« Pene 3 : Te anira’a ’ia fa’ari’i i te bāpetizora’a ’e te ha’amaura’a », ’Ia poro haere i tā’u nei ’Evanelia : E arata’i nō te fa’a’ite i te ’evanelia a Iesu Mesia (2023)
« Te anira’a ’ia fa’ari’i i te bāpetizora’a ’e te ha’amaura’a », ’Ia poro haere i tā’u nei ’Evanelia
Pene 3
Te anira’a ’ia fa’ari’i i te bāpetizora’a ’e te ha’amaura’a
Ha’api’ira’a tumu niu
E mau tamari’i tātou pā’āto’a nā te Metua i te ao ra. ’Ua haere mai tātou i te fenua nei nō te fāna’o i te rāve’a ’ia ha’api’i, ’ia tupu i te rahi ’e ’ia riro rahi atu ā mai iāna ra te huru ’ia ti’a ia tātou ’ia ho’i i mua i tōna aro (hi’o Mose 1:39). E’ita tātou e nehenehe e riro mai iāna te huru ’e ’aore rā e ho’i iāna ra ma te tauturu ’ore nō te ra’i mai. ’Ua tono mai te Metua i te ao ra i tāna Tamaiti, ’o Iesu Mesia, nō te ’aufau nō tātou ’e nō te ’ōfati i te mau tāpe’a o te pohe (hi’o 3 Nephi 27:13–22).
E roa’a ia tātou te mana fa’aora o te Mesia nā roto i te fa’a’ohipara’a i te fa’aro’o iāna nō te tātarahapa, nō te bāpetizo ia tātou, nō te fa’ari’i i te hōro’a nō te Vārua Maita’i nā roto i te ha’amaura’a, ’e nō te fa’a’oroma’i ē tae noa atu i te hope’a. ’Ua riro te ha’apa’ora’a i te fafaura’a o te bāpetizora’a ’ei ta’ahira’a mātāmua nō te tā’amu ia tātou i te Atua ’ia ti’a i te Vārua Maita’i ’ia tāmā, ’ia ha’apūai ’e ’ia taui i tō tātou nātura ’ei mea maita’i roa a’e. ’Ua parauhia te ’itera’a i teie mana ha’amo’ara’a te fānau-fa’ahou-ra’a pae vārua. (Hi’o 2 Nephi 31:7, 13–14, 20–21 ; Mosia 5:1–7 ; 18 ; 27:24 ; 3 Nephi 27:20 ; Ioane 3:5.)
E ha’amata te fānau-fa’ahou-ra’a vārua ’ia bāpetizo-ana’e-hia tātou i te pape ’e i te Vārua. ’Ua riro te bāpetizoraa ’ei ’ōro’a ’oa’oa ’e te ti’aturihia. ’Ia bāpetizohia tātou nā roto i te ’ā’au tātarahapa ’e te vārua marū, e ha’amata tātou i te hō’ē orara’a ’āpī nā roto i te mana pāturu o te Atua. I muri a’e i tō tātou bāpetizora’a ’e te ha’amaura’a, e nehenehe tātou e tāmau noa i te ha’apūaihia nā roto i te ’amura’a i te ’ōro’a ma te ti’amā. (Hi’o 2 Nephi 31:13 ; Mosia 18:7–16 ; Moroni 6:2 ; Te Ha’api’ira’a Tumu ’e te mau Fafaura’a 20:37.)
Fa’arahira’a i te tītaura’a-manihini
’Ia fa’ari’i ana’e ’oe i te arata’ira’a a te Vārua, ’a ani i te ta’ata ’ia bāpetizo ’e ’ia ha’amauhia. E nehenehe te reira e tupu i roto i te mau huru ha’api’ira’a ato’a.
’A ha’api’i i te ta’ata i te ha’api’ira’a tumu nō te bāpetizora’a ’e ’a tauturu ia rātou ’ia māramarama i te ha’api’ira’a tumu a te Mesia (hi’o ha’api’ira’a 3). ’A ha’api’i i te faufa’a ’e i te ’oa’oa o te fafaura’a o te bāpetizora’a, te fa’ari’ira’a i te fa’a’orera’a hara, ’e te fa’ari’ira’a i te hōro’a nō te Vārua Maita’i nā roto i te ha’amaura’a.
