Sopun 3: Nesen 1

Ewe Porousen ewe Niwinsefaniton ewe Kapas Allimen Jises Kraist

Aramas Repwe Mochen Sinei

• Mi wor Kot?

• Ifa usun upwe tongeni mefi ai arap ngeni Kot?

• Ifa usun upwe kaeo ennet non osukosuken fonufan ikenai?

• Ifa usun namanam epwe anisiei?

• Pwata mi kon chommong mwichefen?

• Pwata mi kon chommong ai weires?

• Ifa usun upwe tongeni kuna kinamwe non fansoun osukosuk?

• Ifa usun upwe wesen pwapwa?

• Ifa usun emon soufos a tongeni anisi ewe fonufan ikenai?

Seni nepoputan ewe fonufan, Kot a fen pwarano ewe kapas allim ngeni Noun semirit seni ekkewe soufos. A fen fori ei me ren Noun we, Jises Kraist. Me nom, Jises a pwarano ewe kapas allim ngeni ekkewe soufos usun ren Adam, Noah, Abraham, me Moses. Nge chommong aramas rese etiwa.

Ru ngerou ier a no, Jises Kraist Pwisin a asukuna An kapas allim me forata An Mwichefen. Nge aramas rese pwan etiwa Jises. Mwirin chok An mano, a wor eu watten rikino seni an ewe Samon ennet me Mwichefen. Ewe unusochun kapas allim me ewe mumutan pristut rese chiwen nom won fonufan.

Fite puku ier mwirin, Kot a kokkori pwan emon soufos, Joseph Smith. Kot a eniwinsefanieto ewe unusochun kapas allim seni i me an mutata epwe etetteni ewe Mwichefenin Jises Kraist sefan.

An ewe unusochun kapas allimen Jises Kraist nom won fonufan ina eu me nein ekkewe watten feiochun ach fansoun. Ewe kapas allim a anisi kich ne ponuweni ekkewe sokkun kapas eis non manauach. Soufos mi manau ra emweni kich non fansoun osukosuk. Ewe mumutan pristut an Kot a pwan nom sefan won fonufan an epwe efeiochu Noun semirit.

Ekkoch ekiek ren Osukun

Ei kinikin a awora eu tettenin awewe an epwe anisuk om kopwe monneta ne osukun. Mi pwan pachenong ekkoch awewen kapaseis me tingor en mi tongeni aea.

Nupwen ka amonata om kopwe osukun, ioteki ne ekieki nonnomun emon me emon me met mi namot ngeni non pekin ngun. Finata met epwe kon aninisoch ne osukun. Monneta om kopwe awewei kapas minne aramas resap weweiti. Kokkot anongonong won ifa ukukun fansoun kopwe ani, chechemeni om kopwe fori ekkewe nesen repwe mwochomwoch.

Fini uwekisin kopwe nounou nupwen ka osukun. Ewe kinikin “Doctrinal Foundation” non ewe nesen mi pachenong chommong uwekisin mi aninisoch.

Ekieki menni kapaseis kopwe eis nupwen ka osukun. Otta ekkoch etiwetiw kopwe otoura minne epwe pesei emon me emon aramas ar repwe fori mettoch.

Apochokuna an Kot kewe pwonen efeioch, me apasa om kapasen pwarata usun met ka osukuna.

Met Kopwe Tongeni Osukuna Aramas non 15-25 Minich

Fini eu ika ekkoch me nein ekkewe nongonong mi tettenitiw om kopwe osukuna. Ewe nongonongun annuk ren eu me eu nongonong mi kawor mwirin ei tettenitiw.

Kot I Semach won Nang Mi Unuesen Tong

• Kot I Samach won Nang, me kich Noun semirit. I a forikicheta non Ununun.

• Kot mi sinei emon me emon kich me a tongei kich.

• Kot a wor ren inisin aion me chuu mi ning me unusoch.

• Kot a mochen efeiochu kich ren kinamwe me ren eu unusen pwapwa minne epwe fis tori fansoun esemuch.

• Pokiten Kot a tongei kich, A tinato Noun we, Jises Kraist, an epwe angasa kich seni tipis me mano.

Kot a Pwarano ewe Kapas allim me ren Soufos non Ew me Ew Kinikinin fansoun

• Kot a kokkori soufos ar repwe chon tupuni I won fonufan.

• Me nom, Kot a kokkori soufos usun Adam, Noah, Abraham, me Moses.

• Emon soufos mi manau a angei pwarata seni Kot an epwe aiti me emweni kich ikenai.

An Jises Kraist Angang won Fonufan me Achasefan

• Jises Kraist ii ewe Noun Kot.

• Fansoun An angang won fonufan, Jises a osukuna An kapas allim me forata An Mwichefen.

• Jises a kokkori engon me ruemon Aposel me a ngenir mumuta ar repwe emweni An Mwichefen.

• Nesoponon Manauan, Jises a achasefani ach tipis ren An riaffou non ewe Ataken Gethsemane me fansoun ewe Irapenges. Mwirin an Jises mano, I a manausefan.

• Pokiten an Jises asoren achasefan, sia tongeni musono me nimoch seni ach kewe tipis nupwen sia aier. Ei a wato ngeni kich kinamwe me a otufichi kich ach sipwe niwin ngeni me mwen mesen Kot me angei unusen pwapwa.

• Pokiten an Jises Manausefan, sipwe pwan manausefan mwirin ach mano. Ei wewen pwe ngunun emon me emon aramas me inisir repwe chufengen sefan me manau feinfeino.

Ewe Rikino

• Mwirin an noun Jises kewe aposel ra mano, a wor eu watten rikino seni ewe kapas allim me Mwichefenin Jises Kraist.

• Non ei fansoun, aramas ra siwini chommong afanafanen ewe kapas allim. Aramas ra pwan siwini angangepinen pristut, usun ren papatais. Mumutan pristut me ewe Mwichefen mine Jises a forata rese chiwen nom won fonufan.

