Ina Ia Papatiso.
Mafaufau e faitau le tala faatusi paia o le papatisoina o Iesu (tagai i le Mataio 3:13–17). E mafai foi ona e faaali atu le vitio o le Tusi Paia o loo faaalia ai le papatisoga o le Faaola po o le vitio o le Tusi a Mamona o soo o le Faaola o loo papatiso.
E mafai foi ona e faitau i le tala a Nifae e uiga i le papatisoga o Iesu (tagai i le 2 Nifae 31:4–12). O le faitauina o tala o le papatisoga o Iesu Keriso e mafai ona faamalosia ai i latou o loo aoaoina.
Suesuega o Tusitusiga Paia
Suesue i mau nei:
Tusi se aotelega o mea ua e aoaoina.