’A fa’aineine i te mau ta’ata ’ia fa’ari’i i te anira’a ’ia bāpetizo nā roto i te ha’apāpūra’a e ’ua ta’a maita’i ia rātou te mea tā ’oe i ha’api’i ’e te fafaura’a tā rātou e rave. Teie i muri nei te fafaura’a nō te bāpetizora’a :
-
E ineine i te rave i ni’a ia tātou i te i’oa o Iesu Mesia.
-
E ha’apa’o i te mau fa’auera’a a te Atua.
-
E tāvini i te Atua ’e ia vētahi ’ē.
-
E fa’a’oroma’i ē tae noa atu i te hope’a. (Hi’o i te ha’api’ira’a 4.)
E nehenehe ’outou e fa’a’ite i teie mau mea i muri nei :
« ’Ia bāpetizohia tātou, ‘tē fa’a’ite pāpū nei tātou i mua i te [Atua] ē, ’ua fafau [tātou] i te hō’ē fafaura’a iāna, ’e e tāvini [tātou] iāna ’e e ha’apa’o ho’i i tāna ra mau fa’auera’a.’ Mai te mea e rave tātou i te reira fafaura’a, e fafau mai ’oia ē e ‘nīni’i rahi mai ’oia i tōna Vārua i ni’a ia [tātou]’ (Mosia 18:10). »
’Ia pāpū ’e te ’āfaro tā ’oe anira’a ’ia bāpetizo e ti’a ai. E nehenehe tā ’oe e parau :
« E pe’e ānei ’oe i te hi’ora’a o Iesu Mesia i te bāpetizora’a ia ’oe, ’e nā te hō’ē ta’ata tei fa’atōro’ahia e rave i teie ’ōro’a ? E tauturu mātou ia ’oe ’ia fa’aineine nō tō ’oe bāpetizora’a. Tē mana’o nei māua e nehenehe ’oe e ineine nō te [tai’o mahana]. E fa’aineine ānei ’oe nō te bāpetizo ia ’oe i terā tai’o mahana ? »
Mai te mau tītaura’a manihini ato’a tā ’oe e tu’u atu, ’a parau fafau atu i te mau ha’amaita’ira’a rahi tā te ta’ata e fa’ari’i mai te mea e fa’ari’i rātou i te anira’a ’ia bāpetizohia rātou ’e ’ia ha’apa’o i te mau fafaura’a ’o tē au mai. ’A fa’a’ite i tō ’oe ’itera’a pāpū nō teie mau ha’amaita’ira’a.
’A ha’api’i i te ta’ata ē e ’ere te bāpetizora’a ’e te ha’amaura’a i te tāpaera’a hope’a. ’Ua riro rā ’ei rēni arata’i i ni’a i te ’ē’a nō te fa’afāriura’a ’o tē hōpoi rahi atu ā i te tīa’ira’a, te ’oa’oa ’e te mana o te Atua i roto i te orara’a o te hō’ē ta’ata (hi’o Mosia 27:25–26). ’Ia oti te ta’ata i te bāpetizohia ’e i te ha’amauhia, e nehenehe rātou e ti’aturi ē e ha’amo’ahia rātou e te Vārua ’a haere noa ai i mua i ni’a i te ’ē’a nō te fafaura’a.
Mai te mea e nehenehe, ’a tītau manihini i te feiā tā ’oe e ha’api’i ra ’ia haere mai i te hō’ē purera’a bāpetizora’a ’e i te hō’ē purera’a ’ōro’a e ha’amauhia ai te hō’ē ta’ata.
Te mau mana’o nō te anira’a ’ia bāpetizohia
E nehenehe e tai’o i te ’ā’amu i roto i te pāpa’ira’a mo’a nō ni’a i te bāpetizora’a o Iesu (hi’o i te Mataio 3:13–17). E nehenehe ato’a e fa’a’ite i te video nō te Bibilia e fa’a’ite ra i te bāpetizora’a o te Fa’aora ’e ’aore rā te video nō te Buka a Moromona e fa’a’ite ra i te bāpetizora’a a te mau pipi a te Fa’aora.
E hina’aro ato’a paha ’oe e tai’o i te ’ā’amu o Nephi nō te bāpetizora’a o Iesu (hi’o 2 Nephi 31: 4–12). E nehenehe te tai’ora’a i te mau ’ā’amu nō te bāpetizora’a o Iesu Mesia e ha’apūai i te feiā e ha’api’ihia ra.
Heheura’a pāpa’ira’a mo’a
Tai’o māite i te mau pāpa’ira’a mo’a i muri nei :
’A pāpa’i i te tahi ha’apotora’a nō te mea tā ’oe i ’apo mai.