Ewe Niwinsefaniton ewe Kapas Allimen Jises Kraist me ren Joseph Smith

• Joseph Smith a kutta an epwe sinei menni mwichefen ewe an Kot we ennetin Mwichefen pwe i epwe choni. Samach won Nang me Jises Kraist ra pwa ngeni I non 1820. Ei mettoch a fis a iteni ewe Aewin Nemasepwi.

• Kot a kokkori Joseph Smith an epwe emon soufos, usun chok I a fen kokkori soufos non fansoun nom.

• Ewe kapas allimen Jises Kraist a niwinsefanito me ren Joseph Smith.

• Ekkoch pwan chon kuno seni nang ra eniwinato ewe pristut, me Joseph a mumuta an epwe etetteni ewe Mwichefenin Jises Kraist.

• Jises Kraist a sopweno ne emweni An Mwichefen ikenai me ren soufos me aposel mi manau.

Ewe Puken Mormon: Pwan eu Kapasen pwarata usun Jises Kraist

• Ewe Puken Mormon eu tettenin pukefel mi mak non fansoun nom me ren soufos non ekkewe fonuen Merika. Joseph Smith a chiakuni seni ewe niffang me manamanen Kot.

• Fiti ewe Paipen, ewe Puken Mormon a awora eu pisekin pwarata usun an Jises angang, afanafan, me misin usun ach Chon Amanau.

• Sia tongeni arap ngeni Kot ren ach anneani ewe Puken Mormon me manaueni annukun.

• Sia tongeni sinei pwe ewe Puken Mormon mi ewe kapasen Kot ren ach anneani, ekipwichi, me ioteki usun. Ei foffor epwe anisi kich ach sipwe sinei pwe Joseph Smith emon soufosun Kot .

Iotek pwe kopwe Sinei ewe Ennet me ren ewe Ngun mi Fel

• Iotek mi ru-aanen porous fengen nefinan Kot me Noun kewe Semirit.

• Seni ennetin iotek, sia tongeni sinei pwe ewe porousen ewe Niwinsefaniton ewe Kapas Allimen Jises Kraist mi ennet.

• Nupwen sia iotek, ewe Ngun mi Fel a aiti kich me apungano ennet ngeni kich.

Kapaseis Kopwe Tongeni Eisini Aramas

Ekkewe kapaseis mi tettenitiw fan ir ekkoch awewen met ka tongeni eisini aramas. Ekkei kapaseis ra tongeni anisuk an epwe wor om ennetin oporous me weweiti met mi namot ngeni emon aramas me ar ekiek.

• Met ka nuku usun Kot?

• Ifa usun om mefi om arap ngeni Kot a anisuk?

• Met ka sinei ussun Jises Kraist? Ifa usun Manauan me an osukun a peseok?

• Ifa usun ka kuna ponuwen kapaseis mi murino non ei osukosuken fonufan ikenai?

• Ifa usun epwe anisuk om sinei pwe mi wor emon soufos mi manau won fonufan ikenai?

• En mi rong usun ewe Puken Mormon? Am mi tongeni aporousa pwata mi auchea?

• En mi tongeni aporousa om nuku usun iotek? Am mi tongeni aporousa am nuku usun iotek?

Taropwen etiwetiw Kopwe Tongeni Ngeni Ekkoch

• Kopwe tingorei Kot non iotek an epwe anisuk om kopwe sinei pwe met aua fen aituk mi ennet? (Nengeni “Teaching Insights: Prayer” non ewe omuchunon kinikinin ei nesen.)

• Kopwe fiti fan non ei raninfel om kopwe kaeo pwan ekkoch usun met aua fen aituk?

• Kopwe anneani ewe Puken Mormon me iotek om kopwe sinei pwe iei ewe kapasen Kot? (En mi tongeni apasa ekkoch tichikin sopun me uwekisin.)

• Kopwe tapweno mwirin an Jises nenien appiru me papatais? (Nengeni “The Invitation to Be Baptized and Confirmed,” minne a nom me mwen ei nesen.)

• Am mi tongeni apungano eu fansoun ren am aupwe churuk sefan?

Nongonongun Annuk

Ei kinikin a awora annuk me uwekisin ren om kopwe kaeo an epwe apochokuna om weweiti me kapasen pwarata usun ewe kapas allim me an epwe anisuk om kopwe osukun.

Kot I Semach won Nang Mi Unusen Tong

Kot I Samach won Nang, me kich Noun semirit. I a forikicheta non ununun. A wor ren eu ningen, unusoch inisin aion me chuu non napanapen me nikinikin aramas (Doctrine and Covenants 130:22).

Kot mi sinei emon me emon kich, me a tongei kich nap seni ach tongeni weweiti. I a weweiti ach sossot, netipechou, me apwangapwang, me A fang an ewe apochokuna kich . I a pwapwa non ach fefeita me epwe anisi kich ach sipwe fini mi pung. A mochen kapas ngeni kich, me sia tongeni kapas ngeni I non ach iotek.

Kot a ngeni kich ei manau won fonufan pwe sipwe tongeni kaeo, marita, me winiti usun I. Ren unusochun tong, A mwochen sipwe niwin ngeni I mwirin sia mano. Nge inamo, sise tongeni fori ei won pwisin winikapach. Pokiten Kot a tongei kich, A tinato Noun we, Jises Kraist, an epwe angasa kich. Pun Kot a fokkun tongei chon fonufan, ina minne a fangeno Noun we anamon, … pwe ewe fonufan epwe ngaseno punun i (nengeniJohn 3:16–17).

Kot a mochen efeiochu kich ren kinamwe me ren eu unusen pwapwa minne epwe fis tori fansoun esemuch. A awora eu kokkot ewe a ngeni kich ewe tufich ach sipwe angei ekkei feioch. Ei kokkot a iteni ewe kokkotun manau ese much (nengeni nesen 2).

Nuku usun Kot

Kaeo met ewe aramas ka osukuna a nuku usun Kot. Napengeni aramas ra nuku non emon sokkun Mi Napanap ina mwo ika mi wor chommong ekiek usun Kot. Nge inamo, chommong aramas ese wor ar wewe usun Kot.

