“Mataupu 6: Saili Uiga Faa-Keriso,” Tala’i La’u Talalelei: O Se Taiala i le Faasoaina Atu o le Talalelei a Iesu Keriso (2023)

“Mataupu 6,” Tala’i La’u Talalelei

Mataupu 6

Saili Uiga Faa-Keriso

Manatunatu i le Mea Lenei

O le a faapefea ona fesoasoani le sailia o uiga faa-Keriso e faataunuu ai lo’u faamoemoe o se faifeautalai?
E mafai faapefea ona ou sailia ma maua uiga faa-Keriso?
O le fea uiga po o uiga auaumama e tatau ona ou taulai i ai i le taimi nei?

Faatomuaga

I le amataga o Lana galuega i le olaga faaletino, sa afio atu ai Iesu Keriso i auvai o le sami o Kalilaia ma valaau atu i faifaiva e toalua, o Peteru ma Anetere’a. “Ina mulimuli mai ia ia te au,” na Ia fetalai atu ai, “ou te faia oulua ma faifaiva i tagata” (Mataio 4:19; tagai foi i le Mareko 1:17

Ua valaauina foi oe e le Alii i Lana galuega, ma ua Ia valaaulia oe ina ia e mulimuli atu ia te Ia. “Pe faapefea la outou amio e tatau ai? Sa Ia fesili ai. E moni, ou te fai atu ia te outou, e pei lava o a’u nei” (3 Nifae 27:27).

O nisi mataupu o i totonu o le Talai La’u Talalelei o loo taulai atu i mea e tatau ona e faia i le avea ai ma se faifeautalai—o le auala e suesue ai, o le auala e aoao atu ai, ma le auala e faatutu ai sini. E pei lava ona taua e pei o le mea e te faia o le tagata ua avea ai oe ma le tagata o le a avea ai oe. O le taulaiga lena o lenei mataupu.

O loo faamatala mai e tusitusiga paia ia uiga faa-Keriso e taua mo oe ina ia sailia a o avea ai oe ma se faifeautalai faapea i lou olaga atoa. O se uiga faa-Keriso o se uiga auaumama po o se uiga o le natura ma uiga o le Faaola. O loo faamatala mai i lenei mataupu nisi o na uiga auaumama. Suesue i mau nei ma tusitusiga paia e o faatasi ma i latou. Vaavaai mo isi uiga faa-Keriso a o e suesue i isi mau.

Suesuega Faaletagata Lava Ia

Suesue le Mataupu Faavae ma Feagaiga 4. O a uiga auaumama ua faailoa mai e le Alii e taua mo faifeautalai? E faapefea e le sailia o nei uiga ona fesoasoani ia te oe e faataunuu ai lou faamoemoega faafaifeautalai?

“Saili Lenei Iesu”

Na apoapoai mai le perofeta o Moronae: “O lenei, ou te apoapoai atu ia te outou ia outou saili lenei Iesu o le ua tusi i ai le au perofeta ma aposetolo” (Eteru 12:41). O se tasi o auala taua e saili ai Iesu o le faia lea o se taumafaiga maelega e aoao e uiga ia te Ia ma avea atili e faapei o Ia. O lau misiona o se taimi lelei lea e taulai atu ai i lenei mea.

A o e taumafai ia avea atili e faapei o Keriso, o le a sili atu ona e ausia lou faamoemoega o se faifeautalai. O le a e lagonaina le olioli, filemu, ma le tuputupu a’e faaleagaga a o avea Ona uiga paia ma se vaega o lou tagata. O le a e faatuina foi se faavae mo le faaauau pea ona mulimuli ia te Ia i lou olaga atoa.

O Meaalofa mai le Atua

O uiga faa-Keriso o ni meaalofa mai le Atua. E faapei o mea lelei uma, o nei meaalofa e oo mai e ala ”i le alofa tunoa o le Atua le Tama, ma le Alii o Iesu Keriso, ma le Agaga Paia” (Eteru 12:41).

Taulai atu ia Keriso a o e saili e atiina a’e Ona uiga auaumama (tagai Mataupu Faavae ma Feagaiga 6:36). O nei uiga e le o ni aitema i luga o se lisi o mea e fai. E le o ni metotia e te atiina a’e i se polokalama o le faaleleia o oe lava ia. E le na o le naunautaiga patino e maua ai. Ae, e mafai ona e mauaina a o e taumafai e avea atili ma se soo tuuto o Iesu Keriso.

Tatalo mo le Atua e faamanuia oe i nei uiga auaumama. Faailoa atu ma le lotomaualalo ou vaivaiga ma lou manaomia o Lona mana i lou olaga. A o e faia, o le a Ia “faia mea vaivai ia avea ma mea malolosi ia te [oe]” (Eteru 12:27).

O Se Faagasologa Faifai malie

O le avea atili e faapei o le Faaola o se faagasologa faifai malie ma umi i le olaga atoa. Faatasi ai ma se manao e faafiafia le Atua, ia faaleleia le faaiuga e tasi i le taimi.

Ia onosai ia te oe lava. E silafia e le Atua o suiga ma le tuputupu a’e e umi se taimi e alu ai. E fiafia o Ia i ou manaoga faamaoni ma o le a faamanuiaina oe mo taumafaiga uma e te faia.

A o e saili ia avea atili e faapei o Keriso, o le a suia ou manaoga, mafaufauga, ma faatinoga. E ala i le Togiola a Iesu Keriso ma le mana o le Agaga Paia, o le a faamamaina ai lou lava natura (tagai Mosaea 3:19).

E faalautele ma faateleina e le Agaga Paia o tatou tomai. Na te “musuia le amio mama, lelei, agaalofa, alofa, agalelei, ma le alofa mama. E le gata i lea, o le su i ivi, o le fiafia i le loto, o le malamalama i mata, o pese i taliga, ma le ola i le tino atoa.” (Parley P. Pratt, Key to the Science of Theology [1855], 98–99).