Ruemon misineri non Puken Mormon, Ammon me Aaron, ra aiti aramas ekkewe ese wor ar sinei usun Kraist. Ra osukuna ennet mi mecheres me tingorei ekkewe aramas ar repwe iotek. Iwe pungunon, Leimonai me seman we ra ekkesiwin. Kaeo Alma 18:24–40 me 22:4–23. Ponuweni ekkewe kapaseis mi nom fan:

• Pwata ekkei misineri ra osukuna usun nonnomun Kot?

• Ifa usun kopwe tapweno mwirin ar nenien appiru?

Ren pwan ekkoch porous, nengeni “Teaching People Who Do Not Have a Christian Background” non sopwun 10.

Kaeo Pukefel

• 1 Nifai 17:36

• Mosaia 4:9

• 3 Nifai 14:9–11

• Doctrine and Covenants 93:29; 130:22

• Moses 1:39

• Abraham 3:25

• Foffor 17:27–29

• Rome 8:16

• Hebrews 12:9

• Genesis 1:26–27

Kaeo Pwan Ekkoch usun Ei Nongonong

• Guide to the Scriptures, “Sam won Nang,” “Kot, Unumon non Kot”scriptures.ChurchofJesusChrist.org.

• Itenapen Kapas Allim: “Kot ewe Sam”

Kot a Pwari ewe Kapas allim me ren Soufos non Ew me ew Kinikinin fansoun

Soufos Ir Chon Tupuni Kot won Fonufan

Eu auchean aanen an Kot pwarano An tong ngeni kich ina ren a kokkori soufos, ngenir ewe mumutan pristut, me ourourer ar repwe kapas fan Itan. Soufos Ir Chon Tupuni Kot won Fonufan. Ewe soufosun Testamen Noom Amos a rekotuni pwe ewe Samon Kot esap fori och mettoch, nge a pwarano an mwonomwon ngeni noun chon angang ekkewe soufos (nengeniAmos 3:7). Ekkoch ekkewe feioch sia angei seni soufos mi manau ir mi tettenitiw fan.

Chon Pwarata usun Jises Kraist Soufos ir chon pwarata usun Jises Kraist mi auchea, ra pwarata usun I pwe ach Chon Amanau me Chon Angasano.

Osukun. Soufos ra angei emwen seni Kot ar repwe anisi kich ach sipwe sinei ennet seni mwan. Ra aitikich ne anneasochisi an Kot annuk me aier nupwen sia tur. Ra ungeni tipis me fonou usun mwirinon kewe.

An soufos osukun ra chunata kich ngeni Kot me anisi kich ach sipwe angei ekkewe feioch I a mochen fan itach. Ach watten tumun a anongonong non ach tapweno mwirin ewe kapasen ewe Samon seni Noun kewe soufos.

Mumutan Pristut. Ewe soufos iei i ewe chon nemenem ne amwochu pristut won fonufan. Ewe pristut ina ewe mumuta me manamanen Kot. A wor ren ewe soufos ewe mumuta an epwe kapas me foffor fan iten Kot ren amanauen Noun semirit.

Emwenin Mwichefen. Ewe Mwichefenin Jises Kraist a kauuta won nongonongen ekkewe soufos me aposel (nengeni Ephesus 2:19–20; 4:11–14).

Soufos non Fansoun Nom

Adam i ewe aewin soufos won fonufan. Kot a pwar ngeni i ewe kapas allimen Jises Kraist me ngeni i mumutan Pristut. Atam me If ra aiti nour semirit ekkei ennet me peser ar repwe awora nuku me manaueni ewe kapas allim.

Nesoponon mwirimwirin Adam me Eve ra ungeni me kun seni ewe kapas allim. Ei a emwen ngeni ew nikinik a iteni fansoun rochopwak, ika ew rikino. Nupwen watten fansoun rochopwak a fis, Kot a angeiano An mumutan pristut, ewe mi namot ne osukuna me anganga ekkewe angangepinen ewe kapas allim.

Ewe Testamen Noom a rekotuni chommong watten fansoun rochopwak. An epwe osopwano ekkei fansoun, Kot a anisi Noun semirit ren an kokkori pwan emon soufos. A pwarano ekkewe ennetin ewe kapas allim sefan ngeni ekkei soufos me ngenir ewe mumutan pristut. Ekkoch ekkei soufos ren Noah, Abraham, me Moses. Netipengawan, non eu tetten non ekis me ekis fansoun, aramas rese etiwa ekkewe soufos me ra rikino.

Aninisin Osukun

Soufos

Kaeo met ewe aramas ka osukuna a weweiti usun soufos. Aramas non chommong oreni ra nuku pwe aramas mi pin ika mi wor rer ourour ra angei ekkoch napanapen emwen me tetten seni Kot. Nge inamo, esap meinisin mi wor rer ourour ir soufosun Kot.

Awewei pwe mwirin eu me eu fansoun watten fansoun rochopwak, Kot a aniwinato ewe kapas allim me ren emon soufos. A ngeni ena soufos mumutan pristut. Ewe soufos a anisi aramas ar repwe weweiti nefiner ngeni Kot, mi pachenong ifa usun ar repwe angei manau esemuch seni ewe kapas allimen Jises Kraist.

Kinikinin fansoun

Eu kinikinin fansoun ewe kapas allimen Jises Kraist ina eu atun fansoun minne mi mwaren wor emon chon angangen ewe Samon mi mutata won fonufan ewe a amwochu ekkewe kiien ewe pristut. An Sam won Nang we kokkoten manau ese much a fen pwano sefan non eu me eu kinikinin fansoun.

A fen wor chommong kinikinin fansoun ewe kapas allim. Atam, Enoch, Noah, Abraham, Moses, Jises Kraist, Joseph Smith, me ekkoch ra fen emweni eu me eu kinikinin fansoun. Ewe kinikinin fansoun minne a poputa ren Joseph Smith a fatteno pwe ina ewe “kinikinin fansoun mi unus” (Ephesus 1:10). Nengeni Bible Dictionary, “Dispensation”; Emwen ngeni ekkewe Pukefel, “Kinikinin fansoun,.”