Suesuega o Tusitusiga Paia

O a mea o loo ta’u mai e nei mau e uiga i le mulimuli i le faataitaiga a Iesu Keriso?

O le a se mea e mafai ona e aoao mai le mulimuli i mau nei e uiga i le sailia o uiga faa-Keriso?

Faatuatua ia Iesu Keriso

Mo le faatuatua e taitai atu ai i le faaolataga, e tatau ona e faatotonugalemuina ia Iesu Keriso (tagai Galuega 4:10–12; Mosaea 3:17; Moronae 7:24–26). Pe a e faatuatua ia Keriso, e te faalagolago ia te Ia o le Alo e Toatasi na Fanaua o le Atua. Ua e mautinoa a e salamo, o le a faamagaloina oe i au agasala e ala i Lana taulaga togiola ma faapaiaina e le Agaga Paia (tagai i le 3 Nifae 27:16, 20).

O le faatuatua e le o le mautinoa lea o mea. Ae, o se faamautinoaga mai le Agaga o mea e te le vaaia ae e moni. (Tagai i le Alema 32:21.)

E faatino lou faatuatua e ala i mea e fai. O nei faatinoga e aofia ai le mulimuli i aoaoga ma faataitaiga a le Faaola. E aofia ai le auauna atu i isi ma fesoasoani ia i latou e filifili e mulimuli ia Keriso. E te faailoa atu foi lou faatuatua e ala i le filiga, salamo, ma le alofa.

O le faatuatua o se mataupu faavae o le mana. A o e faatinoina le faatuatua ia Iesu Keriso, o le a faamanuiaina oe i Lona mana e talafeagai ma lou tulaga. E mafai ona e faia vavega e tusa ai ma le finagalo o le Alii. (Tagai Iakopo 4:4–7; Moronae 7:33; 10:7.)

O lou faatuatua ia Iesu Keriso e tuputupu a’e a o faateleina lou masani lelei ia te Ia ma Ana aoaoga. O le a faateleina pe a e suesue i tusitusiga paia, tatalo ma le faamaoni, ma usitai i poloaiga. O le masalosalo ma le agasala e faavaivaia ai le faatuatua.

“O le faatuatua e le na o se lagona; o se faaiuga. Faatasi ai ma le tatalo, suesue, usiusitai, ma feagaiga, tatou te fausia ma faamalosia ai lo tatou faatuatua. O lo tatou talitonuga maumaututu o le Faaola ma Lana galuega i aso e gata ai e avea ma tioata mamana lea tatou te faamasinoina ai isi mea uma. Ma, a o tatou mauaina i tatou lava i le faigata o le olaga, … ua ia i tatou le malosi e uia ai le ala sao” (Neil L. Andersen, “E Moni, A ea? O lea O a Isi Mea E Taua?” Liahona, Me 2007, 121).

Suesuega o Tusitusiga Paia

O le a le faatuatua?

Alema 32:21
Eteru 12:6
Eperu 11:1; tagai footnote b
Taiala i Tusitusiga Paia, “Faatuatua”
Topical Guide,“Faatuatua”

E faapefea ona e maua le faatuatua, ae o le a se mea e mafai ona e faia e ala i le faatuatua?

O a faamanuiaga e oo mai e ala i le faatuatua?

Faamoemoe

O le faamoemoe e le na o le mafaufau ma le loto i ai. Nai lo lena, o se talitonuga tumau, e faavae i lou faatuatua ia Keriso, o le a faataunuu ai e le Atua Ana folafolaga ia te oe (tagai Moronae 7:42). O le faamoemoega “o mea lelei e oo mai” e ala ia Keriso (Eperu 9:11).

O lou punavai autu o le faamoemoe o Iesu Keriso. Na fesili le perofeta o Mamona “Ma o le a le mea tou te faamoemoe i ai?” Ona ia tali lea, “Tou te faamoemoe, e ala i le togiola a Keriso ma le mana o lona toetu, ia faatutu mai outou i le ola faavavau, ma o le pogai ona o lo outou faatuatua ia te ia e tusa ma le folafolaga” (Moronae 7:41; tagai fuaiupu 40–43).

A o e faatotonugalemuina lou faamoemoe ia Keriso, ua ia te oe le faamautinoaga o le a galulue faatasi mea uma mo lo outou lelei (tagai i le Mataupu Faavae ma Feagaiga 90:24). O lenei faamautinoaga e fesoasoani ia te oe e tumau ai i le faatuatua pe a e feagai ma tofotofoga. E mafai foi ona fesoasoani ia te oe e tuputupu a’e ai mai tofotofoga ma atiina a’e ai le maufetuunai ma le malosi faaleagaga. O le faamoemoe ia Keriso e maua ai se taula mo lou agaga (tagai Eteru 12:4).

O le faamoemoe e te maua ai le mautinoa o le a faalauteleina e le Atua au taumafaiga filiga, ma amiotonu (tagai Mataupu Faavae ma Feagaiga 123:17).

O se tasi auala e faateleina ai le faamoemoe o le salamo. O le faamamaina ma le faamagaloina e ala i le taulaga togiola a Iesu Keriso e tupuga mai ai ma toe faaolaola ai le faamoemoe (tagai Alema 22:16).

Na fautua mai Nifae, “Fetaomi atu i luma ma le tumau ia Keriso, ma se susulu atoatoa o le faamoemoe, ma le alofa i le Atua ma tagata uma” (2 Nifae 31:20). A o e ola i le talalelei, o le a e tuputupu a’e i lou gafatia e “faateleina le faamoemoe” (Roma 15:13).

“I taimi o mafatiaga, e mafai ona tatou pipiimau i le faamoemoe o le a ’galulue faatasi mea uma mo [lo tatou] lelei’ pe a tatou mulimuli i fautuaga a perofeta a le Atua. O lenei ituaiga o faamoemoe i le Atua, Lona agalelei, ma Lona mana e faamalosia ai i tatou i le lototele i taimi o luitau faigata ma maua ai le malosi ia i latou o e lagonaina le faamata’uina e ala i puipui o le fefe, masalosalo, ma le faanoanoa” (Dieter F. Uchtdorf, “O Le Mana e Le Iu o le Faamoemoe,” Liahona, Nov. 2008, 23).

Suesuega o Tusitusiga Paia

O le a le faamoemoe, ae o le a foi le mea o loo tatou faamoemoe i ai?

Alofa Mama ma le Alofa

Na fesili se tagata ia Iesu i se tasi taimi, “O lē fea poloaiga o i le tulafono ua sili?” Na tali Iesu: “E te alofa atu i le Alii lou Atua ma lou loto atoa, ma lou agaga atoa, ma lou manatu atoa. O le poloaiga muamua lena ma le sili. E faapena foi lona lua, E te alofa atu i le lua te tuaoi, ia pei o oe lava ia te oe” (Mataio 22:36–39).

O le alofa mama o le “alofa mama lea o Keriso” (Moronae 7:47). E aofia ai le alofa faavavau o le Atua mo Ana fanau uma.

Na aoao mai le perofeta o Mamona,“Tatalo atu i le Tamā ma le malosi atoa o le loto, ina ia faatumulia outou i lenei alofa” (Moronae 7:48). A o e tatalo ina ia faatumulia lou loto i le alofa mama, o le a e tofo i le alofa o le Atua. O le a faateleina lou alofa mo tagata, ma o le a e lagonaina se popolega faamaoni mo lo latou fiafia e faavavau. O le a e vaai atu ia i latou o ni fanau a le Atua faatasi ai ma se malosi tele e avea ai faapei o Ia, ma o le a e galue mo i latou.

A o e tatalo mo le meaalofa o le alofa mama, o le a faaitiitia lou naunau e mau i lagona le lelei e pei o le ita po o le lotoleaga. O le a tau le faamasinoina pe faitioina isi. O le a tele atu lou manao ia malamalama ia i latou ma o latou manatu. O le a sili atu lou onosai ma taumafai e fesoasoani i tagata pe a latou tautevateva pe lotovaivai. (Tagai Moronae 7:45.)

O le alofa mama, e pei o le faatuatua, e tau atu i le faatinoga. E te faamalosia a o e auauna atu i isi ma tuuina atu oe lava ia.

O le alofa mama e faatupuina ni suiga. Ua faaee mai e le Tama Faalelagi “i luga o i latou uma o e o soo moni o lona Alo, o Iesu Keriso; … a oo ina afio mai o ia o le a tatou faapei o ia, … ina ia mafai ona faamamaina i tatou e pei lava ona mama o ia” (Moronae 7:48).

Suesuega o Tusitusiga Paia

O le a le alofa mama?

Moronae 7:45–48
1 Korinito 13
Bible Dictionary, “Charity”

Na faapefea ona faaalia e Iesu Keriso le alofa mama?

O le a se mea ua e aoaoina e uiga i le alofa mama mai le mulimuli i mau nei?

Amio Atua

“Matou te talitonu i le … amiomama,” ua taua e le Mataupu Faavae o le Faatuatua (1:13). O le mamā o se mamanu o le mafaufau ma le amio e faavae i tulaga faatauaina e tatau ai. O le faamaoni a’ia’i i le Atua ma isi. O se vaega taua o le amioatua o le taumafai lea ia mama ma atoatoa faaleagaga ma faaletino.

O le amioatua e tupu mai i ou manatu ma manaoga loloto. “Ia tuu le amiomamā e teuteuina ai ou mafaufauga e lē aunoa,” na fetalai mai ai le Alii (Mataupu Faavae ma Feagaiga121:45). Taulai atu i mafaufauga amiotonu, ma faagaeetia. Tuu ese ni mafaufauga le mama mai lou mafaufau nai loo le nofo ai.

O o outou mafaufau e pei lava o se tulaga i se falefaafiafia. Afai e te faatagaina ni mafaufauga le lelei e tumau ai i le tulaga o lou mafaufau, o le a sili atu ona e agasala. Afai e te faatumuina ma le mataalia lou mafaufau i mea lelei, o le a sili atu ona e taliaina mea e mama ma aloese mai mea leaga. Ia atamai e uiga i mea e te faatagaina e ulu atu i ai ma tumau ai i le tulaga o lou mafaufau.

Ao e tummafai e ola mama, ona “ [o le a] solo malosi ai lea o lou lototele i luma o le Atua; ma … ma o le a avea le Agaga Paia ma au soa e lē aunoa” (Mataupu Faavae ma Feagaiga 121:45–46).

Suesuega o Tusitusiga Paia

O le a le uiga o le amioatua?

Mataupu Faavae ma Feagaiga 25:2; 46:33; 121:45–46
2 Peteru 1:3–8
Taiala i Tusitusiga Paia, “Amioatua”
Taiala mo Autu: “Mama, Amiomama”

Amiosa’o

E tafe mai le amiosa’o mai le poloaiga muamua ma le sili ia alofa i le Atua (tagai Mataio 22:37). Ona e te alofa i le Atua, ua e faamaoni ia te Ia i taimi uma. E pei o atalii o Helamana, e te “savali sa’o i ona luma” (Alema 53:21).

Pe a ia te oe le amiosa’o, ua e malamalama e i ai le sa’o ma le sese ma o loo i ai le upumoni a’ia’i—o le upumoni a le Atua. E te faaaogaina lou faitalia e filifili ai e tusa ai ma le upumoni a le Atua, ma e vave ona e salamo pe a e le faia. O le mea e te filifili e mafaufau i ai—ma mea e te faia pe a e talitonu e leai se tasi o vaavaai mai—o se fuataga malosi o lou amiosa’o.

Tanielu i le Lua o Leona, saunia e Clark Kelley Price.