Kaeo Pukefel

• Jacob 4:4, 6

• Mosaia 8:13–18

• Doctrine and Covenants 1:37–38

• Luke 1:68–70

• Foffor 10:34–43

• Ephesus 4:11–14

• Amos 3:7

Kaeo Pwan Ekkoch usun Ei Nongonong

• Emwen ngeni Pukefel: “Soufos”

• Itenapen Kapas Allim: “Soufos,” “Niwinsefaniton ewe Mwichefen”

An Jises Kraist Angang won Fonufan me Achasefan

Jises Kraist i ewe Noun Kot. Jises Kraist me An Achasefan ir nukanapen an Kot kokkot fan itach. An Achasefan mi pachenong An riaffou non ewe Ataken Gethsemane, An riaffou me mano won ewe irapenges, me An Manausefan.

Seni ewe fansoun Atam me If, aramas ra esuku ewe wareton Jises Kraist pwe i ar Chon Amanau me Chon Angasano. Semach won Nang a tinato Jises ngeni fonufan nap seni 2,000 ier ra no.

Jises a unusoch, ese wor tipisin. A osukuna An kapas allim me forata An Mwichefen. A kokkori engon me ruemon Aposel me ngenir mumutan pristut ar repwe osukun me fori angenepin, usun ren paptais. A pwan ngenir mumuta ar repwe emweni An Mwichefen.

Nesoponon Manauan, Jises a achasefani ach tipis ren An riaffou non Gethsemane me fansoun ewe Irapengesino. Pokiten an Jises asoren achasefan, sia tongeni nimoch seni ach kewe tipis nupwen sia aier. Ei me a otufichi kich ach sipwe niwin ngeni me mwen mesen Kot me angei unusen pwapwa.

Mwirin an Jises irapengesino, I a manausefan, okkufu mano me ren manamanen Samach won Nang. Pokiten an Jises Manausefan, kich meinisin sipwe pwan manausefan mwirin ach mano. Ei wewen pwe ngunun emon me emon aramas me inisir repwe chufengen sefan, me emon me emon kich sipwe manau feinfeino non eu inis mi unusoch me manausefan. (Nengeni “Ewe Achasefan an Jises Kraist” non nesen 2.)

Ewe Soufos Joseph Smith a aiti kich, “Ekkewe nongonongen ach namanam ekkewe kapasen pwarata an ekkewe Aposel me Soufos, usun Jises Kraist, pwe I a mano, a peias, me manausefan non ewe aunungatin ran, me feita nang; me meinisin pwan ekkoch mettoch minne mi wewe ngeni ach namanam ir chok kapachetan” (Teachings of Presidents of the Church: Joseph Smith [2007], 49).

Kaeo Pukefel

• 2 Nifai 2:6–8; 9:1–24; 31

• Alma 7:11–13; 11:40; 34:8–10

• 3 Nifai 11:31–41; 27:1–22

• Doctrine and Covenants 19:15–19; 45:3–5

• John 3:16–17

• 1 Corinth 15:1–4, 20–22

• 1 John 1:7

Kaeo Pwan Ekkoch usun Ei Nongonong

• Emwen ngeni ekkewe Pukefel: “Jises Kraist,” “Achasefani, Achasefani”

• Bible Dictionary: “Atonement”

• Itenapen Kapas Allim: “Jises Kraist,” “Achasefanin Jises Kraist”

Ewe Rikino

Mwirin ewe mano an Jises Kraist, Noun kewe Aposel ra kutta ar repwe tumunochu ewe nongonongun Kraist epwe nimenimoch me ar repwe amwochu ewe tettenoch non ewe Mwichefen. Nge inamo, chommong chon ewe Mwichefen ra rikino seni ekkewe Aposel seni ewe nongonong minne Jises a osukuna.

Mwirin an noun Jises kewe Aposel ra mano, a wor eu watten rikino seni ewe kapas allim me Mwichefenin Jises Kraist. Ei rikino fan ekkoch a iteni ewe Fansoun Rochopwak mi Nap. Pokiten ei, Kot a angeiano an mumutan pristut seni ewe fonufan. Ei turuno mi pachenong ewe mumuta mi namot ne emweni ewe Mwichefen. Pungunon, ewe Mwichefenin Jises a fen forata rese chiwen nom won fonufan.

Non ei fansoun, aramas ra siwini chommong afanafanen ewe kapas allim. Napengeni ewe mirit usun ennetin nikinikin Sam won Nang, Jises Kraist, me ewe Ngun mi Fel a mwanino ika mworukono. Aramas ra pwan siwini angangepinen pristut, usun ren papatais.

Fite puku ier mwirin, mwan me fefin mi kukuta ennet ra sotuni ne forsefani ekkewe afanafan me oreni ra fen siwin. Ra kutta watten saram non pekin ngun, me ekkoch me neir ra kapas usun ewe namoten eu niwinsefaniton ennet, Ar achocho a efisata ewe forutan chommong mwichefen.

Ei atun fansoun a efisata eu watten apochokunen ngasenon namanam, minne a suki aanen ewe niwinsefaniton ennet me mumuta seni Kot.

Soufos me aposel ra fen osini ewe rikino (nengeni 2 Thessalonians 2:1–3). Ra pwan osini pwe ewe kapas allim me Mwichefenin Jises Kraist epwe niwinsefan ngeni ewe fonufan (nengeni Foffor 3:20–21). Ika ese wor eu rikino, eu niwinsefanito esap namot.

Aninisin Osukun: Ewe Rikino

Osukuna aramas usun ewe rikino ren ukukun tichikin mi fich ngeni met mi namot ngenir me ar sinei. Anisir repwe weweiti ewe namoten ewe Niwinsefanito ewe kapas allimen Jises Kraist.