O le amiosa’o o lona uiga e te le tuuina i lalo ou tulaga faatonuina po o amioga ina ia mafai ona e faafiafia pe taliaina e isi. E te faia le mea sao e tusa lava pe faatauemu isi i lou manao ia faamaoni i le Atua (tagai i le 1 Nifae 8:24–28). Ua e ola ma le mamalu i siosiomaga uma, e aofia ai le auala e te suitulaga ai ia te oe lava i luga o le initoneti.

Afai e ia te oe le amiosa’o, e te tausia au feagaiga ma le Atua faapea foi au tautinoga amiotonu i isi.

O le amiosa’o e aofia ai le faamaoni i le Atua, o oe lava, ou taitai, ma isi. E te le pepelo, gaoi, kopi, pe taufaasese. A e faia se mea sese, ua e taliaina le tiutetauave ma salamo nai lo le taumafai e tauamiotonuina pe fetuuna’ia.

A o e ola ma le amiosa’o, o le a e maua le filemu i le loto ma le faaaloalo o le tagata ia te ia lava. E talitonu le Alii ma isi ia te oe.

Suesuega o Tusitusiga Paia

Na faapefea ona faaalia e Iesu le amiosa’o e oo lava i Ona taimi sili ona vaivai?

Mataio 4:1–11

Na faapefea ona faaalia e le autau talavou i le autau a Helamana le amiosa’o?

Alema 53:19–21

Na faapefea ona faaalia e Tanielu le amiosa’o? Na faapefea ona faamanuiaina Tanielu e le Atua mo lona amiosa’o?

Tanielu 6

Aisea na alofa ai le Alii i le uso o Iosefa Samita o Ailama?

Mataupu Faavae ma Feagaiga 124:15

Malamalama

Na poloai mai le Alii, “Ia saili i le aoao, e faapea foi i le suesue ma le faatuatua” (Mataupu Faavae ma Feagaiga 88:118). I le taimi o lau misiona ma i lou olaga atoa, saili le malamalama, aemaise lava le malamalama faaleagaga.

Suesue i tusitusiga paia i aso uma, e faapea foi upu a perofeta soifua. O le suesue ma le tatalo, e maua ai fesoasoaniga mo au fesili patino, luitau, ma avanoa. Vaavaai mo fuaitau o mau e mafai ona e faaaogaina i le aoao atu ma i le taliina o fesili e uiga i le talalelei.

A o e suesue ma le filiga ma le agaga tatalo, o le a faamalamalamaina e le Agaga Paia lou mafaufau. O le a Ia aoao oe ma avatu ia te oe le malamalama. O le a Ia fesoasoani ia te oe e faaaoga aoaoga a tusitusiga paia ma perofeta o aso e gata ai i lou olaga. E pei o Nifae, e mafai ona e fai atu:

“Aua e fiafia lo’u agaga i tusi paia, ua mafaufau foi i ai lo’u loto. … Faauta, ua fiafia lo’u agaga i mea a le Atua, e mafaufau pea lo’u loto i mea ua ou vaaia ma faalogoina” (2 Nifae 4:15–16).

Suesuega o Tusitusiga Paia

E mafai faapefea e le malamalama ona fesoasoani ia te oe i le galuega a le Alii?

E mafai faapefea ona e maua le malamalama?

2 Nifae 32:3–5
Moronae 10:5
Mataupu Faavae ma Feagaiga 42:61; 76:5–10; 88:118
Bible Dictionary: “Knowledge”
Topical Guide: “Knowledge”

Onosai

O le onosai o le gafatia lea e faalagolago ai i le Atua a o e feagai ma le faatuai, tetee, po o puapuaga. E ala i lou faatuatua, ua e faatuatuaina ai le taimi a le Atua mo Ana faamanuiaga folafolaina ina ia faataunuuina.

Pe a e onosai, e te vaai atu i le olaga mai se vaaiga e faavavau. E te le o faamoemoeina ni faamanuiaga po o ni taunuuga vave. O ou manaoga amiotonu o le a masani lava ona iloa i “lea fuaitau i luga o lea fuaitau, … o sina mea itiiti i i ma sina mea itiiti i o” (2 Nifae 28:30). O nisi manaoga amiotonu atonu e le mafai ona iloaina seia mavae lenei olaga.

O le onosai e le o le paie po o le faamavae. O le “faia ma le fiafia [o] mea uma ua i ai i lo outou mana” a o e auauna atu i le Atua (Mataupu Faavae ma Feagaiga123:17). E te totoina, fui, ma faafailele le fatu, ma e tuuina mai e le Atua le faatelega “i lea taimi ma lea taimi” (Alema 32:42; tagai foi 1 Korinito 3:6–8). Tou te galulue faapaaga ma le Atua, ma faatuatuaina a e faia lau vaega, o le a Ia faataunuuina Lana galuega i Lana taimi ma e tusa ai ma le faitalia a le tagata lava ia.

O le onosai foi o lona uiga afai e le mafai ona suia se mea, e te taliaina ma le lototele, alofa tunoa, ma le faatuatua.

Atiina a’e le onosai i isi, e aofia ai lau soa ma i latou e te auauna atu i ai. Ia e onosai ia te oe lava ma isi. Taumafai mo le mea sili i totonu ia te oe lava a o e iloaina o le a e tuputupu a’e i lea laasaga ma lea laasaga.

E pei foi o isi uiga faa-Keriso, o le tuputupu a’e i le onosai o se faagasologa i le olaga atoa. O le faaaogaina o le onosai e mafai ona i ai se faatosinaga faamalolo i lou agaga ma i latou o siomia oe.

“O le onosai o lona uiga o le faatalitali ma le tumau. O lona uiga o le tumau i se mea ma fai mea uma tatou te mafaia—galue, faamoemoe, ma le faaaoga o le faatuatua; onosai o faafitauli ma le malosi, e tusa lava pe ua tolopo manaoga o o tatou loto. O le onosai e le na o le tumau, ae o le tumau lelei ai!” (Dieter F. Uchtdorf, “Faaauau i le Onosai,” Liahona, Me 2010, 57).

Suesuega Faaletagata Lava Ia

Suesue le Mosaea 28:1–9.

O a manao o atalii o Mosaea?
O le a le fautuaga a le Alii i na faifeautalai? (Tagai i le Alema 17:10–11; 26:27.)
O a nisi o taunuuga o lo latou onosai ma le filiga? (Tagai i le Alema 26.)

Tusi au tali i totonu o lau tusi talaaga o suesuega.

Suesuega o Tusitusiga Paia

Aisea e taua ai le onosai? E faapefea ona fesootai le onosai ma le faatuatua?

Mosaea 24:9–16
Alema 31:31; 32:41–43; 34:40–41
Roma 5:3–5; 8:24–25
2 Korinito 6:1–10
Iakopo 5:10–11
Topical Guide: “Patience, Patient, Patiently”

Lotomaualalo

O le lotomaualalo o le naunau lea e gauai atu i le finagalo o le Alii. O le naunau e avatu ia te Ia le mamalu mo mea ua ausia. O le mafai ona aoaoina (tagai Mataupu Faavae ma Feagaiga 136:32). O le lotomaualalo e aofia ai le loto faafetai mo faamanuiaga a le Atua ma le faailoa atu o lou manaomia pea o Lana fesoasoaniga. E fesoasoani o Ia ia i latou o e lotomaualalo.

O le lotomaualalo o se faailoga o le malosiaga faaleagaga, ae le o se vaivaiga. O le lotomaualalo o se malosiaga taua lea mo le tuputupu ae faaleagaga (tagai Eteru 12:27).

Afai e te faalagolago ma le lotomaualalo i le Alii, e mafai ona e mautinoa o Ana poloaiga e mo lou lelei. E te mautinoa e mafai ona e faia soo se mea e moomia mai e le Alii ia te oe, pe afai e te faalagolago ia te Ia. E te naunau foi e faalagolago i Ana auauna filifilia ma mulimuli ia latou fautuaga. O le lotomaualalo o le a fesoasoani ia te oe ia usiusitai, galue malosi, ma auauna atu.

O le faafeagai o le lotomaulalo o le faamaualuga. O le faamaualuga o lona uiga o le faalagolago lea o le tagata ia te ia lava, ae lē o le Atua. O le isi foi ona uiga o le faamuamua lea o mea a le lalolagi e sili atu nai lo mea a le Atua. O le faamaualuga e faatautavā; o i latou o e faamaualuluga e saili ina ia tele atu a latou mea ma ua manatu faapea e sili atu i latou nai lo isi. O le faamaualuga o se maa tu’ia tele.

Suesuega o Tusitusiga Paia

O le a le uiga ia lotomaualalo?

O a faamanuiaga e te maua pe a e lotomaulalo oe lava ia?

E mafai faapefea ona e iloaina lou lava faamaualuga?

Filigā

O le maelega o se taumafaiga faifai pea, ma le faamaoni. I le galuega faafaifeautalai, o le maelega o se faailoaga lea o lou alofa mo le Alii. Pe a e filiga, e te maua le olioli ma le faamalieina i le galuega a le Alii (tagai Alema 26:16).

O le filiga e aofia ai le faia o le tele o mea lelei i lou lava loto malie nai lo le faatalitali mo taitai e ta’u atu ia te oe le mea e fai (tagai Mataupu Faavae ma Feagaiga 58:27–29).

Faaauau pea ona faia mea lelei e tusa lava pe faigata pe ua e lelava. Ae ia iloa le manaomia o le paleni ma le malologa ina ia e le “momoe televave atu nai lo le malosi [ua ia te oe]” (Mosaea 4:27).

Faaogatotonu lou loto ma mea e fiafia i ai i le Alii ma Lana galuega. Aloese mai mea e faalavelave ia te oe mai mea e te faamuamua. Taulai atu lou taimi ma taumafaiga i gaoioiga o le a sili ona aoga i la outou eria ma sili ona fesoasoani i tagata o loo e aoaoina.

“O le Ekalesia lenei a le Alii. Na Ia valaauina i tatou ma faatuatuaina i tatou e ui lava i o tatou vaivaiga sa Ia silafia. Sa Ia silafia tofotofoga o le a tatou feagai. O le auauna atu ma le faamaoni ma e ala i Lana Togiola, o le a tatou aoao ai e manana’o i mea e finagalo ai o Ia ma avea ma ē e tatau ona avea ai i tatou ina ia faamanuia ai i latou o loo tatou auauna atu i ai mo Ia. Pe a tele taimi tatou te auauna atu ai ia te Ia ma le maelega, o le a suia i tatou. E mafai ona tatou avea atili e faapei o Ia” (Henry B. Eyring, “Galue i le Maelega Atoatoa,” Liahona, Me 2010, 62–63).

Suesuega o Tusitusiga Paia

O le a le uiga o le maelega?

Moronae 9:6
Mataupu Faavae ma Feagaiga 10:4; 107:99–100
Topical Guide: “Diligence, Diligent, Diligently”

Aisea ua finagalo ai le Alii ia te oe ia e maelega?

E fesootai faapefea le maelega ma le saolotoga e filifili ai?

Mataupu Faavae ma Feagaiga 58:26–29

Usiusitai

O lau auaunaga o se faifeautalai o se faaopoopoga o feagaiga na e osia ma le Atua i le papatisoga ma i totonu o le malumalu. Ina ua e mauaina sauniga o le papatisoga ma le faaeega paia, sa e osifeagaiga o le a e tausia Ana poloaiga.

Na aoao mai le Tupu o Peniamina, “Ou te manao ia outou manatunatu i le tulaga manuia ma le fiafia o i latou o e e tausi i poloaiga a le Atua. Aua faauta, e faamanuiaina i latou i mea uma, i mea uma faaletino ma faaleagaga; ma afai latou te tutumau i le faamaoni e oo i le iuga, e talia i latou i le lagi, ina ia mafai ona latou mau faatasi ma le Atua i se tulaga o le fiafia e lē gata” (Mosaea 2:41).