Ekkewe Auchean Kinikin Ka Tongeni Asukuna

• Napengeni aramas rese etiwa Jises Kraist me Noun kewe Aposel (nengeni Matthew 24:9; 1 Nifai 11:32–34; 2 Nifai 27:5). Mwirin manon ekkewe Aposel, ewe pristut a mworukono seni ewe fonufan. Ese chiwen wor mumuta ne papatais ika emweni ewe Mwichefen.

• Ewe Muun Rome, minne akkom a ninni ekkewe chon nuku Kraist, mwiriin ra etiwa Namanamen Kraist. Auchean kapaseisen namanam ra wesino ren anini fengen non mwicheich nap seni pwarata seni Kot. Ra anini fengen usun annuk me angangepin me ra siwinir ngeni ar repwe fich ngeni ekiekin fonufan. Ekkoch nuku, ika kapasen nuku, ra foruta anongonong won met ekkei mwicheich ra finata (nengeni Joseph Smith—History 1:19).

• Ekkoch aramas ra sotuni ar repwe forsefani Namanamen Kraist ren ar apungu met kewe mi chok wor. Nge inamo, pokiten an Kot mumutan pristut ese chiwen nom won fonufan, eu niwinsefaniton mumuta me ennet a namot an epwe forsefani ewe Mwichefenin Jises Kraist.

Kaeo Pukefel

• 2 Nifai 28

• Matthew 24:9–11

• Foffor 20:28–30

• Galatian 1:6– 9

• 2 Thessalonians 2:1–12 (Joseph Smith Translation, uwokisin 2, 3, 7–9)

• 2 Timothy 4:3–4

• 2 Peter 2:1–2

• Amos 8:11–12

Kaeo Pwan Ekkoch usun Ei Nongonong

• Emwen ngeni Pukefel: “Fansoun rochopwak”

• Topical Guide: “Apostasy of the Early Christian Church”

• Itenapen Kapas Allim: “fansoun rochopwak”

Ewe Niwinsefaniton ewe Kapas Allimen Jises Kraist me ren Joseph Smith

Ewe Aewin Nemasepwi me ewe Kokkon Joseph Smith an epwe emon Soufos

Non ekkewe fite puku ier nupwen unusen ewe kapas allimen Jises Kraist ese nom won ewe fonufan, Sam won Nang a sopweno ne anisi Noun semirit. Ekis me ekis fansoun, A amonnata eu aan pwe repwe tongeni feioch sefan ren unusochun An kapas allim. Nupwen nonnomun mettoch ra pung, A kokkori Joseph Smith pwe epwe emon soufos pwe seni i ewe kapas allim me ewe Mwichefenin Jises Kraist repwe niwinsefan.

Joseph Smith a nom non otiwen United States atun ena fansoun watten mwasangasangen mwichefen. Chon an we famini ir mi nikitu ngeni Kot me ra kutta ennet. Chommong mwichefen ra ara mi nom rer ewe ennet, me Joseph a mochen sinei menni mi pung (nengeni Joseph Smith—History 1:18). Ewe Paipen a aiti kich pwe mi wor “emon chok Samon, eu chok nuku, eu chok papatais” (Ephesus 4:5). Nupwen Joseph a fiti kewe sokofesenin mwichefen, a osukosuk usun menni epwe fiti. Mwirin a apasa:

“A men watte ekkewe orukoruk me osukosuk nefinen ekkewe sokun mwichefen, iwe ese tufich ngeni emon serafo usun ngang … ai upwe apungano ion mi ennet me ion mi muan. …

“Non nukanapen ei anini fengen non kapas me fitikokon ekiek, ua soun eisiniei: Met epwe fis? Menni me nein ekkei mwicheich mi ennet; are, ir meinisin mi mwan? Ika eu me neir mi pung, menni, me ifa usun ai upwe sinei?” (Joseph Smith—History 1:8, 10).

Usun chommong aramas, Joseph Smith a pwan wor an kapaseis usun amanauen ngunun. A mochen pwe an tipis repwe mwusono me epwe nimoch me mwen Kot. Nupwen a kutta ennet me nein ekkewe sokkonon mwichefen, a annea non ewe Paipen, “Nge ika emon me neimi ese mirit, epwe tingor ngeni Kot, iwe Kot epwe Ngeni I, pun Kot mi kisasew o kirokiroch ngeni aramas meinisin” (James 1:5).

Pokiten ei mak, Joseph a finata pwe epwe eisini Kot met epwe fori. Non ew fansoun non 1820, a feino ngeni nein ekkoch ira arap ngeni imwan we me a fotopukutiw ne iotek. Mi wor ruanu uruon ewe nemasepwi mi makketiw, a mak me ren Joseph Smith ika me ren chon mak fan an emwen (nengeni Gospel Topics Essays, “Uruon Aewin Nemasepwi”). Non ewe uruo a affateno pwe pukefel, a anapanapa met a fis ngeni usun mi makketiw fan:

“Ua kuna ew uren saram mi wesen nom asan mokurei, mi nap seni saramen ewe akkar, minne a feitiw ekis me ekis tori a nom woi. … Nupwen ewe saram a toriei ua kuna ruemon Aramas, ukukun ninger use tongeni awewei, nge ra chok ukuta non asepwan. Emon me neir a fos ngeniei, a kokkoriei ren itei, a itini ngeni ewe emon me a apasa—Iei nei we At mi Achengicheng. Ausening ngeni!” (Joseph Smith—History 1:16–17).

Non ei nemasepwi, Kot ewe Sam me Noun we, Jises Kraist, ra pwa ngeni Joseph Smith. Ewe Chon Amanau a ereni pwe esap fiti eu me nein ekkewe mwichefen.

Non pwan eu uruon ei nemasepwi, Joseph a aporousa pwe we Chon Amanau a pwan ureni: “Om tipis ra musono. … Nengeni Ngang ewe Samonun ning. Ngang uwa irapengesino fan iten fonufan pwe meinisin ekkewe ra nuku non itei repwe ani Manau Ese much.”

Mwirin ewe nemasepwi, Joseph a ekiek, Nguni a uren tong, me non chommong ran ua tongeni pwapwa ren watten pwapwa me ewe Samon a nom rei (Joseph Smith History, circa Summer 1832, 3, josephsmithpapers.org; itechikin me tikitikin ra siwin ngeni minen ikenai).