O le usiusitai i poloaiga o se faailoaga lea o le alofa mo le Tama Faalelagi ma Iesu Keriso (tagai Ioane 14:15). Sa fetalai Iesu, “Afai tou te tausia a’u poloaiga, ona tumau lea o outou i lo’u alofa; pei ona ou tausia poloaiga a lo’u Tama, ma ou tumau i lona alofa” (Ioane 15:10).

Mulimuli i taiala i le Tulaga Faatonuina Faafaifeautalai mo So’o o Iesu Keriso. Ia mulimuli foi i le fautuaga a lou peresitene o le misiona ma lona faletua a o latou fautuaina oe i le amiotonu.

“O le usiusitai o la tatou filifiliga. Na faamanino mai e le Faaola lenei mea. E pei ona ta’ua i le Faaliliuga a Iosefa Samita o le Luka 14:28, na faatonuina e Iesu, ’O le mea lea, ia faamautu lenei mea i o outou loto, ina ia outou faia mea o le a ou aoao atu, ma poloaiina ai outou.’ E faigofie lava. … A tatou faia lea mea, o le a matua faaleleia atili lo tatou mausali faaleagaga. O le a tatou aloese mai le fesuisuiaia o punaoa ua tuuina mai e le Atua ma faia ni auala ’alo le aoga ma faataumaoi i o tatou olaga” (Dale G. Renlund, “Constructing Spiritual Stability” [Brigham Young University devotional, Sept. 16, 2014], 2, speeches.byu.edu).

Suesuega o Tusitusiga Paia

O le a se mea ua e aoaoina e uiga i le usiusitai mai mau nei?

O Se Mamanu mo le Avea Atili e Faapei o Keriso

O le mamanu lenei e mafai ona fesoasoani ia te oe e atiina a’e ai ma maua uiga o loo faamatalaina i lenei mataupu ma isi uiga o loo faamatala mai i tusitusiga paia:

Ia iloa le uiga e te manao e sailia.
Tusi se faauigaga o le uiga.
Lisi ma suesue fuaitau o mau o loo faaalia ai faataitaiga o le uiga auaumamā po o loo aoao mai e uiga i ai.
Tusi i lalo ou lagona ma uuna’iga.
Faatutu ni sini ma fai ni fuafuaga e alualu ai i luma i le uiga.
Tatalo mo le Atua e fesoasoani ia te oe e atiina a’e ma maua le uiga.
Iloilo e lē aunoa lou alualu i luma.

“E faamanuiaina e le Alii i latou e mananao ina ia lelei atili, o e taliaina le manaomia o poloaiga, ma taumafai e tausi i ai, o e faatauaina uiga paia Faa-Keriso ma tauivi i lo latou atamai sili e maua ai. Afai e te tautevateva i lena taumafaiga, e faapena foi tagata uma; o loo i ai le Faaola iina e fesoasoani ia te oe ia faaauau pea. … E le o toe mamao ona lava lea o lou manuia o loo e sailia” (Jeffrey R. Holland, “O a Taeao e Faia ai e le Alii o Vavega i o Outou Luma,” Liahona, Me 2016, 126).

Suesuega Faaletagata Lava Ia

Vaai ia iloa se uiga mai le mataupu lenei pe mai tusitusiga paia. Mulimuli i le mamanu lea faatoa faamatala atu ia malamalama ai ma saili le uiga.

Vaai i lau pine faifeautalai. E faapefea ona ese mai i pine e faamau e tagata faigaluega o se kamupani? Ia mātau o vaega e lua e sili ona taua, o lou igoa ma le suafa o le Faaola.

E mafai faapefea ona e mautinoa o loo fai oe ma sui o le Faaola i le avea ai ma se tasi o Ona soo?
Aisea e taua ai i tagata ona faafesootai lou igoa ma le suafa o le Faaola i se auala lelei?

Tusi ou manatu i totonu o lau api faamaumau mo suesuega.

Suesuega o Tusitusiga Paia

Toe iloilo uiga o loo lisi atu i mau nei. Ia famaumau soo se uunaiga i totonu o lau tusi talaaga o suesuega.

Manatu mo le Suesue ma le Faaaogaina

Suesuega Faaletagata Lava Ia

Ia faatumu faavaitaimi le “Gaoioiga o Uiga” o loo i le faaiuga o lenei mataupu.
Faailoa mai se uiga o loo i totonu o lenei mataupu. Ia fesili ifo ia te oe lava:
- E mafai faapefea ona ou aoao atili e uiga i lenei uiga?
- E faapefea e le sailia o lenei uiga ona fesoasoani ia te a’u e avea ai ma se faifeau sili atu o le talalelei a Iesu Keriso?
Saili ia faataitaiga o uiga faa-Keriso i olaga o alii ma tamaitai i totonu o tusitusiga paia. Ia tusi i lalo ou lagona i totonu o lau tusi talaaga o suesuega.
Saili ni faataitaiga o uiga faa-Keriso i musika paia a le Ekalesia. A o e sailia se uiga, tauloto upu o viiga po o pese e maua ai le malosi ma le mana. Toe fai pe usu upu ia te oe lava mo musumusuga ma valaaulia le uunaiga a le Agaga.

suesuega faalesoa ma le felafolafoaiga faalesoa

Suesue i mau faasino i uiga faa-Keriso i le Gospel Library po o isi punaoa ua faamaonia. Talanoaina pe faapefea ona faaaoga mea ua e aoaoina. E mafai foi ona outou talanoaina mea ua outou aoaoina i au taumafaiga patino ia avea e faapei o Keriso.

Aufono a le Itu, Konafesi Faalesone, ma le Aufono a Taitai o le Misiona

I ni nai aso a o lumanai le fono po o le konafesi, fai atu i faifeautalai taitasi e saunia se lauga e lima minute e uiga i se uiga faa-Keriso. Faaavanoa se taimi o le fonotaga mo ni nai faifeautalai e fetufaai mai ai a latou tautalaga.
Vaevae faifeautalai i ni vaega se fa ma tuu atu i ai tofiga nei:

Vaega 1: Faitau le 1 Nifae 17:7–16 ma tali fesili nei:
- Na faapefea ona faatino e Nifae lona faatuatua?
- O le a le mea pei o se uiga faa-Keriso sa faia e Nifae?
- O a folafolaga na faia e le Alii ia Nifae?
- E faapefea ona faatatau lenei tala i le galuega faafaifeautalai?
Vaega 2: Faitau le Mareko 5:24–34 ma tali fesili nei:
- Na faapefea ona faaalia e lenei fafine le faatuatua ia Iesu Keriso?
- Aisea na faamaloloina ai o ia?
- E mafai faapefea ona tatou mulimuli i lana faataitaiga i a tatou taumafaiga faafaifeautalai?
Vaega 3: Faitau le Iakopo 7:1–15 ma tali fesili nei:
- Aisea na matuai malosi ai le faatuatua o Iakopo e tetee atu ai i le osofa’iga a Serema?
- Na faapefea ona faatinoina e Iakopo le faatuatua ina ua la talanoa ma Serema?
- Na faapefea ona pei uiga o Iakopo o ni uiga faa-Keriso?
Vaega 4: Faitau le Talafaasolopito—Iosefa Samita 1:8–18 ma tali fesili nei:
- O a ni auala na faatinoina ai e Iosefa Samita le faatuatua ia Iesu Keriso?
- Na faapefea ona tofotofoina lona faatuatua?
- O le a le mea na ia faia sa faapei ai o Keriso?
- E mafai faapefea ona tatou mulimuli i le faataitaiga a losefa Samita?
A mae’a ia vaega, ona toe aumai faatasi lea o faifeautalai ma fai atu i ai e fetufaai mai mea na latou talanoaina.

Taitai Misiona ma Fesoasoani o le Misiona

Faatonu faifeautalai e faitau se tasi o Evagelia e fa o loo i totonu o le Feagaiga Fou po o le 3 Nifae 11–28. Ia latou vaseina mea na faia e le Faaola lea foi e mafai ona latou faia.
Ia faaaoga le faatutuina ma le fuafuaina o sini e aoao ai faifeautalai e uiga i le maelega. Ia faaali atu le auala e avea ai le maelega e taulai atu i tagata, ma se faailoga o le alofa.
I le taimi o faatalanoaga po o talanoaga, fai atu i faifeautalai e talanoa e uiga i se uiga faa-Keriso o loo latou sailia.

Gaoioiga o Uiga

O le faamoemoega o lenei gaoioiga o le fesoasoani lea ia te oe ia iloa avanoa mo le tuputupu a’e faaleagaga. Faitau ia vaega taitasi o loo i lalo. Fuafua po o le a le moni o lena faamatalaga ia te oe, ona filifili lea o le tali sili ona talafeagai. Tusi lau tali i totonu o lau tusi talaaga o suesuega.

E leai se tasi e mafai ona tali atu “taimi uma” i faamatalaga uma. O le tuputupu a’e faaleagaga o se faagasologa i le olaga atoa. O se tasi lena o mafuaaga e manaia ma tauia ai—aua e anoanoai avanoa e tuputupu a’e ai ma maua faamanuiaga o le tuputupu a’e.

Ia toafimalie i le amata i le mea o e i ai. Tautino atu oe lava i le faia o le galuega faaleagaga e manaomia ona tuputupu a’e. Saili le fesoasoani a le Atua. Pe a i ai ni ou faafitauli, ia i ai le talitonuga o le a Ia fesoasoani ia te oe. A o e tatalo, saili le taitaiga e uiga i uiga auaumamā e taulai i ai i taimi eseese i le taimi o lau misiona.

Faailoga o Tali

1 = le’i faia lava
2 = fai i nisi taimi
3 = fai soo
4 = toetoe o taimi uma e fai ai
5 = fai i taimi uma

Faatuatua

Ou te talitonu ia Iesu Keriso ma talia o Ia o lo’u Faaola. (2 Nifae 25:29)
Ou te lagona le mautinoa e alofa le Atua ia te a’u. (1 Nifae 11:17)
Ua lava lou faatuatua i le Faaola e talia ai Lona finagalo ma faia mea e poloai mai ai o Ia. (1 Nifae 3:7)
Ou te talitonu e ala i le Togiola a Iesu Keriso ma le mana o le Agaga Paia, e mafai ai ona faamagaloina a’u agasala ma faapaiaina pe a ou salamo. (Enosa 1:2–8)
“Ou te faatuatua e faafofoga ma tali mai le Atua i au tatalo. (Mosaea 27:14)
Ou te mafaufau e uiga i le Faaola i le gasologa o le aso ma manatua mea na Ia faia mo a’u. (Mataupu Faavae ma Feagaiga 20:77–79)
Ou te faatuatua o le a faataunuuina e le Atua mea lelei i lo’u olaga ma olaga o isi a o tatou tuuto atu i tatou lava ia te Ia ma Lona Alo. (Eteru 12:12)
Ua ou iloa e ala i le mana o le Agaga Paia e moni le Tusi a Mamona. (Moronae 10:3–5)
E i ai lo’u faatuatua e faataunuu mea e finagalo Keriso ou te faia. (Moronae 7:33)

Faamoemoe

O se tasi o o’u faanaunauga sili o le maua lea o le ola e faavavau i le malo selesitila. (Moronae 7:41)
Ua ou mautinoa o le a ou maua se misiona fiafia ma le faamanuiaina. (Mataupu Faavae ma Feagaiga 31:3–5)
Ou te lagona le toafilemu ma le talitonu o le a lelei mea uma o le lumanai. (Mataupu Faavae ma Feagaiga 59:23)
Ou te talitonu e i ai se aso o le a ou nofo ai faatasi ma le Atua ma avea faapei o Ia. (Eteru 12:4)