Seni ei nemasepwi, Joseph Smith a winiti emon chon pwarata usun Jises Kraist me a kaeo auchean ennet usun ewe Unumon non Kot. Ren awewe, I a kaeo pwe Samach won Nang me Jises Kraist ir ruemon mi imufesen. Nupwen Ra kori ren itan, a sinei pwe Ir mi sinei i won winikapan. Nupwen ra ureni Joseph pwe a musono an tipis, a sinei pwe Kot mi uren chen. Ei mettoch a fis a ourano i ren pwapwa.

Usun Kot a fori ngeni chommong soufos akkom, A finata Joseph Smith pwe epwe emon soufos me ren ewe unusen ewe kapas allim epwe niwinsefanito ngeni fonufan. Ei niwinsefanito epwe anisi noun Kot semirit ar repwe kuna pwapwa non ei fonufan me manau esemuch non ewe fonufan epwe feito—meinisin seni Jises Kraist.

Omwochu non ekiek Joseph Smith—History 1:16–17

Omwochu non ekiek an Joseph Smith anapanapa an kuna Samach won Nang me ewe Nau (Joseph Smith—History 1:16–17). Kopwe monneta fansoun meinisin om kopwe anapanapa ewe Aewin Nemesepwi ne aea an Joseph Smith pwisin kapas. Apasa om ennetin kapasen pwarata usun ennetin me pwata mi auchea ngonuk.

Niwinsefaniton ewe Pristut me Kien ewe Pristut

Mwirin pwaton ewe Sam me ewe Nau, ekkoch pwan chon kuno seni nang ra titino ngeni Joseph Smith me chiechian Oliver Cowdery. John ewe Chon Paptais a pwato i emon aramas mi manausefan me wato ewe Aaronik Pristut me kiian kewe ngenir. Ewe Aaronik Pristut mi pachenong ewe mumuta ne papatais.

Mwitir chon mwirin, Peter, James, me John—unumon me nein noun Kraist kewe akkomwen Aposel—ra pwato ir aramas mi manausefan me wato ewe Melchizedek Pristut me kiian kewe won Joseph Smith me Oliver Cowdery. Ei pristut iei ewe chok mumuta Kraist a ngeni Noun kewe Aposel me nom.

Non ewe Kirtland Tempel, Moses, Elias, me Elijah ra pwa ngeni Joseph Smith me Oliver Cowdery me ngenir pwan och mumuta me kiien pristut mi namot ar repwe awesi an Kot angang non ekkewe fansoun soponon. Moses a wato ekkewe kiien ewe ionfengenin Israel. Elias a wato ewe kinikinin fansoun ewe kapas allimen Abraham. Elijah a wato ekkewe kiien manamanen riri. (Nengeni Doctrine and Covenants 110:11–16; nengeni pwan Pukenapen Emwen, 3.1.)

Tettenin ewe Mwichefen

Joseph Smith a emwen an epwe etetteni ewe Mwichefenin Jises Kraist sefan won fonufan. Me ren i, Jises Kraist a kokkori engon me ruemon Aposel.

Soufos non fansoun paipel ra eita ngeni ewe fansoun minne sia nom non pwe ekkewe ranin soponon ika ewe fansoun soponon. Iei ewe fansoun me mwen chok ewe Oruwen Wareto an Jises Kraist. Ina pwata ewe Mwichefen a iteni Ewe Mwichefenin Jises Kraist ren Aramas mi Pin non Fansoun Soponon (nengeni Doctrine and Covenants 115:3–4; nengeni pwan 3 Nifai 27:3–8).

Soufos me Aposel Mi Manau Ikenai

Usun chok Jises a kokkori Aposel fansoun An angang won fonufan ar repwe emweni An Mwichefen, I A pwan kokkori Aposel ar repwe emweni ikenai. Ewe Aewin Presetensi me ewe Mwichen Engon me Ruemon Aposel ir soufos, chon osini, me chon pwäratä.

Ewe chok Aposel mi nap a iteni ewe souofos pokiten i a nemenem won unusen ewe Mwichefen me mi sokkono ren an mumuta an epwe kapas ngeni ewe Samon. I ewe mi mumuta a tapweto mwirin Joseph Smith. I me ekkewe Aposel iei ra tongeni etetteni ar mumuta tori Jises Kraist non eu seinen seikita ese ta ewe a poputa nupwen Joseph Smith a seikita me fan poun chon kuno seni nang.

Kaeo Pukefel

• 2 Nifai 3

• 3 Nifai 27:3–8

• Doctrine and Covenants 27:12–13; 112:30–32; 115:4

• Joseph Smith—History 1:68–72

• Foffor 3:19–22

• Ephesus 4:5

• James 1:5

Kaeo Pwan Ekkoch usun Ei Nongonong

• Emwen ngeni ekkewe Pukefel: “Nwinsefanito ewe Kapas allim”

• “Ewe Niwinsefaniton ewe Unusochun ewe Kapas Allimen Jises Kraist: Esinesinen Eu Achechemen Ruepuku Ier ngenewe Fonufan”

• Itenapen Kapas Allim: “Niwinsefaniton ewe Mwichefen,” “Niwinsefaniton ewe P”

Ewe Puken Mormon: Pwan eu Kapasen pwarata usun Jises Kraist

Ewe Puken Mormon ew puken pukefel minen mi pin a usun me ewe Paipen. Ewe Paipen eu pwarata usun Jises Kraist, me ewe Puken Mormon pwan eu pisekin pwarata usun An angang, An afanafan, me An misin usun ach Chon Amanau.

Joseph Smith a emwen me ren emon chon kuno seni nang itan Moronai ngeni eu chukuchukuta ikewe eu uruon nom a fen ireireno non fite puku ier. Ei uruo, a mak won seleichen gold (chachakin chen mecha), a masoweni ekkewe mak an soufos usun an Kot angang ngeni ekkoch chon nom non ekkewe fonuen Merika. Joseph Smith a chiakuni ei rekot me ren ewe niffang me manamanen Kot.