Alofa Mama ma le Alofa

Ou te lagona se naunau faamaoni mo le soifua manuia e faavavau ma le fiafia o isi tagata. (Mosaea 28:3)
Pe a ou tatalo, ou te ole atu mo le alofa mama—o le alofa mama o Keriso. (Moronae 7:47–48)
Ou te taumafai ia malamalama i lagona o isi ma iloa o latou manatu. (Iuta 1:22)
Ou te faamagalo atu i isi o e na faatiga pe na sese mai ia te a’u. (Efeso 4:32)
Ou te aapa atu ma le alofa e fesoasoani ia i latou o e tuuatoatasi, tauivi, pe lotovaivai. (Mosaea 18:9)
Pe a talafeagai ai, ou te faailoa atu lo’u alofa ma le tausiga o isi e ala i le auauna atu ia i latou e ala i upu ma galuega. (Luka 7:12–15)
Ou te vaavaai mo avanoa e auauna atu ai i isi. (Mosaea 2:17)
Ou te fai atu ni faamatalaga lelei e uiga i isi. (Mataupu Faavae ma Feagaiga 42:27)
Ou te agalelei ma onosai mo isi, e tusa lava pe faigata ona mafuta ma i latou. (Moronae 7:45)
Ou te maua le olioli i mea ua ausia e isi. (Alema 17:2–4)

Amio Atua

Ou te mama ma loto mama. (Salamo 24:3–4)
Ou te manao ia faia mea lelei. (Mosaea 5:2)
Ou te taulai atu i mafaufauga amiotonu, ma faagaeetia ae aveese mai mafaufauga le amiotonu mai lo’u mafauafau. (Mataupu Faavae ma Feagaiga 121:45)
Ou te salamo i au agasala ma taumafai e faatoilalo o’u vaivaiga. (Mataupu Faavae ma Feagaiga 49:26–28; Eteru 12:27)
Ou te lagonaina le mafutaga a le Agaga Paia i lo’u olaga. (Mataupu Faavae ma Feagaiga 11:12–13)

Amiosa’o

Ou te faamaoni i le Atua i taimi uma. (Mosaea 18:9)
Ou te le tuuina i lalo o’u tulaga faatonuina po o amioga ina ia mafai ona ou faafiafia pe taliaina e isi. (1 Nifae 8:24–28)
Ou te faamaoni i le Atua, a’u lava ia, o’u taitai, ma isi. (Mataupu Faavae ma Feagaiga 51:9)
Ou te ola faalagolago. (Alema 53:20)

Malamalama

Ou te lagonaina le mautinoa i lou malamalama i aoaoga ma mataupu faavae o le talalelei. (Alema 17:2–3)
Ou te suesue i tusitusiga paia i aso uma. (2 Timoteo 3:16–17)
Ou te saili ia malamalama i le upumoni ma su’e tali i au fesili. (Mataupu Faavae ma Feagaiga 6:7)
Ou te saili le malamalama ma le taitaiga e ala i le Agaga. (1 Nifae 4:6)
Ou te faatauaina aoaoga ma mataupu faavae o le talalelei. (2 Nifae 4:15)

Onosai

Ou te faatalitali ma le onosai mo faamanuiaga ma folafolaga a le Alii ina ia faataunuu. (2 Nifae 10:17)
E mafai ona ou faatali mo ni mea e aunoa ma le oso o le ita po o le le fiafia. (Roma 8:25)
Ou te onosai i luitau o le avea ma se faifeautalai. (Alema 17:11)
Ou te onosai i isi. (Roma 15:1)
Ou te onosai ia te a’u lava ia ma faalagolago i le Alii a o o’u galue e faatoilalo o’u vaivaiga. (Eteru 12:27)
Ou te feagai ma faigata i le onosai ma le faatuatua. (Alema 34:40–41)

Lotomaualalo

Ou te agamalu ma loto maualalo. (Mataio 11:29)
Ou te faalagolago i le Atua mo le fesoasoani. (Alema 26:12)
Ou te faafetai mo faamanuiaga ua ou maua mai le Atua. (Alema 7:23)
O au tatalo e faamaoni ma mai le loto. (Enosa 1:4)
Ou te talisapaia ia faatonuga mai o’u taitai po o faiaoga. (2 Nifae 9:28–29)
Ou te taumafai ia gaua’i atu i le finagalo o le Atua. (Mosaea 24:15)

Filigā

Ou te galue ma le mataalia, e tusa lava pe le o vaavaaia ma le toto’a au. (Mataupu Faavae ma Feagaiga 58:26–27)
E taulai atu a’u taumafaiga i mea e aupito sili ona taua. (Mataio 23:23)
E faalua ona fai a’u lava tatalo i le aso. (Alema 34:17–27)
Ou te taulai atu o’u manatu i lo’u valaauga o se faifeautalai. (Mataupu Faavae ma Feagaiga 4:2, 5)
Ou te faatutuina ni sini ma fuafua e lē aunoa. (Mataupu Faavae ma Feagaiga 88:119)
Ou te galue malosi seia mae’a le galuega. (Mataupu Faavae ma Feagaiga 10:4)
Ou te maua le olioli ma le faamalieina i la’u galuega. (Alema 36:24–25)

Usiusitai

Afai ou te tatalo, ou te ole atu mo le malosi e tetee ai faaosoosoga ma fai le mea tonu. (3 Nifae 18:15)
Ou te agavaa mo se pepa faataga o le malumalu. (Mataupu Faavae ma Feagaiga 97:8)
Ou te usitai ma le naunautai i tulafono a le misiona ma mulimuli i fautuaga a o’u taitai. (Eperu 13:17)
Ou te taumafai ia ola e tusa ai ma tulafono ma mataupu faavae o le talalelei. (Mataupu Faavae ma Feagaiga 41:5)