Ekkewe soufos non ewe Puken Mormon ir mi sinei usun ewe misin an Jises Kraist me ra osukuna An kapas allim. Mwirin an Jises a manausefan, A pwato ngeni ekkewe aramas me pwisin angang ngenir. A osukuner me forata An Mwichefen.

Ewe Puken Mormon a anisi kich ach sipwe arap ngeni Kot nupwen sia kaeo, weweiti, me manaueni afanafanan. Ewe Soufos Joseph Smith a apasa pwe “emon mwan [ika fefin] a tongeni arap ngeni Kot seni an manaueni annukun ei puk, me nein puk meinisin” (Teachings: Joseph Smith, 64).

Ach sipwe sinei pwe ewe Puken Mormon mi ewe kapasen Kot, mi auchea sipwe anneani, ekipwichi, me ioteki usun. Emon soufosun ewe Puken Mormon a pwonei pwe Kot epwe pwarano ennetin ewe puk ngeni kich nupwen sia iotek ren ennetin netip, ren ennetin mochen, me ren nuku non Kraist (nengeni Moronai 10:3–5). Ach kaeo Ewe Puken Mormon mi namot ngeni soposoponon ekkesiwin.

Nupwen sia anneani ewe Puken Mormon me ioteki usun, sipwe kaeo ennet usun Jises Kraist minne epwe efeiochu manauach. Sia pwan sinei pwe Joseph Smith i emon soufosun Kot me ewe kapas allim me Mwichefenin Jises Kraist a fen niwinsefanito me ren i.

“Ua pwon pwe nupwen kopwe iotek ne kaeo ewe Puken Mormon iteiten ran, kopwe finiochu mettoch mi murrino—iteitan ran. Ua pwon pwe nupwen oua ekieki usun met oua kaeo, ekkewe asamen nang epwe suk, me oupwe angei ponuwen ami kapas eis me emwen fan iten manauemi. Ua pwon pwe nupwen ka ounusa om fansoun iteitan non ewe Puken Mormon, ka tongeni pochokun seni ekkewe osukosuken ngawen ei fansoun” (Russell M. Nelson, “Ewe Puken Mormon: Epwe Ifa Usun Manauom Ika Pwe ese Wor?” Liahona, Nov. 2017, 62–63).

Aninisin Osukun

Esinei ewe Puken Mormon ngeni Aramas

Nupwen ka aporousa usun ewe Puken Mormon ngeni Aramas, awewei pwe eu uruo mi pin usun an Kot mwokutukut ngeni ekkoch ekkewe aramas non fansoun nom non ekkewe fonuen Merika ren ukukun ier mi nap seni engorou ier. Seni ena puk sia tongeni kaeo chommong minne mi wewengeni manauach ikenai.

Awewei pwe ewe popun ewe Puken Mormon pwe epwe pesei aramas meinisin pwe Jises i ewe Kraist (nengeni ewe peichen itenap). Usun itenapan a apasa, ewe puk “pwan eu kapasen pwarata usun Jises Kraist.” Pwonei aramas pwe ra tongeni sineiochu ar Chon Amanau nupwen ra anneani.

Nupwen ka ngeni aramas eu kapin ewe Puken Mormon, urenir usun ewe manamanen ngun a fen wato non manauom. Aporousa eu ika ru porous ekkewe ir mi auchea ngonuk ika meni repwe fen auchea ngenir. Non om pwisin kaeo ika fiti chienom, ewe Ngun epwe anisuk om kopwe kuna ekkewe uwekisin repwe tongeni chunata ika apochokuna aramas.

Pesei aramas ar repwe anneani ewe Puken Mormon iteiten ran. Nupwen ra anneani me manaueni annukun, repwe feioch me mefi ar arap ngeni Kot.

Ewe Puken Mormon a Apungano ewe Ennetin ewe Niwinsefanito

En mi tongeni nounou kapas usun ekkewe mi mak fan an epwe anisi aramas ar repwe weweiti ifa usun ewe Puken Mormon a apungano ewe ennetin ewe Niwinsefaniton ewe kapas allimen Jises Kraist:

“Ewe Puken Mormon eu aanen an Kot a apungano ngeni ei ewe ennet usun met aua fen apasa. Kose mochen kopwe anneani ekkewe ru omuchunon kinikinin mak non nepoputan ewe puk?”

Awewei wewen eu me eu ekiek non ir me ru ekkewe kinikinin mak. Tingorei ekkewe ka osukuner ar repwe anneani ekkoch kinikinin ewe Puken Mormon me aea ekkewe nongonong non ekkei kinikinin mak. Nupwen ra mefi ewe ngun me ennetun ewe Puken Mormon, ra tongeni sinei pwe Joseph Smith emon soufosun Kot.

Kaeo Pukefel

• Peichen itenapen ewe Puken Mormon

• Nepoputan ewe Puken Mormon, kinikinin mak 1–7

• Moronai 10:4–5

• Doctrine and Covenants 1:17–23; 20:1–12

• Joseph Smith—History 1:27–62

Kaeo Pwan Ekkoch usun Ei Nongonong

• Emwen ngeni ekkewe Pukefel: “Puken Mormon”

• Itenapen Kapas Allim: “Puken Mormon”

Iotek pwe kopwe Sinei ewe Ennet me ren ewe Ngun mi Fel

Pokiten Kot i Samach, I epwe anisi kich ne esinna ennet. Sia tongeni sinei pwe ewe porousen ewe Niwinsefaniton ewe Kapas Allimen Jises Kraist mi ennet nupwen sia anneani ewe Puken Mormon me iotek ngeni Kot. Nupwen sia iotek ren nuku me ren ennetin mochen, I epwe ponuweni ach kapaseis me emweni manauach.

Kot a soun ponuweni ach iotek me ren ewe Ngun mi Fel. Nupwen sia iotek, ewe Ngun mi Fel a aiti kich me apungano ennet. Porous seni ewe Ngun mi Fel ir mi unusen manaman. Ra soun feito usun eu mosonosonun epinukunuk seni ach memef, nuku, me ekiek (nengeni 1 Kings 19:11–12; Ilaman 5:30; Doctrine and Covenants 8:2).

Kakaeo ekkewe pukefel iteitan (akkaewin ewe Puken Mormon), mwichen sakrament iteiten wik, me ennetin iotek a tongeni anisi kich ach sipwe mefi ewe manamanen ewe Ngun mi Fel me kuna ennet.

Aninisin Osukun

Iotek

Usun Joseph Smith, chommong aramas ra kutta ponuwen kapaseis mi auchea me kutta eu akoko ngeni Kot. Aporousa ifa usun iotek a fen anisuk ne mefi om arap ngeni Kot. Aporousa ifa usun om angei ponuwen kapaseis me emwen seni om kaeo me iotek.

Awewei iotek eu ru aanen porous fengen nefinen Kot me Noun kewe semirit. Kopwe tingorei ekkewe ir ka aitir ar repwe tingorei Kot ren aninnis me emwen. Tingorei aramas ar repwe iotek ina eu me nein ekkewe tingor mi namot sia tongeni atoura. Nupwen ra angei ponuwan, repwene sinei pwe ir achengicheng noun Kot me I epwe anisir.

Chommong me nein ekkewe aramas ka aitir resap sinei ar repwe iotek. Ina eu tufich om kopwe anisir ne kaeo ar repwe iotek me wato ekkewe feiochun iotek non manauer. Iotek a ina usun ach angei eu pwarata usun ennet non pekin ngun.

Aiti aramas pwe iotek a kan masoweni ekkei kinikin mi tettenitiw:

• Poputa ren om kapas ngeni Semom won Nang.

• Apasa mefien netipom, usun ren om kinisou ren ekkewe feioch ka fen angei.

• Eis kapasesi, kutta emwen, me tingor ren feioch mi auchea ngonuk.

• Osopwano ren om apasa, “Non iten Jises Kraist, amen.”

Kopwe tingorei aramas ar repwe iotek nupwen ra anneani ewe Puken Mormon an epwe anisir ne weweiti pwe ina ewe kapas an Kot me mi pwarata usun Jises Kraist.

Nupwen ka aiti aramas ar repwe iotek, nounou kapas mi mecheres pwe repwe tongeni nounou nupwen ra iotek. Tumunu ekkei iotek repwe mwochomwoch.

Tingorei ewe aramas ka aiti an epwe apasa eu iotek nesoponon ewe nesen. Pwarata pwe Kot mi rong me ponueni ach iotek.

Ennetin Mochen

Annea ren ennetin mochen wewen pwe ka wesewesen mochen foffor won ewe annuk me apachanong non manauom iteiten ran. Iotek ren ennetin mochen wewen pwe ka wesewesen mochen foffor won ponuwan kewe sia angei seni Kot.

Kaeo Pukefel

• Moronai 10:3–5

• Alma 5:45–46

• Doctrine and Covenants 8:2–3

• John 14:26

• Nepoputan ewe Puken Mormon, kinikinin mak 8–9

Kaeo Pwan Ekkoch usun Ei Nongonong

• Emwen ngeni Pukefel, “Iotek”

• Bible Dictionary: “Iotek”

• Itenapen Kapas Allim: “Iotek”

Etettenin Nesen mi Mwochomwoch me Ukukoch

Ewe etetten mwirin ina eu awewen usun met en mi tongeni osukuna emon ika pwe mi chok wor ekis om fansoun. Nupwen kopwe aea ei etetten, fini eu ika epwe nap seni ekkewe nongonong om kopwe osukuna. Ewe nongonongun annuk ren eu me eu nongonong mi kawor akkom non ewe nesen.

Nupwen ka osukun, kopwe eis kapaseis me ausening. Otoura etiwetiw ekkewe repwe anisi aramas ar repwe kaeo ifa usun ar repwe arap ngeni Kot. Eu auchean etiwetiw ina ren an ewe aramas epwe pwan chu ngonuk sefan. Ewe tamen ewe nesen epwe anongonong won ekkewe kapaseis ka eis me ewe ausening ka fori.

Met Kopwe Tongeni Osukuna Aramas non 3-10 Minich

• Kot I Samach non Nang, me a forikicheta non nikinikin. I mi sinei emon me emon kich me a tongei kich. I a mochen efeiochu kich ren kinamwe me ren eu unusen pwapwa minne epwe fis tori fansoun esemuch.

• Jises Kraist ii ewe Noun Kot. An misin epwe fori an epwe tufich ngeni kich ach sipwe nimoch seni ach tipis, okkufu mano, me angei manau esemuch.

• Kot a kokkori soufos ar repwe chon tupuni I won fonufan. Me nom, Kot a kokkori soufos usun Adam, Noah, Abraham, me Moses. Emon soufos mi manau a angei pwarata seni Kot an epwe eiti me emweni kich ikenai.

• Fansoun an Jises angang on fonufan, I a forata An Mwichefen. Mwirin an noun Jises kewe aposel ra mano, a wor eu watten rikino seni ewe kapas allim me Mwichefenin Jises Kraist. Aramas ra siwini chommong afanafanen ewe kapas allim me angangepinen pristut, usun ren papatais.

• Kot a kokkori Joseph Smith an epwe emon soufos, usun chok I a fen kokkori soufos non fansoun nom. Samach won Nang me Jises Kraist ra pwa ngeni i. Ewe kapas allimen Jises Kraist a niwinsefanito me ren.

• Ewe Puken Mormon eu puken pukefel. Usun ewe Paipen, ina a eu kapasen pwarata usun Jises Kraist me a anisi kich ach sipwe arap ngeni Kot nupwen sia anneani me manaueni annukun. Joseph Smith a chiakuni me ren ewe niffang me manamanen Kot.

• Seni ennetin iotek, sia tongeni porous fengen me Kot. Seni sia tongeni sinei pwe ewe porousen ewe Niwinsefaniton ewe kapas allimen Jises Kraist mi ennet.